Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaat nr. 20,  3. december 2012-meersoq

 

Kapitali 1
Atuunneqarfia

§ 1.   Aningaasanik immikkoortitsineqassaaq inuussutissarsiornermi pilersaarutinut inuiaqatigiit aningaasarsiorneranni iluaqusiisinnaasutut nalilerneqartunut, assersuutigalugu tunisassiornerunermik suliffissanillu amerlanerulersitsinernik kinguneqartut, tapiissuteqarfigineqarnissaat siunertaralugu tapiissutitigut aaqqiissutinik aningaasalersuisussanik.
Imm. 2.  Ingerlatsinermut namminermut tapiissuteqartoqarsinnaanngilaq.

§ 2.  Inatsisartut inatsisaat nunami inuussutissarsiutinut tapiissuteqarnernut atuuppoq. Nunami inuussutissarsiutinut ilaapput kiffartuussinerup, takornariartitsinerup, suliffissuaqarnerup, niuernerup, akunnittarfeqarnerup, IT-lerinerup, misigisassarsiortitsilluni inuussutissarsiornerup  assigisaasalu iluanni suliffeqarfiit ingerlatallu allat.
Imm. 2.  Inatsisartut inatsisaat manna malillugu siunertanut inatsisit allat malillugit tapiissuteqartarnermi aaqqiissutinut ilaareersunut tapiissuteqartoqarsinnaanngilaq.

§ 3.  Aallaavittut inuussutissarsiornermi ingerlatanut Kalaallit Nunaanni isumagineqartunut taamaallaat tapiissuteqartoqarsinnaavoq. Taamaattorli pikkorissarnernut imaluunniit atortussanik pisiortornernut Kalaallit Nunaanni neqeroorutaasinnaanngitsunut tapiissuteqartoqarsinnaalluni.

 

Kapitali 2
Inuussutissarsiornermut tapiissutit aningaasatillu immikkut ittut

§ 4.  Aningaasat ukiumoortumik aningaasanut inatsimmi immikkoortinneqartut iluanni tapiissuteqartoqartassaaq.

§ 5.  Tapiissutit qinnuteqareernermi tunniunneqassapput, makkununngalu atatillugu aningaasartuutit uppernarsaasernerini utertinnissaannut neriorsuinikkut:
1)  pilersitsineq amma alliliineq,
2) tunisassianik suleriaatsinillu ineriartortitsineq,
3) niuerfissanik pilersitsineq imaluunniit
4) pilersaarusiorneq.
Imm. 2.  Taamattaaq tapiissutit tunniunneqarsinnaapput aningaasat inuussutissarsiuteqartunik siunnersorneqarnermut atugassanik aningaasat amerlassusii aalajangersimasut neriorsuutiginerisigut, soorlu inatsisilerituumit imaluunniit kukkunersiuisunit ikiorneqarneq.
Imm. 3.  Tapiissuteqarnissamik neriorsuineq erseqqinnerusumik piumasaqaateqarnikkut tunniunneqartassaaq.
Imm. 4.  Imm. 1 aamma 2 malillugit tapiiffigineqarnissamik qinnuteqaat qinnuteqarnissamut  immersugassaq Naalakkersuisunit suliarineqarsimasoq atorlugu suliarineqassaaq, paasissutissanillu tassani piumasaqaatigineqartunik imaqassalluni.

§ 6.  Suliaqarfinnut aalajangersimasunut imaluunniit suliffeqarfinnut immikkut ittunut tapiissuteqartarneq pillugu Naalakkersuisut maleruagassanik aalajangersaasinnaapput, tamakkununnga ilaallutik aningaasaatit aalajangersimasut ilaat ukiumoortumik aningaasanut inatsimmi immikkoortinneqartut tamakkununnga inniminneerneqartassallutik kiisalu suliaqarfinnut imaluunniit suliffeqarfinnut tamakkununnga tapiissuteqarnissaq pillugu neriorsuinissamut piumasaqaatit erseqqinnerusut aalajangersarlugit.

 

Kapitali 3
Piumasaqaatit nalinginnaasut

§ 7.  Inuussutissarsiornermi suliffeqarfinnut pilersaarutinullu namminersortunut, piffissap sivisuup ingerlanerani aningaasarsiornikkut sinneqartooruteqarnissamik siunertaqartunut taamaallaat tapiissuteqartoqarsinnaavoq.
Imm. 2.  Tapiiffigineqarnissamik neriorsuut allanut tunniunneqarsinnaanngilaq imaluunniit eqqartuussutitigut malersuinissamut peqquteqartitsisinnaanani.
Imm. 3.  Pilersaarutinut imaluunniit ingerlatanut pisortat aningaasaataannit allanit tapiissutinik imaluunniit aningaasalersuinermi pissarsisanngitsunut taamaallaat tapiissuteqartoqarsinnaavoq.
Imm. 4.  Tapiissuteqarnissamik neriorsuineq qinnuteqaammi ingerlatsinikkut  inuiaqatigiinnilu aningaasarsiornerup nalilersorneqarnera tunngavigalugu tunniunneqartassaaq. Ingerlatsinermi aningaasarsiornikkut naliliinermi ilaatigut qinnuteqartup suliaqarfitsigut aqutsinikkullu piginnaasaqarfiinik piginnaasaanillu naliliineq, qinnuteqartup aningaasarsiornera niuernermilu pilersaarutaata aalajangersimasup atorsinnaassusia naliliinermi ilanngunneqartassallutik.

§ 8.  Tapiiffigineqarnissamik neriorsuineq inunnut imaluunniit suliffeqarfinnut tigussaasunut Kalaallit Nunaanni najugaqartunut imaluunniit nalunaarsorsimasunut kiisalu Kalaallit Nunaanni tamakkiisumik akileraartussaatitaasunut taamaallaat tunniunneqarsinnaavoq.
Imm. 2.  Tapiiffigineqarnissamik neriorsuineq tunniunneqarsinnaanngilaq, pissarsisussaq imaluunniit aqutsisuni imaluunniit siulersuisuni inuk aqutsisuusoq akileraartarnermi inatsimmik annertuumik unioqqutitsisimasutut imaluunniit Kalaallit Nunaanni pinerluttulerinermi inatsimmi aningaasarsiornermi pinerluuteqarnermut aalajangersakkanik unioqqutitsinermini pineqaatissinneqarsimappat imaluunniit pisortanut amerlasuunik akiitsoqarpat.
Imm. 3.  Neriorsuineq tapiiffigineqarnerlu pillugit qinnuteqartumut Naalakkersuisut qaavatigut piumasaqaateqarsinnaapput atugassaqartinneqarlutillu, kiisalu tamakku pillugit maleruagassanik erseqqinnerusunik aalajangersaasinnaallutik.

 

Kapitali 4
Tapiissutit amerlassusii sivisussusiilu

§ 9.  Tapiissuteqarnissamut neriorsuinermi taaneqassaaq, tapiissuteqarsinnaanermut aningaasat amerlanerpaaffissaat qanoq amerlatigissanersut, kiisalu aningaasat taakku killissaasa iluini anigaasartuutit uppernarsaaserneqarsimasut procentiisa qanoq amerlassuseqarneri utertinneqarsinnaanersut..
Tapiissutit tunniunneqarnissaannut piumasaqaataavoq aningaasartuutit pilersaarummut toqqaannartumik tunngatinneqarsinnaappata, pilersaarutillu isumagineqarnissaanut pisariaqartinneqarpata. Taamattaaq piumasaqaataavoq aningaasartuutit piffissap neriorsuiffiusup aalajangikkap iluani akilerneqartussaasut.
Imm. 2. § 5, imm. 1 malillugu tapiissuteqarnermi pilersaarutip nassuiarneqarnera, tapiiffigineqarnissamik neriorsuinermut tunngaviusimasoq, malillugu aningaasartuutissatut uppernarsaataasut amerlanerpaamik 50 %-iisa amerlaqataat akilerneqarsinnaapput.
Imm. 3. Tapiissutit amerlassusissai neriorsuinerullu sivisussusissaa pillugit Naalakkersuisut maleruagassanik erseqqinnerusunik aalajangersaasinnaapput. 

 

Kapitali 5
Aqutsineq, nalunaarusiortarneq, atorunnaarsitsineq aamma maalaaruteqarneq

Aqutsineq aamma sulianik suliarinnittarneq

§ 10.  Neriorsuinermik aqutsineq tapiissutinillu akiliuteqarneq pillugit kommunalbestyrelsimik imaluunniit suliffeqarfimmik allaffissornermik ingerlataqartumik Naalakkersuisut isumaqatigiissusiorsinnaapput.
Imm. 2.  Imm. 1 malillugu suliffeqarfimmik allaffissornermik ingerlataqartumik isumaqatigiissusiortoqarpat, pisortat ingerlatsineranni sulianik suliarinnittarneq pillugu inatsisartut inatsisaat aamma ingerlatsinermi ammasuunissaq pillugu inatsisartut inatsisaat suliffeqarfiup allaffissornermik ingerlataqartup inatsisartut inatsisaat manna malillugu suliaminik isumaginninnera pillugu atuutsinneqassapput.

Nalunaarusiortarneq aamma paasissutissat pillugit nalunaaruteqartarneq

§ 11. Nalakkersuisut inunnit imaluunniit suliffeqarfinnit tapiiffigineqarnissamik neriorsorneqarsimasunit paasissutissat, uppernarsaatit, takussutissat naatsorsuutillu tapiissutinik akiliinissamut aalajangerniarnermi pisariaqarsinnaasutut nalilerneqartut tamaasa tunniuteqqullugit piumasaqarsinnaapput.
Imm. 2. Naatsorsuutinik saqqummiussisarneq, kukkunersiuineq, nakkutilliineq misissuisarnerlu pillugit maleruagassanik erseqqinnerusunik Naalakkersuisut aalajangersaasinnaapput.

Neriorsuinerup atorunnaarsinnera aamma tapiissutinik utertitsisarneq

§ 12.  Tapiissuteqarnissamik neriorsuinerup atorunnaarsinnissaa imaluunniit tapiissutinik utertitsinissaq pillugu Naalakkersuisut aalajangiisinnaapput, tapiissuteqarfigineqartoq pisussaatitaanani inatsisartut inatsisaat manna malillugu tapiiffigineqarsimappat imaluunniit tapiiffigineqarnissamik neriorsuummik angusaqarsimappat imaluunniit neriorsuummik pissarsisimappat imaluunniit tapiiffigineqarsimappat.
Imm. 2. Ima pisoqarsimatillugu utertitsinissaq piumasaqaatigineqarsinnaavoq:
1)  Tapiissuteqarfigineqartoq piaaraluni imaluunniit annertuumik mianersuaalliornikkut paasissutissanik tapiissutinik pissarsinissamut pingaaruteqartunik eqqunngitsunik imaluunniit pututitsiniutinik tunniussaqarsimappat.
2) Tapiissutinik pissarsinissamut piumasaqaatit pigisimanngippagit.
Imm. 3. Inuit imaluunniit suliffeqarfiit tapiissuteqarfigineqarnissamik neriorsorneqarsimasut, aningaasarsiornermi pissutsinilu allani tapiiffigineqarnissamik neriorsuisimanerup atorunnaarsinneqarnissaanut Naalakkersuisut naliliinissaannut pingaaruteqarsinnaasut annertuumik allanngornerini pillugit Naalakkersuisut nalunaarfigissallugit pisussaaffeqarput.
Imm. 4.  Qinnuteqartoq imaluunniit suliffeqarfik ima iliorsimatillugu tapiiffigineqarnissamik neriorsorneqarneq imminut isumagisumik atorunnaassaaq:
1)  naatsorsuutinik imaluunniit uppernarsaatinik allanik Naalakkersuisut § 10, imm. 1 malillugu pissarsiarisassaat tassani piffissaliussap iluani nassiussinngitsoortoq imaluunniit
2) akiliisinnaajunnaartussatut suliarineqarpat, imminut akisussaajunnaarsitaappat imaluunniit suliffeqarfimmik ingerlatsisinnaanerminik arsaarneqarpat.

Maalaaruteqarneq

§ 13. Inatsisartut inatsisaat malillugu aalajangiinerit allaffissornikkut oqartussanut allanut maalaarutigineqarsinnaanngillat. Tamannattaaq  § 10, imm. 1 malillugu atuuppoq kommunalbestyrelsi imaluunniit allaffissornikkut suliffeqarfik aalajangiisuusimappat.

 

Kapitali 6
Pineqaatissiinerit aamma atuutsilerfissaa assigisaallu

§ 14.  Kinaluunniit piaaraluni imaluunniit annertuumik mianersuaalliornikkut ima iliortoq Kalaallit Nunaanni Pinerluttulerinermi inatsit malillugu pineqaatissinneqarsinnaavoq:
1)  Pisussaatitaanani tapiiffigineqarnissamik neriorsorneqarnissaq imaluunniit tapiissutinik akiliiffigineqarnissaq anguniarlugu paasissutissanik eqqunngitsunik imaluunniit pututsitsiniutinik tuniussisoq imaluunniit paasissutissanik nipangiussisimasoq.
2) Tapiissutinik tunniunneqarsimasunik tamatumunnga piumasaqaatit unioqqutillugit atuisoq.
Imm. 2.  Inatsisartut inatsisaanni maleruagassiat malillugit Kalaallit Nunaanni Pinerluttulerinermi Inatsimmi malittarisassat malillugit akiliisitsinermik pineqaatissiinissaq aalajangersarneqarsinnaavoq.
Imm. 3.  Inatsisartut inatsisaanni imaluunniit inatsisit malillugit aalajangersagaq malillugu akiliisitsinissamik pineqaatissiisarnissamut pisinnaatitsineqarpat, Kalaallit Nunaanni pinerluttulerinermi inatsimmi § 17 malillugit akiliisitsineq inummut inatsisinut attuumassuteqartumut tutsinneqarsinnaavoq.
Imm. 4.  Inatsisartut inatsisaat manna malillugu imaluunniit inatsisartut inatsisaat malillugit maleruagassat aalajangerneqarsimasut malillugit akiliisitsinermik pineqaatitsiissutit landskarsimut nakkartinneqassapput.

§ 15.  Inatsisartut inatsisaata atuutilerfigissavaa 1. januar 2013.
Imm. 2.  Tamanna ilutigalugu takornariartitsinermik inuussutissarsiuteqarnerup nunamilu inuussutissarsiornerup iluanni inuussutissarsiornermik siuarsaanissaq pillugu inatsisartut inatsisaat nr. 14, 12. november 2001-imeersoq, inatsisartut inatsisaatigut nr. 10, 14. november 2004-meersukkut allanngortinneqarsimasoq atorunnaassaaq.
Imm. 3. Takornariartitsinermik inuussutissarsiornerup nunamilu inuussutissarsiornerup iluanni inuussutissarsiornermik siuarsaanissaq pillugu inatsisartut inatsisaanni pisinnaatitsissutitut maleruagassat atorunnaarsinneqarnissaasa tungaannut atuutiinnassapput.
Imm. 4. Taarsigassarsinissamut neriorsuutit, qularnaveeqqusiinerit imaluunniit tapiiffigineqarnissamik neriorsuutit takornariartitsinermik inuussutissarsiornermut aningaasaliissutissatut tapiissutit pillugit inatsisartut inatsisaanni nr. 15, 31. oktober 1996-imeersumi pisinnaatitsineqarluni tunniunneqarsimasut, nunami inuussutissarsiutinut aningaasaliissutissatut tapiissutit pillugit inatsisartut inatsisaat nr. 20, 30. oktober 1998-meersoq aamma takornariartsitsinermik inuussutissarsiuteqarnerup nunamilu inuussutissarsiuteqarnerup iluanni inuussutissarsiutinik siuarsaanissaq pillugu inatsisartut inatsisaat nr. 14, 12. november 2001-imeersoq suli atuupput, inatsisartullu inatsisaat manna malillugu naleqqussarneqarlutik.

Namminersorlutik Oqartussat, ulloq 3. december 2012

Kuupik Vandersee Kleist

---

Siunnersuummut nassuiaatit

Isumaliutissiissut (Aappassaaneerinninneq)