Avatangiisit innarlitsaaliorneqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allanngortinneqarsimasumi § 7, imm. 2 nr. 3, 5, 7 aamma 11, § 15 aamma § 46, imm. 2 tunngavigalugit makku aalajangersarneqarput:

 

Kapitali 1
Pineqartunut nassuiaatit.

§ 1. Anartarfiit imaattut imertullu errortuivikutut isigineqassapput anartarfinnit sunilluunniit imeq errortuivikoq.
Imm. 2. Kuuffittut akuerineqarsimasutut isigineqassaaq kuuffik pisortanit innuttaasunilluunniit sanaartornermi malittarisassat atuuttut malillugit sanatinneqarsimasoq, avatangiisillu pillugit inatsisit atuuttut malillugit kuuffiup aniaffiata inissinneqarsimanera akuerineqarsimasoq.
Imm. 3. Imermik errortuivikumik katersuvittut tankitut akuerineqarsimasutut isigineqassaaq tanki ussissoq qerisoorsinnaanngitsoq qanoq imaqartigineranut kalerrisaarutitaqarluniluunniit nalunaarsuutitalik, kiisalu sanaartornermi malittarisassanut avatangiisillu pillugit inatsisinut atuuttunut naapertuuttoq.
Imm. 4. Imermik errortuikumik eqqaanertut isigineqassaaq aaqqissuussinertut kommunalbestyrelsimit isumagineqartutut, anartarfii imaannut eqqaavimmut kuuffimmuulluunniit akuerineqartumut assartorneqartartoq.
Imm.5. Imertut kuuginnartutut isigineqassaaq imeq naqitsinikkut ruujoritigut qerinaveersakkatigut illumut pineqartumut ingerlatinneqartoq, taamaalilluni nalunaarummi aalajangersakkat isigalugit imermik atuinermut killilersuisuunngitsoq.
Imm. 6. Imiisivimmi tankimiittutut isigineqassaaq imeq imermik pilersuinermit akuerineqarsimasunit illup nammineq imiisivianut tankimut assartorneqartoq, tassanngaanniillu pisariaqartitaq naapertorlugu maqitinneqarsinnaasoq.

§ 2. Illuutilittut isigineqassaaq kinaluunniit nunaminertamik pisortanit tunineqarsimalluniluunniit atuisinnaatitaasoq. Tamanna nunaminertanut sanaartorfiusimanngitsunut aamma atuuppoq nunaminertaq arlaatigut annertunerusumik ingerlatsivigineqarpat.
Imm. 2. Illuutilittut aamma isigineqassapput suliffeqarfiit, peqatigiiffiit ingerlatanillu inuppassuit katersuuffigigallagaanni ataavartumilluunniit katersuuffigisartagaanni ingerlataqartut.

 

Kapitali 2
Anartarfiit.

§ 3. Illuni inissiani anartarfiit qassiussusissaat aaqqissuunneqarnerilu pillugit aalajangersakkat sanaartorneq pillugu inatsisini malittarisassatigut aalajangersarneqarsimapput.
Imm. 2. Allatigut inatsisiliorneq aqqutigalugu immikkut ittunik aalajangersaasoqarsimatinnagu namminersortut niuertarfiutaanni, allaffiini assigisaannilu kiisalu illuutini, inissiisarfinni allanilu inuppassuit katersuukkallartarfigisaanni katersuuttuartarfiiniluunniit anartarfiit qassiunissaat qanoq aaqqissuunneqarnissaat kommunalbestyrelsimit aalajangiivigineqartassapput.
Imm. 3. Peqqinnissap tungaanit isigalugu pisariaqartinneqarpat kommunalbestyrelsip illuutilik naalakkersinnaavaa malittarisassat maleruaqqusallu sukkulluunniit atuuttut malillugit anarfiit amerlassusii napertuuttunngorteqqullugit, imaluunniit taamatut maleruaqqusaliortoqarsimatinnagu kommunalbestyrelsip amerlassutsinut naapertuuttuusorisaanut aaqqeqqullugit.
Imm. 4. Qerisoorneq allaluunniit patsisigalugu illup anartarfii atorsinnaajunnaarsimappata illup piginnittaata anartarfiit allat kommunalbestyrelsimit akuerineqarsinnaasut pissarsiarissavai.
Imm. 5. Anartarfiit pisariaqartitat ikkussornerinut aningaasartuutit illuutillip akisussaaffigai aningaasartuutigisassaralugillu.

§ 4. Illu imermik kuuginnartumik imeqarpat kuuffimmillu akuerisaasumik kuuffeqarluni anartarfinnit nusuinnartakkanit kuuffigineqarsinnaasunik, taava kommunalbestyrelsip naalakkiutigisinnaavaa anartarfiit nutaat ikkussorneqartussat nusuinnartagaassasut.

§ 5. Anartarfiit nusuinnartakkat ikkussorneqarnernissaat kommunalbestyrelsip akuerisinnaavaa illu imissamaavimmik tankeqarpat akuerisaasumillu kuuffiligaalluni anartarfinnit nusuinnartakknit kuuffigineqarsinnaasumik.
Imm. 2. Anartarfiit nusuinnartakkat ikkussorneqarnissaat kommunalbestyrelsip aamma akuerisinnaavaa illu kuuginnartumik imeqarluniluunniit imissamaasivimmik tankeqarpat kiisalu imermut errortuivikumut katersuiviusumik akuerisaasumut kuuffilikkamik tankeqarpat, imermik errotuivikumik eqqaasarnermut akuerisaasumit imaarneqartartunuit.

§ 6. Anartarfiit nusuinnartakkat akuerineqarsinnaanngiffiini anartarfiit imaartakkat akuerineqarsimasut kommunalbestyrelsip malittarisassai malillugit ikkussuunneqassapput.
Imm. 2. Anartarfiit imaartakkat ulikkkaartoornerisa eqqiluisaarnissakkut pissutsit kusanaatsut kingunerippagit imaluunniit anartarfilerisut ajornartorsiortilerpatigit anartarfiit amerlanerusut ikkussorneqarnissaat kommunalbestyrelsip naalakkiutigissavaa.
Imm. 3. Anartarfiit imaartakkat annanut quumullu taamaallaat atorneqassapput. Qillertuusat, puiaasat igitassallu allat anartarfinnut taakkununnga eqqarneqartassanngillat.

 

Kapitali 3
Anartarfiit imaartakkat imaannik il.il. eqqaaneq.

§ 7. Imermut errortuivikumut katersuiviit tankit kiisalu anartarfiit imaartakkat imaasa eqqaavissaanik kommunalbestyrelsi innersuussissaaq. Eqqaavissatut innersuussutiginneqartoq atorneqassaaq.

§ 8. Illoqarfimmi nunaqarfinnilu anartarfiit imaartakkat imaannut eqqaaviliinissaq, kuuffiliinissaq imalluunniit anartarfiit imaaartakkat imaasa aamma erngup errortuivikup eqqaavissaanik allamik akuerisaasumik pilersitsinissaq kommunalbestyrelsip qulakkiissavaa.

§ 9. Eqqaanermik aaqqissuussinerit nutaat § 8-mi taaneqartut illoqarfinni nunaqarfinnilu pilersinneqannginnerminni Naalakkersuisunit akuerineqaqqaarsimassapput.
Imm. 2. Aaqqissuussinerit pioreersut akuerineqaratik atorneqaannarsinnaapput. Aaqqissuussinerit pioreersut piffissaliussaq aalajangersimasoq qaangiutsinnagu allanngortinneqarlutilluunniit allamut nuunneqassasut Naalakkersuisut aalajangersinnaavaat.

 

Kapitali 4
Katersuinermik aaqqissuussinerit.

§ 10. Illoqarfimmi nunaqarfinnilu anartarfiit imaartakkat imaasa katersorneqarnissaat eqqarneqarnissaallu kommunalbestyrelsip aallartissinnaavaa.
Imm. 2. Imermut errotuivikunut katersuiviit tankit imaarneqarnissaat taakkulu eqqarneqarnissaannik aaqqissuussineq kommunalbestyrelsip aallartissinnaavaa.
Imm. 3. Peqqinnissap tungaanit isigalugu pisariaqartinneqarpat suliassaqarfinni imm. 1-imi aamma imm. 2-mi taaneqarsimasut avataanni anartarfiit imaartakkat imaannik imermillu errortuivikumik katersuineq eqqaanerlu kommunalbestyrelsip aallartissinnaavai.

§ 11. Kommunip aaqqissuussinera aallartinneqarpat anartarfinnik imaartakkanik anartarfilimmik imaluunniit imermut errortuivikumut katersuiviusunik tankelimmik illuutillip kialuunniit aaqqissuussineq atussavaa, tamatumunngalu akiliutissaq kommunalbestyrelsimit aalajangersarneqarsimasoq akilissallugu.

§ 12. Kapitali 5 tunngavigalugu kommunalbestyrelsip aalajangersagai malillugit uninngatitsineq assartuinerlu peqqinnissaq avatangiisillu eqqarsaatigalugit illersorneqarsinnaasumik ingerlanneqassapput.
Imm. 2. Eqqaaneq tamarmi ilaannakortumilluunniit suliffeqarfimmit kommunimit ingerlanneqanngitsumit suliarineqartarpat eqqaannerup kommunalbestyrelsimit aalajangersakkat malillugit ingerlanneqarnera kommunalbestyrelsip nakkutigissavaa.

 

Kapitali 5
Aalajangersakkat allat.

§ 13. Kommunip illoqarfiani nunaqarfiinilu katersuineq eqqaanerlu pillugit maleruaqqusat erseqqinnerusut kommunalbestyrelsip aalajangersassavai. Maleruaqqusat taakku paasissutissanik makkuninnga imaqassapput:
1) Imermut errortuivikumut katersuivittut tankit imaasa anartarfiillu imaartakkat imaasa eqqarneqarfigisinnaasaat, tak. § 7.
2) Anartafiit imaartakkat akuerisat suussusii.
3) Kommunimi katersinermik aaqqissuussinerit. Matumani illoqarfiup/nunaqarfiup immikkoortukkuutaavini ataasiakkaani piffissat katersuiviusartut ilanngullugit.
4) Anartarfilerisut anartarfinnik imaartakkanik imaarsinissaannut imaluunniit siparnit anartarfiilluunniit puussiartaasa illup silataani inissinneqarnissaat pillugit malittarisassat.
5) Imermut errortuivikumut tankit imaarneqartarneri pillugit aaqqissuussinerit.
6) Kommunit katersuinermik aaqqissuussinerinik atuinermut akiliutit.

§ 14. Anartarfiit puusiartaasa siparnilluunniit illup silataanut inissinneqassappata imaat qimminut, timmissanut uumasunullu taakku assigisaannut allanut pineqarnaveerlugit inissinneqassapput.

§ 15. Katersuinermi aaqqissuussinernut atatillugu maleruaqqusassiamini anartarfiit imaartakkat aalajangersimasut atorneqarnissaat kommunalbestyrelsip naalakkiutigisinnaavaa. Anartarfiit imaartakkat puussialertakkat atorneqarnissaat naalakkiutigineqarpat puussiat katersuinermik aaqqissuusinikkoortumik tunniunneqartassapput.

 

Kapitali 6
Nakkutilliineq il.il.

§ 16. Illuutit anartarfii, eqqiluitsuutinneqarneri kiisalu anartarfiit imaartakkat imaasa aamma imermik errortuivikumik katersuivittut tankit passunneqarneri tamaasa taakku eqqarneqarnissaasa tungaannut kommunalbestyrelsip nakkutigisarai.
Imm. 2. Pissutsit anartarfinnut tunngasut kiisalu anartarfiit imaartakkat imaasa aamma imermik errortuivikumik katersuivittut tankit eqqarneqarnerisa avatangiisit peqqinnissarlu eqqarsaatigalugit illersorneqarsinnaasumik ingerlanneqarnissaat qulakkeerniarlugit kommunalbestyrelsi naalakkiuteqarsinnaallunilu inerteqquteqarsinnaavoq. Mingutsisinissaq pinngitsoortinniarlugu naalakkiuteqartoqarsinnaavoq.
Imm. 3. Nakkutilliinermi malittarisassanillu atortitsinermi Avatangiisit innarlitsaalineqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allanngortinneqartumi kap. 4-mi aamma § 44, imm. 2-mi malittarisassat atuupputtaaq.

§ 17. Ajoqutaasinnaasut pinngitsoortinneqarnissaaq siunertaralugu kommunalbestyrelsip illuutillit taakkunatullu isigineqartut anartarfinnut pissutsit aamma anartarfiit imaartakkat imaasa kiisalu imermut errortuivikumut katersivittut tankit eqqarneqartarneri pillugu naalakkiuteqarfigisinnaallugillu inerteqquteqarfigisinnaavai.

§ 18. Kapitali 2, 3, 4 aamma 6 tunngavilugit aalajangiinerit tamarmik peqqinnissaakkut nakkutilliisoqarfik tusarniaavigeqqaarlugu aatsaat pisassapput.

§ 19. Nalunaarut manna malittarisassalluunniit allat taassuminnga tunngavillit tunngavigalugit aalajangiinerit tamarmik Avatangiisit innarlitsaaliorneqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allanngortinneqarsimasumi kap. 10-mi malittarisassat tunngavigalugit naammagittaalliuutigineqarsinnaapput.

 

Kapitali 6
Pineqaatissiinermut atortuulersitsinermullu aalajangersakkat.

§ 20. Akiilisinneqarsinnaapput:
1) § 3, imm. 4-mik, § 6, imm. 1-imik aamma 3-mik, § 7-imik, § 8-mik, § 9-mik, § 11-mik aamma § 14-imik unioqqutitsisut, imaluunniit
2) § 3, imm. 3, § 4, § 6, imm. 2, § 10, imm. 3, § 15 aamma § 17, imm. 1 malillugit piumasaqaatinik, naalakkiutinik inerteqqutinilluunniit sumiginnaasut, imaluunniit
3) § 13 tunngavigalugu malittarisassanik aalajangersarneqartunik unioqqutitsisut.

§ 21. Aktieselskabi, anpartsselskabi, andelsselskabi assigisaalluunniit unioqqutitsisuuppat selskabi akiliisitaasinnaavoq. Namminersornerullutik Oqartussat, kommuni kommunilluunniit ataatsimut ingerlatseqatigiiffiat unioqqutitsisuuppat Namminersornerullutik Oqartussat, kommuni kommunilluunniit ataatsimoorlutik ingerlatseqatigiiffiat akiliisitaasinnaavoq.§ 22. Nalunaarut manna atortuulersinneqarpoq 1. oktober 1993 aallarnerfigalugu.
Imm. 2. Piffissami ikaarsaariarfiusumi 31. december 1993-ip tungaanut igitassanik eqqaanermi ileqqoreqqusat manna tikillugu atuuttut atukkallassapput, tamatumalu kingorna atorunnaarsinneqassallutik.
Imm. 3. Kommunalbestyrelsilli ataasiakkaat Naalakkersuisunut innuttaminnullu siumoortumik nalunaaruteqaqqaarlutik kommunimi igitassanik eqqaanermi ileqqoreqqusat imm. 2-mi piffissaliunneqarsimasoq sioqqullugu atorunnaarsissinnaavaat.

Namminersornerullutik Oqartussat, ulloq 27. september 1993.

Ove Rosing Olsen

/

Torben Cordtz