Danmarkimi Namminersornerullutik Oqartussani tjenestemanditut atorfilinnut akissaatit soraarnerussutisiallu il.il. pillugit Inatsisartut inatsisaanni nr. 20-mi 17. december 1985-imeersumi § 2, imm. 6 naapertorlugu akissaatinut tunngasumik siunnersuisoqatigiit qanoq ilaasortaligaanissaat pillugu matumuuna imaattunik aalajangersagaliortoqarpoq:

§ 1. Akissaatinut tunngasumik siunnersuisoqatigiit siulittaasumik, siulittaasup tullianik, allaffeqarfiup ilaasortaatitaanik 2-nik aamma kattuffissuit, Namminersornerullutik Oqartussat tunngaviusumik isumaqatigiissutaanni illuatungiliuttut tamarmik immikkut ilaasortaatitaannik inuttaligaapput, aningaasaqarnermut naalakkersuisup toqqagaanik, kattuffiit ilaasortaatitaannut tunngatillugu kattuffissuit inassuteqarnerat naapertorlugu.

§ 2. Kalaallit Nunaanni Inatsisartut akunnerminnit ilaasortat ikinnerpaamik 4-t amerlanerpaamillu 9-t toqqassavaat. Inatsisartut ilaasortaatitassaasa qassiunissaat naalakkersuisunit aalajangerneqassaaq.

§ 3. Ilaasortanut §§ 1 aamma 2-mi eqqartorneqartunut sinniisussanik toqqaasoqassaaq imaluunniit qinersisoqarluni.

§ 4. Siulittaasoq, siulittaasup tullia, ilaasortat, sinniisussallu ukiunut 4-nut toqqarneqassapput imaluunniit qinerneqassallutik. Taamaattorli Inatsisartut ilaasortaatitaat sinniisussaallu tunuassapput Inatsisartunit tunuarunik, kattuffiillu ilaasortaatitaat sinniisussaallu tunuassapput nutaanik inassuteqartoqarpat.

§ 5. Siunnersuisoqatigiinni aalajangiisoqartarpoq nalinginnaasumik amerlanerussuteqarnikkut.

§ 6. Nalunaarut atuutilerpoq tamanut nalunaarutigineqarnermigut.

Namminersornerullutik Oqartussat, ulloq 19. marts 1986

Hans Pavia Rosing

/

Emil Abelsen