Tunngaviusumik atuarfiit namminersortitat angerlarsimaffimmilu atuartitaaneq il.il. pillugit Inatsisartut inatsisaata allanngortinnissaa pillugu Inatsisartut inatsisaat nr. 18. 3. December 2012-imeersoq.
(Tapiissutit naatsorsorneqartarnerat, PPR aamma annertusisamik immikkut atuartitsineq il.il. pillugit kommunip nassuiaataanut tunngatillugu sunniutit allannguutaat)

 

§ 1

Tunngaviusumik atuarfiit namminersortitat angerlarsimaffimmilu atuartitaaneq il.il. pillugit Inatsisartut inatsisaanni nr. 10, 15. april 2003-meersumi, Inatsisartut inatsisaat nr. 16, 20. november 2006 aqqutigalugu allanngortinneqartumi, allannguutit makku ilanngunneqassapput:

1.  § 4, imm. 2 imatut oqaasertalerneqassaaq:
”Imm. 2.  Kommunimi tunngaviusumik atuarfiup namminersortitap najugaqarfiani kommunalbestyrelse atuartunut tunngaviusumik atuarfimmi namminersortitami atuartunut akeqanngitsumik perorsaanermut tarnillu pissusaannut tunngatillugu siunnersuisassaaq.”

2.  14, imm. 3-p kingorna ilanngunneqassaaq:
” Imm. 4. Tunngaviusumik atuarfinni namminersortitani atuartut amerlassusaasa ikinnerpaaffilerneqarnissaat pillugu Naalakkersuisut maleruaqqusaliorsinnaapput, taamaattoq tak. § 23 aamma § 29”.

3.  § 16, imm. 1-imi imm. 2 imatut oqaasertalerneqassaaq:
” Atuartumut ataatsimut tapiissutit 2013-imi qaffasissusaat 32.000 kr.-upput. Kommuninut ataatsimoortumik tapiissutit aqqutigalugit aningaasarsianik akinillu aaqqiisarneq assigalugu tapiissutit ukiut tamaasa naleqqussarneqartassapput.”

4.  § 16, imm. 2 imatut oqaasertalerneqassaaq:
” Imm. 2.  Kommunip tunngaviusumik atuarfiup namminersortitap najugaqarfiata annertusisamik immikkut atuartitsinermut allatullu immikkut perorsaanermi siunnersuinermut, atuartumut perorsaanermut tarnillu pissusaannut tunngatillugu siunnersorneqarnissamik innersuunneqartariaqarsimasumut, aningaasartuutit akilerallassavai, tak. § 4, imm. 2.”

5.  § 28-p kingorna ilanngunneqassaaq:
”§ 29.  Maleruaqqusat § 14, imm. 4 naapertorlugu aalajangersarneqartut, maleruaqqusat atuutsinneqalernerisa kingorna atuarfinnut pilersinneqartunut, taamaallaat sunniuteqassapput.”

6.  Inatsimmi tamarmi oqaaseq “Landsstyret” imatut allanngortinneqassaaq: “Naalakkersuisut”.

 

§ 2

Inatsisartut inatsisaat atuutilerpoq ullormi 1. januar 2013.

Namminersorlutik Oqartussat, ulloq 3. december 2012

Kuupik Kleist

---

Siunnersuummut nassuiaatit

Isumaliutissiissut (Aappassaaneerinninneq)