|
|
||
|
|
http://www.nanoq.gl/Emner/Landsstyre/ Kundegoerelse_Lovgivning/2012.aspx-imi ulloq 3. december 2012-mi saqqummersinneqartoq |
|
|
|
||
Atuarfik pillugu Inatsisartut inatsississaattut siunnersuut nr. 15, 3. December 2012-imeersoq
Kapitali 1
Nassuiaataa§ 1. Atuarfik tassaavoq kommunip atuarfiutaa, § 31, imm. 1 aamma 2 naapertorlugu meeqqanut inuusuttunullu atuartinneqartussaatitaasunut akeqanngitsumik ukiuni10–ni atuartitsinissamik neqerooruteqartoq, tak. § 31, imm. 3.
Kapitali 2
Atuarfiup siunertaa tunngavialu§ 2. Atuarfiup angerlarsimaffik suleqatigalugu pisussaaffigaa
1) ilikkagassanik pisinnaasassanillu pisariaqartunik tamanik atuartoq inooqataanikkut tunuliaqutai apeqqutaatinnagit pissarsitissallugu,
2) atuartup piginnaasai ineriartortissallugit, peqqissutsikkut, inooqataanikkut misigissutsitigullu inerikkiartorneq ilaatillugu,
3) atuartup toqqissisimasumik namminersortumillu inooqataalernissaanut peqataassalluni,
4) tatisimaneqanngitsumik isumaliorsinnaaneq akaarinninnerlu atuartumi siuarsassallugit,
5) atuartut akornanni aamma ilinniartitsisut atuartullu akornanni akisussaaqatigiinneq suleqatigiinnerlu nukittorsassallugit kiisalu,
6) atuartut immikkut pisariaqartitallit immikkut isiginiarneqassasut.
Imm. 2. Atuarfiup ilikkartitsiniarnermini avatangiisit peqqinnartut toqqissisimanartullu neqeroorutigissavai, taamaasiornermigullu atuartup namminersortumik eqqarsarsinnaanera, akuersaaginnarani nammineq isummersinnaassuseqarnerminik piginnaassusai, isummaminik, nammineq isiginnittaatsiminik misigissutsiminillu oqaatiginnissinnaassuseqarnera kiisalu anguniakkaminik angusiniarsinnaassutsimigut, allanngortitseriarsinnaassutsimigut, tunniussimassutsimigut pilersitseriarsinnaassutsimigullu piginnaasai siuarsassallugit.
Imm. 3. Atuarfiup atuartitsinermini atuartoq piginnaasassanik, suleriaatsinik atuagarsornikkullu piginnaasassanik iluaqutaasussanik pissarsinissamut periarfississavaa, taakkununnga ilaatinneqassapput atuartup piginnaasaminik ineriartortitsisinnaanissaa, ilinniagaqarnissamut inuutissarsiutitaarnissamullu piareersarneq kiisalu tamatigoortumik saqqummiusseriarsinnaaneq oqaatsinillu piginnaasat tamatigoortut.
Imm. 4. Atuarfiup ulluinnarni ingerlatsinini sulininilu imatut sinaakkusersussavaa, atuartoq imminut naleqartinnerminik, imminut tatiginerminik, suleqateqarsinnaassuseqarnerminik, akisussaassuseqarnerminik inunnullu allanut ataqqinninnerminik ineriartortitsisinnaalersillugu.
Imm. 5. Atuarfiup suliamini tamani atuartup inuiaqatigiinni kinaassutsiminik, kulturiminik pingaartitaminillu paasinninnerminik ilisimasaminillu ineriartortitsinissaa tunngavilissavaa, inuiaat allat kulturiinik ilisimasaqarnera paasinnissinnaaneralu ineriartortissavaa, oqartussaaqataanermik eqqarsartaatsimut iseriartuaartinneqarnissaa isumagissavaa kiisalu oqartussaaqataanerminut, pisinnaatitaaffeqarnerminut, pisussaaffeqarnerminut inuiaqatigiillu ineriartornerannut pinngortitamullu naleqqussarniarnerminut atuartup nammineq akisussaaqataanerminik paasinnissinnaanera ineriartortissallugu.§ 3. Atuartitsinerup pitsaassusianik naliliinissamik aamma atuartitsinerup pitsaassusianik nalileeriaatsinik aallaavissanik Naalakkersuisut kommunalbestyrelse peqatigalugu atuarfiup siunertaa tunngavialu naammassineqarsimanersut takuniarlugu piumasaqarsinnaapput.
Imm. 2. Atuartitsinerup pitsaassusianik nalileeriaatsinik Naalakkersuisut imm. 1 malillugu malittarisassanik aalajangersaasinnaapput.
Kapitali 3
Atuarfiup ilusaa annertussusaalu
Immikkoortui sivisussusaalu§ 4. Atuarfik ukiuni 10-ni atuarfiuvoq alloriarfinnut pingasunut agguarsimasoq, tassaasut ukiuni 3-ni nukarlerni, ukiuni 4-ni akullerni kiisalu ukiuni 3-ni angajullerni atuarfiusoq.
§ 5. Alloriarfinni ataasiakkaani atuartut klassinut ukioqatigiiaanut imaluunniit ukioqatigiiaanngikkaluanut agguaanneqassapput atuartitsissutinilu ataasiakkaani atuartitsissutinillu akimuilluni ingerlatitsiffiusuni ingerlaqatigiinnilu nikerartuni, alloriarfimmi pineqartumi klassinit ataasiakkaanit arlalinnilluunniit atuartulinnik katitigaasuni atuartinneqassallutik, atuartut ataasiakkaat ilikkagassatut anguniagassanut naleqqiullugu pisariaqartitaat soqutigisaallu aallaavigalugit, tak. § 14, imm. 2, § 18 aamma 19. Aaqqissuussinermi atuartut piginnaasaannik tunngaveqarluni immikkoortitsineq aallaaviussanngilaq.
Imm. 2. Atuartut alloriarfiit akimorlugit klassinut ingiaqatigiinnullu (holdinut) inissinneqarsinnaassapput, atuartut ukiumikkut agguataarnerisa tamanna periarfissaqartippassuk. Aaqqissuussinermi atuartut piginnaasaannik tunngaveqarluni immikkoortitsineq aallaaviussanngilaq.
Imm. 3. Klassinik pilersitsinermi anguniarneqassaaq atuartut kalaallisut ilitsoqqussaralugu oqaasillit aamma atuartut kalaallisut ilitsoqqussaralugu oqaasiliunngitsut, atuartut tamarmik amerlassusaannut naapertuuttumik agguaanneqarnissaat.§ 6. Klassimi ataatsimi atuartut amerlassusaasa ukiup atuarfiusup aallartinnerani 26 qaangissanngilaat.
Atuartitsinerup sivisussusia§ 7. Piffissaq atuartut atuartinneqarfissaat tiimit atuartitsiffiusut 60 minutsikkaartut tunngavigalugit ukiumoortumik naatsorsorneqartassaaq.
Imm. 2. Nukarlerni ukiuni atuartitsiffiusuni 3-ni tamani atuartut ukiumut minnerpaamik nalunaaquttap-akunnerini 700-ni atuartinneqartassapput. Akullerni atuartut ukiut atuartitsiffiusut 4-anni minnerpaamik nalunaaquttap-akunnerini 890-ini, ukiut atuartitsiffiusut 5-aanni minnerpaamik nalunaaquttap-akunnerini 920-ni, ukiullu atuartitsiffiusut 6-anni 7-annilu minnerpaamik nalunaaquttap-akunnerini 970-ini atuartinneqartassapput. Angajullerni atuartut pinngitsoorani atuartitsissutini, ukiut atuartitsiffiusut 8-anni, minnerpaamik nalunaaquttap-akunnerini 880-ini, ukiut atuartitsiffiusut 9-anni minnerpaamik nalunaaquttap-akunnerini 910-ni kiisalu ukiut atuartitsiffiusut 10-anni minnerpaamik nalunaaquttap-akunnerini 920-ni atuartinneqartassapput.
Imm. 3. Imm. 2-mi aalajangersakkat sanioqqunneqarsinnaapput, atuartut ingerlaqatigiinni (holdimi) amerlassusaasa pisariaqartippassuk.
Imm. 4. Sapinngisaq naapertorlugu piffissap atuartut atuartinneqartarfissaata, ukiup atuarfiusup sapaatip-akunneranut sapaatip-akunneratalu ulluinut oqimaaqatigiissumik agguataarneqartarnissaa anguniarneqassaaq, tak. § 8, imm. 1-3.
Ukiup atuarfiusup sivisussusaa§ 8. Ukioq atuarfiusoq 1. august aallartittassaaq, ullullu atuarfiusussat 200-niit 240-nut amerlassuseqassallutik, atuartitsinerlu sapaatip-akunnerata ulluini siullerni 5-ni imaluunniit ulluini siullerni 6-ni pisassaaq.
Imm. 2. Immikkut aaqqissukkanik pikkorissartitsilluni ingerlatsinermi, atuartitsissutit akimorlugit ingerlatsinermi, sammisanillu aalajangersimasunik qulequtsiilluni, piareersariikkanik anguniagaqarluni, periutsillu taakku assigisaannik atuartitsissutinik ingerlatsinermi, atuarfiit sapaatip-akunneranut ulluni 5-ni atuartitsiffiusartut sapaatip-akunnerisa ulluisa 6-at atuartitsivigisinnaavaat taamaattoqassappat atuarfik ukiup atuarfiusup aallartinnissaa sioqqullugu tamanna pillugu pilersaarusioreersimassaaq.
Imm. 3. Atuartitsineq sivikinnerpaamik sapaatip-akunnerini 36-ni sivisunerpaamillu sapaatip-akunnerini 40-ni ingerlanneqartassaaq.
Imm. 4. Naalakkersuisut atuanngiffissanik pilersaarusiaq, sumiiffinni ataasiakkaani atuanngiffissat pilersaarusiornerannut malittarisassanik aalajangersaassapput.
Kapitali 4
Atuartitsinerup imarisai, aaqqissorneqarnera piareersarneqarneralu
Atuartitsinermi oqaatsit§ 9. Atuartitsinermi oqaatsit tassaapput kalaallit qallunaallu oqaasii.
Imm. 2. Atuartut oqaatsinik ilikkartinniarneqarnerannut ilaatillugu tuluit oqaasii aammattaaq ilinniartitsinermi atorneqarsinnaapput.
Atuartitsinerup imaaaaqqissorneqarneralu§ 10. Alloriarfinni tamani – atuartitsissutinut ataasiakkaanut immikkoortiterilluni aamma immikkoortiterinani - atuartitsineq pissaaq, tak.§§ 11 - 13 atuartitsissutit qanitariissut makku iluanni:
1) oqaatsit, tassaallutik kalaallit oqaasii, qallunaat oqaasii, tuluit oqaasii kiisalu allamiut oqaasiisa pingajui,
2) kulturimik inuiaqatigiillu pillugit sammisaqarneq, tassaallutik inuiaqatigiilerineq kiisalu upperisalerineq isumalioqqissaarnerlu,
3) matematikki pinngortitarlu, tassaallutik matematikki pinngortitalerinerlu,
4) inuttut inerikkiartorneq, tassaallutik peqqinneq, inooqatigiinnikkut misigissutsikkullu ilikkagaqarniarneq, ilinniagaqarnissamik inuutissarsiutissamillu qinersiniarnermi paasisitsiniaaneq aamma tarnikkut inuttullu inooqatigiinneq pillugu sammisassat, kiisalu
5) sumiiffinni ataasiakkaani ilinniartitsissutissatut toqqakkat mernguernartulerinerup iluaniittut, kiisalu kulturikkut, inuttut inooqatigiinnikkut inuutissarsiutinullu tunngassuteqartunik peqataanerit.
Imm. 2. Atuartitsissutini ataasiakkaani aamma atuartitsissutini qanitariissuni tamani mernguernartulerineq ilikkartitsiniarnermi ikorfartuutitut ilaatinneqassaaq.
Imm. 3. Atuartitsissutini ataasiakkaani aamma atuartitsissutini qanitariissuni tamani IT atuartitsinerup ilaatut atuartitsinermilu atortutut ilaatinneqassaaq.
Imm. 4. Alloriarfinni tamani atuartitsinerup ingerlanneqartup ilaa atuartitsissutit akimorlugit ingerlatsinertut, aalajangersimasunik qulequtaqarluni sammisaqartitsinermi piareersariikkanillu anguniagaqarluni atuartitsinertut ingerlanneqartassaaq.
Imm. 5. Atuartitsinerup ilaa unnuinngikkaluarluni paasisassarsiorluni angalanertut aamma unnuinertalimmik tammaarsimaarnertut atuaqatigiillu angalaaqatigiinnerisut aaqqissuunneqarsinnaavoq.
Imm. 6. Atuartitsinermut nalinginnaasumut taarsiullugu atuarfik angalanernik unnuinertalinnik ingerlatsinissamut periarfissiisinnaavoq.
Imm. 7. Sapaatip-akunnerata ulluini siullerni tallimani, nal. 8-miit 16-imut, atuartut, imm. 1-imi atuartinneqarnerup eqqartorneqartup nalinginnaasup saniatigut, perorsaaneq tunngavigalugu namminneq piumassusertik naapertorlugu peqataaffigineqarsinnaasaminnik neqeroorfigineqarsinnaapput.
Nukarlerni atuartitsineq§ 11. Nukarlerni atuartitsineq aaqqissuunneqassaaq meeqqanut suli atualinngitsunut sammisat nangillugit.
Imm. 2. Nukarlerni atuartitsissutit qanitariissut ukuupput:
1) oqaatsit tassaasut kalaallit qallunaallu oqaasii,
2) kulturi aamma inuiaqatigiit tassaasut inuiaqatigiilerineq aamma upperisalerineq isumalioqqissaarnerlu,
3) matematikki pinngortitarlu tassaasut matematikki pinngortitalerinerlu,
4) inuttut inerikkiartorneq, kiisalu
5) atuartitsissutit qanitariissut ilinniartitsissutissat sumiiffinni ataasiakkaani toqqagassat.
Imm.3. Oqaatsinik atuartitsinermut aammattaaq ilaassapput allamiut oqaasiinik piginnaasaannik inerisaaniarluni pilersitsiffiusumik sammisaqartitsineq. Atuartitsissutini qanitariissuni oqaatsini oqaatsit allat sammineqarsinnaapput.
Akullerni atuartitsineq§ 12. Akullerni atuartitsissutit qanitariissut ukuupput:
1) oqaatsit tassaasut kalaallit, qallunaat tuluillu oqaasii kiisalu allamiut oqaasiisa pingajui,
2) kulturi inuiaqatigiillu tassaasut inuiaqatigiilerineq aamma upperisalerineq isumalioqqissaarnerlu,
3) matematikki pinngortitarlu tassaasut matematikki pinngortitalerinerlu,
4) inuttut inerikkiartorneq kiisalu
5) ilinniartitsissutissat sumiiffinni ataasiakkaani toqqagassat.
Imm. 2. Oqaatsinik atuartitsinermut ilaassinnaapput oqaatsit allat.
Imm. 3. Atuartut akullerni atuartut siunnersorneqassapput ilinniagaqarnissamut suliffissatullu qinigassat pillugit.
Angajullerni atuartitsineq§ 13. Angajullerni atuartitsissutit qanitariissut ukuupput:
1) oqaatsit tassaasut kalaallit, qallunaat tuluillu oqaasii aamma toqqakkatut allamiut oqaasiisa pingajui,
2) kulturi inuiaqatigiillu tassaasut inuiaqatigiilerineq aamma upperisalerineq isumalioqqissaarnerlu,
3) matematikki pinngortitarlu tassaasut matematikki pinngortitalerinerlu,
4) inuttut inerikkiartorneq, kiisalu
5) sumiiffinni ataasiakkaani toqqagassat.
Imm. 2. Pinngortitalerinermik atuartitsinermi, tak. imm. 1, nr. 3, immikkut atuartitsissutaassapput fysik/kemi, uumassuseqartulerineq aammalu pinngortitaleriffiusumik nunalerutit.
Imm. 3. Atuartut angajullerni atuartut siunnersorneqassapput ilinniagaqarnissamut suliffissatullu qinigassat pillugit.
Alloriarfinni ataasiakkaani siunertat, atuartitsissutit siunertaat, ilikkagassatut pilersaarutit, ilitsersuutit kiisalu nalunaaquttap-akunneri atuartitsinermi atugassat§ 14. Naalakkersuisut alloriarfinni ataasiakkaani atuartitsinermi anguniagassat pingaarnerit aalajangersassavaat aammalu § 10, imm. 1, nr. 1-imiit 3-mut eqqartorneqartuni atuartitsissutini kiisalu atuartitsissutini qanitariissuni § 10, imm. 1, nr. 4-mi 5-imilu taaneqartuni siunertassat ilanngullugit aalajangersassallugit.
Imm. 2. Naalakkersuisut atuartitsissutinut § 10, imm. 1, nr. 1-3-mi aamma atuartitsissutinut qanitariissunut § 10, imm. 1, nr. 4-mi eqqaaneqartunut ilikkagassatut pilersaarutinik, kiisalu atuartitsissutinut qanitariissunut § 10, imm. 1, nr. 5-imi eqqaaneqartunut ilitsersuutaasumik ilikkagassatut pilersaarutinik suliaqassapput. Alloriarfinni ataasiakkaani atuartitsinermi anguniagassat pingaarnerit atuartitsissutillu kiisalu atuartitsissutit qanitariissut siunertaasa saniatigut, takuuk imm. 1, ilikkagassatut pilersaarutit imarivaat alloriarfinni ataasiakkaani ilikkagassatut anguniagassat, atuartitsinermik ilitsersuutit aamma naliliisanermik ilitsersuutit.
Immikkut ittumik atuartitsineq aamma allatut immikkut perorsaanikkut ilinniartitsinikkullu ikiorsiisarneq§ 15. Atuartut piginnaasamikkut ajornartorsiuteqarnertik pissutigalugu nalinginnaasumik atuartitsinerup iluani immikkut ikiorserneqarnissaminnik pisariaqartitsinerat tunniunneqarsinnaanngippat, immikkut atuartinneqassapput allatullu annertusisamik immikkut perorsaanikkut ikiorserneqassallutik.
Imm. 2. Atuartut atuarfimmi, imm.1 malillugu, naammattumik ikiorserneqarfigisinnaanngisaminni atuartuusut, atuartut angerlarsimaffiini, atuartunut inissiani atuarfinniluunniit najugaqarfiusuni immikkut aaqqissuussani § 25-mi eqqaaneqartuni najugaqarnissaminnik neqeroorfigineqassapput.
Imm. 3. Immikkut atuartitsineq aamma allatut immikkut perorsaanikkut ikiorsiineq malit-tarisassanik Naalakkersuisut aalajangersagaannik tunngaveqarluni aallartisarneqassapput, taamaaliornermi malittarisassat §§-ini 7, 8, 10, 11, 12, 13, 14, imm. 2 aamma 22, imm. 1-6-imi eqqartorneqartut sanioqqutaarneqarsinnaapput.
Naammattusaammik aamma ilitsoqqussaralugu oqaatsinik atuartitsineq§ 16. Atuartunut atuartitsissutini ataasiakkaani arlalinniluunniit nalinginnaasumik atuartitsinermut malinnaasinnaanngikkallartunut naammattusaammik atuartitsisoqarsinnaavoq makku peqqutaappata:
1) atuartup sivisunerusumik atuartitaasimannginnera imaluunniit napparsimaneq peqqutigalugu atuartinneqarsimanera amigarsimappat,
2) atuarfimmit atuartitsinerup imarisaasigut, periusaasigut annertussusaasigulluunniit, atuarfigiligaanut naleqqiullugu annertuumik allaassuteqartumit nuussimappat,
3) nunatsinnut nuuttuuppat kalaallillu oqaasiinik ilisimasaqariinngippat.
Imm. 2. Naalakkersuisut imm. 1 malillugu atuartitsineq pillugu malittarisassanik aalajangersaasinnaapput.§ 17. Atuartut kalaallisut qallunaatulluunniit ilitsoqqussaralugu oqaaseqanngitsut ilitsoqqussaralugu oqaatsiminnik atuartitaanissaminnik neqeroorfigineqarsinnaapput.
Atuartitsinerup aaqqissorneqarnera§ 18. Atuartitsissutini tamani atuartitsinerup aaqqissorneqarnera, atuartitseriaatsit suleriaatsillu atorumasat ilanngullugit, periutsit, atuartitsinermilu atortut atortussanillu atugassanik toqqaasarneq atuarfiup siunertaanut, alloriarfiit ataasiakkaat siunertaannut, atuartitsissutit ataasiakkaat atuartitsissutillu qanitariissut siunertaannut aamma ilikkagassatut pilersaarutinut naapertuuttuussapput. Atuartitsineq allanngorartuussaaq, atuartut ataasiakkaat pisariaqartitaannut piginnaariigaannullu naapertuuttuussalluni.
Imm. 2. Atuarfiup pisortaata atuartitsinerup pilersaarusiorneqarnermigut aaqqissuunneqarnermigullu atuartunut tamanut unamminartoqartinneqarnissaa qularnaassavaa.
Imm. 3. Atuartitsitsissutini tamani ilinniartitsisoq atuartorlu suleqatigiillutik ingerlaavartumik anguniagassaliortassapput. Atuartup sulinissaa anguniagassaliarisimasat tunngavigalugit aaqqissuunneqartassaaq. Suleriaatsinik, periutsinik aamma sammisassanik toqqaanerit aalajangersaanerillu ilinniartitsisut atuartullu suleqatigiinnerisigut ingerlanneqartassapput.
Iliuusissanik pilersaarutit aamma atuartut mappii§ 19. Atuartup ilinniartitsisorisani isumasioqatigalugit iliuusissani pilersaarusiussavai, pilersaarusiarlu ingerlaavartumik naliliinermut ilaatinneqassaaq, tak. § 22, imm. 1 aamma 2, taannalu atuartup atuartinneqarnerata ilinniagaqaqqinniarneratalu ingerlateqqinneqarnissaanut tunngaviussaaq.
Imm. 2. Iliuusissanik pilersaarummi naliliinerni angusat aamma iliuuseqarnissami piviusunngortissallugit aalajangiussat ilaassapput. Atuartut atuarunnaartussat eqqarsaatigalugit iliuusissanik pilersaarutit atuartup siunissami ilinniagaqarnissamut suliffissaqarnissamullu anguniagai pillugit paasissutissanik imaqassapput, tassunga ilanngullugit anguniakkat angunissaannut piumasaqaataasut.§ 20. Atuarfiup pisortaata qulakkiissavaa atuartup mappiata atuartumut ataasiakkaamut nutartertuarnissaa atuartoq malinnaaffigisinnaanngorlugu piaartumik immikkut iliuuseqarnissaq pisariaqarpat pisinnaanngortillugu soorlu ilinniarnermi ajornartorsiuteqartoqarpat, ilikkagassatigut amigaateqartoqarpat imaluunniit inooqataanikkut ajornartorsiortoqarpat.
§ 21. Naalakkersuisut iliuusissanik pilersaarutit aamma atuartut mappii pillugit malittarisassanik aalajangersaassapput.
Naliliineq uppernarsaasiinerlu§ 22. Atuartitsinermut ilaatillugu atuartut ataasiakkaat atuartinneqarnerminnit pissarsiaat ingerlaavartumik nalilerneqartassapput. Naliliinerup aallaavigisassavaa atuartup nammineq naliliinera, atuartitsinerullu pilersaarusioqqinneranut aamma atuartumut taassumalu angajoqqaavinut atuartup atuaqqinnissaanut, ilinniagaqaqqinnissaanut inuutissarsiutigiumaagassaminillu qinigaqarnissaanut siunnersuinissamut tunngaviussalluni.
Imm. 2. Atuartut angajoqqaallu, tak. § 34, atuartup atuarnermini pissarsiaqarnera pillugu atuarfiup naliliineranik akuttunngitsumik nalunaarfigineqartassapput. Tassunga atatillugu atuartup ilinniartitsisorisani isumasioqatigalugit iliuusissatut pilersaarusiarisimasaa oqaloqatigiissutigineqartassaaq § 19 naapertorlugu.
Imm. 3. Atuartup atuarnermini ingerlariaqqinnissaa pillugu pilersaarusiornissamut tunngaviusussamik nukarlerni akullernilu atuarnerup naammassereernerani, atuartup atuarnermini pissarsiai nalilerneqartassapput. Naliliinermi ilaatinneqassapput ingerlaavartumik naliliinerup inerneri aamma atuartup naliliinerup nalaani atuartitsinermi piginnaasassatigut killifffii.
Imm. 4. Atuartup atuartitaanermini pissarsiai uppernarsaaserumallugit angajullerni atuarneq atuartup atuarnermini pissarsiaanik ataatsimoortumik naliliinermik inaarneqartassaaq. Naliliinermi angajullerni atuarsimanermi ingerlaavartumik nalilerneqartarnerit inerneri ilaatinneqassapput taamatullu atuartitsissutini atuartup peqataaffiini tamani atuartup killiffii ilaatinneqassallutik.
Imm. 5. Angajullerni atuarnerup naammassinerani atuarfik atuarsimanermik uppernarsaasiussaaq. Uppernarsaammi paasissutissiissutigineqassapput atuartitaaneq qanoq ittoq atuartup peqataaffigisimaneraa aamma atuartup atuartitaanermini ataatsimoortumik pissarsiaasa nalilerneqarnerisa inerneri, tak. imm.4, kiisalu paasissutissat pisariaqartut allat atuartup naliliinermut tamakkiisumut ilanngukkumasai.
Imm. 6. Atuartunut § 31, imm. 3 tunngavigalugu klassit 9-aanni atuareernerup kingorna atuartuujunnaarsinnaanermik akuerineqarsimasunut atuarsimanermik uppernarsaammik aamma nalunaarusiortoqassaaq paasissutissiissutigineqarlunilu atuartitaaneq qanoq ittoq atuartup peqataaffigisimaneraa aamma atuartup angajullerni atuartitaanermini ataatsimoortumik pissarsiaasa nalilerneqarnerisa inerneri, kiisalu paasissutissat pisariaqartut allat atuartup naliliinermut tamakkiisumut ilanngukkumasai.
Imm. 7. Naalakkersuisut ingerlaavartumik naliliisarneq pillugu erseqqinnerusumik malittarisassiussapput, tak. imm. 1, atuartut aamma angajoqqaat nalunaarfigineqartarnerat, tak. imm. 3 aamma 4 kiisalu imm. 5 aamma imm. 6-imi taaneqartutut atuarsimanermik uppernarsaatit imarisassaat ilusissaallu.§ 23. Nukarlerni akullernilu misitsinnerni aamma angullerni inaarutaasumik misitsinneri atuarfiit immikkut angusaat kommunalbestyrelsep tamanut saqqummiuttassavai. Tamanut saqqummiussinermi inunnut ataasiakkaanut tunngassuteqartut takuneqarsinnaassanngillat.
Klasselæreri§ 24. Klassit tamarmik ataatsimik klasselærereqassapput, taassumalu atuartup angerlarsimaffia atuartullu ilinniartitsisui allat suleqatigalugit atuartup atuarnerata anguniagassartaliornera pilersaarusiorneralu akisussaaffigissavai.
Imm. 2. Klasselærerip akisussaaffigaa, klassimi ataatsimooqatigiinnerup atuartut tamarmik toqqissinartumik aallaaveqarlutik atuarnissaannut aallaaviunissaa.
Atuartunut angerlarsimaffiit, atuartunut inissiat atuarfiillu najugaqarfiusut immikkut aaqqissuussat§ 25. Atuartut tamarmik inatsit manna malillugu atuartitaanissamik neqeroorfigineqarnissaat qulakkeerumallugu, pisariaqartitsineq naapertorlugu atuartunut angerlarsimaffiit aamma atuartunut inissiat atuarfinnut pioreersunut atasut pilersinneqassapput.
Imm. 2. Atuartut angerlarsimaffiinut inissiineq angajoqqaat, tak. § 34, qinnuteqarnerat tunngavigalugu aamma atuartup atuarfiullu isumasioqatigeereernerisigut pisassaaq.
Imm. 3. Atuartunut angerlarsimaffinni atuartunullu inissiani najugaqarneq angajoqqaanut akeqanngilaq.
Imm. 4. Atuarfinni najugaqarfiusuni immikkut aaqqissuussani najugaqalersinneqarsinnaapput atuartut innarluutillit, atuaqqinnissaq/sungiusaqqinnissaq siunertaralugu angerlarsimaffiup avataaniinnissaq taakkununnga annertuumik iluaqutaasussatut isigisariaqarpat.
Imm. 5. Atuarfinni najugaqarfiusuni immikkut aaqqissuussani najugaqarneq angajoqqaanut akeqanngilaq.
Imm. 6. Imm. 4-mi taaneqartunut atuarfinnut najugaqarfiusunut immikkut aaqqissuussanut atuartunik najugaqalersitsinermi aamma agguataarinermi kiisalu kommuniisa akiliisarnissaat pillugu Naalakkersuisut erseqqarissumik aalajangersaassapput.
Atuartitsinermi atortussat§ 26. Atuartitsinermi atortussat pisariaqartinneqartut atuartunut akeqanngitsumik atugassanngortinneqassapput.
Atuarfinni atuakkanik atorniartarfiit§ 27. Atuarfinni ataasiakkaani tamani atuakkanik atorniartarfinnik pilersitsisoqassaaq.
Imm. 2. Atuarfinni atuakkanik atorniartarfiit siunertaraat, atuarfiup siunertaata siuarsarneqarnissaanut ilinniartitsinermi atuarfimmi atuartunut ilinniartitsisunullu atortussanik pissaqartitsissalluni. Tamatumalu saniatigut atuarfinni atuakkanik atorniartarfiit atuartut sunngiffimminni soqutigisaat naatsorsuutigissavaat taamatullu ilinniartitsisut perorsaaneq pillugu tarnillu pissusaanik nalunngisassanik ingerlaqataajuarnissaminnut pisariaqartitaanik atuagassaqartittuartassallugit.
Imm. 3. Atorniartarfimmi suliamut atatillugu maleruagassanik Naalakkersuisut aalajangersaassapput, tak. atuakkanik atorniartarfeqarneq pillugu inatsisartut peqqussutaat.
Kapitali 5
Misiligutaasumik suliaqarneq§ 28. Misiligutaasumik suliaqarnissaq siunertaralugu Naalakkersuisut inatsisip matuma kapitaliata 3-anni 4-aannilu atuarfiup ilusaanik, annertussusaanik, atuartitsinerup imarisaanik, atuartitsinerup aaqqissorneqarneranik piareersarneqarneranillu aalajangersakkanik sanioqqutitsinissaq, Atuarfiup siunertaanik ataavartitsinissamut naleqquttoq, akuerisinnaavaat, tak. § 2.
Kapitali 6
Atuartitaasussaatitaaneq aamma angajoqqaat pisinnaatitaaffii pisussaaffiilu
Atuartitaasussaatitaaneq§ 29. Meeraq kinaluunniit Kalaallit Nunaanni najugalik, imaluunniit sivikinnerpaamik qaammatini 6-inni tassani najugaqartussaq atuartitaasussaatitaavoq malittarisassat §§ 30 - 31-miittut malillugit.
Atuartitaasussaatitaanerup imaa§ 30. Atuartitaasussaatitaanerup nassataraa atuarfimmi atuartitsinermut imaluunniit atuartinneqarnermut allamut atuarfimmi nalinginnaasumik piumasaasunut nallersuuttumut peqataanissamut pisinnaatitaaneq pisussaatitaanerlu.
Imm. 2. Atuarnerup ingerlanneqarnissaata naammassineqarnissaa atuarnerullu nalaani atuarfiup atuartunik nakkutilliisussaatitaanera pillugit Naalakkersuisut malittarisassanik aalajangersaassapput.
Imm.3. Meeqqat, nalinginnaasumik atuarfimmi piumasaasunut nallersuuttumik, angerlarsimaffimminni atuartinneqartut allatulluunniit atuartinneqartut, atuarfiup atuartitsineranut peqataassanngillat.
Atuartitaasussaatitaanerup aallartinnera taamaatinneralu§ 31. Atuartitaasussaatitaaneq aallartissaaq atuarnerup aallartinnerani qaammatisiutit malillugit ukiumi meeqqap 6-inik ukioqalerfiani, taamaatissallunilu atuartup ukiuni qulini ataavartumik atuartinneqareerneratigut.
Imm. 2. Angajoqqaat qinnuteqareernerisigut akuersereernerisigulluunniit kommunalbestyrelsip akuerisinnaavaa meeqqap atualernissaata atuartitaasussaatitaanerup allartinneraniit ukiumik ataatsimik kinguartinneqarnissaa, tamanna meeqqap inerikkiartorneranik patsiseqarpat.
Imm. 3. Kommunalbestyrelsip angajoqqaat qinnuteqareernerisigut atuartoq ukiut 9-t atuareersimappat atuarunnaarnissaanik akuerisinnaavaa, tamanna immikkut patsisissaqartinneqarpat. Atuartoq ukiut 9-t atuareernermi kingorna atuarunnaarnissaminik akuerineqassappat inuussutissarsiummik ilinniarnermillu ingerlatsinissaa aallarnisaqqaartariaqarpoq.
Allatsinneq atualernerlu§ 32. Atuarfimmi atualerneq pissaaq ukiup atuarfiusup aallartinnerani ukiumi meeqqap 6-inik ukioqalerfiani, taamaattorli tak. § 31, imm. 2.
Imm. 2. Kommunalbestyrelsip aalajangersinnaavaa atualernissamut allatsinneq piffissaliussap aalajangersimasup iluani pissasoq. Taamaakkaluartoq allatsinneq kingusinnerpaamik juunip aallaqqaataani pisimassaaq.
Imm. 3. Atualersussat allatsinnerat aamma atuarunnaarneq pillugit maleruagassanik Naalakkersuisut aalajangersaasinnaapput.
Angajoqqaat akisussaanerat§ 33. Angajoqqaat, tak. § 34, meeqqap atuartitaasussaatitaanerminik eqqortitsinissaa akisussaaffigaat, atuartitaasussaatitaaneranullu akornusersuissanatik.
Imm. 2. Atuarfiup avataani atuarneq kommunimi atuartup najugaqarfigisaani kommunalbestyrelsimut nalunaarutigineqassaaq.
Imm. 3. Atuartoq atuartitsinermut peqataasimanngippat angajoqqaat, tak. § 34, ornigullutik imaluunniit allagaqarlutik tamatumunnga pissutaasoq atuarfimmut nalunaarutigissavaat. Atuanngitsoorneq sapaatip-akunneri 2 sinnerlugit napparsimanermik peqquteqarpat tamatuma nakorsamit uppernarsaaserneqarnissaa atuarfiup angajoqqaanit piumasarisinnaavaa, tak. § 34.
Angajoqqaat pisinnaatitaaffii pisussaatitaaffiilu§ 34. Angajoqqaatut pisinnaatitaaffiit pisussaatitaaffiillu, Inatsisartut inatsisaanni matumani pineqartut, inummit inunnilluunniit meeqqamut angajoqqaatut oqartussaaffeqartunit akisussaaffigineqarput.
Imm. 2. Atuarnerup aallartinnissaa sivisussusissaalu pillugit apeqqutit eqqarsaatigissanngikkaanni, atuarfiup inuk meeqqamik ulluinnarni pilersuisuusoq, angajoqqaatut oqartussaaffeqartut sinnerlugit iliuuseqarsinnaatitaasutut isigisinnaavaa.
Kapitali 7.
Ilinniartitsisut§ 35. Atuarfimmi atuartitsisinnaassagaanni atuarfimmi ilinniartitsisussatut ilinniarneq imaluunniit ilinniarneq naleqquttoq alla Naalakkersuisunillu akuerisaasoq naammassillugu ilinniarsimasariaqarpoq.
Imm. 2. Inuit immikkut piginnaassusillit atuartitsissutini ataasiakkaani atuartitsisinnaapput.
Imm. 3. Tiimini atuartitsiviusuni imm. 1-imi 2-milu eqqartorneqartunik atuartitsisulerneqarsinnaanngitsuni, inuit immikkut piginnaassusillit atuartitsisinnaapput.
Imm. 4. Atuartut angerlarsimaffiini, atuartunut inissiani atuarfinnilu najugaqarfiusuni immikkut aaqqissuussani, tak. § 25, immikkut perorsaanikkut ikiorsiinermi, tak. § 15, kiisalu perorsaaneq tunngavigalugu nammineq piumassuseq naapertorlugu sammisassani, tak. § 10, imm. 7, perorsaanikkut suliat isumaginissaannut atorfinitsinneqarsinnaapput isumaginninnermi perorsaasutut ilinniarsimasut imaluunniit inuit naleqquttumik allamik ilinniagaqarsimasut.
Imm. 5. Immikkut ittumik atuartitsinermi ilinniartitsisut immikkut atuartitsinermik ilinniagaqarsimasut imaluunniit allatut iliorlutik pisariaqartunik piginnaasaqalersimasut atuartitsisassapput.
Kapitali 8
Atuarfeqarfiup aqunneqarnera§ 36. Naalakkersuisut pisussaapput isumagissallugit:
1) § 25, imm. 4 naapertorlugu atuarfiit najugaqarfiusut immikkut aaqqissuussat,
2) perorsaanermut aamma tarnip pissusaanut tunngasunik siunnersuineq,
3) atuartitsinermi atortussanik inerisaaneq,
4) atuarfimmi ilinniartitsisunik pisortanillu pikkorissartitsisarneq, ilinniartitseqqittarneq ingerlaqqiffiusumillu ilinniartitseqqittarneq,
5) perorsaaneq inerisaanerlupillugit ilisimatusarneq kiisalu atuarfiup ingerlanneqarneranik suliaanillu nalilersuineq.
Imm. 2. Naalakkersuisut kommunini ataasiakkaani imaluunniit kommunini arlalinni kommunalbestyrelsit isumaqatigiissuteqarfigalugit isumagisassat imm. 1-imi nr. 1-imi taaneqartut taakkununnga isumagisassanngortissinnaavaat.
Imm. 3. Naalakkersuisut ilisimasanik eqiterineq aamma siammarterineq isumagissavaat meeqqat atuarfiannik kommunalbestyrelsip isumaginninnera nukittorsarniarlugu aamma nukinnik atorluaaneq sapinngisaq annertunerpaaq anguniarlugu. Kiisalu Naalakkersuisut sulinniutit sunniutaannik uuttuineq isumagissavaat ukunani:
1) immikkut ittumik atuartitsineq,
2) efterskolernerit sorliit ilinniarnermik aallartitsinissamut naammassinninnissamullu kinguneqarluarnerpaajusarnersut,
3) siunnersuinerit sorliit ilinniagaqalernermik kinguneqarluarnerpaajusarnersut,
4) atuarfinni angisuuni marlunnik ilinniartitsisoqartarnerup karakterit agguaqatigiissinnerinut aamma ilinniakkap naammassineqartarneranut qanoq sunniuteqartarnersoq,
5) ilinniarnertuunngorniarfimmi inuutissarsiutinillu ilinniartitsinerni ilinniarnermik taamaatitsisarnerup pinngitsoortinniarnerani sulinniuteqarneq,
6) ilinniartitsisutut ilinniarsimanngitsut atuartitsinerisa inaarustaasumik misilitsitsinerni karakterinut aamma ilinniarnermut sunniutaat,
7) ilinniartitsisut ilinniarnerminni atuartitsissutissat itisilerlugit ilinniarsimasaminnik atuartitsinerisa annertussusaat atuarfiullu angusaanut sunniutaat, aamma
8) inooqataanermi kingornuttakkat akornutit akiorniarlugit suliniutit.§ 37. Kommunit Inatsisartut inatsisaannik uuminnga ingerlatsinerat Naalakkersuisut nakkutigissavaat.
Imm. 2. Naalakkersuisut paasissutissanik inatsit una naapertorlugu suliassamik isumaginissaannut pisariaqartutut isigisaminnik kommunalbestyrelse piumaffigisinnaavaat.§ 38. Kommunalbestyrelse, tak. § 43, imm. 1, pisussaavoq isumagissallugit:
1) §§-ni 10-miit 12-imut aamma §§-ni 15-imiit 17-imut aalajangersakkat eqqartorneqartut tunngavigalugit atuartitsineq,
2) atuartunut peqqissuunissartik atugarissaarnissartilluunniit pissutigalugit sivisunerusumik atuarfimmi atuartinneqarsinnaanngitsunut atuartitsinissaq. Taamatut atuartitsineq atuartut angerlarsimaffiini, paaqqinniffimmi imaluunniit napparsimmavimmi kommunimi atuartup najugaqarfigisaani neqeroorutigineqassaaq,
3) atuartut angerlarsimaffiinik atuartunullu atuarfinnut pioreersunut atasunik inissianik pilersitsineq, tak § 25, imm.1,
4) perorsaanermut aamma tarnip pissusaanut tunngasunik siunnersuineq,
5) nunaqarfimmi atuarfik illoqarfimmi atuarfimmut atassuserneqarsinnaasoq, taamaalilluni illoqarfimmi atuarfiup pisortaa perorsaanikkut aaqqissugaanikkullu nunaqarfimmi atuarfimmut akisussaasuusinnaalluni, aamma
6) atuarfimmi ataatsimi ineriartorneq ingerlaavartumik malinnaaffigineqassasoq.
Imm. 2. Naalakkersuisut imm. 1, no. 2-mi atuartitsineq pineqartoq pillugu malittarisassiorsinnaapput.§ 39. Kommunalbestyrelsip inatsimmi suliassarititaasut suliarisinnaavai kommunit allat kommunalbestyrelsii suleqatigalugit.
§ 40. Kommunalbestyrelsip kommunip allap kommunalbestyrelsia isumaqatigiissuteqarfigalugu atuartuutitik kommunip taassuma atuarfiini atuartinneqarnissaannut innersuussinnavai.
Imm. 2. Kommunip allap atuarfiinut taamaallaat innersuunneqarsinnaapput angajullerni atuartut atuartullu klassini immikkut atuartitsiffiusuni atuartut imaluunniit atuarfinni immikkut atuartitsiffiusuni atuartinneqartussat, kiisalu atuartut kommunip avinngarusimasortaaneersut kommunillu sanilerisap atuarfianut qaninnerusuniittut.§ 41. Sumiiffinni kommunit aggorneqarnerisa avataanniittuni suliassat, inatsit naapertorlugu kommunalbestyrelsimut suliassarititaasut, Naalakkersuisunit isumagineqassapput.
Imm. 2. Naalakkersuisut kommalbestyrelse imaluunniit kommunalbestyrelsit arlallit isumaqatigiissuteqarfigisinnarlugit, suliassat imm. 1 malillugu Naalakkersuisunit isumagineqartussat taakkununnga isumagisassanngortissinnaavaat.§ 42. Anguniagassat sinaakkutissallu kommunalbestyrelsimit aalajangersarneqartut iluini, atuarfiit ataasiakkaat atuartitsinerup pitsaassusaa akisussaaffigaat atuarfiup siunertaanut tunngavianullu naleqqiullugu, tak. § 2.
Kapitali 9
Sumiiffinni ataasiakkaani aqutsineq
Kommunalbestyrelse§ 43. Kommunalbestyrelse kommunip atuarfeqarfiinut qullersaalluni akisussavoq nakkutigissallugulu kommunimi meeqqat atuartitaasussaatitaasut tamarmik atuarfimmut allatsinnissaat imaluunniit atuarfimmi nalinginnaasumik piumasarisaasunut nallersuuttumik atuartitaanissaat. Kommunalbestyrelsip atuarfiit sulineranni anguniagassat sinaakkutissallu aalajangersassavai. Kommunalbestyrelse atuarfiit sulinerannik nakkutilliisuuvoq, tassaasorlu atuarfiup Inatsisartut inatsisaanni matumani aalajangersakkanik eqqortitsinersut.
Imm. 2. Kommunalbestyrelsip makku aalajangiiffigisassavai:
1) Atuarfeqarfimmut aningaasaliissutit atuarfiillu ataasiakkaat aningaasaqarnikkut sinaakkutissaat.
2) Atuarfiit pisortaannik atuartitsisunillu atorfinitsitsineq soraarsitsinerlu. Atuarfiit pisortaannik ilinniartitsisunillu atorfinitsitsineq aalajangerneqartassaaq atuarfimmi pineqartumi siulersuisut oqaaseqaateqareernerisigut, tak. § 47, imm. 8.
3) Atuarfiup ilusiligaanera, tamatumunnga ilanngullugit atuarfiit amerlassusissaat aamma atuarfiit ataasiakkaat alloriarfii, klassii, immikkut atuartitsineq immikkullu perorsaanikkut ikiorsiisarnerit § 15-imi eqqartorneqartut kiisalu § 10, imm. 7 malillugu perorsaaneq tunngavigalugu nammineq piumassuseq naapertorlugu sammisassanik neqerooruteqarnerit. Aalajangiineq pisassaaq atuarfinni siulersuisut oqaaseqaateqareernerisigut.
4) Makku pillugit sinaakkutissat:
a) klassinik pilersitsineq,
b) atuartut tiimissaasa amerlassusissaat, kiisalu
c) immikkut atuartitsineq il.il..
5) Atuarfiit sumiiffinni ataasiakkaani inuiaqatigiit qaammarsaanermik peqatigiiffeqarnermillu suliaqartuinik, piumassutsiminnik meeqqanut inuusuttunullu suliaqartunik suleqateqarlutik sulinissaat, kiisalu innuttaasut soqutiginnittut allat suleqatigalugit kulturikkut suliniutinik ingerlatsinissaq ataqatigiissaarinissarlu pillugit nalinginnaasumik malittarisassat.
6) Atuarfiup pisortaanik naqitamik isumaqatigiissusiornissaq, tassani atuarfiup pisortaata perorsaanikkut akisussaanera aamma isumagissai erseqqissarneqassapput.
7) Apeqqutit allat atuarfinnut ataasiakkaanut isumagisassanngortitaanngitsut, taakkununnga ilaallutik atuarfinni allani atuartitaanissamut innersuussinerit, allatsinnissaq atualernissarlu, atuarfimmi nerisitsisarneq aamma kommunimi atuarfiup atuagaateqarfeqarneranik aaqqissuussineq pillugit malittarisassat.
Imm. 3. Kommunalbestyrelsip § 10, imm. 1, no. 1-imiit 4-mut taaneqartuni atuartitsissutinut aamma atuartitsissutinut qanitariissunut atuarfiit ilikkagassatut pilersaarutinut tapiliussaat taamatullu § 10, imm.1, nr. 5-imi taaneqartut sumiiffinni ataasiakkaani qinigassat ilikkagassatut pilersaarutaasa tapissaat, atuarfinni siulersuisut ataasiakkaat siunnersuuteqarnerisigut akuersissutigisassavai, tak. § 47, imm. 9.
Imm. 4. Kommunalbestyrelsip inatsit una naapertorlugu pisinnaatitaaffini tamaasa ilaannaaluunniit atuarfinni siulersuisunut isumagisassanngortissinnaavai, § 23-mi, § 38, imm. 1-imi taaneqartut suliassat taamaallaat pisinnaatitaaffiit nakkutilliisutut, aningaasaliisartutut sulisitsisutullu oqartussaaffeqarnermik tunngaveqartut pinnagit.§ 44. Atuarfinni siulersuisut oqaaseqaateqartereernerisigut kommunalbestyrelse kommunimi atuarfeqarfiup aqunneqarnera pillugu ileqqoreqqusaliussaaq. Ileqqoreqqusap makku pillugit aalajangersakkat ilaatigut imarissavai:
1) angajoqqaat ilaasortaatitaasa atuarfiup siulersuisuini amerlassusissaat,
2) atuarfiup siulersuisuini taaseqataasinnaanani ataatsimeeqataasartussamik pisariaqartitsineq naapertorlugu toqqaaneq, tak. § 45, imm. 4,
3) atuarfiup siulersuisuini ilinniartitsisut atuartullu ilaasortaatitassaannik qinersinermi periusissat,
4) kommunalbestyrelsip § 45, imm. 10 malillugu angajoqqaat ilaasortaatititaannik qinersisarneq kipungasumik pisassasoq aalajangersimaneraa, aamma
5) kommunip atuarfeqarfiani ataatsimoorluni siunnersuisartoqatigiiusinnaasut katitigaanerat.
Imm. 2. Ileqqoreqqusap imarissavaattaaq pisinnaatitaaffiit § 43, imm. 4 naapertorlugu atuarfiup siulersuisuinut isumagisassanngortitaasimasinnaasut allaaserinerat.
Imm. 3. Ileqqoreqqusamut ilanngussami allanneqassapput kommunalbestyrelsip atuarfiup ilusiligaanera il.il. pillugit aalajangiineri, tak. § 43, imm. 2, no. 3-miit 7-imut.
Imm. 4. Naalakkersuisut ilitsersuutaasumik nalinginnaasumik ileqqoreqqusaliussapput.
Atuarfiup siulersuisui§ 45. Atuarfinni tamani atuarfiup siulersuisui ukuninnga ilaasortaqartut pilersinneqassapput:
1) Angajoqqaat ilaasortaatitaat 5, inuit, meeqqanut atuarfimmi atuartussatut allatsinneqarsimasunut angajoqqaatut oqartussaassuseqartut imaluunniit meeqqanut paaqqinnittussatut akuerisaasut, akornannit taakkunanngalu qinikkat. Angajoqqaat ilaasortaatitaat qinerneqassapput qinersisinnaatitaasut qinigaasinnaatitaasullu, tak. kapitali 1-i Inatsisartut inatsisaat Kalaallit Nunaanni Inatsisartunut qinersinermi,
2) ilinniartitsisut ilaasortaatitaat 2, atuarfimmi ilinniartitsisut akornannit taakkunanngalu qinikkat, aamma
3) atuartut ilaasortaatitaat 2, atuarfimmi atuartut akornannit taakkunanngalu qinikkat, taamaattorli tak. imm. 3.
Imm. 2. Atuarfiup atuartuisa amerlassusaat, alloriarfiit amerlassusaat klassit amerlassusaat pissutsillu taakku assigisaat naapertorlugit, angajoqqaat ilaasortaatitaat pingasuinnaassanersut kommunalbestyrelsip aalajangersinnaavaa. Atuarfiup siulersuisuini angajoqqaat ilaasortaatitaat 3-uppata, ilinniartitsisut 1-imik atuartullu 1-imik ilaasortaatitaqassapput.
Imm. 3. Atuarfinni taamaallaat klassit 7-iat ilanngullugu atuartitsiviusuni atuartut atuarfiup siulersuisuini ilaasortaatitaqassanngillat. Atuarfiulli siulersuisuisa inassuteqaateqareernerisigut pisuni taamaattuni atuartut ilaasortaatitaqarnissaat kommunalbestyrelsip akuersissutigisinnaavaa.
Imm. 4. Atuarfiup siulersuisuisa tamanna pillugu qinnuteqareernerisigut kommunalbestyrelsip aalajangiussinnaavaa, inuk kommunalbestyrelsimi ilaasortaq atuarfiup siulersuisuisa ataatsimiinnerini taaseqataasinnaatitaanani peqataasassasoq. Taamaaliortoqarsinnaanngippat inuk kommunalbestyrelsimi ilaasortaanngitsoq kommunalbestyrelsip toqqarsinnaavaa.
Imm. 5. Atuarfiup siulersuisuini ilaasortat tamarmik taaseqataasinnaatitaapput, taamaattorli tak. imm. 12.
Imm. 6. Atuarfiup siulersuisuini siulittaasoq angajoqqaat ilaasortaatitaasa akornannit toqqarneqassaaq.
Imm. 7. Atuarfiup pisortaa atuarfiup siulersuisuinut allattaavoq atuarfiullu siulersuisuisa ataatsimiinnerini taaseqataasinnaatitaanani peqataasarluni. Atuarfiup pisortaata tullia atuarfiup siulersuisuisa ataatsimiinnerini aamma taaseqataasinnaatitaanani peqataasassaaq.
Imm. 8. Angajoqqaat ilaasortaatitaasa qinigaaffiat ukiunik 4-nik sivisussuseqarpoq. Ilaasortat sinnerisa qinigaaffiat ukiumik 1-imik sivisussuseqarpoq. Inuit atuarfimmi pineqartumi atuartitsisutut suliffeqartut atuarfiup siulersuisuini angajoqqaat qinigaattut ilaasortaasinnaanngillat. Angajoqqaat sinniisaat atuarfimmi atuartitsisutut atorfinippat, pineqartoq atuarfimmi siulersuisunit tunuassaaq.
Imm. 9. Meerarisaq atuarfimmit anippat angajoqqaat ilaasortaatitaat atuarfiup siulersuisuini ilaasortaanerminit tunuarumasinnaavoq. Qinigassanngortinngitsoorsinnaanermut allatigullu ilaasortaanermut tunngasutigut kommunalbestyrelsinut, nunaqarfinnik aqutsisunut ilagiillu sinniisaannut qinersisarneq pillugu malittarisassat Inatsisartut inatsisaanni aalajangersarneqarsimasut assingi atuupput.
Imm. 10. Kommunalbestyrelsip aalajangersinnaavaa angajoqqaat ilaasortaatitaasa ukiut marluk-kaarlugit nikerartumik qinersinertut qinerneqartarnissaat.
Imm. 11. Atuarfiit marluk amerlanerusulluunniit ataatsimut katinneqarpata, kommunalbestyrelsip aalajangiussinnaavaa, atuarfinni siulersuisunut ilaasortat tamarmik ataatsimoorlutik atuutiinnassasut, ilaasortat ataasiakkaat qinigaaffiisa naanissaasa tungaannut.
Imm. 12. Suliassat inunnut ataasiakkaanut tunngassuteqartut oqaluuserineqarnerini imaluunniit taasissutigineqarnerini atuartut ilaasortaatitaat najuussinnaatitaanngillat.
Imm. 13. Naalakkersuisut angajoqqaat ilaasortaatitaannik atuarfiup siulersuisuinut qinersisarneq pillugu aalajangersagaliussapput.§ 46. Kommunalbestyrelsip angajoqqaat atuartullu ilaasortaatitaat sulineranni aalajangersimasumik akissarsiaqartissavai. Sulinermi akissarsiat annertussusaat atuarfimmi atuartut amerlassusaat, alloriarfiit amerlassusaat pissutsillu taakkununnga assingusut naapertorlugit aalajangersarneqartassapput. Atuartut akissarsiaat angajoqqaat akissarsiaasa pingajorarterutaattut angissulerneqassapput.
§ 47. Atuarfiup siulersuisuisa sulinertik anguniakkat sinaakkutissallu kommunalbestyrelsimit aalajangersarneqartut iluanni ingerlatissavaat, tak. § 43, atuarfiullu ingerlatsinera aamma nakkutigissallugu.
Imm. 2. Atuarfiup siulersuisuisa atuarfiup atuartitsinerata allanillu suliaqarnerata anguniagassartai aalajangersassavaat.
Imm. 3. Atuarfiup siulersuisuisa ukiut atuarfiusut tamaasa, atuarfiup ukiumoortumik atuartitsinissamut pilersaarusiaa akuersissutigisassavaat, tassanilu ilaatinneqassapput makku pillugit pilersaarutit:
1) atuartut tiimiisa amerlassusissaat,
2) atuartitsissutit tiimissaasa amerlassusissaat,
3) atuartitsissutini ataasiakkaani pikkorissaasarneq tunngavigalugu atuartitsissutillu akimorlugit ingerlatsisarnissanik aaqqissuussinerit,
4) sumiiffinni ataasiakkaani toqqagassat annertussusissaat,
5) atuarfimmi immikkut ittumik atuartitsineq,
6) perorsaaneq tunngavigalugu nammineq piumassuseq naapertorlugu sammisassatut toqqarsinnaasat annertussusissaat,
7) atuartut klassinut inissitsiterneqarneri,
8) atuarfiup angerlarsimaffiullu suleqatigiinnerat, tak. imm. 4.,
9) atuartup atuarnermini pissarsiai pillugit angerlarsimaffiit ilisimatinneqartarnerat,
10) ilinniartitsisut akornanni suliassat agguataarneqarnerat,
11) atuarnerup nalaani atuartunut tamanut sammisassaqartitsiniutit, aamma
12) atuarfiup sulisuinik pikkorissaasarneq ilinniartsiteqqittarnerlu.
Imm. 4. Atuarfiup siulersuisuisa atuarfiup ingerlatai allat, tassunga ilanngullugit angerlarsimaffiup atuarfiullu atuartup atuartinneqarnermini ilinniartinneqarnissaminullu tunngasutigut ingerlanera pillugu isumasioqatigiittarnissaannut tunngasut, kiisalu atuarfiup angerlarsimaffiullu suleqatigiissutissaat allat malittarisassiussavaat.
Imm. 5. Atuarfiup siulersuisuisa, aningaasatigut sinaakkutissat atuarfimmut atuuttussatut aalajangersarneqarsimasut iluanni, atuarfiup aningaasartuutissatut isertitassatullu missingersersuutai akuersissutigisassavaat.
Imm. 6. Atuarfiup siulersuisuisa atuartitsinermi atortussat akuersissutigisassavaat, torersaarnissarlu pillugu malittarisassat aalajangersartassallugit.
Imm. 7. Tunaartarisassat kommunalbestyrelsimit aalajangersarneqarsimasut iluanni atuarfiup siulersuisuisa akuersissutigisassavaat, kulturikkut ingerlatat ingerlanneqarnerat ataqatigiissarnerallu atuarfiup ingerlataanut ilaatinneqassanersut, tak. § 43, imm. 2, no. 5.
Imm. 8. Ilinniartitsisunik pisortanillu atorfinitsitsinerit pillugit atuarfiup siulersuisui kommunal-bestyrelsimut oqaaseqaateqartassapput, tak. § 43, imm. 2, no. 2.
Imm. 9. Atuarfinni siulersuisut atuartitsissutit atuartitsissutillu qanitariit § 10, imm. 1, no. 1-imiit 4-mut taaneqartut pillugit, atuarfiit ilikkagassatut pilersaarusiaannut tapiutissanik kommunalbestyrelsimut siunnersuusiussapput, taamatullu § 10, imm.1, no. 5-imi taaneqartut sumiiffinni ataasiakkaani toqqagassat ilikkagassatut pilersaarusiorneri siunnersuusiussallugit, tak. § 43, imm. 3.
Imm. 10. Misiligaalluni inerisaanermilu suliat anguniakkanik sinaakkutissanillu kommunalbestyrelsimit aalajangersarneqarsimasunik qaangiisussaatillugit, atuarfiup siulersuisui kommunalbestyrelsimut inassuteqaateqartassapput.
Imm. 11. Atuarfiup siulersuisui kommunalbestyrelsimut apeqqutit atuarfimmut pineqartumut tunngasut tamaasa pillugit oqaaseqaateqarsinnaallutillu siunnersuuteqarsinnaapput. Atuarfiup siulersuisui oqaaseqaateqartassapput, apeqqutit kommunalbestyrelsip atuarfiup siulersuisuinut saqqummiussai tamaasa pillugit.
Imm. 12. Ukiut atuarfiusut naammassineri tamaasa atuarfiup siulersuisui kommunalbestyrelsimut ukiup ingerlasimaneranik nalunaarusiortassapput. Ukiumoortumik nalunaarusiami ukiup atuartitsiffiusussap tullissaani atuarfiup siulersuisuisa pingaarnerusutigut sammisassatut pilersaarutaat aammattaaq ilaatinneqartassapput.
Atuarfiup pisortaa§ 48. Atuarfinni tamani pisortamik atorfinitsitsisoqassaaq taannalu atuarfimmi allaffissornikkut perorsaanikkullu sulinermi aqutsisuussaaq aammalu atuarfiup ingerlatsinera pillugu atuarfiup siulersuisuinut kommunalbestyrelsimullu akisussaasuulluni. Atuarfiup pisortaatut sulissaguni pineqartoq meeqqat atuarfianni ilinniartitsisussatut ilinniarneq imaluunniit ilinniarneq alla Naalakkersuisut akuerisimasaat naammassillugu ilinniarsimasariaqarpoq.
Imm. 2. Atuarfiup pisortaata:
1) ilinniartitsisut perorsaanikkut siunnersussavai,
2) suliassat atuarfimmi atorfeqartut akornanni agguataarlugillu aqussavai, atuartitsinerullu pilersaarusiorneqarnermigut aaqqissuunneqarnermigullu atuartunut tamanut unamminartoqarteqqullugu tak. § 18, imm. 2, aamma atuarfimmi nukiit pitsaanerpaamik atorluarneqaqqullugit,
3) pitsaassuseq pillugu ukiumoortumik nalunaarusiornissaq isumagissavaa, tak. § 49, aamma
4) atuarfimmi atuartut pillugit aalajangigassat aalajangersimasut tamaasa aalajangiiffigisassavai, taamaattorli tak. § 31, imm. 2 aamma 3.
Imm. 3. Atuarfimmi pisortap ingerlatsinini atuarfimmi atorfeqartut suleqatigalugit ingerlatissavaa.
Imm. 4. Atuarfiup pisortaa, atuarfiup ukiumoortumik atuartitsinissamik pilersaarutaanik atuarfiullu suliassaanut allanut tunaartarisassanik, ukiut atuarfiusut tamaasa, atuarfiup siulersuisuinut siunnersuusiussaaq, tak. § 47 imm. 3 aamma 4, kiisalu atuarfiup aningaasatigut isertitassai aningaasartuutissaalu pillugit missingersersuutinik siunnersuuteqassalluni, tak. § 47 imm. 5, kommunalbestyrelsip aningaasatigut sinaakkutissatut aalajangersagaasa iluanni, tak. § 43, imm. 2, no. 1.§ 49. Atuarfiup pisortaa pitsaassuseq pillugu nalunaarusiortassaaq ukiumi atuarfiusumi pineqartumi 1. oktober sioqqullugu kommunalbestyrelsimut nassiunneqartussamik.
Imm. 2. Pitsaassuseq pillugu nalunaarusiap imarisassavai ukiumi atuarfiusumi kingullermi nukarlerni akullernilu misitsinnerni angusat, angajullerni inaarutaasumik misilitsinnerni angusat, iliuusissanik pilersaarusiornerit, agguaqatigiissillugu klassini atuartut amerlassusiat, piffissaq atuartitsinermut atorneqarpoq, napparsimanerit pillugit naatsorsuinerit, piffissaq vikarinit atorneqartartoq, atuartunik atuarunnaartussanik ilinniagaqalernissaq inuussutissarsiummillu toqqaanissaq pillugit siunnersuinerup annertussusia aamma siuliani taaneqartup pitsaassuseq pillugu nalunaarusiornerup malitseqartinnera.
Imm. 3. Naalaakkersuisut pitsaassuseq pillugu nalunaarusiornissaq pillugu erseqqarinnerusunik aalajangersagaliorsinnaapput, tassani nalunaarutigalugu paasissutissat tapiliutassat pitsaassuseq pillugu nalunaarusiamiittussat.
Siunnersuisutut ingerlataqartut§ 50. Atuarfinni tamani perorsaaneq pillugu siunnersuisoqatigiit pilersinneqassapput. Siunnersuisoqatigiini ilaasortaasut tassaapput atuarfiup pisortaa aamma sulisut atuartitsinermi suliassanik perorsaanikkullu suliassanik allanik ingerlataqartut tamarmik.
Imm. 2. Siunnersuisoqatigiit atuarfiup pisortaa siunnersortassavaat kiisalu atuarfinni ataasiakkaani perorsaaneq pillugu oqallinnermi inerikkiartortitsinermilu isummersoqatigiiffiusassallutik.
Imm. 3. Atuarfiup siulersuisuisa atuarfiup pisortaa peqqusinnaavaat perorsaaneq pillugu siunnersuisoqatigiit oqaaseqaataannik pissarsiniaqqullugu. Siunnersuisoqatigiit namminneerlutik atuarfiup siulersuisuinut oqaaseqaateqarsinnaapput. Oqaaseqaatit taakku atuarfiup pisortaa aqqutigalugu saqqummiunneqartassapput.
Imm. 4. Perorsaaneq pillugu siunnersuisoqatigiit atuartut siunnersuisoqatigiivi apeqqutini taakkununnga tunngassuteqartuni tamani tusarniaavigisassavaat.
Imm. 5. Siunnersuisoqatigiit suleriaasissartik namminneq aalajangersassavaat.§ 51. Atuarfinni tamani atuartut siunnersuisoqatigiivi pilersinneqassapput. Atuarfinni mikinerusuni atuarfiup siulersuisui aalajangiisinnaapput, atuartut siunnersuisoqatigiivisa suliassaat atuartut tamarmik peqataaffigisaannik ingerlanneqassasut.
Imm. 2. Siunnersuisoqatigiit atuartunut tamanut sinnissuussapput.
Imm. 3. Siunnersuisoqatigiit atuartut soqutigisaat pillugit oqallinnerni isummersoqatigiiffiusassapput.
Imm. 4. Atuarfiup siulersuisuisa atuarfiup pisortaa atuartut siunnersuisoqatigiivisa isumaannik tusarniaaqqullugu piumaffigisinnaavaat. Atuartut siunnersuisoqatigiivi nammineerlutik atuarfiup siulersuisuinut oqaaseqaateqarsinnaatitaapput. Oqaaseqaatit taamaattut atuarfiup pisortaatigoortillugit ingerlatinneqartassapput.
Kapitali 10
Naammagittaalliuteqartarneq pillugu malittarisassat§ 52. Atuarfiit ataasiakkaat Inatsisartut inatsisaat manna naapertorlugu aalajangigaat pillugit naammagittaalliuutit aalajangiinerup nalunaarutigineqarneranit sapaatip-akunneri sisamat qaangiutsinnagit kommunalbestyrelsimut saqqummiunneqarsinnaapput.
Imm. 2. Kommunalbestyrelsip suliassat Naalakkersuisut isumaqatigiissuteqarfigereernerisigut kommunalbestyrelsinut isumagisassanngortitaasimasut, tak. § 36, imm. 3 aamma § 40, imm. 2, pillugit aalajangiinerisa nalunaarutigineqarneranniit sapaatip-akunneri sisamat qaangiutsinnagit Naalakkersuisunut saqqummiunneqarsinnaapput.
Imm. 3. Naalakkersuisut imm. 1-imi aamma 2-mi taaneqartut avataasigut aaliangiinerit ilaasa allat Naalakkersuisunut saqqummiunneqarsinnaanerat pillugu malittarisassaliorsinnaapput.
Kapitali 11
Aningaasalersuineq§ 53. Atuarfimmi atuartitsinermut, sanaartornermut ulluinnnarnilu ingerlatsinermut aningaasartuutit tamaasa kommunit aningaasartuutigisassaraat, aningaasartuutit pineqartut tamakkiisumik ilaannakortumilluunniit Namminersorlutik Oqartussanit allanilluunniit aningaasartuutigineqarnissaat inatsisitigut erseqqilluinnartumik tunngavissalerneqarsimanngippat.
Imm. 2. Paasisassarsiorluni angalanerit, tammaarsimaarnerit atuaqatigiillu angalaneri § 10, imm. 5, taamaattoq tak. imm. 3, naapertorlugu ingerlanneqartussat piviusunngortinnissaannut aningaasartuutit pisariaqartut kommuninit matussuserneqassapput.
Imm. 3. Kommunalbestyrelsip piumasarisinnaavaa, atuartut ataasiakkaat angajoqqaavisa, atuartut angalanerminni nerisaqartinneqarnerat isumagissagaat. Tammaarsimaarnermi atuaqatigiillu angalaneranni § 10, imm. 5 aamma 6 naapertorlugu pisuni atuartup nerisaqarneranut aningaasartuutit kommunalbestyrelsip angajoqqaanut akileqqusinnaavai. Akiliisitsineq angissusilerneqartassaaq angerlarsimaffimmi aningaasartuutissaagaluit nalilersorneqarneri tunngavilersuutigalugit.
Imm. 4. Klassimi atuartut angajoqqaallu, tamatumani atuarfik suleqatigineqarsinnaalluni, katerseqatigiinnikkut imaluunniit allatigut peqatigiilluni iliuuseqarnikkut aningaasartuutisanik, imm. 2 aamma 3 naapertorlugu kommunimit matussuserneqartussaanngitsunik matusiniarlutik katersiniarsinnaapput allatulluunniit matussusiiniarsinnaallutik.
Imm. 5. § 10, imm. 5 aamma 6 naapertorlugu aaqqissuussinernut atuartup peqataanissaa, imm. 3-ni aningaasartuutit eqqaaneqartut saniatigut, akiliuteqarnissamik allatulluunniit tunniussaqarnissamik piumasaqaatitaqartinneqassanngilaq.
Imm. 6. Kommunit ingerlatsinerminni atuartumut ataatsimut aningaasartuutaasa aaqqiissutissaat, tamatumunnga ilaatillugu atuartumut ataatsimut ilinniartisisut tiimit atugassaat, pillugit Naalakkersuisut aalajangersaasinnaapput.
Kapitali 12
Atortuulersitsineq, ikaarsaariarneq atorunnaarsitsinerlu pillugit aalajangersakkat.§ 54. Inatsisartut inatsisaat manna 1. januar 2013 aallarnerfigalugu atortuulersinneqarpoq, taamaattorli tak. imm. 2.
Imm. 2. Naalakkersuisut, kommunini tamani kommunalbestyrelsit tamanna pillugu isumaqatigiissuteqarfigereernerisigut, sanaartornermi pisussaaffiup kommuninut tunniunneqarnissaanik piffissaliussaq atugassarititaasussallu pillugit aalajangiisinnaapput. § 25, imm. 1 aamma § 53, imm. 1 tunngavigalugu sanaartornermik pisussaaffik tunniussinissap tungaanut Namminersorlutik Oqartussaniiginnarallassaaq. Naalakkersuisut kommunini tamani kommunalbestyrelsinik ikaarsaariarnermi aaqqissuussinernik, kommunit annerpaamik oqartussaaqataanissaannik siunertaqartunik isumaqatigiissuteqarsinnaapput.§ 55. Inatsisartut inatsisaata matuma atulersinneratigut Atuarfik pillugu Inatsisartut peqqussutaat nr. 8, 21. maj 2002-meersoq atorunnaassaaq, taamaattoq tak. imm. 2.
Imm. 2. Malittarisassat Atuarfik pillugu Inatsisartut peqqussutaat nr. 8, 21. maj 2002-meersoq naapertorlugu atuuttuusut, atuuttuuinnassapput, atorunnaarsinneqarnissamik imaluunniit malittarisassanik Inatsisartut inatsisaat manna inatsisilluunniit allat naapertorlugit aalajangersakkanik allanik taarserneqarnissamik tungaannut.
Namminersorlutik Oqartussat, 3. december 2012
Kuupik Kleist
Isumaliutissiissut (Aappassaaneerinninneq)