Inuussutissarsiutigalugu piniarsinnaanermut allagartat pillugit Namminersorlutik Oqartussat nalunaarutaat nr. 18, 9. oktober 2012-imeersoq.

Piniarneq aallaaniarnerlu pillugit Inatsisartut inatsisaat nr. 12, 29. oktober 1999-imeersumi, Inatsisartut inatsisaat nr. 1, 16. maj 2008-meersukkut allanngortinneqartumi, § 6, § 12, § 13, imm. 1 aamma § 17, imm. 2, malillugit aalajangersarneqarput:

 

Atuuffia

§ 1.  Nalunaarut una Kalaallit Nunaata nunataani aalisarnikkullu oqartussaaffigisaani inuussutissarsiutigalugu piniarsinnaanermut aallaaniarsinnaanermullu atuuppoq.
Imm. 2.  Nalunaarummi uumasut miluumasut timmissallu tamarmik pineqarput.

Akiliuteqartitsinerup aalajangersaavigineqarnera

§ 2.  Piniarnermut allagartanut akiliuteqartitsinermi akigititassap annertussusaa qaammatisiutit ukiuat naallugu Piniarnermut Naalakkersuisumut ilaasortamit aalajangersarneqartassaaq, ukioq kingulleq allaffissornikkut ingerlatsinermilu aningaasartuutit tunngavigalugit.
Imm. 2.  Inuussutissarsiutigalugu piniarnermut allagartap tunniunneqarneranut akiliutissaq annertussuseqarpoq 200 kr.-nik.

Inuussutissarsiutigalugu piniarsinnaanermut aallaaniarsinnaanermullu akuersissuteqartarneq

§ 3.  Inuussutissarsiutigalugu piniarsinnaanermut allagartaq killissarititaasut inatsisini allani aalajangersarneqartut iluanni piniarnissamut aallaaniarnissamullu pisinnaatitsivoq.
Imm. 2.  Kalaallit Nunaanni pinerluttulerineq pillugu inatsit naapertorlugu, sakkut ulorianartut inunnut 12-it inorlugit ukiulinnut tunniuteqqusaanngillat, tamanna naapertorlugu taamatut ukiutigut killigititaq ataallugu ukiullit piniarsinnaanermut allagartamik tunineqarsinnaanngillat.

Inuussutissarsiutigalugu piniarnermut allagartartaarniarluni qinnuteqarneq

§ 4.  Inuussutissarsiutigalugu piniarnermut allagartassamik qinnuteqarneq pisinnaavoq immersuiffissamut Piniarnermut Naalakkersuisoqarfimmit ilusilersugaq atorlugu kommunimut najugarigisamut nassiunneqarneratigut imaluunniit Internet-imik aallaavilik atorlugu nassiunneqarneratigut.
Imm. 2.  Piniarnermut allagartamik qinnuteqartumut itigartitsisoqartillugu, najugarisami kommunerisamit tamatuminnga qinnuteqartoq ilisimatinneqassaaq, Piniarnermut aallaaniarnermullu Inatsisartut inatsisaanni piumasarineqartut qinnuteqartumit naammassineqannginneri peqqutigalugu. Allakkatigut nalunaarutigineqarnerata assilinera Piniarnermut Naalakkersuisoqarfimmut nassiunneqassaaq.

Inuussutissarsiutigalugu piniarnermut allagartap atorsinnaassusia

§ 5.  Inuussutissarsiutigalugu piniarnermut allagartaq tassaavoq Piniarnermut Naalakkersui­soqarfiup giro atorlugu akiliiffissiaata akiliisimanermut uppernarsaatitaa.
Imm. 2.  Inuussutissarsiutigalugu piniarnermut allagartap tunniunneqarnerani akiliuteqar­titsisoqassaaq, § 2 naapertorlugu.
Imm. 3.  Inuussutissarsiutigalugu piniarnermut allagartaq taamaallaat atuuppoq akiliisimaneq uppernarsarsimagaangat atuuttarlunilu qaammatisiutit ukiuat allagartap atuuffissaa naallugu. Akiliisimanermut uppernarsaat tassaavoq giro atorlugu akiliiffissami aningaaseriviup allakkeri­viulluunniit naqitsisaa, webbank atorlugu akiliisimanermut uppernarsaat imaluunniit allatut iliorluni paatsoorneqarsinnaanngitsumik qularnaat­sumillu nalunaarsuineq, akileqquneqartup akilersimaneranut uppernarsaatitut atuuttoq.

§ 6.  Inuussutissarsiutigalugu piniarnermut allagartamik piginnittoq Piniarneq aallaaniarnerlu pillugit Inatsisartut inatsisaanni inuussutissarsiutigalugu piniarnissamut piumasaqaatitut  aalajangersakkat naammassinngippagit imaluunniit inuussutissarsiutigalugu piniarner­mik aallaaniarnermillu ingerlatsinerminik unitsitsippat, tamanna kommunimut najugarisamut erngerluni nalunaarutigineqassaaq.
Imm. 2.  Najugarisami kommunerisap imm. 1 naapertorlugu nalunaarut Piniarnermut Naalakkersuisoqarfimmut ingerlateqqissavaa. Pineqartoq sunngiffimmi aallaaniarsinnaanermut allagartat pillugit Namminersorlutik Oqartussat nalunaarutaat malillugu sunngiffimmi piniarsinnaanermut allagartartaarnissaamut qinnuteqarsinnaavoq.

§ 7.  Inuussutissarsiutigalugu piniarnermut allagartaq piginnittumuinnaq tunngavoq allamullu tunniuteqqusaanani, tuneqqusaanani atukkiuteqqusaananiluunniit.
Imm. 2.  Inuussutissarsiutigalugu piniarnermut allagartaq kinaassutsimut uppernarsaammut atuuttumut ilanngullugu piniarnermi aallaaniarnermilu nassarneqartassaaq nakkutilliinermullu atatillugu politiit, piniarnermik aalisarnermillu nakkutilliisut, taakku ikiortaasa imaluunniit inuit tamatumunnga piginnaatitaasut piumasaqarnerisigut takutinneqartassalluni.

Pisanik nalunaaruteqartarneq

§ 8.  Inuussutissarsiutigalugu piniarnermut allagartalik kinaluunniit pisussaavoq pisat tamarmiusut nalunaarsussallugit pissatat ilanngullugit. Pisanik nalunaarsuinissamut periarfissat marluusunit arlaat atorlugu pisinnaavoq:
1) Pisarisimasat qaammatit naaneri tamaasa naatsorsuusiorneqartassapput. Ukiumut pisarisimasat pillugit kisitsisit, imm. 2 naapertorlugu piffissap pisanik nalunaarsuiffiusussap naanerani, pisanik nalunaarsuiffissamut Piniarnermut Naalakkersuisoqarfimmit suliarineqarsimasumut naatsorsuusiorneqassapput, oktobarillu ulluisa 15-iat tikitsinnagu utertinne­qassallutik.
2) Pisarisimasat Internet-imik aallaavilik atorlugu oktoberip ulluisa 15-iat tikitsinnagu nalunaarsorneqassapput.
Imm. 2.  Piffissaq pisanik nalunaarsuiffiusussaq tassaavoq oktobarip ulluisa aallaqqaataanniit septembarip ulluisa 30-iannut, ullut taakku ilanngullugit.
Imm. 3.  Inuussutissarsiutigalugu piniarsinnaanermut allagartap nutarternissaanut tunngaviussaaq piffissamut pisanik nalunaarsuiffiusussamut qaangiuttumut pisanik nalunaarsuilluni immersuiffissap Piniarnermut Naalakkersuisoqarfimmi nalunaarsorneqarsimanissaa, imm. 1 naapertorlugu.
Imm. 4. Inuussutissarsiutigalugu piniarnermut allagartartaarnissamut qinnuteqaatit suliarineqassanngillat pisanik nalunaarsuiffik, piffissami pisanik nalunaarsuiffiusussaatitaaffimmi siuliani, imm. 2 naapertorlugu, pisanik nalunaarsuiffimmik immersuiffissaq, imm 1, naapertorlugu immersorneqarluni nassiunneqarsimanngippat.

Immikkut akuersissuteqartarneq

§ 9.  Piniarnermut Naalakkersuisoq nalunaarummi matumani maleruagassat immikkut saneqqunneqarnissaannut akuersissuteqarsinnaavoq tamanna ilisimatuutut misissuinerit pisariaqartilersippassuk.
Imm. 2.  Inuussutissarsiutigalugu piniarnermut allagartassanik immikkut akuerineqarnissamik qinnuteqaat najugarisami kommunerisamut imaluunniit Piniarnermut Naalakkersuisoqarfimmut nalunaarutigineqassaaq immersuiffissaq Naalakkersuisoqarfimmit ilusilersugaq atorlugu imaluunniit imminut kiffartuusseriaatsimi immersugassaq Naalakkersuisoqarfimmit ilusilersugaq atorlugu nalunaarutigineqassalluni.
Imm. 3.  Imm. 2 naapertorlugu immikkut akuerineqarneq qaammatisiutit ukiuanni tunniunneqarfigisamini atuutissaaq.

Pineqaatissiissutit

§ 10.  Piniarneq aallaaniarnerlu pillugit Inatsisartut inatsisaanni piniarsinnaanermut aallaaniarsinnaanermullu piumasaqaatinik uanilu nalunaarummi § 7, imm. 1-imik 2-millu kiisalu § 8, imm. 1-imik unioqqutitsisut akiliisitsinikkut pineqaatissinneqarsinnaapput.
Imm. 2.  Piniarneq aallaaniarnerlu pillugit Inatsisartut inatsisaanni piniarsinnaanermut aallaaniarsinnaanermullu piumasaqaatinik aamma § 7, imm. 1-imik 2-millu unioqqutitsisoqartillugu pisat taakkuluunniit nalingat Kalaallit Nunaanni pinerluttulerinermik inatsit malillugu arsaarinnissutigineqarsinnaapput.

Atuutilerfia

§ 11.  Nalunaarut atuutilerpoq ulloq 10. oktober 2012.
Imm. 2.  Tamatumunnga peqatigitillugu Inuussutissarsiutigalugu piniarnermut allagartat pillugit Namminersornerullutik Oqartussat nalunaarutaat nr. 20, 27. november 2003-meersoq atorun­naarsinneqarpoq.
Imm. 3. Imminut kiffartuusseriaatsip nutaap atorneqalerneranut atatillugu piffissaq ikaarsaariarfiusoq ukiut marluk tikillugit ingerlanissaa naatsorsuutigineqarpoq.

Namminersorlutik Oqartussat, ulloq 9. oktober 2012.

Ane Hansen

/

Jens K. Lyberth