Aalisarnermik piniarnermillu inuussutissarsiutillit inuussutissarsiornerannik siuarsaaneq pillugu Inatsisartut inatsisissaattut nr. 13, 3. December 2012-imeersussatut siunnersuut

 

Kapitali 1
Atuuffia

§ 1.  Inatsisartut inatsisiliaatigut siunertarineqartoq tassavoq aalisarnermik piniarnermillu inuussutissarsiutit sunniuteqarluartut unammillersinnaasullu siunissaq ungasinnerusoq isigalugu suliffissaqartitsisinnaasut siuasarnissaat suliniutitigut ungasinnerusoq isigalugu inooqatigiit ani-ngaasarsiornerannut iluaqutaasinnaasutigut.
Imm. 2.  Kapitalini 2-mi 3-milu oqaatigineqartut inuit ingerlatseqatigiilluunniit Kalaallit Nunaanni aalisarnermik piniarnermillu ingerlatsisinnaatitaasut inuussutissarsiorneq siuarsarniarlugu Naalakkersuisut inuussutissarsiutit siuarsarniarlugit taarsigassarsitillugilluunniit tapiiffigisinnaavaat.

 

Kapitali 2
Inuussutissarsiutit siuarsarniarlugit taarsigassarsianik tapiissutinillu tunniussisarneq

Ingerlatassatut pilersaarutit, inuussutissarsiutit siuarsarniarlugit taarsigassarsisitsiviusinnaasut

§ 2.  Ingerlatassatut pilersaarutinut inuussutissarsiutit siuarsarniarlugit Naalakkersuisut taarsigassarsisitsisinnaapput:
1) Teknikkikkut isumannaatsumik nalilerneqartunut, aamma
2) maannakkut siunissamiluunniit aningaasatigut akilersinnaasutut nalilerneqartunut, aamma
3) ingerlatassatut pilersaarutigineqartuni iluanaarutissaattut naatsorsuutigineqartut aningaasartuutaajumaartunut naapertuuttutut nalilerneqarpata.

Ingerlatassatut pilersaarutit tapiiffigineqarsinnaasut

§ 3.  Naalakkersuisut pilersaarutinut makkununnga tapiisinnaapput:
1) Teknikikkut isumannaatsumik nalilerneqartunut, aamma
2) maannakkut siunissamiluunniit inuiaqatigiit aningaasarsiorneranni akilersinnaasutut nalilerneqartunut, aamma
3) tapiiffigineqartoq periarfissaqarpat imminut napatilernissamut.

Qinnuteqaateqartut, inuussutissarsiutit siuarsarniarlugit taarsigassarsisinnaasut

§ 4.  Inuussutissarsiutit siuarsarniarlugit taarsigassarsiniartup qinnuteqaataata suliarinerani qinnuteqaat ataatsimut isigalugu naliliiffiginiarneqassaaq ilaatigut matuma kinguliini taasat uppernarsisinneqarsimappata:
1) Qinnuteqartoq ingerlatsinikkut aqutsinikkullu pisariaqartinneqartunik piginnaassuseqartoq qulakkeerneqarsimalluni ingerlanniakkaminik imminut akilersinnaasumik ingerlatsisinnaanera inuussutissarsiutit siuarsarniarlugit taarsigassarsisitsinissami piumasarineqartunut naapertuuppata.
2) Ingerlatsinermi aningaasartuutissatut akiliisinnaassutsimullu naatsorsuusiatigut takuneqarsinnaappat taarsigassarsiat utertinniarlugit akilersorneqarsinnaasut.
3) Qinnuteqartoq nalilinnik pigisaqarnermigut ima ittoq akilersuinissamik pisussaassutsiminik naammassinnissinnaalluni aningaasanik atukkaminik taarsiisinnaassuseqartumik.
4) Takuneqarsinnaappat akuersissummik tunineqarnermut, aalisarsinnaanermut akuerineqarnermut, aalisagartassinneqarnermut pisortanillu akuersissutinut allanut aallartinniakkanullu pisortanit akuersinissamut nalunaarneqarsimasoq inatsit manna malillugu inuussutissarsiutinik siuarsaanissamut atatillugu taarsigassarsisitsisoqarsinnaavoq.
5) Qinnuteqartoq pilersaarutimi naammassinissaanut inuussutissarsiutit siuarsarniarlugit taarsigassarsinissamik piumasaqaatigineqartunik pigisaqarpat.
  Imm. 2.  Imm.1, nr. 3 malillugu naliliineq pissaaq qinnuteqartup qinnuteqarnerup nalaani aningaasatigut ingerlanera tunngavigalugu. Pissutsit patsisissallit, taamatuttaaq sillimmasiinermik suliat, eqqartuussivimmi sulianik aalajangiinerit il.il. pissutsit naammassereertinnagit naliliinermut ilaasinnaanngillat.
  Imm. 3.  Naliliinissamik tunngavik Naalakkersuisut ilasinnaavaat piumasaralugit inuussutissarsiornermut atasumik siusinnerusukkut atorniarnerit Namminersorlutik Oqartussanilluunniit tapiissutit paasissutissartaannik tunineqarnissamik nalilerniarlugu qinnuteqartup pisussaaffini naammassisimanerai.
   

Qinnuteqartut tapiiffigineqarsinnaasut

§ 5.  Inuussutissarsiutigalugu nutaamik sanaamik umiatsiaararsiniarnermut Naalakkersuisut tapiisinnaapput inuussutissarsiutigalugu umiatsiaararsiassaq tankeqarpat umiatsiaaqqamut atavissumik aammalu sillimaniarnermut atortulimmik, minnerpaamik isikkanik 16-inik annerpaamillu isikkanik 19-inik takissuseqarpat aammalu Kalaallit Nunaanni inuussutissarsiutigalugu umiatsiaarassatut akuerisaasimappat.  Motoriata annertussussissaa annerpaamik 115 HK-jussaaq.
Imm. 2.  Tapiissutit tunniunniunneqartassapput ukiumi qinnuteqarfiusumi qinnuteqaatigineqartut tulleriiaariffigineqarnerisigut.  Tulleriiaarinermi qinnuteqarfigineqartumi aalisarnerup annertussusiata pingaaruteqarnera isiginiarneqassaaq.
Imm. 3.  Inuussutissarsiutigalugu umiatsiaaqqamik pisinermi umiatsiaaqqap pisiarinerani akiata 75 %-ianik tapiissuteqartoqarsinnaavoq. Qinnuteqaateqartoq Qaanaap pigisaani, Ammassaliup pigisaani Ittoqqortoormiullu pigisaani aalajangersimasumik najugaqarpat umiatsiaaqqap pisiarinerani akiata 84 %-ianik tapiissuteqartoqarsinnaavoq.
Imm. 4.  Inuussutissarsiutigalugu umiatsiaararsiniarnermi inuussutissarsiutit siuarsarniarlugit taarsigassarsisitsisoqarsinnaanngilaq.

§ 6.  Qinnuteqartoq, inuussutissarsiutigalugu nutaamik umiatsiaarartaarniarnermini, § 5 malillugu imaassaaq:
1) 18-it 65-illu akornanni ukioqassalluni, aamma
2) tapiiffigineqarnissamik qinnuteqarnini ukiunik marlunnik sioqqullugu inuussutissarsiutigalugu piniartutut aalisartutulluunniit allagartaqartussaalluni qinnuteqarnermilu nalaani taamatut allagartaqartussaalluni.

 

Kapitali 3
Aalisarnermut piniarnermullu malittarisassat sukumiinerusumik oqaatigalugit

Inuussutissarsiutit siuarsarniarlugit angallatinut aalisariutinut taarsigassarsiat   inuutissarsiutigalugulu umiatsiaaqqanut tapiineq

§ 7.  Naalakkersuisut inuussutissarsiutit siuarsarniarlugit aalisariutinut taarsigassarsisitsisinnaapput matuma kinguliini taaneqartut siunertarineqarpata:
1) Aalisariut allanngortiteriniarneqarlunilu iluarsaanniarneqarpat.
2) Pisineq, iluarsaassinerit annertuut motoorinillu taarsiinerit.
3) Sillimanissamut atortunik pissarsiniartoqarpat.
4) Teknikkikkut atortunik allanik pissarsiniartoqarpat.
5) Aalisarnermut atortunik ingerlatsinermilu atortunik taamaaqataannik pissarsiniartoqarpat.
Imm. 2.  ”Aalisariut” pineqartoq angallataassaaq 5BRT/8BT qanngerlugu angissusilik.
Imm. 3.  Inuussutissarsiutit siuarsarniarlugit taarsigassarsianik aalisariutisiniarnissamut qinnuteqaat nalilerniarlugu, imm. 1 malillugu aalisariutip ataatsimut aningaasarsiutaanera nalilerniarneqassaaq aalisartup nalinginnaasumik isertitarisinnaasai aallaavigalugit.
Imm. 4.  Aalisariutinut qisunnut sisannullu ukiut 30-it sinnerlugit pisoqaassusilinnut inuussusissarsiutit siuarsarniarlugit taarsigassarsisitsisoqarsinnaanngilaq, aamma aalisariutinut glasfiber-iusunut ukiut 20-it sinnerlugit pisoqaassusilinnut taarsigassarsisitsisoqarsinnaanngilartaaq.
Imm. 5.  Qinnuteqartoq angallammut ataatsimut taamaallaat inuussutissarsiut siuarsarniarlugu taarsigassarsisitsisoqarsinnaavoq. Tamanna atuupportaaq inuk taanna ingerlatseqatigiiffinnik ilivitsumik ilaannakuusumilluunniit arlalinnik piginnittuuppat.

§ 8.  Qinnuteqartup aalisariup sillimmaserneqarsimanissaa pisussaaffigivaa sillimmasiisimanermullu uppernarsaat Aalisarnermut, Piniarnermut Nunalerinermullu Naalakkersuisoqarfimmut nassiullugu.  Aammattaaq ukiut tamaasa ukiup sisamararterutaata siulliup ingerlanerani sillimmateqarneq pillugu uppernarsaatit nassiunneqartassapput.  Naalakkersuisut sillimmasersimanermik pisussaaffik taanna naammassineqarsimanngippat inuussutissarsiutit siuarsarniarlugit taarsigassarsisitsinertik taamaatitissavaat imaluunniit tapiissutit utertinneqarnissaat piumasaralugu.

§ 9.  § 5 malillugu tapiissutigineqartut inummut qinnuteqartumut siusinnerpaamik ukiut aqqaneq marluk qaangiunnerini tunniuteqqinneqarsinnaapput. Tassalu qinnuteqaateqartoq malittarisassat siusinnerusukkut atuuttut malillugit umiatsiaaqqamik pisinissamut Naalakkersuisunit taarsigassarsilluniluunniit tapiiffigineqarsimaguni, umiatsiaaqqamik inuussutissarsiummik nutaamik pisinissamut akuerineqarsinnaavoq pissarsinermi kingorna ukiut aqqaneq marluk aatsaat qaangiuppata.

§ 10.  Inuussutissarsiutigalugu umiatsiaaraq Naalakkersuisunit inatsit manna malillugu siusinnerusukkulluunniit malittarisassat malillugit taarsigassarsilluni tapiiffigineqarluniluunniit pisiarineqarsimasoq umiiarnikkut, tamakkiisumik ajoqusivinnikkut allatulluunniit sillimmasiissutitigut matussusigassamik pisoqarneratigut annaaneqarpat, § 9 soqutinagu inuussutissarsiutigalugu nutaamik umiatsiaararsiniarnissamut tapiissuteqartoqarsinnaavoq:
1) Umiatsiaaraq annaaneqartoq naapertuuttumik sillimmasigaasimappat, aamma
2) sillimmasiinermut taarsiissutit tamakkerlutik umiatsiaaqqamik nutaamik pisinermut atorneqarpata. 
Imm. 2.  Imm. 1 nr. 2 naammassineqarsimanngippat Naalakkersuisut inuussutissarsiutit siuarsarniarlugit taarsigassarsiat tamaatitinneqarnissaannik imaluunniit tapiissutit utertinneqarnissaannik aalajangiisinnaapput. 
Imm. 3.  §§ 3, 5 aamma 6 malillugit piumasaqaatit aalajangiinermilu tunngaviit atorneqassapputtaaq.

Inuussutissarsiutigalugu umiatsiaaqqamut tapiissutitutertillugit akilerneqarnerat

§ 11.  Inuussutissarsiutigalugu umiatsiaaqqamik nutaamik pisinermut tapiissutit utertillugit akilerneqarnissaat Naalakkersuisut piumasarisinnaavaat imaattoqarsimappat:
1) Tapiissuteqarfigineqartoq ukiuni tulleriinni marlunni inuussutissarsiutigalugu piniartutut aalisartutulluunniit nalunaarsugaasimanngippat.
2) Nalilerneqarpat tapiissuteqarfigineqartup qaammatini kingullerni aqqaneq marlunni inuussutissarsiutigalugu umiatsiaaraq pingaarnertut isertitaminut atorsimanngikkaa.
3) Pisiarineqarsimasut, § 5, imm. 1 malillugu, allamut tunineqarsimappata tapiissutit tigune-ranniit ukiut arfinillit qaangiutsinnagit.
4) Pisiarineqarsimasut, § 5, imm. 1 malillugu, qularnaveeqqusiunneqarsimappata.
5) Tapiissuteqarfigineqartup Naalakkersuisunit, § 23, imm. 3 malillugu, piumaffigineqarluni inuussutissarsiutigalugu umiatsiaaqqap ingerlannerani qaammatini aqqaneq marlunni qaa-ngiuttuni nioqqutissiassanik tunisanut uppernarsaat nassiussimanngippagu,
6) sillimmasersimanissamik piumasaqaatit naammassineqarsimanngippata aamma sillimmasiisimanermi isumaqatigiissutaasut sumiginnarneqarsimappata, tak. § 8, imaluunniit
7) tapiinissamut piumasarisat atugassarititaasullu allakkut qaangiinnarneqarsimappata.

§ 12.  Ukiunut aqqaneq marlunnut tapiissutit aningaasartaat nalikillineqartassapput ukiut tamaasa aqqaneq marlorarterummik.
Imm. 2.  Tapiissutip utertinneqarnerani, § 11 malillugu, utertitsinissamik piumasaqaat naatsorsorneqassaaq tapiissutit tiguneranniit ukiup nutaap aallartinneranit aqqaneq marlorarterummik ikiliartuaartillugit.

 

Kapitali 4
Inuussutissarsiutit siuarsarniarlugit taarsigassarsinermut atugassarititaasut

Taarsigassarsiat ikilisarnerat

§ 13.  Inuussutissarsiutit siuarsarniarlugit taarsigassarsiat utertinniarlugit akilersorneqarsinnaapput aalajangersimasumik annertussusilinnik akuttoqatigiiaakkanik ernialersukkanillu.
Imm. 2.  Naalakkersuisut inuussutissarsiutit siuarsarniarlugit taarsigassarsiat ikilisinniarlugit inuussutissarsiutit siuarsarniarlugit taarsigassarsianut tapiissuteqarsinnaapput.  Ernianut tapiisoqarsinnaanngilaq.  Inuussutissarsiutit siuarsarniarlugit taarsigassarsianut tapiissutaasinnaapput naafferaartumik akilersuutit 35 %-rii tikillugit.
Imm. 3.  Naalakkersuisut tapiissutissat amerlassusissaat aalajangissavaat taarsigassarsianut piffissaq akilersuiffiusoq najoqqutaralugu.
Imm. 4.  Naalakkersuisut inuussutissarsiutit siuarsarniarlugit taarsigassarsianut ikilisaatissanut tapiissutit amerlassusissaat atugassarititaasullu allat pillugit malittarisassat aalajangersarsinnaavaat.

Nammineq aningaasaliissutit

§ 14.  Naalakkersuisut inuussutissarsiutit siuarsarniarlugit taamaallaat taarsigassarsisitsisinnaapput qinnuteqartoq nammineq aningaasaliissuteqassasoq piumasaqaatigalugu.
Imm. 2.  Nammineq aningaasaliissutit pisiap akiata minnerpaamik 10 %-erissavai Naalakkersuisunullu akilerneqareersimassallutik inuussutissarsiutit siuarsarniarlugit taarsigassarsiat akiliutigineqalersinnagit.
Imm. 3.  § 7, imm. 1 malillugu inuussutissarsiutit siuarsarniarlugit taarsigassarsisitsinermi nammineq aningaasaliissutit ilaqarsinnaapput pigisanik nalilinnik pissarsiariniakkap tamarmi nalinganut ilaasunik.
Imm. 4.  Naalakkersuisut nammineq aningaasaliissutip annertussusiata allinissaanik malittarisassaliorsinnaapput.

Piffissaq akilersuiffiusussaq

§ 15.  Inuussutissarsiutit siuarsarniarlugit taarsigassarsianik piffissaq akilersuiffiusussaq, takuuk § 7, imm. 1, sivisunerpaamik ukiunut tallimanut aalajangersarneqarpoq. Taamaattorli § 7-mi imm.1-imi nr. 1 aamma 2 malillugit taarsigassarsianik piffissaq akilersuiffiusussaq ukiunut qulinut aalajangersarneqarsinnaavoq angallammik sanaqqiineq iluarsaassinerlu kiisalu motoorimik pissarsineq taarsiinerlu annertuujusimappata.

Qularnaveeqqusiineq

§ 16.  Inuussutissarsiutit siuarsarniarlugit taarsigassarsiat aalisariummi inuussutissarsiut siuarsarniarlugu taarsigassarsiaqarfiusimasumi qularnaveeqquserneqartassapput. Qularnaveeqqut sapinngisamik pitsaanerpaamik prioriteteqartinneqassaaq.
Imm. 2.  Inuussutissarsiutit siuarsarniarlugit taarsigassarsiat sapinngisamik pitsaanerpaamik qularnaveeqquserneqarsimassapput, pigisami nalilimmi inuussutissarsiutit siuarsarniarlugit taarsigassarsisitsiviusumiluunniit qularnaveeqqusiinikkut.

Inuussutissarsiutit siuarsarniarlugit taarsigassarsisitsinermi atugassarititaasut

§ 17.  Inuussutissarsiutit siuarsarniarlugit taarsigassarsianut ernialiussat naafferartumillu akilersuutit Naalakkersuisunit aalajangersaavigineqartassapput. Tulleriiaakkamik angeqqatigiissaakkanik taarsigassarsiat tunniunneqarsinnaapput.
Imm. 2.  Naalakkersuisut piumasarisinnaavaat inuussutissarsiutit siuarsarniarlugit taarsigassarsiat tamarmik utertinneqassasut ima pisoqarpat: Erniaat ikilisaallunilu akiliutaasartut piffissaq eqqorlugu akilerneqanngippata imaluunniit inuussutissarsiutit siuarsarniarlugit taarsigassarsinermut atatillugu piumasareqqaakkat sumiginnarneqarpata.
Imm. 3.  Taarsigassarsianik akilersuineq piffissaq eqqorlugu pisarsimassaaq ulloq akileeqquneqarnermik kingorna kingusinnerpaamik ullut 30-t qaangiunneranni akilerneqarsimagunik. Tamatuminnga kingusinnerusukkut akiliineq pisimappat aningaasat taarsigassarsiarineqarsimasut utertinniarneqalissapput taarsigassarsisimasup allakkatigut piumaffigineqarnermi tusarlerneqarnermiluunniit kingorna ullut arfineq marluk qaangiutsinnagit erniat naafferartumillu akilersuutit akilersimanngippagit.
Imm. 4.  Naalakkersuisut taarsigassarsisup piffissami aalajangersimasumi akiliinissaa ukiut marluk tikillugit kinguartissinnaavaat imaattoqarsimappat:
1) Inuussutissarsiutit siuarsarniarlugit taarsigassarsiat tamarmiusut nalingisa qularna-veeqqusiussap nalingata 60 %-iat sinnerlugu annertussuseqartoq nalilerneqarpat, aamma
2) isumaqartoqarpat akiliisinnaanngikkallarneq sivikitsuinnaasoq.
Imm. 5.  Taarsigassarsiallip imm. 4 malillugu akilersuinermik kinguartitsinerup kingornatigut piffissami aalajangersimasumi akiligassanik akilersuinini aallarteqqippagu, piffissaq akilersuiffiusussaq piffissat aalajangersimasut kinguartitsivigineqarsimasut amerlaqataannik sivitsorneqassaaq.
Imm. 6.  Ukiunit marlunnit amerlanerusunik akilersuinissamik sivitsuisinnaanermik Naalakkersuisut akuersisinnaapput immikkut ittunik pisoqartillugu.

Ernialersuinerup unitsinneqarnera akiitsunillu appartitsineq

§ 18.  Taarsigassarsiat ernialersorneqarnerat unitsinneqassaaq taarsigassarsiat sumiginnarneqarsimanerannik pissuteqartumik Naalakkersuisut taarsigassarsisitsineq taamaatitippassuk.
Imm. 2.  Taarsigassarsiat taamaatitinneqarpata, akiitsut ikilisarnissaannut Naalakkersuisut ukiumoortumik tapiissuteqartarsinnaapput, aningaasat qaammatit aqqaneq marluk kingulliit ingerlanerani taarsigassarsialimmit akilerneqarsimasut amerlaqataannik.

Isumakkeerinninneq

§ 19.  Inatsit manna imaluunniit inuussutissarsiutinut tapersiisarneq pillugu malittarisassat siusinnerusukkut atuuttut malillugit taarsigassarsiat ukiup qaammatisiuteqarfiusup naaneranit ukiut tallimat ingerlareerpata Naalakkersuisut akiligassat ilaat isumakkeerinnissutigisinnaavaat. Akiligassat 150.000 kruuninit ikinninngorlugit isumakkeerinnissutigineqarsinnaanngillat.
Imm. 2.  Inuussutissarsiornermut siuarsaaneq pillugu taarsigassarsianut taamaallaat isumakkeerinnittoqarsinnaavoq naatsorsuutigineqarpat taarsigassarsiallip akiligassat tamakkerlugit ukiuni qaninnerni tamakkiisumik utertillugit akilersinnaanngippagit.
Imm. 3.  Taarsigassarsiallip imm. 2 malillugu akiliisinnaassuseqarnera ukua tunngavigalugit nalilerneqassaaq:
1) Akiitsut amerlassusiat.
2) Taarsigassarsisup inoqutaasalu aningaasaateqassusiat.
3) Taarsigassarsisup inoqutaasalu maannakkut isertitaat siunissamilu isertitassaat.
4) Taarsigassarsiallip ukiui.
Imm. 4.  Naalakkersuisut imm. 1 soqutiginagu akiligassat sinneri tamaasaluunniit ukiut qulit qaangiunneranni isumakkeerinnissutigisinnaavaat, tamatumanili tunngaviussaaq taarsigassarsialik akiliisinnaassuserigunakkani naapertorlugu annertussusilimmik akiligassanik akilersuisimappat.
Imm. 5.  Taamaallaat inuit isumakkeerinniffigineqarsinnaapput.

§ 20.  Taarsigassarsisoq 60-inik ukioqalereersimappat imaluunniit utoqqalinersiaqarpat, aamma qularnaveeqqusiissutit Namminersorlutik Oqartussat tigunerisa, umiunerup, imaluunniit qularnaveeqqusiissutit allanik pissuteqartumik taarsigassarsialimmit pigineqarunnaarsimappata Naalakkersuisut taarsigassarsiaq tamaat isumakkeerinnissutigisinnaavaat.
Imm. 2. Imm. 1 tunngavigalugu isumakkeerinninnerup kingunerissavaa taarsigassarsisimasup aalisakkanut pisassiisarnikkut aqunneqartunut aalisarneq ataavartumik taamaatissallugu.

Taarsigassarsianik allanngortitsineq

§ 21.  Naalakkersuisut una inatsit malillugu imaluunniit inuussutissarsiutinut tapersiisarnermut maleruagassat siusinnerusut tunngavigalugit inuussutissarsiutit siuarsarniarlugit taarsigassarsiaareersut taarsigassarsianut nutaanut allanngortissinnaavaat piffissami aalajangersimasumi akilersuiffissaq pigisap nalillip taarsigassarsiarititanut tunngasup piunissaa sinneruttutut naatsorsuutigineqartoq sinnernagu, imaassimappat
1) inuussutissarsiutit siuarsarniarlugit taarsigassarsiaareersut ukiut tallimat sinnerlugit ingerlareersimappata, aamma
2) nalilerneqarpat taarsigassarsiallip tamatuma kingornatigut inuussutissarsiutit siuarsarniarlugit taarsigassarsiat nutaat utertillugit akilersornissaat sapissanngikkaa.

Akiligassallit nikinnerat

§ 22.  Taarsigassarsiallip inatsit manna imaluunniit inuussutissarsiutinut tapersiisarneq pillugu malittarisassat siusinnerusukkut atuuttut malillugit taarsigassarsisimasup taarsigassarsiniartumut nutaamut taarsigassarsiaminik tunniussisinnaanera Naalakkersuisut akuerisinnaavaat, taarsigassarsiniartup nutaap pigisat nalillit taarsigassarsiaritinnerinut tunngaviusut tiguppagit taarsigassarsiaqalersullu nutaap inuussutissarsiutit siuarsarniarlugit taarsigassarsisinnaassaguni piumasaqaataasut naammassisimappagittaaq.

Inuussutissarsiutit siuarsarniarlugit taarsigassarsianik tapiissutinillu utertitsilluni akiliineq

§ 23.  §§ 11 aamma 17, imm. 2 malillugit inuussutissarsiutit siuarsarniarlugit taarsigassarsisitsineq taamaatinniarlugu Naalakkersuisut aalajangiisinnaapput, inuit ingerlatseqatigiiffiilluunniit tunngavissaqanngitsumik peqqussut manna iluaqutigalugu taarsigassarsianik tapiissutinilluunniit pisimappata.
Imm. 2.  §§ 11 aamma 17, imm. 2 malillugit inuit ingerlatseqatigiiffiillu inuussutissarsiutit siuarsarniarlugit taarsigassarsisitaasimasut tapiiffigineqarsimasulluunniit aningaasatigut ingerlanermik allanngornerinik pingaaruteqartunik Naalakkersuisunut nalunaaruteqarnissamik pisussaaffeqarput. Naalakkersuisut pineqartut taakku piumasaqarfigisinnaavaat aningaasaqarnerminnut tunngasunik uppernarsaatinik tuneqqullutik.
Imm. 3.  Naalakkersuisut inuk umiatsiaararsiniarnermut tapiiffigineqarsimasoq piumasaqarfigisinnaavaa qaammatini ingerlareersuni aqqaneq marlunni umiatsiaaqqamik pisami tuniniarnerinut uppernarsaatinik nasseqqullutik.

 

Kapitali 5
Ataatsimut aalajangersakkat

§ 24.  Naalakkersuisut inatsisartut inatsisaata allaffissornikkut aqunneqarnera pillugu malittarisassanik erseqqinnerusunik aalajangersaasinnaapput, taamatuttaaq makku pillugit malittarisassaliorsinnaallutik:
1) Inuussutissarsiutit suut ingerlatassatullu pilersaarutit suut inuussutissarsiutit siuarsarniarlugit taarsigassarsisitsivigineqarsinnaasut.
2) Nunap ilaani sumiiffiit sorliit Naalakkersuisut inuussutissarsiutit siuarsarniarlugit taarsigassarsisitsiffigisassaneraat.
3) Inuussutissarsiutit siuarsarniarlugit taarsigassarsiat ikilisarnerinut tapiissutinik aalaja-ngersaasarnerit.
4) Ilinniartitaanermut, aningaasaqarnermut teknikkimullu tunngatillugu qinnuteqaateqartunut ingerlatassatullu pilersaarutinut piumasaqaatit.
6) Inatsisip allaffissornikkut aqunneqarnera, tassani aamma kommunit peqataanerat.

Atulersitsineq

§ 25.  Inatsisartut inatsisaat manna atuutilerpoq 1. januar 2013.
Imm. 2.  Peqatigitillugu Aalisarnermik piniarnermillu inuussutissarsiutillit inuussutissarsiornerannik siuarsaaneq pillugu Inatsiartut Peqqussutaat nr. 10, 20. november 2006-imeersoq atorunnaarsinneqarpoq.
Imm. 3.  Namminersornerullutik Oqartussat nalunaarutaat nr. 12 12. december 1984-imeersoq inuussutissarsiutinik tapiinermut tunngasoq ataannassaaq Inatsisartut inatsisaat manna naapertorlugu nalunaarummik taarserneqarserluni.
Imm. 4.  Piumasarisat inatsisartut peqqussutaat nr. 4, 20. november 1984 inuussutissarsiutinut tapersiisarneq malillugu, Inatsisartut peqqussutaat nr. 10 12. november 2001 aalisarnermut, piniarnermut nunalerinermullu tapersiisarnernut tunngasoq aamma Aalisarnermik piniarnermillu inuussutissarsiutillit inuussutissarsiornerannik siuarsaaneq pillugu Inatsisartut Peqqussutaat nr. 10, 20. november 2006-imeersoq malillugu suli atasut allaffissornikkut aqunneqartuarallassapput atukkiinerit pineranni aalajangersakkat atuuttut najoqqutaralugit.

Namminersorlutik Oqartussat, 3. december 2012

Kuupik Kleist

---

Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Aappassaaneerinninnermut allannguutissatut siunnersuut (akuerineqartoq)