Kalaallit Nunaanni annaassiniarnissamut upalungaarsimaneq  aamma ikuallattoornissamik qaartoornissamillu pitsaaliuinermi iliuusissat pillugit Inatsisartut inatsisaata allannguuteqartinneqarnissaanik Inatsisartut inatsisissaannut nr. 14, 3. December 2012-imeersumut siunnersuut
(Sorsuttoqarnerani sorsuttoqarnissaanullu aarlerinartoqarnerani pilersaarusiornissamut aalajangiisinnaatitaaffiup tiguneqarnissaa)

 

§ 1

Kalaallit Nunaanni annaassiniarnissamut upalungaarsimaneq  aamma ikuallattoornissamik qaartoornissamillu pitsaaliuinermi iliuusissat pillugit Inatsisartut inatsisaanni nr. 14-imi, 26. maj 2010-meersumi imatut allannguisoqassaaq:


1.  § 1, imm. 1,  imatut oqaasertalerneqassaaq:
”§ 1.  Kommunit annaassiniarnissamut upalungaarsimasuutitanik pilersitsissapput, taakkua suliassarissalugu ajutoornerni ajunaarnersuarnilu, tassungalu ilanngullugu sorsuttoqarnerani, tamatumunngaluunniit annertuumik ulorianartorsiortoqarnerani, imaluunniit taamaattoqarnissaanik annertuumik aarlerinartorsiornermi inuit, pigisat avatangiisillu ajoqusernissaannik pitsaaliuinissaq, killilersimaartitsinissaq ikiorsiinissarlu. Annaassiniarnissamut upalungaarsimasuutitat suliassat oqartussanit allanit isumagineqartussat suliassarinngilaat.”

2.  § 10, imm. 1, imatut oqaasertalerneqassaaq:
”Annaassiniarnissamut upalungaarsimasut ajutoortoqarnerani ajunaarnersuaqarneranilu, ilanngullugit sorsuttoqarnera, kiisalu nunami akuutissanik ulorianartunik tassanngaannartumik ajutoortoqarnerani, ikuallattoqarneranut, inuit, illuutit avatangiisillu ajoquserneqarnerannut isumannaatsumik suliniuteqarsinnaassapput. Annaassiniarnissamut upalungaarsimasut aamma qimarngunneqartut allallu ajornartoortut ikiorniarsinnaanissaannut, unnuisarfimmiitissinnaanissaannut nerisaqartissinnaanissaannillu isumaginninnermut oqartussaasunut ikiuutissapput.”

3. § 10, imm. 3, imatut oqaasertalerneqassaaq:
”Imm. 3.  Naalakkersuisut, kommunip allap, Statens Luftfartsvæsen-ip (RCC), Grønlands Kommando-p (MRCC) imaluunniit politiit kissaateqarneranni annaassiniarnissamut upalungaarsimasut ajutoorneq, ajunaarnersuaq sorsuttoqarneraluunniit pissutigalugu pisariaqartinneqartunik ikiuutissapput.”

4.   § 20, imm. 1, imatut oqaasertalerneqassaaq:
”Naalakkersuisuni ilaasortat ataasiakkaat tamarmik immikkut ajutoortoqartillugu, ajunaarnersuaqartillugu sorsuttoqartillugulu suliassaqarfimmik iluanni inuiaqatigiinni atuuffiit attatiinnarnissaat ingerlaqqinnissaallu pilersaarusiussavaat.”

 

§ 2

Imm. 1. Inatsisartut inatsisaat manna Naalakkersuisut tamanna pillugu nalunaarusiornerini atuutilissaaq. Inatsisartut inatsisaat Naalakkersuisut aamma danskit naalakkersuisuisa akornanni isumaqatigiissuteqartoqaqqaanngippat atuutilersinnaanngilaq.
Imm. 2. Inatsisartut inatsisaata matuma atuutilerneranut peqatigitillugu, suliassaqarfinnut Namminersorlutik Oqartussanit tiguneqareersimasunut atuuttumik, inuinnarnut upalungaarsimaneq pillugu inatsisip nr. 342-p, 23. december 1959-imeersup, Kalaallit Nunaannut atuutsinneqalernera pillugu Kunngip peqqussutaa nr. 405, 20. december 1962-imeersoq atorunnaarpoq, kiisalu  suliffeqarfiit pingaarnerutinneqartut pillugit Nalunaarut nr. 331, 14. maj 1990-imeersoq, suliassaqarfinnut Namminersorlutik Oqartussanit tiguneqarsimanngitsunut, atorunnaarsinneqarnissamik imaluunniit inatsisitigut allanngortinneqarnissamik tungaanut, atuutiinnassaaq.

Namminersorlutik Oqartussat, ulloq 3. december 2012

Kuupik Kleist 

---

Siunnersuummut nassuiaatit

Isumaliutissiissut (Aappassaaneerinninneq)