Inuussutissarsiutitigut ilinniartitaaneq, ilinniagaqarnermut tapiissutit inuussutissarsiutinullu tunngasunik siunnersuineq pillugit Inatsisartut peqqussutaanni nr. 16-imi 28. oktober 1993-imeersumi § 1-imi imm. 2 naapertorlugu aalaj angersarneqarput:

 

Kapitali 1.
Siunertaa sivisussusialu.

§ 1. Pitsaassutsimut teknikerinngorniartunik ilinniartitsinikkut siunertarineqarpoq ilinniartut aalisakkanik suliffissuit tappiorannartuleriffiini, inuussutissalerivinni suliffinnilu tamakkununnga assingusuni sulinissamut pikkorissartinneqarnissaat.
Imm. 2. Ilinniartitsinerup siunertaraattaaq ilinniartup peqqinnissamut tunngasunik, uumaatsunik uumassusilinnillu misissugassanik tigusinermut, laboratoriami sulinermik naammassinninnissamut aamma misissuinikkut paasisat suliarinerannut nalilerneqartarnerannullu tunngaviusumik paasinnitsinnissaa piginnaaneqalersinnissaalu, laboratoriap aaqqissuussaaneranut siulersuisinnaanissaa laboratoriamilu sulinermik aaqqissuussisinnaanissaa, sulisunik immikkut suliamut ilinniagaqarsimanngitsunik pikkorissartitsisarnissaa aammalu inuussutissanik avatangiisinillu nakkutilliinermik siulersuisinnaanissaa.

§ 2. Ilinniartitaaneq ukiunik marlunnik sivisussuseqassaaq, ataqatigiiginnarnik sisamanik semestereqarluni.

 

Kapitali 2.
Ilinniartunngornissamut piumasaqaatit.

§ 3. Ilinniartunngorsinnaasut ukuupput:
1) aalisakkerisutut/fiskeindustriassistentitut ilinniarsimasut
2) inuussutissalerinermik suliffissuarmi taassumunngaluunniit assingusumik tunngaviusumik ilinniarsimasut imaluunniit
3) ilinniarnertuunngorniarfimmi ilinniarsimasut.
Imm. 2. Ilinniartunngorsinnaapputtaaq allatigut ilinniartitaanermik tunuliaqutaqartut, ilinniartitaanermut ataatsimiititaliap isumaa malillugu taanna pitsaassutsimik teknikeritut ilinniartitaanerup naammassinissaanut naapertuuttumik tunngavissaqalersitsippat.
Imm. 3. Qinnuteqartuttaaq kalaallisut qallunaatullu allattariarsornikkut oqaluinnarnikkullu paasinnissinnaallutillu paasisitsisinnaassapput ilinniarfiullu kisitsinermi piginnaassutsinut piumasaqaatai naammassisimassallugit.
Imm. 4. Ilinniarfik nalileereernikkut qinnuteqartunut sulinikkut misilittagaqanngitsunut ukioq ataaseq angullugu tamatumunnga naleqquttumik inuussutissarsiutigalugu misilittagaqarnissamik piumasaqaateqarsinnaavoq.

§ 4. Ilinniarfiup imaluunniit najukkami inuussutissarsiutitigut ilinniartitaanermut ataatsimiititaliap qinnuteqartup tiguneqarnissaa inassutigiguniuk tamatumunnga peqatigitillugu qinnuteqartup ilinniarneq piffissaliussami naammassisinnaallugu naleqquttuunera pillugu paasissutissatut oqaaseqaateqassaaq.

 

Kapitali 3.
Ilinniartitaanerup imai.

§ 5. Ilinniartitaanerup ukiuani siullermi (semesterit siullianni aappaannilu) lektionit 1440-t ilinniagassani ukunani ilinniartitsinermut atorneqassapput:

 

1)	aalisakkerineq	540 lektionit
2)	eqqiluisaarneq, akoorutissat atorlugit aamma uumasuaqqanik tappiorannartulerineq	280 lektionit
3)	aalisarneq aalisakkanillu ilisimatusarneq	160 lektionit
4)	matematikki naatsorsueqqissaarnerlu	140 lektionit
5)	sulinermik siulersuineq/aaqqissuineq	80 lektionit
6)	qarasaasialerineq	80 lektionit
7)	attaveqaqatigiinneq	80 lektionit
8)	timersorneq	80 lektionit

Imm. 2. Ilinniartitaanerup ukiuata aappaani (semesterit pingajuanni sisamaannilu) lektionit 1420-t ilinniagassani ukunani ilinniartitsinermut atorneqassapput:

1)	fysikki laboratorieteknikimik ilallugu.	120 lektionit
2)	akoorutissalerineq laboratorieteknikimik ilallugu	200 lektionit
3)	matematik aamma qarasaasialerineq	120 lektionit
4)	uumasuaqqanik tappiorannartulerineq aamma bioteknik	200 lektionit
5)	atortorisanik ilinniartitsineq	40 lektionit
6)	laboratoriami isumannaallisaaneq	30 lektionit
7)	ikiueqqaarneq/qatserineq	30 lektionit
8)	pitsaassutsinik aqutsineq	280 lektionit
9)	laboratoriami atortulersorluni sulineq	320 lektionit
10	timersorneq	80 lektionit

Imm. 3. Semesterit sisamaanni sapaatit akunnerini kingullerni arfinilinni ilinniartoq nammineerluni immikkut sammisaminik allaaserinnissaaq.

§ 6. Ilinniartoq immikkut sammisassaminik ilinniartitsisumit ilitsersorneqarluni nammineerluni itisiligassaminik toqqaassaaq.
Imm. 2. Immikkut sammisaq semesterit pingajuat naatinnagu toqqarneqassaaq ilinniartitsisumillu akuerineqassalluni.
Imm. 3. Immikkut sammisassaqartitsinikkut siunertarineqarpoq ilinniartup anguniagaqarluni suliassaq sulinermut tunngassuteqartoq siunissami suliassaminut attuumassuteqartoq nammineerluni allaaserisinnaassagaa tamatumuunalu angusarineqartut nalilersinnaassallugit.
Imm. 4. Immikkut sammisamut tunngasut § 5-imi imm. 2-mi ilinniagassanit taaneqartunit akuleriissinneqassapput qaqutigorluinnarli ilinniagassamut ataasiinnarmut killilerneqarsinnaallutik. Immikkulli sammisaq ilinniagassat uku arlaannut killilerneqarsinnaanngilaq:
matematik/qarasaasialerineq, atortorisanik ilinniartitsineq, laboratoriami isumannaallisaaneq, ikiueqqaarneq/qatserineq imaluunniit timersorneq.
Imm. 5. Piffissaq immikkut sammisaqarfiusoq ilinniartup nalunaarusiorneratigut naggaserneqassaaq.

§ 7. Ilinniagassanik ataasiakkaanik ilinniartitsinikkut siunertarineqarput:
1) Aalisakkerinermi, ilinniartup aalisakkat suliarineqanngitsut pitsaassusiannik asiujaassusiannillu aamma pissutsinik aalisakkap ajorsiartortarneranut sunniuteqartartunik paasinninnissaa. Taamatullu ilinniartup aalisakkanik nioqqutissiat piareersariikkat tunulequtaattut qerititerinermi teknikkip aamma aqerlortereriaatsimi periaatsit pingaaruteqartut eqqortumik atorneqartarnerisa pingaaruteqarnerannik paasinninnissaa, pilersaarusiorluni periaatsit, pissarsiat, inatsiseqartitsineq pitsaassutsinillu misissuineq ilanngullugit.
2) Eqqiluisaarnermi, akoorutissat atorlugit aamma uumasuaqqanik tappiorannartulerinermi, ilinniartup uumasuaqqanut tappiorannartunut akoorutissanullu tunngasunik paasisimaqqaagassanik ilisimasaqarluarneq aqqutigalugu inuussutissalerinermik suliaqartut eqqiluisaarnissamik maleruagassaannik paasinninnissaa siunertanullu naleqquttumik pissuseqalernissaa.
3) Aalisarneq aamma aalisakkanik ilisimatusarnermi, ilinniartup immami periaatsimut uumassusillit avatangiisaasalu sunniivigeqatigiinnerisigut pilersinneqartumut ilisimasaqalernissaa aanuna isumalluutinik pissarsiarineqarsinnaasunik sapinngisamik pitsaanerpaamik iluaquteqarnissamut paasinninnerulernissaa.
4) Matematikki aamma naatsorsueqqissaarnermi, ilinniartoq tunngaviusumik matematikkikkut paasinneriaatsinik, kisitsisilerinermik atortunillu sungiusarniarlugu, naatsorsueqqissaarnikkut kisitsisinik atortussanik paasinnissinnaalersillugu atuisinnaalersillugulu.
5) Sulinermik siulersuineq/aaqqissuinermilu, ilinniartoq inuit akornanni pissutsinik suleqatigiinnermut siulersuinermullu pingaaruteqartunik paasinnitsinniarlugu aamma suleqatiginneriaatsinut siulersueriaatsinullu piginnaanngorsarniarlugu sungiusarniarlugulu.
6) Qarasaasialerinermi, ilinniartoq qarasaasiat nalinginnaasumik atorneqartarnerannut paasitinniarlugu aammalu allannermut kisitsinermullu atortuinik atuinermut paasisaqalersinniarlugu.
7) Attaveqaqatigiinnermi, ilinniartoq ataatsimeeriaatsimik allattueriaatsimillu, najoqqutassarsiortarnermik, nalunaarusiornermik aamma kikkulluunniit oqartussaaqataaneranni periaatsinut malittarisassanik sungiusarniarlugu taamaalilluni piviusorsiortumik attaveqaqatigiinnermi piginnaaneqalersinniarlugu.
8) Timersornermi, ilinniartup timimi siunertamut naapertuuttumik qasulissutigisassarinngisaminillu atornissaa ilinniassammagu aammalu tamatigoortumik timimigut sungiusarnissamut paasinninniassammat suleqatiginnissinnaassuseqarlunilu.
9) Fysikkimi laboratorieteknikimik ilallugu, ilinniartoq fysikkimi pingaarnerusutigut anguniagaasunik aamma maleruagassanik laboratoriami atortulersuutit atorneqartut tunngavigisaannik tamatigoortumik paasinnitsissallugu, aamma sananeqaatit pissuserisartagaannut pingasunut tunngaviusumik maleruagassanik paasinnitsinniarlugu.
10) Akuutissalerinermi laboratorieteknikimik ilallugu, ilinniartoq akuutissat pissusilersortarnerannik, annertussutsit naatsorsorneqartarnerinik, pissusilersortarnernut skemanik aamma laboratoriami sulinermut ilisimasaqarnerulersinniarlugu.
11) Matematikkimi aamma qarasaasialerinermi, ilinniartoq laboratoriami sulisilluni matematikkilerinermi atortunik fysikkernermut, akuutissalerinermut uumasuaqqanik tappiorannartulerinermut atatillugu atorneqartartunik atuisinnaalersinniarlugu aamma paasisat suliarinerinut, paasissutissanik katersinermut, paasissutissaateqarfinnut titartakkanillu sulinermut kisitsissummik atuinissamut ilinniartinniarlugu.
12) Uumasuaqqanik tappiorannartulerinermi aamma bioteknikkimi, ilinniartoq uumasuaqqat tappiorannartut avissaartiternissaannut suunerinillu paasinninnissamut ilinniartinniarlugu aamma bioteknikimut tunngasunik suleriaatsinik ajornanngitsunik ilisarinnilersinniarlugu.
13) Atortorisanik ilinniartitsinermi, ilinniartoq atortorisat sananeqaataannik, pingaarnerusutigut tunngaviinik atuuffiinillu ilisimannilersinniarlugu.
14) Laboratoriami isumannaallisaanermi, ilinniartoq uumasuaqqanik tappiorannartunik akuutissallu sananeqaataannik sulinermik ilitsersuunniarlugu, naliliisarluni paasiniaanermut aamma eqqagassalerinermut atatillugu laboratoriami sulinermi ileqquliussat pitsaasut isumannaatsullu pingaaruteqassusiannik paasinnitsinniarlugu.
15) Ikiueqqaarneq/qatserinermilu, ilinniartoq laboratoriami suugaluartunilluunniit ajutoortoqartillugu isumannaatsumik sukkasuumillu periaaseqartarnissaanut sungiusarniarlugu.
16) Pitsaassutsinik aqutsinermi, ilinniartoq laboratoriami sulinikkut pitsaassutsinik pingaarnerusutigut aqutseriaatsinik sukumiisumik paasisimasaqalersinniarlugu aamma tamatumuuna tunisassiornermut, suleqataasunut misissuinermut aningaasaqarnermullu sunniutaasartunik aammalu ilinniartoq pitsaassutsinik aqutseriaatsinik nalinginnaasunik ilisimannilersinniarlugu.
17) Laboratoriami atortulersorluni sulinermi, ilinniartoq atuagarsornerup sulinerullu ataqatigiissinnissaannut periarfissinniarlugu aamma nalinginnaasumik naliliisarluni misissueriaatsinik aamma laboratoriami sulinermik sungiussisinniarlugu.

§ 8. Ilinniagassani tapertaasartuni pingaarutilinni atuarfik ilassutitut ilinniartitsinermik neqerooruteqarsinnaavoq.

§ 9. Ilinniartut ilinniartitsinermut najuuttussaatitaapput.
Imm. 2. Kultureqarnermut, Ilinniartitaanermut Ilisimatusarnermullu Pisortaqarfik najuuttussaatitaaneq pillugu maleruagassanik aalajangersaasinnaavoq.

 

Kapitali 4.
Naliliisarneq misilitsinnerillu.

§ 10. Ilinniarneq naallugu ilinniarfik ilinniartut ataasiakkaat ilinniartitsinikkut ilikkagaannik ingerlaavartumik naliliisassaaq ilinniagassanillu ilitsersuussinissamik neqerooruteqartassalluni.

§ 11. Semesterit aappaata naanerani ilinniagassani eqqiluisaarnermi, akoorutissalerinermi aamma uumasuaqqanik tappiorannartulerinermi aammalu aalisarnermi aamma aalisakkanik ilisimatusarnermi naliliissutissanik karakteeriliisoqassaaq.
Imm. 2. Kingusinnerpaamik semesterit sisamaata naanerani ilinniagassani matematikkimi/qarasaasialerinermi/naatsorsueqqissaarnermi, pitsaassutsinik aqutsineq aamma laboratoriami atortulersorluni sulinermi naliliissutissanik karakteeriliisoqassaaq.

§ 12. Semesterit aappaata kingornatigut ilinniagassami aalisakkerinermi soraarummeertitsisoqassaaq.

§ 13. Semesterit sisamaanni immikkut sammisamik allaaserinnittoqalersinnagu ilinniagassani uumasuaqqanik tappiorannartulerinermi/bioteknikimi aamma fysikkimi laboratoriateknikimik ilallugu/akoorutissalerminermi laboratoriateknikimik ilallugu soraarummeersitsisoqassaaq.

§ 14. §§ 12 aamma 13 malillugit soraarummeersitsinerit allattariarsornerusinnaapput oqaluttariarsornerusinnaallutillu.
Imm. 2. Soraarummeerutini tamani ataatsimut karakteeriliisoqassaaq.

§ 15. Semesterit sisamaata naanerani immikkut sammisaq ilinniartumit toqqarneqartoq ilinniartitsisumillu akuersissutigineqartoq oqaluttariarsornikkut soraarummeertitsissutigineqassaaq, § 6 takuuk.
Imm. 2. Soraarummeersitsinermut aallavigineqassaaq ilinniartumit nalunaarusiaq aamma sulinikkut angusarineqartut. Ataatsimut katillugit karakteeriliisoqassaaq.

§ 16. Pitsaassutsimut teknikeritut ilinniartitaanermi qaqisissaguni ilinniartoq imatut angusaqarsimassaaq
1) immikkut sammisami minnerpaamik karakteeri 6,
2) soraarummeernerni sisamani agguaqatigiissillugu minnerpaamik 6 aamma
3) naliliissutaasumik karakteerini agguaqatigiissillugu minnerpaamik 6.
Imm. 2. Soraarummeernerit ilinniagassami ilinniartitsisumit aamma nalileeqataasumit, censorimit, Kultureqarnermut, Ilinniartitaanermut Ilisimatusarnermullu Pisortaqarfimmit piginnaatinneqartumit, nalilerneqassapput.
Imm. 3. Naliliineq pillugu isumaqatigiinnginneqartillugu karakteerit taakku marluk agguaqatigiissinnerat, kisitsillu ilivitsuuppat, atorneqassaaq. Karakteerilersuinermi agguaqatigiissitsineq karakteerit marluk akunnerpiaanniippat, kisitsimmut ilivitsumut tullermut qaffanneqassaaq, tassa nalileeqataasoq qaffasinnerusumik karakteeriliisimappat, kisitsimmullu ilivitsumut qaninnermut appaasoqassalluni, nalileeqataasoq appasinnerusumik karakteeriliisimappat. Taamaattorli karakteerit "13" aamma "0" karakteeriliunneqassapput aatsaat ilinniartitsisup nalileeqataasullu tamanna isumaqatigiissutigippassuk.

§ 17. Ilinniartup soraarummeerneq naammassinngippagu angusinngitsoorfigippaguluunniit, ilinniartoq soraarummeerummut tassunga marloriarluni peqataasussanngorteqqinneqarsinnaavoq.
Imm. 2. Ilinniartitaanermut ataatsimiititaliap pissutsit immikkut illuinnartillugit imm. 1-imi aalajangersakkat saneqqussinnaavai.

§ 18. Ilinniartunut uppernarsarneqartumik napparsimanermik imaluunniit allamik akuerineqarsinnaasumik pissuteqartumik pilersaarutigineqartutut soraarummeernermut peqataasimanngitsunut napparsimasunut naatsorsuussamik soraarummeersitsisoqassaaq.
Imm. 2. Napparsimasunut soraarummeeqqittussanullu soraarummeersitsisoqassaaq kingusinnerpaamik pilersaarutigineqartutut soraarummeersitsinermut tullermut atatillugu.

 

Kapitali 5.
Ilinniarsimanermut uppernarsaat.

§ 19. Soraarummeernermi angusinerup kingornatigut ilinniarfik pitsaassutsimut teknikerimut ilinniarnermik naammassinninnermut uppernarsaasiissaaq. Uppernarsaammiissapput naliliiniarluni misiliisarnerni soraarummeernermilu karakteerit.
Imm. 2. Taamatuttaaq ilinniartup aalajaassusia, soqutiginninnera suleqatikkuminassusialu pillugit naatsumik oqaaseqaateqartoqassaaq.

 

Kapitali 6.
Aalajangersakkat assigiinngitsut.

§ 20. Aalisakkanik suliffissuaqarnermut tunngasunut ilinniartitaanermut ataatsimiititaliaq pitsaassutsimut teknikerissat ilinniartitaanerannut ilinniartitaanermut ataatsimiititaliaavoq.

§ 21. Nalunaarut una malillugu pissutsit suliamik ilinniarnermut tunngasut pillugit ilinniarfiup aalajangiinerinut naammagittaalliuutit aalajangiinerup tiguneqarneraniit sapaatit akunneri sisamat qaangiutsinnagit ilinniartitaanermut ataatsimiititaliamut suliassanngortinneqarsinnaapput.
Imm. 2. Nalunaarut una malillugu pissutsit suliamik ilinniarnermut tunngassuteqanngitsut pillugit ilinniarfiup aalajangiinerinut naammagittaalliuutit aalajangiinerup tiguneqarneraniit sapaatit akunneri sisamat qaangiutsinnagit Kultureqarnermut, Ilinniartitaanermut Ilisimatusarnermullu Pisortaqarfimmut suliassanngortinneqarsinnaapput.

§ 22. Ilinniartitaanerup misilinneqarneranut ineriartortinneqarneranulluunniit atatillugu ilinniartitaanermut ataatsimiititaliap inassuteqarneratigut Kultureqarnermut, Ilinniartitaanermut Ilisimatusarnermullu Pisortaqarfiup nalunaarut una saneqqunneqarallartissinnaavaa.

§ 23. Nalunaarut atuutilerpoq 1. april 1994 ukiumi ilinniartitsiviusumi 1993-1994-imi atuuttussanngorlugu.

Namminersornerullutik Oqartussat, ulloq 6. april 1994.

Marianne Jensen

/

Aqissiaq Møller