Oqartussaasoqarfiit assigiinngitsunik suliallit isumaginninnermi suliassat pillugit suleqatigiinnissaannut inatsisartut peqqussutaat
§ 1. Kalaalit Nunaanni Peqqinnissamik isumaginnittoqarfiup Siulersuisuisa isumaqatigiissuteqarfiginerat naapertorlugu Kalaallit Nunaanni kommunini oqartussaasoqarfiit assigiinngitsunik suliallit isumaginninnermi suliassat pillugit suleqatigiinnissaannut malittarisassat peqqussummi matumani aalajangersarneqarput.
§ 2. Kommunalbestyrelsip kommunimi oqartussaasoqarfiit assigiinngitsunik suliallit isumaginninnermi suliassat pillugit suleqatigiinnissaannut ileqqoreqqusaliornissaq 1. april 1984 tikitsinnagu isumagissavaa.
Imm. 2. Ileqqoreqqusaq Isumaginninnermi Naalakkersuisumit akuerineqaqqaartussaavoq, taannalu oqartussaasoqarfiit assigiinngitsunik suleqatigiinnissaannik siunertaq ileqqoreqqusami naammattumik anguniarneqanngitsutut isigiguniuk allanngortinneqarnissaanik piumasaqarnissaminut piginnaatitaavoq.
§ 3. Oqartussaasoqarfiit assigiinngitsunik suliallit suleqatigiinnissaanni minnerpaamik piumasarineqarpoq najukkami peqqinnissamik isumaginnittoqarfiup, meeqqqat atuarfiata kiisalu isumaginninnermik ingerlatsiviup sinniisaasa aalajangersimasumik ataatsimeeqatigiittarnissaat malittarisassaqartinneqassasoq.
Imm. 2. Aammattaaq pinerluttaalisitsisut,pinerluuteqarsimasunik isumaginnittoqarfik kiisalu suliffissarsiuussisarfik suleqatigiinnermi peqataatinneqarsinnaapput.
§ 4. Oqartussaasoqarfiit assigiinngitsunik suliallit suleqatigiinnissaanni siunertarineqarpoq oqartussaasoqarfiit meeqqat inuusuttullu, innarluutillit kiisalu inuit atugarisamikkut inuutissarsiornikkullu ajornartorsiutillit pillugit suliassat suliarinerini paasissutissanik isummanillu tunioraannermikkut aalajangiiniarnerminnut pitsaanerusumik tunngavissaqalissasut, aammalu oqartussaasoqarfiit ataasiakkaat suliniutaat ataqatigiissarneqassasut.
§ 5. Attaveqaatitut ataatsimiititat imaluunniit suleqatigiiffiit sanilliunneqarsinnaasut allat peqqussut manna naapertorlugu pilersinneqartut oqartussaasoqarfiit suleqatigiinnermi peqataasut sinnerlugit namminerisaminnik aalajangiisinnaassusilerneqarsinnaanngillat.
§ 6. Kommunimi isumaginninnermut allaffik suleqatigiinnut pilersinneqartunut allattoqarfiunissaminut pisussaavoq.
§ 7. Isumaginninnermi Naalakkersuisoq oqartussaasoqarfiit assigiinngitsunik suliallit suleqatigiinnerat pillugu najoqqutassianik malittarisassiorsinnaavoq.
§ 8. Peqqussut manna atulerpoq 1. januar 1983.
Kalaallit Nunaanni Namminersornerullutik Oqartussat, 1. november 1982
Jonathan Motzfeldt
/
Moses Olsen