Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisaat nr. 9, 3. december 2012-imeersoq
(Utaqqiisaasumik inissiat nalingisa akileraarusersorneqarnerat, akileraartarnermi nalikilliliinerit pillugit maleruagassat sukaterneqarnerat)

 

§ 1

Aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi, kingullermillu Inatsisartut inatsisaatigut nr. 20, 18. november 2010-meersukkut allangortinneqartumi, allanngortinneqassapput makku:

1.  § 15-imi imm. 5-tut ilanngunneqassaaq:
”Imm. 5.  Aningaasarsiat akileraaruteqaataasussat naatsorsorneranni ernianut aningaasartuutit, imm. 1-imiit imm. 3 ilanngullugu pineqartut akiligassanngorsimasut 90 procentii ilanngaatigineqarsinnaapput. Aningaasartuutit namminersorluni inuussutissarsiornermik ingerlatamut attuumassuteqarpata, oqaaseqatigiinni siullermi killiliineq atuutsinneqassanngilaq.”

2.  § 19-ip kingorna ilanngunneqassaaq:
”§ 19 a.  Aningaasarsianik akileraaruteqaataasussanik naatsorsuinermi inissiani tamakkiisumik ilaannakortumilluunniit akeqanngitsumik ineqartitaanerit nalingi, matumani ilanngullugit utaqqiisaasumik inissiani aammalu utaqqiisaasumik inigisassaq sioqqullugu inissiani ineqartitaanerit nalingi ilanngunneqassapput, taamaattorli takuuk § 34, imm.1, nr. 3.”

3.  § 22, imm. 1 imatut oqaasertaqassaaq:
”Selskabit il.il., § 1, imm. 1, nr. 3-miit 14-imut naapertorlugit tamakkiisumik akileraartussaasut imaluunniit § 2 naapertorlugu killilimmik akileraartussaasut, pigisat § 24, imm. 1, nr. 1 naapertorlugu, akileraartarnermi nalikilliliinerit il.il. pillugit nalunaarummi nalikillilerneqarsinnaasutut taasanik, annertunerpaamik imm. 2-mi taaneqartut nalikillilerneqarsinnaasut an-nertoqataannik akileraarutitigut nalikilliliisinnaapput.”

4.  § 22, imm. 2, nr. 4-mi allassimasoq ”100.000 koruuniuppata” allanngortissaaq imaalillugu: ”50.000 koruuniuppata”.

5  § 23 imatut oqaaasertaqassaaq:
”§ 23.  Inuk, § 1, imm. 1, nr. 1 aamma 2 naapertorlugit akileraartussaatitaasoq, imaluunniit § 2 malillugu killilimmik akileraartussaatitaasoq namminersorluni inuussutissarsiornermik ingerlataqarnermini isertitaqartoq, pigisat § 24, imm. 1, nr. 1 naapertorlugu, akileraartarnermi nalikilliliinerit il.il. pillugit nalunaarummi nalikillilerneqarsinnaasutut taasanik, annertunerpaamik imm. 2-mi taaneqartut nalikillilerneqarsinnaasut annertoqataannik akileraarutitigut nalikilliliisinnaavoq.
Imm. 2.  Ukiunut ataasiakkaanut akileraarutitigut nalikilliliinerit annertunerpaamik nalinut ukununnga naapertuutissapput:
1)  Illuutit atortullu ikkussorneqarsimasut pissarsiarineranni nalingisa ukiumut 5 procentii angullugit nalikillilerneqarsinnaapput.
2)  Umiarsuit timmisartullu pissarsiarineranni nalingisa ukiumut 10 procentii angullugit nalikillilerneqarsinnaapput.
3)  Nalikillilerneqarsinnaasunut allanut aningaasartuutit il.il. aammalu ingerlatsinermut atortut, pequtit pissarsiarineranni nalingi aammalu pigisanut piffissami killilimmi pisinnaatitaaffinnut akiliutinut il.il. 30 procentii angullugit nalikillilerneqarsinnaapput, ukiup aningaasarsiorfiusup naanerani pigisap nalikillilerneqarsinnaasup nalinganit tunngaveqartumik.
4)  Pigisanut nalilinnut nr. 3-mi taaneqartunut aningaasartuutit imaluunniit pissarsiarineranni nali 100.000 koruuniuppata taakkualuunniit ataallugit naleqarpata 100 procentii angullugit nalikillilerneqarsinnaapput.
Imm. 3.  Namminersorluni inuussutissarsiornermik ingerlataqartut imm. 1-mi taaneqartut nalikillilerneqarsinnaasunut aningaasartuutinik aammalu pigisanut nalilinnut il.il. imm. 2, nr. 3-mi 4-milu taaneqartunut kontomik ataatsimut naatsorsuiffiusussamik  naatsorsuuteqassapput. Ukiumi nalikilliliissutit ukiup aningaasarsiorfiusup naanerani nalikillilerneqarsinnaasup nalinga tunngavigalugu nalikilliliissutigineqartassapput. Naliusoq taanna ukiup aallartinnerani naliusup nakilliliissutaasinnaasutut aningaasartuutinik imaluunniit ingerlatsinermut atortut il.il. pissarsiarinerani nalinginik ilallugit naatsorsorneqartassapput, taakkua ukiumi aningaasarsiorfiusumi pissarsiarineqarsimappata, aammalu ukiumi ingerlatsinermut atortut il.il. ukiumi aningaasarsiorfiusumi tuninerini nalinginik kiisalu imm. 2, nr. 4 naapertorlugu nalikilliliissutaasunik ilanngaateqartillugit. Pitsanngorsaatinut aningaasartuutit pissarsinermi naliusutut suliarineqartassapput. Ukiup aallartinnerani naliusoq tassaavoq ingerlatsinermut atortut il.il. ukiuni siusinnerusuni pissarsiarinerisa nalingi aammalu aningaasartuutit nalikilliliissutinik ilanngareerlugit nalingat.
Imm. 4.  imm. 2, nr. 3-mi aamma 4-mi pigisanik taaneqartunik tunisinikkut naliusut nalikilliliissutigineqarsinnaasup sinnera qimmussimappassuk, nikingassut naatsorsugaq ukiumi aningaasarsiorfiusumi tassani isertitatut ilanngunneqassaaq.”

6.  § 24, imm. 1, nr. 3 imatut oqaasertaqassaaq: ”akiitsut erniaat taakkununngalu atatillugu sullissinermut matussutissatut ingerlaavartumik ernialiuttakkat, taamaattorli takuuk § 15, imm. 4 aamma 5”.

 

§ 2

Inatsisartut inatsisaat 15. december 2012-imiit atuutilissaaq ukiorlu aningaasarsiorfiusoq 2013 aallarnerfigalugu sunniuteqalissalluni, takuulli imm. 2.
Imm. 2.  Inatsisissatut siunnersuummi nr. 3 aamma 4 ukioq aningaasarsiorfiusoq 2012 aallarnerfigalugu atuutilerput. Ukiumut aningaasarsiorfiusumut 2012-imut, aningaasarsianit akileraarutit pillugit inatsimmi § 22, imm. 2 naapertorlugu nalikilliliissutaasut katinnerannut, selskabip, akileraarutit ilanngaatigitinnagit sinneqartoorutaasa akileraaruteqaataasussat 25 procentiinut naapertuuttut qaavatigut ilassutigisinnaavai, aatsaalli aningaasarsianit akileraarutit pillugit inatsimmi § 22, imm. 2 aamma 5 malillugit nalikilliliisoqareerneratigut. Ukiumi aningaasarsiorfiusumi 2012-imi § 22, imm. 2, nr. 4-mi nalikilliliissutaasinnaasutut killiussaq 75.000 koruuniuvoq. Selskabinut il.il., ukiumik kipingasumik aningaasarsiorfeqartunut, piffissaq naatsorsuusiorfik 31. august 2012-imut siusinnerusumiluunniit killeqarpat, inatsit sunniuteqartumik aatsaat atuutilissaaq ukioq aningaasarsiorfik 2013 aallarnerfigalugu.

Namminersorlutik Oqartussat, ulloq 3. december 2012

Kuupik Kleist 

---

Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Aappassaaneerinninnermut allannguutissatut siunnersuut (akuerineqartoq)