Qalerallit avataasiorluni aalisarnermi pisarineqartut akitsuutaat pillugu Inatsisartut inatsisaat nr. 11, 3. december 2012-imeersoq

 

Akitsuummik akiliisussaatitaaneq

§ 1.  Suliffeqarfiit aamma inuit avataasiorluni qaleralinniarnissamut pisassinneqarsimasut pisamik ilaasa, aalisarneq pillugu inatsit naapertorlugu Kalaallit Nunaanni tunitsivimmut tunisassiorfimmulluunniit tunineqartussaanngitsut landskarsimut akitsuutaannik, inatsimmi matumani aalajangersakkat naapertorlugit akiliissapput.
Imm. 2.  Nunani allani nunamiluunniit maani oqartussaasut Naalakkersuisunit pisassinneqarsimasut akitsuummik akiliissanngillat.

§ 2.  Akitsuummik akiliisussaatitaaneq atuutilissaaq piffissami pisat nunanut allanut anninneqarfianni imaluunniit inummut pingajuusumut tunineqarfianni.

Akitsuut

§ 3.  Akitsuut qaleralimmut kiilumut ataatsimut 2,50 koruuniuvoq.
Imm. 2.  Akitsuut, tak. imm. 1, qalerallit akiisa uuliap danskit koruuninngorlugit akianut sanilliullutik allanngorarnerisa angeqqataannik kvartalikkaartumik aaqqiivigineqartassaaq. Akit allanngorarnerat kvartalit kingulliit pingasut siullersaanni marlunni agguaqatigiissillugu aki aallaavigalugu naatsorsorneqassaaq. Kisitsit aaqqiissutissaq Aningaasaqarnermut Naalakkersuisoqarfimmit nalunaarutigineqartassaaq.
Imm. 3.  Qalerallit akiisa allanngorarnerannut tunngaviussaaq qalerallit Kalaallit Nunaanneersut nioqqutigineqarneranni aamma nunanut allanut tunineqarneranni akit allanngorarnerat. Uuliap akiata allanngorarneranut tunngaviussaaq uuliap sukuluiarneqanngitsup akiata allanngorarnera.
Imm. 4.  Qalerallit akiisa allanngorarnerat kisitsit 1/1,667 atorlugu naatsorsorneqassaaq uuliallu akia 1/4,454 atorlugu naatsorsorneqassalluni.

Akiliineq

§ 4.  Piffissaq akitsuusiiffissaq tassaavoq kvartali.
Imm. 2.  Suliffeqarfiit aamma inuit akitsuummik akiliisussaatitaasut tunisatik, nunamit annissukkatik il.il. naatsorsuuteqartissavaat, akitsuutip naatsorsornissaanut aamma akitsuutip eqqortumik akilerneqarsimanerata nakkutiginissaanut tunngaviusinnaasunik.
Imm. 3.  Suliffeqarfiit aamma inuit akitsuummik akiliisussaatitaasut piffissap akitsuusiiffissap naanerata kingorna, piffissallu akitsuusiiffissap qaangiunnerata kingorna kingusinnerpaamik qaammatip ulluinnaasa kingullersaanni akitsuusigassat, taakku akitsuutaat akileraaruseriffimmut nalunaarutigissavaat akitsuullu akilerlugu. Nalunaarummut ilanngullugit nassiunneqassapput fakturat il.il. nalunaarummut tunngavigineqartut assilineqarneri.
Imm. 4.  Nalunaarut piffissaagallartillugu nassiunneqanngippat akiliisitsissut piffissami akit­suutip akilerneqartussap 2 procentiinik angissusilik, taamaattorli minnerpaamik 500 kr.-iusoq annerpaamillu 5.000 kr.-iusoq akilerneqassaaq.

§ 5.  Inuit selskabillu allallu akitsuummik piffissaagallartillugu akiliinngitsut, akiliinissamut piffissaliussamit § 4-mi taaneqartumit sivikinnerusumik piffissalerlugit Naalakkersuisut akileeqqusinnaavaat, akitsuutillu akilernissaannut qularnaveeqqusiinissamik piumasaqarfigisinnaallugit.

Piginnaatitsineq

§ 6.  Inatsisip atuutsinneqarnissaanut maleruagassat erseqqinnerusut Naalakkersuisunit aalajangersarneqarsinnaapput.

Misileraalluni aalisarneq

§ 7.  Naalakkersuisut akitsuummik akiliinnginnissamik qinnuteqaat akuerisinnaavaat misileraalluni aalisarnissaq peqassutsimut imaluunniit inuussutissarsiornermut pingaaruteqartoq akuersissutigineqarsimappat, aammalu akiliinnginnissamik akuersinerup aningaasatigut sunniutissai annertunngippata.

Pineqaatissiinerit

§ 8.  Piaaraluneerluni mianersuaalliorujussuarluniluunniit § 1, imm. 1-imik, § 4, imm. 2-mik 3-milluunniit unioqqutitsineq, imaluunniit sivikinnerusumik piffissaqarluni akiliinissamik § 5 naapertorlugu peqquneqarsimanermik qularnaveeqqusiinissamilluunniit peqquneqarsimanermik malinninnginneq Kalaallit Nunaanni Pinerluttulerinermik inatsimmi maleruagassat naapertorlugit pineqaatissiissutigineqarsinnaavoq.
Imm.2.  Kalaallit Nunaanni Pinerluttulerinermik inatsimmi maleruagassat naapertorlugit akiliisitsissuteqarnissamut maleruagassat inatsit manna naapertorlugu maleruaqqusani aalajangersarneqarsinnaapput.
Imm. 3.  Inatsisartut inatsisaat imaluunniit Inatsisartut inatsisaat naapertorlugu maleruaqqusat akiliisitsissummik aalajangersaasinnaanermik periarfissiippata inatsisit malillugit inuttut isigineqarsinnaasoq Kalaallit Nunaanni Pinerluttulerinermik inatsimmi maleruagassat naapertorlugit akiliisinneqarsinnaavoq.
Imm. 4.  Imm. 1-imiit 3-mut naapertorlugit akiliisitsissutit landskarsip pisassarai.

§ 9.  Unioqqutitsineq akiliisitsissutip saniatigut annertunerusumik malersorneqartariaqanngitsutut Akileraaruseriffimmit nalilerneqarpat Naalakkersuisut, Naalakkersuisulluunniit tamatumunnga piginnaatitaata pineqartumut nalunaarutigisinnaavaat suliassat eqqartuussinertaqanngitsumik naammassineqarsinnaasoq, pineqartup unioqqutitsinini nassuerutigippagu akiliisitsissullu nalunaarummi taaneqartoq piffissap erseqqinnerusup, qinnuteqarnikkut sivitsorneqarsinnaasup ingerlanerani akilerumappagu.
Imm. 2.  Nalunaarummut imm. 1-imi taaneqartumut atatillugu, allakkat unnerluussutigineqartut imarisaannut tunngatillugu Kalaallit Nunaanni eqqartuussisarnermik inatsimmi maleruagassat taamatuttaaq atuupput.
Imm. 3.  Akiliisitsissut piffissaagallartillugu akilerneqarpat, aalajangiunneqarnermiluunniit kingorna akiliisitsiniarnikkut akilersinneqarpat suliaq malersoqqinneqassanngilaq.

Atortuulerfia

§ 10.  Inatsit 1. januar 2013-imi atortuulissaaq, atuutissallunilu qaleralinnut 1. januar 2013-imi kingusinnerusumiluunniit tunineqartunut nunanulluunniit allanut anninneqartunut.
Imm. 2.  Akitsuutip annertussusia, tak. § 3, imm. 1, siullerpaamik aaqqiivigineqassaaq 2013-imi kvartalit sisamaanniit atuuttussamik.

Namminersorlutik Oqartussat, ulloq 3. december 2012

Kuupik Kleist

---

Siunnersuummut nassuiaatit

Isumaliutissiissut (Aappassaaneerinninneq)