Inuit Pisinnaatitaaffiinut Kalaallit Nunaata Siunnersuisoqatigiivi pillugit Inatsisartut inatsisaat nr. 23, 3. december 2012-imeersoq.

 

Kapitali 1
Pilersinneqarnerat siunertallu

§ 1.  Inatsisartut inatsisaatigut matumuuna siunertaavoq, Naalagaaffiit Peqatigiit Parisimi tunngavissiaat nunani inuit pisinnaatitaaffiinik suliffeqarfinnut atuuttut naapertorlugit, Inuit Pisinnaatitaaffiinut Kalaallit Nunaata Siunnersuisoqatigiivinik pilersitsinikkut Kalaallit Nunaanni inuit pisinnaatitaaffii siuarsarneqassasut illersorneqarlutillu.
Imm. 2.  Inuit Pisinnaatitaaffiinut Kalaallit Nunaata Siunnersuisoqatigiivi Kalaallit Nunaanni inuit pisinnaatitaaffii pillugit ataatsimut isigalugu ilisimasanik piginnaasanillu annertusaanermut suleqataassapput.
Imm. 3.  Inuit Pisinnaatitaaffiinut Kalaallit Nunaata Siunnersuisoqatigiivi kiffaanngissuseqarput.

 

Kapitali 2
Suliassaat

§ 2.  Inuit Pisinnaatitaaffiinut Kalaallit Nunaata Siunnersuisoqatigiivisa suliassaraat Kalaallit Nunaanni inuit pisinnaatitaaffiisa siuarsarneqarnissaat illersorneqarnissaallu pingaartumik:
1)  Kalaallit Nunaanni inuit pisinnaatitaaffeqarneranni pissutsit pillugit nakkutilliinermut nalunaaruteqartarnermullu peqataanermikkut,
2)  Inuit pisinnaatitaaffiinut tunngassuteqartunik naliliisarluni misissuinernik ilisimatusarnernillu suliaqarnissat oqallisigisarnerisigut,
3)  Inuit pisinnaatitaaffii pillugit Inatsisartunik, Naalakkersuisunik pisortanilu oqartussaasunik allanik aamma namminersorlutik suliaqartunik siunnersuisarlutik,
4)  Inuiaqatigiinni inuinnaat inuit pisinnaatitaaffiinik suliaqarnerannut ataqatigiissaarineq ikiuuttarnerlu siuarsarlugit,
5)  Inuit pisinnaatitaaffiinik ilinniartitsineq tapersersorlugu siuarsarlugulu,
6)  Inuit pisinnaatitaaffii pillugit paasissutissiissutinik ingerlatitseqqittarnermut peqataassallutik,
7)  Kalaallit Nunaanni inuit pisinnaatitaaffiisa nukittorsarneqarnissaannut suliassanik siunnersuuteqartarlutik aamma
8)  Kalaallit Nunaanni inuit pisinnaatitaaffiinut tunngassuteqartunik maannamut suliarineqarsimasut ingerlasimanerat nalilersortarlugu.
Imm. 2.  Inuit Pisinnaatitaaffiinut Kalaallit Nunaata Siunnersuisoqatigiivisa ilaasortamik akornannit Institut for Menneskerettigheder - Danmarks Nationale Menneskerettighedsinstitution-ip siulersuisuinut ilaasortassaq toqqartassavaat.

 

Kapitali 3
Siunnersuisoqatigiit ilaasortalersugaanerat, aqunneqarnerat allattoqarnerallu

Siunnersuisoqatigiit ilaasortalersugaanerat

§ 3.  Inuit Pisinnaatitaaffiinut Kalaallit Nunaata Siunnersuisoqatigiivi imatut ilaasortalersugaassapput, isummat inuiaqatigiinni inuinnaat soqutigisaqaqatigiiffiini inuit pisinnaatitaaffiinik suliaqartuni atuuttut siunnersuisoqatigiinni takuneqarsinnaassallutik. Taamatuttaaq pisortanit oqartussaasut immikkut attuumassuteqartut siunnersuisoqatigiinnut ilaasortaatitaqassapput.
Imm. 2.  Inuiaqatigiinni inuinnaat soqutigisaqaqatigiiffii pisortallu suliffeqarfii uku tamarmik Inuit Pisinnaatitaaffiinut Kalaallit Nunaata Siunnersuisoqatigiivinut ilaasortassamik ataatsimik toqqaasinnaapput:
1) Meeqqat Inuunerissut – MIBB.
2) Nanu – Nanubψrn.
3) Kalaallit Nunaanni Illersuisut Peqatigiiffiat.
4) Nunatsinni Advokatit.
5) Kalaallit Nunaanni Sulisitsisut Peqatigiiffiat – GA.
6) Kalaallit Nunaanni Innarluutillit Piginnaanikitsut Kattuffiat – KNIPK.
7) Inuit Circumpolar Council - ICC-Kalaallit Nunaat.
8) Ilisimatusarfik.
9) Kalaallit Nunaanni Aalisartut Piniartullu Kattuffiat – KNAPK.
10) Kalaallit Nunaanni Naligiissitaanissamut Siunnersuisoqatigiit.
11) Sulinermik Inuussutissarsiuteqartut Kattuffiat – SIK.
12) Transparency Greenland.
13) Sorlak.
14) Kattuffik Utoqqaat Nipaat.
15) Meeqqat Illersuisuat – Meeqqat Inuusuttullu Oqaloqatiginnittarfiat – MIO.
Imm. 3.  Pisortani oqartussaasut uku tamarmik Inuit Pisinnaatitaaffiinut Kalaallit Nunaata Siunnersuisoqatigiivinut ilaasortassamik toqqaasinnaapput:
1) Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfik – IKINN.
2) Kalaallit Nunaanni Kommunit Kattuffiat – KANUKOKA.
3) Inatsisartut Ombudsmandiat.
Imm. 4.  Institut for Menneskerettigheder – Danmarks Nationale Menneskerettighedsinstitution siunnersuisoqatigiit ataatsimiinnerinut taasisinnaatitaanani peqataasassaaq.
Imm. 5.  Inuit Pisinnaatitaaffiinut Kalaallit Nunaata Siunnersuisoqatigiivinut ilaasortat ukiunut marlunnut toqqarneqartassapput.
Imm. 6.  Siunnersuisoqatigiinnut ilaasortaq ilaasortaaginnarnissaminut pisinnaajunnaarpat soqutigisaqaqatigiiffik ilaasortamik toqqaasimasoq, takukkit imm. 2 aamma 3, piffissap sinneranut ilaasortassamik nutaamik toqqaasinnaavoq.

Aqunneqarnerat

§ 4.  Inuit Pisinnaatitaaffiinut Kalaallit Nunaata Siunnersuisoqatigiivi siunnersuisoqatigiit ilaasortaasa akornanni siulittaasussaminnik aamma siulittaasup tullissaanik nammineerlutik qinersissapput. 
Imm. 2.  Inuit Pisinnaatitaaffiinut Kalaallit Nunaata Siunnersuisoqatigiivisa sulinerminnut suleriaasissat aalajangersassavaat.
Imm. 3.  Ikinnerpaamik ukiumut marloriarluni ataatsimiittoqartassaaq.
Imm. 4.  Inuit Pisinnaatitaaffiinut Kalaallit Nunaata Siunnersuisoqatigiivinut ilaasortat inuiaqatigiinni inuinnaat soqutigisaqaqatigiiffinnut pisortallu suliffeqarfiinut, takuuk § 3, imm. 2, sinniisuusut siulittaasutut aamma siulittaasup tulliatut atuuffinnut taasisinnaatitaapput qinigaasinnaatitaallutillu aamma Institut for Menneskerettigheder-ip siulersuisuinut ilaasortaasinnaatitaallutik.
Imm. 5.  Ilaasortat § 3, imm. 3 malillugu toqqakkat alaatsinaatsullu siunnersuisoqatigiit ataatsimiinnerini peqataasartut, taasisinnaatitaanatillu qinigaasinnaatitaanngillat.
Imm. 6.  Inuit Pisinnaatitaaffiinut Kalaallit Nunaata Siunnersuisoqatigiivi aalajangiisinnaapput soqutigisaqaqatigiiffiit oqartussallu il.il. allat siunnersuisoqatigiit ataatsimiinnerinut alaatsinaatsutut peqataasinnaasut.
Imm. 7.  Inuit Pisinnaatitaaffiinut Kalaallit Nunaata Siunnersuisoqatigiivi ataatsimiinnerit tamanut ammasuunissaanik aalajangiisinnaapput.

Allattoqarfik

§ 5.  Nunanut Allanut Pisortaqarfik Inuit Pisinnaatitaaffiinut Kalaallit Nunaata Siunnersuisoqatigiivinut allattoqarfiussaaq. Allattoqarfik allaffissornikkut aqutsisuussaaq aamma suliamut tunngasunik siunnersuisoqatigiinnut ikiuuttassalluni.

 

Kapitali 4
Aningaasalersugaanerat

§ 6. Inuit Pisinnaatitaaffiinut Kalaallit Nunaata Siunnersuisoqatigiivi Nunap Karsianit tapiissuteqarnikkut aningaasalersugaassapput.
Imm 2.  Nunap Karsianit tapiissuteqartarnikkut pingaartumik siunertaavoq ataatsimiinnerit, taamatuttaaq ataatsimiinnernut atatillugu init, oqalutseqarnerup nerisaqarnerullu kiisalu paasissutissiisarnermut ilinniartitsinermullu atortunut aningaasartuutaajunnartut aningaasalersugaanissaat.

§ 7.  Inuit Pisinnaatitaaffiinut Kalaallit Nunaata Siunnersuisoqatigiivinut ilaasortat siunnersuisoqatigiit ataatsimiinnerinut peqataajartorlutik najukkaminnit aallartariaqartut,  Naalakkersuisunut il.il. ilaasortat aningaasarsiaqartitaanerat il.il. pillugit Inatsisartut inatsisaanni Inatsisartunut ilaasortaanngitsunut aningaasarsiat tapisiallu pillugit malittarisassat malillugit ullormusiaqassapput angalanermullu aningaasartuutinut taarsiivigineqarlutik. Tamakku aningaasartuutigineqartassapput Nunap Karsianit ukiumoortumik tapiissutit iluanni.

 

Kapitali 5
Atuutilerfia

§ 8.  Inatsisartut inatsisaat manna ulloq 1. januar 2013-imi atuutilerpoq.
Imm. 2.  § 2, imm. 2-mi aalajangersagaq Naalakkersuisut tamakku pillugit nalunaarummik saqqummiussineranni atuutilertassaaq.
Imm. 3. Inuit Pisinnaatitaaffiinut Kalaallit Nunaata Siunnersuisoqatigiivi 1. juli 2017-mi nalunaarusiussaaq, tassani Siunnersuisoqatigiit taakkulu sulinerat allatut aaqqissuussinnaanera siunertaralugu Siunnersuisoqatigiit ingerlanneqarnerat siunertaalu nalilersorneqarluni. Tamatuma kingorna Siunnersuisoqatigiit ukiut marlukkaarlugit nutaamik nalunaarusiortassapput.
Imm. 4. Imm. 3-mi taaneqartut nalunaarusiat suliarineqariiginnartulu Inatsisartuni ilaasortanut agguaanneqarnissaa siunertaralugu nalunaarusiat Inatsisartunut tunniunneqassapput.

Kalaallit Nunaanni Namminersorlutik Oqartussat, ulloq 3. december 2012

Kuupik Kleist

---

Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Aappassaaneerinninnermut allannguutissatut siunnersuut (akuerineqartoq)