Aalisarnermut atatillugu atuisunut akiliuteqartitsineq pillugu Namminersorlutik Oqar-tussat nalunaarutaat  nr. 22, 21. december 2012-imeersoq

Aalisarneq pillugu Inatsisartut Inatsisaanni nr. 18, 31.oktober 1996-imeersumi § 14-a aamma § 33 imm. 2, kingullermik Inatsisartut Inatsisaanni nr. 12, 3. december 2012-meersumi allanngortinneqartoq, tunngavigalugit aalajangersarneqarpoq:

 

Atuuffia

§ 1.  Nalunaarummi aalisarnermut atatillugu atuisunut akiliuteqartitsinerup malittarisassiuunneqarpoq.
Imm. 2.  Atuinermut akiliuteqartussaatitaaneq atuutsinneqarpoq umiatsiaaqqat, aalisariutit imaluunniit aalisartitseqatigiiffiit Kalaallit Nunaanni angerlarsimaffeqartut atorlugit aalisarnermi.

Akiliisarneq akiliuteqarnissamullu piffissarititaassut

§ 2. Avataasiorluni aalisarsinnaanermut imaluunniit sinerissap qanittuani raajarniarsinnaanermi akuersissutit pisassiissutit amerlassusaat tunngavigalugit akilerneqartassapput. Pisassiissutit nalunaarutigineqartut tonsimut ataatsimut 60,00  koruuninik akilersillugit akilerneqartassapput. Pisassiisutit akilerneqareersut pisarineqanngitsulli utertinneqarsinnaanngillat.
Imm. 2.  Imm. 1 naapertorlugu akiliutissat ukiumi pisassiiffiusumi januarip aallaqqaataani akilerneqarsimassapput. Akiliiffissaq kingullerpaaq tassaavoq ukiumi pisassiiffiusumi aprilip aallaqqaataa.
Imm. 3.  Pisassiisutit januarip aallaqqaataata kingorna nalunaarutigineqarpata qaammatisiutit ukiuannut ataatsimut atugassiissutaappata, akiliutissat ullormi nalunaarfiusumi akilerneqartassapput, kingusinnerpaamillu nalunaarutigineqarneraniit qaammatit pingasut qaangiunnerini akilerneqareersimassallutik.
Imm. 4.  Ulloq akiliiffissaq kingulleq, takujuk imm. 2, sapaataappat, ulloq nalliuttorsiorfiuppat arfininngorneruppalluunniit akiliiffissaq kingulleq ullormut tullinnguuttumut nalinginnaasumut sivitsorneqassaaq.

§ 3.  Aalisarsinnaanermut akuersissutinik tunniussinermi aamma sinerissap qanittuani aalisarsinnaanermut akuersissutinik tunniussinermi, taamaattorli tassani ilanngunneqanngilaq sinerissap qanittuani raajarniarneq, 1.500,00 koruuninik akiliisoqartassaaq.
Imm. 2.  Imm. 1 naapertorlugu akiliutissat ullormi nalunaarfiusumi akilerneqartassapput.    Ulloq akiliuteqarfissatut nalunaarutigineqartoq naapertorlugu akiliisoqanngippat akiligassat akiliuteqarfissatut killissarititamiit qaammatit pingasut qaangiutsinnagit kingusinnerpaamik akilerneqareersimassapput.
Imm. 3.  Ulloq akiliiffissaq kingulleq, takujuk imm. 2, sapaataappat ulloq nalliuttorsiorfiuppat arfininngorneruppalluunniit akiliiffissaq kingulleq ullormut tullinnguuttumut nalinginnaasumut sivitsorneqassaaq.

Umiatsiaararsorluni aalisartunut akiliuteqartitsisarneq

§ 4.  Umiatsiaaraq paasineqassaaq imatut, angallat tamakkerluni 6 meterinik (l.o.a.) angissusilik tassanngaluunniit mikinerusoq.
Imm. 2.  Umiatsiaararsorlutik aalisartut aalisarsinnaanermut akuerineqarnissamut siullermut atatillugu taamaallaat akiliummik akiliuteqassapput, takujuk § 3 imm. 1. Umiatsiaararsorluni aalisartoq aalisarsinnaanermut akuersissummut siullermut akiliuteqareersimasoq, aalisakkanik allanik aalisarsinnaanermut akuersissummik pissarserusuppat, aalisarsinnaanermut akuersissutit taakku tunniunneqassapput akiliuteqartitsinertaqanngitsumik.

Ullut aalisarfiusut aallaavigalugit aalisarnermik ingerlatsineq

§ 5.  Avataasiorluni aalisartunut ullut aalisarfiusut aallaavigalugit aalisarnermik ingerlatsisunut akiliutissatut nalunaarutigineqartut tulaanneqartut tunngavigalugit naatsorsorneqartarput. 60,00 koruunit tonsimut akilerneqartassapput.
Imm. 2.  Imm. 1 naapertorlugu akiliutissat aalisarnerup uninneraniit qaammatip ataatsip qaangiunnerani akiligassanngortinneqassapput. Akiliutissat kingusinnerpaamik akilerneqarsimassapput akiliiffissap nalunaarutigineqarneraniit qaammatip ataatsip qaangiunnerini.
Imm. 3.  Ulloq akiliiffissaq kingulleq, takujuk imm. 2, sapaataappat, ulloq nalliuttorsiorfiuppat arfininngorneruppalluunniit akiliiffissaq kingulleq ullormut tullinnguuttumut nalinginnaasumut sivitsorneqassaaq.

Akiliisussaatitaaneq

§ 6. § 2 naapertorlugu akiligassaq akilerneqartussaq, januarip aallaqqaataani pisassiissutinik nalunaaruteqarfigineqartumit akilerneqarsimassaaq. Qaammatisiutit ukiuata ingerlanerani pisassiissutit nalunaarutigineqarpata, qaammatisiutip ukiuata sinnerani akiligassat, inummit imaluunniit suliffeqarfimmit pisassinneqartumit akilerneqartassapput.
Imm. 2.  Pisassiisutit ilaat tamakkerlugilluunniit allamut tunniunneqarpata, qaammatisiutit ukiuata pineqartup ingerlanerani akiliiffissaatitaasup ingerlanerani akiligassanik tunniussisoq akiliisussaatitaavoq.
Imm. 3. Akiliisinnaajunnaarnerup, pinngitsaaliissummik tunisaqartariaqarnermi, aningaasatigut ajornartoornermi assigisaaniluunniit pisoqartillugu inuussutissarsiummik unitsitsisariaqarnermi pisassiissutinik tunniussinermi akiligassamik akiliisussaatitaaneq suliffeqarfimmit pisassiissutinik pissarsisumit akisussaaffigineqassaaq.

Misileraalluni aalisarneq

§ 7.  Avataasiorluni misileraalluni aalisarnermi akiliutissat, pisarisimasaviit aallaavigalugit naatsorsorneqartassapput. Pisat tonsikkaartumik akilerneqartassapput, akiliutissallu 60,00 koruuniupput tonsimut.
Imm. 2.  Imm. 1 naapertorlugu akiliutissat ukiup aalisarfiusup tulliani januarip aallaqqaataani akilerneqarsimassapput, akiliiffissarlu kingullerpaaq tassaavoq ukiup aalisarfiusup tulliani  aprilip aallaqqaataa.
Imm. 3. Ulloq akiliiffissaq kingulleq, takujuk imm. 2, sapaataappat ulloq  nalliuttorsiorfiuppat arfinngorneruppalluunniit akiliiffissaq kingulleq ullormut tullinnguuttumut nalinginnaasumut sivitsorneqassaaq.
Imm. 4.  Misileraalluni aalisarnermi akiliutissamik tamakkiisumik ilaannakortumilluunniit Naalakkersuisut akiliinissamut pisussaajunnaartitsisinnaapput. Akiliinnginnissaq allakkatigut nalunaarutigineqassaaq.

Akiliuteqannginneq

§ 8.  Inuk suliffeqarfilluunniit akiliutissamik piffissaq eqqorlugu akiliuteqarsimanngitsoq, Aalisarnermut Piniarnermut Nunalerinermullu Naalakkersuisoqarfimmit akiliuteqarnissaminut nutaamik piffissaliiffigineqarsinnaavoq.
Imm. 2. Akiligassat ernialerneqartussaapput ernialersitsinermut inatsisit malillugu.
Imm 3. Akiliisimannginnermi, qinnuteqartoq Aalisarnermut Inatsit tunngavigalugu akuersissummik imaluunniit licensimik nutaamik tunineqarsinnaanngilaq, aatsaallu tunineqarsinnaalluni, akiligassaq, ilanngullugit morarenter, akilerneqareerpata

Pineqaatissinneqarsinnaanerit

§ 9.  § 8 naapertorlugu piffissaq eqqorlugu akileeqquneqarsimagaluartut piaaralutik mianersuaalliorujussuarnikkulluunniit akiliisimanngitsut akiliisinneqarsinnaapput.
Imm. 2. imm 1 naapertorlugu akiliisitsinernit isertitat Nunatta Karsianut nakkartinneqartassapput.

Atuutilersinneqarnera

§ 10.  Nalunaarut ulloq 1. januar 2013-imi atuutilissaaq. Tamatumunnga atatillugu, Aalisarnermut atatillugu atuisunut akiliuteqartitsinermut  Namminersorlutik Oqartussat nalunaarutaat nr. 2, 12. februar 2010-imeersoq, atorunnaarsinneqarpoq.

Namminersorlutik Oqartussat, ulloq 21. december 2012

Ane Hansen

/

Jens K. Lyberth