Siumoortumik nalunaarsuineq, nammineerluni nalunaarsuineq aamma akileraarutit isumannaarneqarnerat pillugit Namminersorlutik Oqartussat nalunaarutaat nr. 7, 30. marts 2012-meersoq

Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi, Inatsisartut inatsisaatigut nr. 2, 18. maj 2010-meersukkut kingullermik allanngortinneqartumi § 13, imm. 7 aamma 8, § 14, imm. 1, § 15, imm. 2, § 17, imm. 1, § 28, § 42, imm. 2, § 45, imm. 3, § 56 aamma § 83, kiisalu Aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi, Inatsisartut inatsisaatigut nr. 20, 18. november 2010-meersukkut kingullermik allanngortinneqartumi § 83, imm. 2 naapertorlugit aalajangersarneqarput:

 

Kapitali 1
Siumoortumik nalunaarsuineq, § 15 naapertorlugu utertitsinerit aamma nammineerluni nalunaarsuineq

Siumoortumik nalunaarsuineq nalinginnaasoq

§ 1. Immersugassat ilitsersuutillu siumoortumik nalunaarsuinermi atugassat akileraaruseriffi­up suliarissavai.

§ 2. Immersukkat paasissutissaajunnartullu allat siumoortumik nalunaarsuinermi nalinginnaasumi naatsorsuutigineqassagunik ukioq aningaasarsiorfiusoq sioqqullugu kingusinnerpaa­mik 15. novemberimi akileraaruseriffimmi tiguneqarsimassapput. Immersukkat paasissutis­saajunnartullu allat akileraaruseriffimmut digitaliusumik nassiunneqarsinnaapput.
Imm. 2. Akileraaruseriffiup piffissaliussaq imm. 1-imi pineqartoq naqitatigut aamma elektroniskiusumik tusagassiuutitigut nuna tamakkerlugu saqqummersartutigut kingusinnerpaamik oktoberip qiteqqunnerani tamanut nalunaarutigissavaa.

§ 3. Akileraartussaatitaasut akileraaruserinermik ingerlatsineq pillugu Inatsisartut inatsisaanni § 13, imm. 6-imi pineqartut aningaasarsiornikkut atugassarissangasatik pillugit, Kalaallit Nunaannut akileraartussaatitaalernerminniit ullut 14-it qaangiutsinnagit nassuiaateqassapput.

Skattekortit aamma akileraarutissat allagartaat

§ 4. Akileraaruseriffiup skattekortit aamma akileraarutissat allagartaat suliarissavai akileraartussaatitaasunullu nassiutissallugit, taamaattorli tak. imm. 2 aamma 3.
Imm. 2. Akileraarutinik A-nik unerartitsinissamik pisussaasup (unerartitsisussaatitaasup) akileraartussaatitaasumik sulisoqartup, ukiup aningaasarsiorfiusussap aggersup ingerlanerani akileraartussaatitaasumik akissarsisitsinissani naatsorsuutigiguniuk skattekortia novemberip 15-ia nal­lertinnagu piniarsinnaavaa.
Imm. 3. Akileraaruseriffiup skattekorti unerartitsisussaatitaasumut tunniussimaguniuk tamanna akileraartussaatitaasumut nalunaarutigissavaa.

§ 5. Tamakkiisumik akileraartussaatitaasoq inaarutaasumik naatsorsuineq malillugu akileraarutit sinnerinik akiliissappat, akileraarutit sinnerisa ilaat, tapiliussaq ilanngullugu 18.000 kr.-i­nit amerlanerunngitsut akileraaruseriffiup erseqqinnerusumik aalajangiinera malillugu ukiup tullissaani akiliutissat ilassaattut nuunneqassapput, taakkulu matussuserniarlugit ukiumi tassani akileraarutinut A-nut B-nulluunniit akiligassiissutinut ilanngunneqassallutik. Ukiumi akileraarutit sinnerisa nuunneqarfianni akileraarutinut akilersinneqartut, akileraarutit sinnerisa nuunneqartut siulliullugit matussusernissaannut atugassatut isigineqassapput.
Imm. 2. Imm. 1 naapertorlugu akiligassiineq pissaaq akileraartussaatitaasup ilanngaatissaasa naatsorsueriaaseq imaattoq malillugu ikilisinnerisigut: Akileraartussaatitaasup ilanngaatissai ima ilanngarlugit (akileraarutit sinneri nuunneqartut procentimik akileraarusiissummik aggu­arlugit 100-millu ganngerlugit). Skattekortimi ilanngaatissat naatsorsorneqartut minusiuppata 0-inngortinneqassapput.
Imm. 3. Aningaasat imm. 1-imi pineqartut sinnerigunnagaat akileraaruserinermik ingerlatsineq pillugu Inatsisartut inatsisaanni § 24, imm. 3-mi 4-milu maleruagassat naapertorlugit akiligassanngussapput. Tamanna aamma atuuppoq akileraarutit sinneri nuunneqartut ukiumi tul­liuttumi akileraarutaagallartussanut ilanngunneqarsinnaanissaat naatsorsuutigineqarsinnaanngippat.
Imm. 4. Akileraarutit sinneri piffissami inaarutaasumik naatsorsuiffiup suliarineqarnerani 6 procentimik tapiliussamik ilallugit naatsorsorneqarsimanerattut ilanngunneqassapput. Akile­raarutit sinneri imm. 1 naapertorlugu nuunneqartut ernialersorneqassanngillat.
Imm. 5. Aningaasat imm. 2-mi 4-milu pineqartut koruunimut ilivitsumut qaninnermut ammut akunnaallineqassapput.

§ 6. Aningaasat 18.000 kr.-it, tak. § 5, imm. 1, akileraarutit sinnerinut matussutissatut tamakkiisumik atorneqanngippata ukiuni aningaasarsiorfiusuni siusinnerusuni akileraarutinut akiitsut tapiliussat ilanngullugit akiligassanngorsimasut, akileraaruseriffiup erseqqinnerusumik aalajangiinera malillugu aningaasat sinnerinut nuunneqarsinnaapput.
Imm. 2. Akileraarutinut akiitsut akiligassanngorsimasut tassaapput aningaasarsianit akileraarutit, akitsuutit, tapit, akiliisitsissutit erniallu akileraaruseriffimmit ingerlanneqartut pillugit akiitsut. Akiitsut taagorneqartut pisoqaanerit siulliullugit, taavalu matussusiinissamik tulleriiaarineq taaneqartoq malillugu matussuserneqartassapput. Akiitsut ilanngunneqartut akileraarutit sinnerinit ilanngunneqarsimasunit kingulliullugit matussuserneqassapput, kisiannili ukiumi aningaasarsiorfiusumi pineqartumi akileraarutinit A-nit siulliullugit.
Imm. 3. Akiitsut aningaasartaat ukiumi pineqartumi 20. november naatsorsorneqarsimanerattut ilanngunneqassapput. Tassunga ilanngunneqassaaq akiitsut tapiat 6 procentiusoq landskarsip pisassaa, kisianni tapit, akiliisitsissutit erniallu ilanngunnagit. Aningaasat koruunimut ili­vitsumut qaninnermut ammut akunnaallineqassapput.
Imm. 4. Akileraarutinut akiitsut imm. 1 naapertorlugu nuunneqartut ernialersorneqassanngillat.
Imm. 5. Akileraartussaatitaasup siumoortumik nalunaarsuutaata kingusinnerusukkut allanngortinneqarnerata kingunerisaanik akiitsut ilanngunneqartut skattekortikkut unerartinneqarsinnaajunnaarpata akiitsut utertinneqassapput.
Imm. 6. Akiitsut ilanngunneqartut ukiumi aningaasarsiorfiusumi akileraarutinut A-nut akiliu­taagallartunit matussuserneqanngippata akiitsut utertinneqassapput, ernialersuinerlu ukiumi aningaasarsiorfiusumi 1. januar aallarnerfigalugu kingumoortumik ingerlateqqinneqalissalluni, aammalu akiitsut tassuuna utertinneqartut tapiat 6 procentiusoq atortussaajunnaarsinneqassaaq.

§ 7. Akileraaruseriffiup aningaasat § 5, imm. 1, imaluunniit § 6, imm. 1 naapertorlugit nuunneqarnissaat pinngitsoortissinnaavaa imaluunniit aningaasat ikinnerusut nuunneqarnissaat aalajangersinnaavaa, nuussineq akileraartussaatitaasup akileraartussaatitaasullu inoqutaasa naammaannartumik angerlarsimaffeqarnissamut naammaannartumillu inuuniarnissamut akissaarunnissaannik kinguneqassasoq akileraaruseriffiup nalilerpagu.

§ 8. Akileraartussaatitaasoq tamakkiisumik akileraartussaajunnaarpat akileraarutit sinneri § 5, imm. 1 naapertorlugu, aammalu akileraarutinut akiitsut § 6, imm. 1 naapertorlugu nuunneqarsimasut pingasunut agguarlugit naafferartumik akiligassanngussapput, siullermik akilerne­qartussanngussallutik tamakkiisumik akileraartussaajunnaarfiup kingorna qaammatip qaninnerup aallaqqaataani, taassumalu kingorna qaammatit tulliuttut marluk aallaqqaataanni, qaammatinilu akiliiffissani tamani piffissaagallartillugu akiliiffissaq kingulleq tassaassalluni qaammatit ulluisa 20-at.
Imm. 2. Piffissaagallartillugu akiliiffissaq sapaataappat nalliuttuuppalluunniit imaluunniit arfininngorneruppat piffissaliussaq ulluinnarmut tulliuttumut sivitsorneqassaaq.

§ 9. Aningaasat 18.000 kr.-it, tak. § 5, imm. 1, tamakkiisumik atorneqanngippata aningaasarsiat B-t sapinngisamik amerlanerpaat skattekortimi ilanngaatissat sinnerisa ilaannit ilanngaatigineqassapput, taamaaliornikkut skattekorti ilanngaatissanik appaaffigalugu imaluunniit ilanngaatitaqanngivissumik suliaralugu.
Imm. 2. Akileraarutit B-t naatsorsorneqarneranni aningaasarsiat B-t sinneruttut koruuninut 100-mik agguarneqarsinnaasunut qaninnernut ammut akunnaallineqassapput.
Imm. 3. Akileraarutit B-t 100 kr.-init amerlaneruppata akileraarutissat allagartaasigut akiligassiissutigineqassapput.

§ 15 naapertorlugu utertitsinerit

§ 10. Aningaasarsianit akileraarutinut akiliutaavallaarsimasut utertinneqarnissaannik qinnuteqaatit akileraaruseriffimmut allakkatigut nassiunneqassapput, tak. akileraaruserinermik ingerlatsineq pillugu Inatsisartut inatsisaanni § 15, imm. 1.
Imm. 2. Utertitsinissamik qinnuteqaat aatsaat akuerineqarsinnaavoq akileraartussaatitaasup akileraarutaagallartunut akiliivallaarsimanini nammineerluni nalunaarsuutikkut, naatsorsuutitigut, akissarsiat allagartaasigut allatigulluunniit takussutissaqartippagu, taamaalillunilu akileraarusiinerup naammassineqarnerani akileraarutit sippuutaannik pisassaqartussatut ilimagineqarsinnaappat.

Nalikilliliinermi immersugassaq

§ 11. Akileraartussaatitaasut ingerlatsinermi naatsorsuutinik akileraaruseriffimmut nassiussi­sussaanngitsut, tak. akileraaruserinermik ingerlatsineq pillugu Inatsisartut inatsisaanni § 17, imm. 3, aamma § 18, imm. 1, kisiannili akileraarutitigut nalikilliliisinnaasut nalikilliliinermi immersugassaq akileraaruseriffimmit suliarineqartoq atussavaat.
Imm. 2. Imm. 1 naapertorlugu pisussaaneq akileraaruseriffiup qinnuteqartoqarneratigut malitsinngitsoorsinnaavaa.

 

Kapitali 2
Akileraarutinik isumannaarineq

Kommunimut akileraarut

§ 12. Akileraarutit akilerneqartut ilaannit kommunimut akileraarut tassaavoq procenti aningaasarsianut inummut ilanngaammik ilanngarneqarsimasunut akileraarusiissutaasoq, kommunip akileraarfiusup qaammatisiutit malillugit ukiumut aalajangersarsimasaa.

§ 13. Akileraaruseriffik, kommunit inuit akileraarutaasa ilaannit pisassaasa isumannaarneqartarnerat pillugu kommuninut isumaqatigiissuteqarsinnaavoq. Akileraaruseriffiup tassunga ilanngullugu isumaqatigiissutigisinnaavaa inuit akileraarutaannik isumannaarisarneq ukiup ingerlanera tamaat atsikkutigiissumik akiliisarnikkut pisarsinnaasoq, kommuninullu akileraarutinut akilerneqartunut tunngatillugu nikingassutaasut, matumani ilanngullugit akileraarusiinerup aammalu akileraarutissanik angissusiliinernik kukkunersiuinerit kingunerisaannik nikingassutaasut ukiumi tulliuttumi isumannaarinissanut ilanngunneqassasut.

Nunamut tamarmut akileraarut aamma kommuninut ataatsimut akileraarut

§ 14. Akileraarutit akilerneqartut ilaannit nuna tamakkerlugu akileraarut aamma kommuninut ataatsimut akileraarut ukiumi aningaasarsiorfiusumi pineqartumi nuna tamakkerlugu akileraarusiissutigineqartut, kommuninut ataatsimut akileraarusiissutigineqartut aamma kommunimut akileraarusiissutigineqartut annertussusii tunngavigalugit naatsorsorneqassapput.

Selskabit akileraarutaat

§ 15. Akileraaruseriffiup selskabit akileraarutaasa ilaat kommunip akileraarfiusup pisassai, ukiup aningaasarsiorfiusup qaangiunnerata kingorna kingusinnerpaamik qaammatit 13-it qaangiunneranni komunimut akilertassavai.
Imm. 2. Selskabit akileraarutaasa ilaat kommunip akileraarfiusup pisassai imm. 1 naapertorlugu akilerneqartut ukiumi aningaasarsiorfiusumi pineqartumi nuna tamakkerlugu akileraarusiissutigineqartut, kommuninut ataatsimut akileraarusiissutigineqartut aamma innuttaasut amerlassusiat malillugu kommunimut akileraarusiissutigineqartut annertussusii tunngavigalu­git naatsorsorneqassapput, tak. akileraaruserinermik ingerlatsineq pillugu Inatsisartut inatsi­saanni § 40, imm. 7.

Iluanaarutisianit akileraarutit

§ 16. Akileraaruseriffiup iluanaarutisianit akileraarutit piffissami qaangiuttumi akilerneqartut ilaat kommunip akileraarfiusup pisassai minnerpaamik ukiumut marloriarluni kommunimut akilerallartassavai.
Imm. 2. Akileraaruseriffiup iluanaarutisianit akileraarutit qaammatini 12-ni qaangiuttuni akilerneqartut ilaat kommunit akileraarfiusut pisassaat kingusinnerpaamik januarip naanerani inaarutaasumik akilertassavai.
Imm. 3. Iluanaarutisianit akileraarutit ilaat kommuninut akileraarfiusunut imm. 1 naapertorlugu akilerneqartut ukiup siuliani nuna tamakkerlugu akileraarusiissutigineqartut, kommuninut ataatsimut akileraarusiissutigineqartut aamma kommunimut akileraarusiissutigineqartut annertussusii tunngavigalugit naatsorsorneqassapput.

Akileraarutit annaasat agguaanneqartarnerat

§ 17. Akileraartussaatitaasut unerartitsisussaatitaasullu akileraarutinik akiliinnginnerisigut annaasat kommunit Namminersorlutillu Oqartussat nammatassaraat.
Imm. 2. Annaasat ilaat kommunit nammatassaat ataatsimoortumik tapiissutit pillugit ukiumoortumik isumaqatigiinniarnerni aalajangersarneqartassapput ataatsimoortumillu tapiissutinit ilanngaatigineqartassallutik.

Ernialersuinermik unitsitsineq

§ 18. Akileraarutinut akiitsunik ernialersuinermik unitsitsinissaq nalinginnaasumik aalajangerneqarsinnaanngilaq
1) akiligassaqartuusup aningaasarsiorneranut tunngasut erseqqissumik ilisimaneqanngippata, imaluunniit
2) akiligassaqartuusup akiitsuni naafferarlugit akilersorsinnaasimagaluarlugit taamaaliorsimanngippat.
Imm. 2. Akileraarutinut akiitsunik ernialersuineq nanginneqassaaq akiligassaqartuusup ani­ngaasarsiornera ima periarfissiippat akiligassaqartuusoq piffissap sivisunerpaamik ukiunik pingasunik sivisussuseqartup iluani akiitsuminik tamarmiusunik akilersuisinnaalluni.

 

Kapitali 3
Pineqaatissiissutit aamma atortuulerfia

§ 19. Kinaluunniit piaaraluni mianersuaalliorujussuarluniluunniit §§-inik 3-mik aamma 11, imm. 1-imik unioqqutitsisoq akiliisinneqarsinnaavoq.

§ 20. Nalunaarut 1. juni 2012-imi atuutilissaaq.
Imm. 2. Ilutigitillugu atorunnaarsinneqarpoq siumoortumik nalunaarsuineq, nammineerluni nalunaarsuineq aamma akileraarutit isumannaarneqarnerat pillugit nalunaarut nr. 25, 1. de­cember 2006-imeersoq.

Namminersorlutik Oqartussat, ulloq 30. marts 2012

Maliina Abelsen

/

Jan H. Lynge-Pedersen