Meeqqat atuarfiat pillugu inatsisartut peqqussutaanni nr. 10-mi, 25. oktober 1990-imeersumi § 36, imm. 3 naapertorlugu aalajangersarneqarput:

Allatsinneq.

§ 1. Atuartoq ukiuni pinngitsoorani atuarfiusussani atuareersimasoq atuartussanngorlugu allatsissimassaaq atuartup imaluunniit angajoqqaat, tak. meeqqat atuarfiat pillugu inatsisartut peqqussutaanni § 40, atuarfimmut nalunaarutigippassuk atuartup atuarnini ingerlateqqissallugu kissaatigigaa atuartorlu atuartussat aqqisa allassimaffiannut ilanngunneqarsimappat atuarninilu aallartissimallugu.
Imm. 2. Atuartussatut allatsissimaneq ullormit atuartup atualerneraniit naatsorsuutigineqassaaq.

Atuartuujunnaarneq.

§ 2. Atuartuujunnaarneq nalinginnaasumik pisassaaq atuartup imaluunniit angajoqqaat, tak. meeqqat atuarfiat pillugu inatsisartut peqqusisutaanni § 40, namminneerlutik imaluunniit allakkatigut atuarfimmut nalunaaruteqarnerisigut atuartup ulloq erseqqinnerusumiik nalunaagaq aallarnerfigalugu atuarunnaarneranik.
Imm. 2. Atuartuujuunarneq aamma pisinnaavoq skolenævnip aalajangiineragut najoqqutassiat makku malillugit:
- Ilinniartitsisut nakkutigissavaat atuartut ukiuni pinngitsoorani atuarfiusussani atuareersimasut atuaqqittussatullu allatsissimasut atuartitsinermi peqataanersut.
- Atuartoq atuartitsinermi peqataasinnaanngippat atuartup imaluunniit angajoqqaat, tak. meeqqat atuarfiat pillugu inatsisartut peqqussutaanni §40, namminneerlutik imaluunniit allakkatigut atuanngitsoornermut peqqutaasoq atuarfimmut nalunaarutigissavaat.
- Atuartoq ukiuni pinngitsoorani atuarfiusussani atuareersimasoq, atuanngitsoortarnerminut patsisissaviusunik patsisigisaminik nalunaaruteqarani qaammammi ataatsimi atuartitsiffiusut 20 %-ii sinnerlugit imaluunniit ullut tallimat sinnerlugit malitsiinnarlugu atuanngitsoorsimappat atuarfimmi pisortap tamatuminnga skolenævni ilisimatissavaa. Skolenævnip atuartoq imaluunniit angajoqqaat, tak. meeqqat atuarfiat pillugu inatsisartut peqqussutaanni § 40, nalunaarfigissavai atuartoq atuarfimmi atuarunnaartutut naatsorsuutigineqartoq, qaammatip ataatsip ingerlanerani skolenævnip erseqqinnerusumik aalajangigaa malillugu atuarnini pitsaanerulersinngippagu. Atuarunnaarneq ullup piffissarititatut aalajangikkap naaneraniit naatsorsuunneqassaaq.
Imm. 3. Atuartoq atuarunnaarsimasoq, tak. imm. 1 imaluunniit imm. 2, ukiumi atuarfiusumi tulliuttumi atuarnissamut allatsissinnaavoq, tak. § 1.

§ 3. Kultureqarnermi, Ilinniartitaanermi Suliffeqarnermilu Pisortaqarfik nalunaarummi aalajangersakkat qanoq aqunneqarnissaannut maleruagassiorsinnaavoq.

§ 4. Nalunaarut atulerpoq 1. august 1991-imit.
Imm.2. Tamatumunnga peqatigitillugu Kultureqarnermi, Atuartitsinermilu Pisortaqarfiup atuartut pinngitsooratik atuartussaanngitsut atuartussatut nalunaarutigineqarnerat atuartuujunnaarnerallu pillugu kaajallaasitaa 2/83, 18. maj 1983-imeersoq atorunnaarsinneqarpoq.

Namminersornerullutik Oqartussat, ulloq 15. april 1991.

Marianne Jensen

/

Kaj Kleist