Kapitel I.
Inatsisartut, Naalakkersuisut, Inatsisartunut qinersisitseqqusineq qinikkatullu atuussinnaassuseq.

§ 1. Inatsisartut nutaamik qinersinerup kingornatigut sapinngisamik piaartumik katersuutissapput kingusinnerpaamillu ullut 45-t qaangiutsinnagit. Ataatsimiigiaqqusisuussaaq ilaasortaq sivisunerpaamik Inatsisartuni ilaasortaasoq, imaluunniit arlallit sivisoqatigiimmik ilaasortaappata angajulleq.
Imm. 2. Qinersinerup misilinneqarnissaata Inatsisartullu siulittaasussaanik qinersinissap tungaanut Inatsisartut ataatsimiinneri ilaasortamit imm. 1-mi taaneqartumit siulersorneqassapput.
Imm. 3. Inatsisartut ilaasortat akornannit qinersinerup misilinneqarnissaanut ataatsimiititaliamik pilersitsissapput, tassani ilaasortaassallutik ilaasortaq imm. 1-mi taaneqartoq siulittaasuusussaq, taassumalu toqqagai ilaasortat sisamat.

§ 2. Inatsisartut Inatsisartut siulittaasussaat piffissamut Inatsisartut qinigaaffiannut atuuttussaq ilaasortat akornannit qinissavaat. Qinigassanngortittoq qinigaassaaq, qinigassanngortittoq ilaasortat najuuttut affaannit amerlanerit taappassuk (amerlanerussuteqarluinnartut). Qinigassanngortittut arlaat amerlanerussuteqarluinnartunit taaneqanngippat qinersisoqaqqissaaq. Qinersinermi tassani qinigassanngortittoq amerlanerussuteqarluinnartunit taaneqanngippat, pingajussaanik qinigassanngortittut marluk aappassaanik qinersinermi amerlanerpaanik taaneqarsimasut taasissutigineqassapput. Taasinerit amerlaqatigiippata qinersineq makitsinikkut aalajangerneqassaaq.
Imm. 2. Aammattaaq Inatsisartut qanoq amerlatigineq naapertorlugu qinerseriaaseq malillugu siulittaasumut kingoraartaasartussat ataatsikkoortumik qinissavaat, siulleq, aappaa, pingajuat sisamaallu, taakkulu siulittaasoq peqatigalugu Inatsisartut Siulittaasoqarfiattut atuutissapput. Siulittaasup tullissaanik qinersinermi siulittaasup qinikkatut inissaq siulleq siulittaasup taaseqatigisartagaanit pineqartussaq pissavaa.

§ 3. Inatsisartut Naalakkersuisut qinissavaat Namminersornerullutik Oqartussat susassaqarfiinik/ingerlatsiveqarfiinik ingerlatsisussat. Naalakkersuisut ilaasortarissavai Naalakkersuisut siulittaasuat aamma Naalakkersuisunut ilaasortat marlunniit arfinilinnut amerlassusillit.
Imm. 2. Naalakkersuisut siulittaasuat Inatsisartunut ilaasortat akornanni qinerneqassaaq § 2, imm. 1-mi allassimasut naapertorlugit.
Imm. 3. Namminersornerullutik Oqartussani suliassaqarfiit amerlassusii annertussusiilu aallaavigalugit suliassaqarfinnullu taakkua agguataarneqarneranni Naalakkersuisunut siulittaasup Inatsisartunut inassutigissavaa Naalakkersuisunut ilaasortassat marlunniit arfinilinnut amerlassuseqartut aqqisigut taaneqarsimasut ataatsikkoortumik qineqqullugit.
Imm. 4. Naalakkersuisunut ilaasortassanik qinersineqassaaq Naalakkersuisut siulittaasuata Naalakkersuisunut ilaasortassatut qineqqullugit siunnersuutai saqqummiunneqartut ataatsimoortillugit taasissutigineqarnerisigut.

§ 4. Namminersornerullutik Oqartussat suliassaqarfiisa ingerlanneqarneri Naalakkersuisut akisussaaffigaat.
Imm. 2. Naalakkersuisut aamma Naalakkersuisunut ilaasortaat ataasiakkaat akisussaaffii Inatsisartut inatsisaatigut aalajangerneqassapput.
Imm. 3. Suliassat Naalakkersuisunut ilaasortat akornanni agguataarneqassapput Naalakkersuisut siulittaasuata aalajangersagai naapertorlugit.

§ 5. Naalakkersuisunut siulittaasoq aamma Naalakkersuisunut ilaasortat qinerneqassapput piffissamut Inatsisartut qinikkatut atuuffiannut.
Imm. 2. Taamaattorli amerlanerussuteqartut, Inatsisartunut ilaasortat affaat sinnerlugit amerlassuseqartut, akuersissutigisinnaavaat, Naalakkersuisut imaluunniit Naalakkersuisunut ilaasortat ataasiakkaat piffissami qinigaaffiup sinnerani atuukkunnaarsinneqassasut § 8, imm. 1-mi taaneqartunit allaanerusunik pissuteqartumik. Naalakersuisut tamarmik atuukkunnaarsinneqarpata nutaamik qinersisoqassaaq § 3-mi allassimasutut.
Imm. 3. Naalakkersuisunut ilaasortat ataasiakkaat atuukkunnaarsinneqarpata imaluunniit toquppata Naalakkersuisunut siulittaasup inassuteqarnera naapertorlugu ilaasortassamik nutaamik taasineqassaaq piffissami qinigaaffiup sinnerani atuuttussamik, Naalakkersuisunut siulittaasup ilaasortap atuukkunnartup suliassaqarfii Naalakkersuisunut ilaasortanut allanut nuunneqarnissaat aalaj anginngippagu.
Imm. 4. Inatsisartut Naalakkersuisut siulittaasuat atuukkunnaarsippassuk Naalakkersuisut ataatsimoorlutik tunuassapput.
Imm. 5. Naalakkersuisut imaluunniit Naalakkersuisunut ilaasortaq ataaseq Inatsisartunit atuukkunnaarsinneqarpata Naalakkersuisut siulittaasuat Inatsisartunut nutaamik qinersisitseqqusisinnaavoq.
Imm. 6. Naalakkersuisunut siulittaasup paasiguniuk nutaanik Naalakkersuisunngortitsisoqarsinnaanngitsoq nutaamik qinersisitsissaaq.
Imm. 7. Naalakkersuisunut siulittaasoq nutaamik Inatsisartunut qinersisitseqqusissaaq piffissap qinigaaffiup atuuffiata naannginnerani.
Imm. 8. Naalakkersuisunut siulittaasoq aamma Naalakkersuisunut ilaasortaq atuutissapput siulittaasumik aamma Naalakkersuisunut ilaasortamik nutaanik qinersisoqareerserlugu imaluunniit suliassat Naalakkersuisunut ilaasortanut allanut agguaanneqareerserlugit.
Imm. 9. Inatsisartunut qinersinermut malittarisassat immikkut Inatsisartut inatsisaatigut aalajangerneqassapput.

§ 6. Inatsisartunut ilaasortaq inaarutaasumik eqqartuussissutikkut imaluunniit akiliisitaanissamik akuersissuteqarnikkut pinerluttulerinermi inatsit naapertorlugu Inatsisartunut ilaasortaanissaminut nalinginnaasumik isigineqarnermini naleqqukkunnaarutigisaminik pineqaatissinneqarsimappat qinersinerup misilinneqarnissaanut ataatsimiititaliap inassuteqarnera naapertorlugu Inatsisartut aalajangissavaat qanoq iliuuseq ilaasortap eqqartuunneqaatigisaa pineqartup Inatsisartuni ilaasortaaginnarnissaanut naleqqukkunnaarutaanersoq.

§ 7. Inatsisartunut ilaasortaanani Naalakkersuisunut ilaasortap Inatsisartunut qinigaasinnaaneq pillugu aalajangersakkat sukkulluunniit atuuttut naammassisimassavai. Inatsisartut suliassat taamaattut aalajangiiffigisassavaat ataatsimiititaliap § 1, imm. 3-mi taaneqartup inassuteqarnera naapertorlugu.

§ 8. Inatsisartunut imaluunniit Naalakkersuisunut ilaasortaq tunuarumalluni qinnuteqaateqarpat, imaluunniit Inatsisartunut ilaasortaq peqqiilliornerminik, inuutissarsiutiminik assigisaanilluunniit pingaarutilimmik peqquteqarluni sulinngiffeqarumalluni qinnuteqaateqarpat, Inatsisartut aalajangissavaat qinnuteqaat akuerineqarsinnaanersoq.
Imm. 2. lnatsisartunut ilaasortaq Inatsisartut ataatsimiinneranni peqataasinnaanngikkallassaguni Inatsisartut siulittaasuannut nalunaaruteqassaaq. Inatsisartut aalajangissavaat suut peqataannginnissamut peqqutissaviunersut. Taamaattorli folketingip ataatsimiinnerinut peqataaneq pissutissaqavilluni peqataannginnertut isigineqassaaq.
Imm. 3. Inatsisartunut ilaasortaq ilaasortaanerminit tunuarpat, toquppat, sulinngiffeqartitaalerpat imaluunniit pissutissaqavilluni peqataasinnaajunnaarpat taassuma sinniisussaa Inatsisartut ataatsimiinnerinut peqataajartoqqullugu ataatsimiigiaqquneqassaaq. Sinniisussap qinigaasinnaanera misissorneqassaaq § 6-imi aamma § 1, imm. 3-mi malittarisassat naapertorlugit. Ilaasortaq sulinngiffeqareerluni pissutissaqavilluniluunniit peqataasinnaajunnaarsimalluni Inatsisartuni sulinerminut uteqqippat sinniisussaq tunuassaaq.

 

Kapitali II.
Inatsisartut ataatsimiittarneri.

§ 9. Inatsisartut ikinnerpaamik ukiumut maloriarlutik ileqquusumik ataatsimiittassapput.
Imm. 2. Inatsisartut taakku saniatigut ataatsimiittassapput Inatsisartut siulittaasuata pisariaqartileraangagu, aamma ataatsimiittassallutik Naalakkersuisut siulittaasuata imaluunniit Inatsisartunut ilaasortat ikinnerpaamik affaasa piumasarigaangassuk.
Imm. 3. Naalagaaffiup Sinniisaata Inatsisartut tamanut ammasumik ataatsimiinneri najuuffigisinnaavai. Inatsisartut pisariaqartitsineq naapertorlugu Naalagaaffiup Sinniisaa qinnuigisarsinnaavaat Inatsisartut ataatsimiinneranni peqataaqqullugu.
Imm. 4. Inatsisartut ileqquusumik ataatsimiinnerminni aalajangissavaat Inatsisartut tullianik ileqquusumik ataatsimiinnissaata ullussaa.

§ 10. Siulittaasoqarfiup ataatsimiinnissaq sioqqullugu Inatsisartut ilaasortaannut Naalagaaffiullu Sinniisaanut nassiutissavai oqaluuserisassat ilaasortanit ataasiakkaanit, partiinit, Naalakkersuisunit imaluunniit danskit naalakkersuisunit Inatsisartunut aalajangiiffigissassanngorlugit oqaaseeqarfigisassanngorlugilluunniit nassiunneqarsimasut apeqqutillumi allat oqaluuserineqassangatitat nalunaarsorneri. Nalunaarsuutit taakku tamanut saqqummiunneqassapput.
Imm. 2. Kikkulluunniit allat imm. 1-mi taaneqanngitsut suliassanik Inatsisartunut oqaluuserisassanngortitsisinnaanngillat.
Imm. 3. Siunnersuutit, apeqquteqaatit suliassalluunniit allat danskit naalakkersuisuinit Naalakkersuisunilluunniit nukinginnartutut oqaatigineqartut Inatsisartut katersuussimaneranni pineqartumi ullormut oqaluuserisassanut ilanngunneqassapput.
Imm. 4. Inatsisartut Suleriaasianni Inatsisartut aalajangersassavaat suliassat qanoq ililluni Inatsisartunut saqqummiunneqartassasut, tamatumunnga peqatigitillugu qanoq iluseqassanersut, qanoq sioqqutsitigisumik, qanoq sivisutigisumik oqaluttoqartassanersoq il.il.

§ 11. Inatsisartut siulittaasuata, siulittaasulluunniit tulliata siulliup, aappaata, pingajuata sisamaatalu tulleriinnertik naapertorlugu Inatsisartut ataatsimiinneri aqussavaat.
Imm. 2. Siulittaasoqarfimmut ilaasortaq suliamik Inatsisartunut saqqummiunneqartumi saqqummiussisuusoq oqaaseqartuusorluunniit suliap oqaluuserineqarnerani ataatsimiinnermi aqutsisuusinnaanngilaq.

§ 12. Inatsisartut ataatsimiinneri tamanut ammasuupput. Taamaattorli Inatsisartut isumaqatigiissutigisinnaavaat suliassat ataasiakkaat matoqqasumik ataatsimiinnermi oqaluuserineqassasut, tamanna Inatsisartunit ataatsimiinnermilluunniit aqutsisumit aalajangerneqarpat.
Imm. 2. Nersornaasiissutissat Inatsisartunit tunniunneqartussat matoqqasumik ataatsimiissutigineqassapput.

§ 13. Inatsisartut ataatsimiinneri kalaallisut ingerlanneqassapput, danskisulli aamma malinnaaffigineqarsinnaassallutik.

 

Kapitali III.
Ataatsimiititaliat il.il.

§ 14. Inatsisartut Siulittaasoqarfia ullormut oqaluuserisassat pillugit ataatsimiititaliatut atuutissaaq.
Imm. 2. Siulittaasoqarfiup qinerneqareernissaata tungaanut siulittaasuugallartoq ilaasortallu marluk Inatsisartunit toqqakkat ullormut oqaluuserisassat pillugit ataatsimiititaliaagallartutut atuutissapput.

§ 15. Inatsisartut inissitsitissallutik ataatsimeeqqaarnerminni ataatsimiititaliat uku pilersissavaat Naalakkersuisunut ilaasortaanngitsunik Inatsisartunut ilaasortanik tallimanik ilaasortallit:
1) Inatsisartut aningaasaqarnermut ataatsimiititaliaat.
2) Landskassep naatsorsuutaasa kukkunersiorneqarnerannut ataatsimiititaliaq.
3) Nunanut allanut illersornissamullu naalakkersuinikkut ingerlatsineq pillugu Naalakkersuisunit nassuiaatinik paasissutissiissutinillu misissuisarnermut ataatsimiititaliaq. Kalaallit Nunaata folketingimi ilaasortai marluk ataatsimiititaliami taaseqataasinnaanatik peqataasarput.
Imm. 2. Ataatsimiititaliat suleriaasissartik nammineq aalajangersassavaat, ataatsimiititaliallu ataasiakkaat iluminni suliassat ilaasortat akornanni agguaatassallugit, tamanna tulluarsorigunikku.

§ 16. Aningaasaqarnermut ataatsimiititaliaq Inatsisartut aningaasanut inatsisissaanut siunnersuutip siullermeerlugu aappassaaneerlugulu oqaluuserineqarnerata akornanni landskassep aningaasanut atugassatut missingersuusiaanut siunnersuutit pillugit isumaliutissiissuteqassaaq, Inatsisartut isertitanut aningaasartuutinullu politikkerisaanut najoqqutassianut pingaarnernut oqaaseqarfiginnillunilu siunnersuuteqartassalluni kiisalu suliassat Inatsisartunit Naalakkersuisunilluunniit ataatsimiititaliamut innersuunneqarsimasut pillugit oqaaseqartassalluni.
Imm. 2. Aningaasaqarnermut ataatsimiititaliap Inatsisartut ataatsimiinngikkaangata sinnerlugit aningaasanut inatsisip akuersissutigineqarnerani siunertanut aningaasartuutissatut naatsorsuutigineqarsimanngitsut aningaasartuutissanngorlugit akuersissutigisinnaavai.
Imm. 3. Aningaasaqarnermut ataatsimiititaliap aningaasartuutissatut akuersissutai ukiumoortumik ilassutitut aningaasanut atugassanngortitanut inatsimmut katersorneqassapput, Inatsisartullu ileqquusumik kingullermeerlutik ataatsimiinneranni aningaasat ukiuanni pineqartumi oqaluuserineqassallutik.
Imm. 4. Naalakkersuisut aningaasanut inatsisip suliarineqarneranut maleruaqqusat aalajangersassavaat aningaasat atugassat missingersuusiorneqarnerinut najoqqutassani.

§ 17. Landskassep naatsorsutaasa kukkunersiorneqarnerannut ataatsimiititaliap landskassep naatsorsuutai kukkunersiuisullu taakkununnga oqaaseqaataat ukiumut ataasiarluni misissuataassavai, naatsorsuutillu pisariaqalersitaannik Naalakkersuisunut apeqquteqarlutillu oqaaseqarfiginnittassallutik. Apeqqutit oqaaseqaatillu Naalakkersuisut akissutaat ilanngullugit Inatsisartunut saqqummiunneqassapput.
Imm. 2. Ataatsimiititaliap suliaminut atugassatut pisariaqartitani paasissutissat, ilanngussat (bilagit), nalunaarusiat il.il. pisortanit naatsorsuuserisunit piniarsinnaavai. Ataatsimiititaliamut ilaasortap arlaata kissaatigippagu paasissutissat taaneqartut ataatsimiititaliamit piniarneqassapput.

§ 18. Naalakkersuisunut siulittaasup Inatsisartuni ataatsimiinnissaq sioqqullugu Nunanut allanut illersornissamullu naalakkersuinikkut ingerlatsineq pillugu nassuiaatit paasissutissallu Kalaallit Nunaannut soqutiginaateqartut nassiutissavai. Paasissutissat ataatsimiititaliap taassuma ataatsimiinnerani aammattaaq oqatsitigut ilisimatitsissutigineqarsinnaapput.
Imm. 2. Ataatsimiititaliami paasissutissat tiguneqartut oqaloqatigiissutigineqassapput, paasissutissiissutillu aamma ataatsimiititaliami isumaliutersuutit pisariaqalersitaannik apeqqutit oqaaseqaatillu ataatsimiititaliamit saqqummiunneqarlutik.
Imm. 3. Ataatsimiititaliap allaffikkut suliassaatai Naalakkersuisut siulittaasuata allattoqarfianit isumagineqassapput.
Imm. 4. Ataatsimiititaliami ilaasortat taaseqataasinnaanatik peqataasut allallu ataatsimiititaliap ataatsimiinnerini najuuttariaqarsimasut pissussaapput ataatsimiititaliami ilisimatitsissutigineqartut isertuunnissaannut qallunaat naalakersuisui Naalakkersuisullu allanit tusagassaanngitsunik ilisimatitsissuteqarnerat naapertorlugu, tamatumalu saniatigut ataatsimiititaliap siulittaasuata aalajangiinera naapertorlugu. Ilaasortap nutaap taamatut pisussaaffeqarnini ilumoorluinnarluni naalakkumallugu allaganngorlugu tunniutissavaa.

§ 19. Inatsisartut ataatsimiititalianik ataavartunik ataatsimiititaliaagallartunilluunniit pilersitsissapput erseqqinnerusumik aalajangersakkat naapertorlugit. Ataatsimiititaliap nammineq siulittaasussani qinissavaa tamatumunnga allamik aalajangersagaqanngippat.
Imm. 2. Suliaq suliarineqarnermini sukkulluunniit ataatsimiititaliuullugu ataatsimiititaliaasimasumulluunniit suliassanngortinneqarsinnaavoq. Inatsisartut suliap oqaluuserineqarnera unitsikkallassavaat, ataatsimiititaliami isumaliutersuutit naammassineqareerserlugit.
Imm. 3. Ataatsimiititaliap ataatsimiinnermi inernerat Inatsisartunut isumaliutissiissutinngorlugu saqqummiutissavaa tamatumunnga allamik aalajangersagaqanngippat.
Imm. 4. Partiit toqqarneqarsimasut taaseqatigiittartulluunniit ilaasortap tunuarnerani ataatsimiititaliami ilaasortaatitatik ilasinnavaat partiit taaseqatigiittartulluunniit Inatsisartut siulittaasuannut nalunaaruteqarpata.

§ 20. lnatsisartut qinigaaffiup atuuffiani § 5, imm. 2-mi oqaaseqatigiit kingulliit naapertorlugit Naalakkersuisut atorunnaarsippatigit Naalakkersuisunillu § 3 naapertorlugu nutaanik qinersillutik Inatsisartut nutaamik qinigaaffiup naanissaata tungaanut atuuttussamik inissititissapput.

§ 21. Inatsisartut inissititissallutik katersuuteqqaarnerminni qinissavaat siunnersuisoqatigiit, ataatsimiititaliat, siulersuisoqatigiit il.il., Inatsisartut sinniisuutitaqarfiini ilaasortaatitassat, inatsisikkut, Inatsisartut peqqussutaatigut Inatsisartulluunniit aalajangiineratigut allakkut allamik aalajangiineqarsimanngippat imaluunniit suliffeqarfiup pineqartup ileqqoreqqusaasigut, taakku Inatsisartunit al1anngortinneqarsinnaanngippata.

 

Kapitali IV.
Inatsisartut inatsisissaannut aamma Inatsisartut peqqussutissaannut siunnersuutit il.il. saqqummiunneqarneri.

§ 22. Inatsisartunut ilaasortat Naalakkersuisullu Inatsisartut inatsisissaannut Inatsisartullu peqqussutissaannut siunnersuutinik saqqummiussaqarsinnaapput. Inatsisartut inatsisissaannut Inatsisartullu peqqussutissaannut siunnersuutit Inatsisartunut saqqummiunneqarnerminni inatsisitut iluseqassapput, pingasoriarlutillu oqaluuserineqassallutik. Ullormut oqaluuserisassatut siunnersuutit nalunaarutigineqarneri pillugit malittarisassat Inatsisartut aalajangersarsinnaavaat tamakkununnga ilanngullugit piffissat qanorlu iluseqarnissaat.
Imm. 2. Inatsisartut suleriaasianni aalajangersarneqassapput allannguutissatut siunnersuutit saqqummiunneqarnerinut malittarisassat.
Imm. 3. Siunnersuutit kingullermeerlugit taasissutigineqassapput ilusissavimmittut iluseqarlutik.

§ 23. Naalakkersuisut aningaasat akiuannut tulliuttumut Inatsisartut aningaasanut inatsisissaannut siunnersuut Inatsisartut ileqquusumik ukiakkut ataatsimiinneranni saqqummiutissavaat.
Imm. 2. lnatsisartut aningaasanut inatsisaat inaarutaasumik akuersissutigineqassaaq kingusinnerpaamik 1. november aningaasat ukiuat inatsimmi pineqartoq sioqqullugu.
Imm. 3. Aningaasartuutit suulluunniit akilerneqarsinnaanngillat aamma sunilluunniit aningaasanik isertitsisoqarsinnaanngilaq Inatsisartut aningaasanut inatsisaanni Inatsisartunit akuersissutigineqarsimasumi imaluunniit utaqqisaagallartumik Inatsisartut ilassutitut aningaasanut atugassanngortitanut inatsisaanni tunngavissaqanngippat, taamaattorli takuuk § 16, imm. 2.

§ 24. Inatsisartunit Inatsisartut inatsisissaannut aamma Inatsisartut peqqussutissaannut siunnersuutit akuersissutigineqarsimasut atortussanngortinneqassagunik Naalakkersuisut siulittaasuannit Naalakkersuisuni ilaasortaq inatsimmik atortitsisussaq imaluunniit taassuma Naalakkersuisoqarfiani pisortaq peqatigalugu atortussanngortinneqassapput.
Imm. 2. Naalakkersuisut piffissaritinneqartoq ullunik 8-nik sivisussusilik qaangiutsinnagu aalajangersinnaavaat, atortussanngortitsinissaq kinguartinneqassasoq siunnersuut tullianik Inatsisartut ataatsimiinneranni akuersissutigineqareerserlugu. Siunnersuut allanngortinneqarani ataatsimiinnermi tamatumani akuersissutigineqanngippat atortussaaj unnaarsinneqassaaq.

§ 25. Inatsisartut inatsisaat aamma Inatsisartut peqqussutaat kiisalu Namminersornerullutik Oqartussat Nalunaarutaat allamik aalajangersagaqanngippat sapaatit akunneri marluk qaangiullutik ulluanni atortuulissapput Naalagaaffiup sinniisuanut, politinut, kommunenut eqqartuussiveqarfinnullu nassiunneqareernermik kingornagut.
Imm. 2. Imm. 1-mi allassimasutut nassiussineq tassaavoq nalunaarutiginninnermik periaaseq pisussaassuseqarfigisassaq.
Imm. 3. Naalakkersuisut isumagissavaat Inatsisartut inatsisaat, Inatsisartut peqqussutaat Namminersornerullutillu Oqartussat nalunaarutaat Nalunaarutini tamanut nalunaarutigineqarnissaat.

§ 26. Siunnersuutit allat nammineerluni saqqummiussat § 22-mi taaneqanngitsut Inatsisartuni ataasiarluni oqaluuserineqassapput, tamakkulu unitsikkallarneqarsinnaapput ataatsimiititaliami oqaluuserineqarnissaat, paasissutissanik pissarsiniarnissaq il.il. siunertaralugit.
Imm. 2. Inatsisartut siulittaasoqarfiata siunnersuummik saqqummiussisoq Inatsisartut oqaluuserinninnerminni naammassisaannik nalunaarfigissavaat.

§ 27. § 22-mi aamma § 26-mi siunnersuutinut taaneqartunut allannguutissatut siunnersuutit Inatsisartuni taasissutigineqassagunik allaganngorlugit saqqummiunneqassapput.

§ 28. Ilaasortaq pisortat susassarisaat pillugu paasissutissanik pissarserusukkuni Naalakkersuisunut apeqquteqaateqassaaq. Apeqqut allaganngorlugu tunngavilersorneqassaaq.

 

Kapitali V.
Qinersineq taasinerillu allat.

§ 29. Inatsisartut aalajangiisinnaapput ikinnerpaamik ilaasortat affaat najuuppata.
Imm. 2. Aalajangiinerit tamarmik taasinermi amerlanerit isumaqataanerisigut pisassapput allatut aalajangiisoqarsimanngippat.
Imm. 3. Taasineqarnerani siunnersuummut isumaqataasut akerliusullu amerlaqatigiippata siunnersuut tunuartinneqassaaq.

§ 30. Ataatsimiititaliamut pisortatigulluunniit sinniisuuffimmut allamut qinigaasinnaassagaanni Inatsisartut ataatsimiittarfiani Inatsisartunut ilaasortamit qinigassatut siunnersuutigineqartariaqarpoq.
Imm. 2. Ataatsimiititaliamut pisortatigulluunniit sinniisuuffimmut allamut ilaasortassanik marlunnik amerlanerusunilluunniit qinersinermi qanoq amerlassuseqarneq naapertorlugu qinersineq atorneqassaaq.
Imm. 3. Inatsit manna malillugu qanoq amerlassuseqarneq naapertorlugu qinersineq d'Hondtip periaasia aallaavigalugu pisassaaq makku malillugit:
Inatsisartunut ilaasortat immikkoortunut qinersinissami pineqartumi qanoq taaseqatigiikkumanertik pillugu siulittaasumut nalunaarsimanertik naapertorlugu avinneqassapput. Immikkoortut tamarmik immikkut amerlassusii 1-mik, 2-mik, 3-mik il.il. agguarneqassapput. Inernerit taamaalilluni pissarsiarineqarlutik aalajangissavaat immikkoortut qanoq tulleriinneqarlutik sinniisorisassaminnik qinersissanersut. Inernerit marluk amerlanerusulluunniit assigiippata qanoq tulleriinneqarnissaq makitsinikkut aalajangerneqassaaq.
Imm. 4. Inuk ataasiinnaq qinigaasussaagaangat taasisut amerlanerussuteqarluinnarnissaat piumasarineqarpoq. Qinigassanngortittut arlaat taasinermi siullermi amerlanerussuteqarluinnartunit taaneqanngippat taasisitsisoqaqqissaaq. Taasineq taanna aamma qinigassanngortittumut amerlanerussuteqarfiunngippat aappassaaneerluni taasinermi amerlaneraarsimasut marluk pingajussaaneerluni taasissutigineqassapput. Tamatumani taasinermi naligiippata qinersineq makitsinikkut aalajangerneqassaaq.
Imm. 5. Qinersinerit tamarmik sivisunerpaamik ukiunut sisamanut atuutissapput, allatullu ittumik aalajangiineqarsimatinnagu qinersineq Inatsisartut qinikkatut atuuffiannut atuutissaaq, taamaattorli takuuk § 20.

§ 31. Taasinerit pissapput ilaasortat nikuinnerisigut. Taamaattorli ataatsimiititalianut il.il. ilaasortassanik qinersinerit allalluni pisinnaapput amerlanerit piumasarippassuk.
Imm. 2. Ilaasortat Inatsisartut taasinerinut taamaallaat peqataasinnaapput namminneerlutik najuukkunik.
Imm. 3. Ataatsimiinnermi aqutsisuusoq isumaqaruni tamarmik isumaqatigiittut nalunaarutigisinnaavaa siunnersuut taasinertaqanngitsumik akuersissutigineqartoq. Ilaasortap kialluunniit taasinissaq piumasarisinnaavaa, aamma Inatsisartut inatsisissaannut Inatsisartullu peqqussutissaannut siunnersuutit pingajussaaneerlutik oqaluuserineqareernermikkut taasissutigineqartassapput.

§ 32. Siunnersuutit Inatsisartut ataatsimiinnermi taannaasumi akuersissutigisaat, ataatsimiinnermi taannaasumi aatsaat allanngortinneqarsinnaapput Inatsisartunut ilaasortat tamavimmik 3/5-iisa taasillutik piumasarippassuk.

 

Kapitali VI.
Aalajangersakkat allat.

§ 33. Inatsisartut katersuussimagallartillugit Inatsisartunut ilaasortat arlaannaalluunniit unnerluutigisatut sassartinneqarsinnaanngilaq Inatsisartullu akuersissuteqartinnagit qanorluunniit ittumik kiffaanngissusiiagaasinnaanani, ilaasortaq qaninngarneqanngippat.
Imm. 2. Inatsisartut ilaasortaat arlaannaalluunniit Inatsisartuni oqaaserisaminut Inatsisartut akuersissuteqartinnagit avataani akisussaatinneqarsinnaanngilaq.

§ 34. Inatsisartut ataatsimiissutaat tamanut nalunaarutigineqassapput kalaallisut qallunaatullu Inatsisartut Siulittaasoqarfiata nakkutigisaanik takussutissiornikkut nuutsinnerilu Inatsisartut ilaasortaannut, Naalagaaffiup Sinniisaanut, qallunaat naalakkersuisuinut kommunalbestyrelsenullu nassiunneqassallutik.

§ 35. Naalakkersuisunut ilaasortatut Inatsisartunullu ilaasortatut suliaqarnermut Inatsisartunillu toqqagaalluni sinniisuunernut aningaasarsiat immikkut Inatsisartut inatsisaatigut aalajangersarneqassapput.

§ 36. lnatsisartut Siulittaasoqarfiata isumagissavaa Inatsisartut pappiaraataasa toqqortassat isumannaatsumik paarineqarnissaat.

 

Kapitali VII.
Atortuulersitsineq.

§ 37. Inatsisartut inatsisaat manna atuutilerpoq 1. november 1988. Tamatumunnga peqatigitillugu Inatsisartut inatsisaat nr. 1 7. maj 1979-imeersoq, Inatsisartut inatsisaatigut nr. 9 18. oktober 1982-imi, Inatsisartut inatsisaatigut nr. 1 21. marts 1984-imi aamma Inatsisartut inatsisaatigut nr. 3 19. juni 1984-imi allanngortinneqarsimasoq atorunnaarpoq.
Imm. 2. Taamaakkaluartoq inatsit manna akuersissutigineqarniariarpat § 2-mi Siulittaasoqarfittut taaneqartoq Inatsisartut pilersissavaat kapitalimilu III-mi taaneqartut ataatsimiititaliat kiisalu Inatsisartut sinniisuutitaqarfiini, siunnersuisoqatigiinni, ataatsimiititaliani, siulersuisoqatigiinni il.il. ilaasortaatitassat qinissallugit.
Imm. 3. Maleruaqqusat imm. 1-mi taaneqartut inatsit maannamut atuuttoq naapertorlugu aalajangersarneqarsimasut atortuuinnassapput taarserneqarnissamik tungaannut imaluunniit maleruaqqusatigut matumani aalajangersakkatigut Inatsisartulluunniit inatsisaasigut allatigut atortuujunnaarserlutik.

Namminersornerullutik Oqartussat, ulloq 20. oktober 1988.

Jonathan Motzfeldt

/

Lars Vesterbirk