Amerlasuut aqerlumik sanaat eqqunneqartarnerat, tunisaanerat pigineqarnerat aamma atugaanerat pillugu Namminersorlutik Oqartussat nalunaarutaat nr. 13, 8. august 2012-imeersoq

Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersumi§ 10, imm. 1, nr. 7, § 49, imm. 1, nr. 1, § 66, imm. 3 aamma § 68, imm. 2 malillugu, makku aalajangersaavigineqarput:

 

Siunertaq atuuffialu

§ 1.  Nalunaarutip matuma siunertaraa imassani amerlasuut aqerlumik sanaanik imaqartut atugaajunnaarsikkiartuaarneqassasut amerlasuut aqerlunik sanaat peqqissutsimut avatangiisinullu sunniutigisinnaasaat pinngitsoorsimatinniarlugit.
Imm. 2.  Nalunaarummi amerlasuunik aqerlumik sanaanik eqqussisarnermut, tunisaqartarnermut, pigisaqarnermut atuinermullu tunngasut pillugit maleruagassat aalajangersaavigineqarput.
Imm. 3.  Nalunaarut una naapertorlugu amerlasuunik aqerlumik sanaanik atuinertut paasineqassaaq imassamik amerlasuunik aqerlumik akulimmik sanaamik imaqartumik aallaariartoqarpat imaluunniit imassamik amerlassuunik aqerlumik akoqartumik sanaamik aallaammi ikkusimasoqarpat.
Imm. 4.  Aqerlutalinnik amerlasuulittut paasineqassapput amerlasuut aqerlumik sanaat tamarmik imaluunniit amerlasuut aqerlumik akullit.

 
Imassani amerlasuunik aqerlumik sanaanik eqqussinissamut, tuniniaanissamut atuinissamullu inerteqquteqarneq

§ 2.  Imassanik aqerlumik sanaanik amerlasoortalinnik Kalaallit Nunaannut eqqussineq aamma tuniniaaneq atuinerlu inerteqqutaavoq.

Nakkutilliineq

§ 3.  Piniarnermi aallaaniarnermilu amerlasuunik aqerlumik sanaannik atuinissamut inerteqquteqarnerup malinneqarnerata nakkutigineqarnissaa Naalakkersuisut isumagissavaat. Allani atuinerit, matumani ilaatillugit timersuutigalugu ooqattaasartoqartarnerani, nakkutilliinerit kommunalbestyrelsip pisussaaffigaa.
Imm. 2.  Kommunalbestyrelsip nakkutigissavaa amerlasuunik aqerlumik sanaanik tuniniaanissamut inerteqquteqarneq malinneqarnersoq.
Imm. 3.  Akileraartarnermut aqutsisoqarfiup amerlasuunik aqerlumik sanaanik eqqussinissamut inerteqquteqartoqarnera malinneqarnersoq nakkutigisassarissavaa.

Pineqaatissiinerit pillugit aalajangersakkat

§ 4.  § 2 unioqqutsinneqarpat akiliisitaasussanngortitsilluni eqqartuussisoqarsinnaavoq. Ingerlataq inatsisitigut inuttut isigineqartoq akiliisitaasussanngortinneqarsinnaavoq Kalaallit Nunaanni pinerluttulerinermut inatsimmi maleruagassat naapertorlugit.
Imm. 2.  Nalunaarummik matuminnga unioqqutitsisoqartillugu pinerluttulerinermi inatsimmi maleruagassat naapertorlugit aamma arsaarinnissuteqartoqassaaq.
Imm. 3.  Nalunaarut una malillugu eqqartuusinikkut akiliisitaasutaasussanngortinneqartut Nunatta karsianut tutsinneqassapput.

Atuutilersinneqarnera ikaarsaarnissamilu aalajangersakkat

§ 5.  Nalunaarut atuutilissaaq 1. oktober 2012, tak. § 6.

§ 6.  Amerlasuunik aqerlumik sanaanik tuniniaanermut inerteqquteqarneq, tak. § 2, 1. april 2014-imiit atuutilissaaq.
Imm. 2.  Amerlasuunik aqerlumik sanaanik atuinissamut aamma pigisaqarnissamut inerteqquteqarneq, tak. § 2, 1. oktober 2014-imiit atuutilissaaq
Imm. 3.  Amerlasut aqerlumik sanaat atorneqanngitsut politiinut tunniuneqassapput.

Namminersorlutik Oqartussat, ulloq 8. august 2012

Anthon Frederiksen

/

Hans-Erik Bresson