Aalisarsinnaanermut akuersissutit pisassiissutillugu pillugit Namminersorlutik Oqartussat nalunaarutaat nr. 1, 2. februar 2012-meersoq

Aalisarneq pillugu Inatsisartut inatsisaanni nr. 18, 31. oktober 1996-imeersumi, Inatsisartut inatsisaatigut nr. 6, 20. Maj 1998-imeersukkut, Inatsisartut inatsisaatigut nr. 5, 21. Maj 2002-imeersukkut allanngortinneqartumi, kingullermik Inatsisartut inatsisaatigut nr. 8, 22. November 2011-meeersukkut allanngortinneqartumi  § 9, § 10, § 10 a, § 11, § 13, imm. 2 aamma imm. 3, § 23, § 33 imm. 2 aamma § 34, imm. 3, naapertorlugit aalajangersarneqarpoq:

 

Atuuffia

§ 1. Nalunaarut angallatit Kalaallit Nunaanni nalunaarsorsimasut atorlugit aamma allamiut angallataat atorlugit inuussutissarsiutigalugu aalisarnermi imartani Kalaallit Nunaata aalisarnikkut oqartussaaffigisaani atuuppoq.
Imm. 2.  Angallatit usitussutsimut uuttuutaat malillugu 75 BRT/120 BT-it mikinerusut taamaallaat imartami sinerissap titarnerullu aalisarnikkut oqartussaaffiup tunngaviusumik killingata 3 sømilinik avataaniittup akornanni aalisarsinnaapput.
Imm. 3. Angallatit usitussutsimut uuttuutaat malillugu 75 BRT/120 BT-tut angitigisut anginerusullu taamaallat titarnerup aalisarnikkut oqartussaaffiup tunngaviusumik killingata 3 sømilit avataani aalisarsinnaapput.
Imm. 4.  Imm 2 aamma imm. 3. uiluinniarnermi atuutinngillat.

§ 2.  Angallatip usitussitsimut killigititaq qaangersimaneraa ataassimaneraaluunniit nalunaarummi uani aalajangiisoq tassaavoq usitussutsip annertussusia angallatip usitussutsimut uuttuutaani allaqqasoq, usitussutsimut uuttueriaaseq pillugu malittarisassat suut tunngavigalugit suliarineqarsimanera apeqqutaatinnagu.

Piffissaa killilerlugu pisassat annertunerpaaffilerlugit aalisarsinnaanermut akuersissut

§ 3.  Piffissaa killilerlugu pisassat annertunerpaaffilerlugit aalisarsinnaanermut akuersissuteqarnissaq ukuninnga inuussutissarsiutigalugu aalisarnermi piumasaqaataavoq:
1) angallatit 75 BRT/120 BT-tut angitigisut anginerusullu atorlugit aalisagaqatigiinnik tamanik aalisarnermi, raajalli pinnagit,
2) uiluinniarnermi, angallatit angissusaat apeqqutaatinnagit,
3) aalisarneq pillugu oqartussaaffinni nunat allat imaluunniit nunarsuup immikkoortuini aalisarneq pillugu suleqatigiiffiit aalisarnermik killilersuisinnaanermut pisinnaatitaaffigisaanni angallatit Kalaallit Nunaanni nalunaarsorneqarsimasut atorlugit aalisarnermi,
4) Kalaallit Nunaata aalisarnermik oqartussaaffigisaata iluani misileraalluni aalisarnermi, angallatip naalagaaffimmit suminngaanneersuunera apeqqutaatinnagu,
5) nunat tamat imartaanni killilersuiffiunngitsuni aalisarnermi.
Imm. 2.  Imm. 1. malillugu aalisarsinnaanermut akuersissut inunnut suliffeqarfinnulluunniit  ukiut siuliani taassuma assinganik aalisarsinnaanermut akuersissuteqarsimasunut taassuminngalu atuisimasunut qinnuteqartoqarneratigut tunniunneqartarpoq.
Imm. 3.  Aalisarsinnaanermut akuersissut sivisunerpaamik ukiumut ataatsimut tunniunneqartarpoq.

Piffissaa killilerlugu pisassat annertunerpaaffilernagit aalisarsinnaanermut akuersissut

§ 4.  Piffissaa killilerlugu pisassat annertunerpaaffilernagit aalisarsinnaanermut akuersissuteqarnissaq ukuninnga inuussutissarsiutigalugu aalisarnermi piumasaqaataavoq:
1) aalisagaqatigiinnik angallatinit Kalaallit Nunaanni nalunaarsorneqarsimasunit ataatsimoorullugu aalisarneqarsinnaasunik pisassiissoqartillugu aalisarnermi,
2) immikkut pisuni biologit siunnersuinerat pisassiissutinik aalajangiinissamik kinguneqartussaatinnagu angallatit Kalaallit Nunaanni nalunaarsorneqarsimasut atorlugit aalisarnermi,
3) angallatit nunanit allaneersut atorlugit Kalaallit Nunaata aalisarnikkut oqartussaaffigisaani aalisarnermi, aalisakkanik pisassiissutit nunap erfalasoqarfiusup pineqartup angallataanit ataatsimoorullugu aalisarneqarsinnaagaangata.
Imm. 2. Aalisarsinnaanermut akuersissut taamaallaat angallatinut suliffeqarfinnulluunniit ukiup siuliani taassuma assinganik aalisarsinnaanermut akuersissuteqarsimasunut taassuminngalu atuisimasunut qinnuteqartoqarneratigut tunniunneqartarpoq.
Imm. 3 Aalisarsinnaanermut akuersissut sivisunerpaamik ukiumut ataatsimut tunniunneqartarpoq.

§ 5.  Piffissaa killilerlugu pisassat annertunerpaaffilernagit aalisarsinnaanermut akuersissut qinnuteqartunut 6 meter sinnerlugu tamakkiisumik takissusilinnut mikinerusunulluunniit angallatilinnut tunniunneqartarpoq. Aalisarsinnaanermut akuersissut inunnut ukiup siuliani taassuma assinganik aalisarsinnaanermut akuersissuteqarsimasunut taassuminngalu atuisimasunut qinnuteqartoqarneratigut tunniunneqartarpoq.
Imm.  2. Inuit siusinnerusukkut aalisarsinnaanermut akuersissuteqarsimasut kisiannili pissutsit immikkut ittut pissutigalugit taassuminnga atuisinnaasimanngitsut imm. 1-imit immikkut akuerineqarnissamik qinnuteqarsinnaapput. Pissutsit immikkut ittut tassaasinnaapput nammineq qanigisalluunniit napparsimanera, angallammik ajutoorneq aamma amutsivimmiinneq. Immikkut akuersissuteqartoqarsinnaavoq nalilersuineq pissutsinik atuisinnaannginnermut pissutaasunik ataatsimut nalilersuineq tunngavigalugu. Qinnuteqaat uunga nassiunneqassaaq, Aalisarnermut, Piniarnermut Nunalerinermullu Naalakkersuisoqarfik, Postboks 269, 3900 Nuuk.

Piffissaa killilernagu pisassat annertunerpaaffilerlugit aalisarsinnaanermut akuersissut

§ 6.  Angallatit 6 meter sinnerlugu tamakkiisumik takissusillit atorlugit raajarniarnermi sinerissamullu qanittumi qaleralinniarnermi piffissaa killilernagu pisassat annertunerpaaffilerlugit akuersissummik peqarnissaq piumasaqaataavoq.
Imm. 2.  Piginnittup pisassiissutinit pigisai aalisarsinnaanermut akuersissummi allaqqasarput. Pisassiissutinit pigisat tassaapput pisassiissutit tamarmiusut imartami pisassiiffiusumi aalisagaqatigiinnik pineqartunik Naalakkersuisut aalajangersarsimasaasa procentinngorlugit ilaat.
Imm. 3.  Piffissaa killilernagu aalisarsinnaanermut akuersissummut atatillugu ukiut tamaasa ukioq pisassiiffiusoq aallartitsinnagu ukiumoortumik pisassiissutit pillugit nalunaarut tunniunneqassaaq, ukiumi pineqartumi annertussutsit nalunaarlugit.

§ 7.  Raajarniarnermi aalisariutaatileqatigiiffik ukiumoortumik pisassiissutinik tamakkerlugit aalisarsimasoq qinnuteqartoqarneratigut 15. november kingorna ukiumi pineqartumi aalisarnermik ingerlatitseqqinnissamik akuerineqarsinnaavoq. Ukiumoortumik pisassiissutit saniatigut pisarineqartut annertussusaat ukiup tulliani aalisariutaatileqatigiiffimmut ukiumoortumik pisassiissutigineqartunit ilanngaataasarput.
Imm. 2. Raajarniarnermi aalisariutaatileqatigiiffik ukiumoortumik pisassiissutinik tamakkerlugit aalisarsimanngitsoq qinnuteqartoqarneratigut ukiup siuliani pisarineqanngitsut amerlaqataannik ukiup tulliani ukiumoortumik pisassiissutit amerlineqarnissaannik akuerineqarsinnaavoq. Pisassiissutit nuunneqartut kingusinnerpaamik 30. april pisarineqarsimassapput.
Imm. 3.  Imm. 1 aamma 2 malillugit qinnuteqaat Aalisarnermut, Piniarnermut Nunalerinermullu Naalakkersuisoqarfimmut nassiunneqassaaq. Qinnuteqaat imm. 1 malillugu aalisarnerup nangeqqinneqarnera imaluunniit imm. 2 malillugu pisassiisutinik nuussinissamik kissaateqartoqarnera kingusinnerpaamik sapaatit akunneri marluk sioqqullugit naalakkersuisoqarfiup tigusimassavaa.
Imm. 4.  Pisarineqartussatut imaluunniit ukiup tullianut nuunneqartussatut kissaatigineqartut annertussusaannik qinnuteqaat imaqassaaq.

Aalajangersakkat tamanut tunngasut

§ 8.  Aalisarsinnaanermut akuersissut taassumaluunniit assilinera aalisarnermi angallammiitinneqassaaq. Taamatuttaaq ukiumoortumik pisassiissutinik nalunaarut taassumaluunniit assilinera aalisarnermi angallammiitinneqassaaq.

§ 9.  Aalisarsinnaanermut akuersissutit piginnittumut aalajangersimasumut ataatsimut tunniunneqartarput aammalu angallat angallatilluunniit aalisarnermut atorneqartussat allassimassallutik. § 6, imm. 1 malillugu piffissaa killilernagu aalisarsinnaanermut akuersissummut atatillugu ukiumoortumik pisassiissutinik nalunaarummmi angallatit allassimassapput.
Imm. 2.  Aalisarsinnaanermut akuersissummi allannguutit, tassunga ilanngullugit piginnittuumermi pissutsit allanngorneri, Aalisarnermut, Piniarnermut Nunalerinermullu Naalaakkersuisumit akuerineqassapput.

§ 10.  Inuk ingerlatseqatigiiffilluunniit peqatigitillugu angallammut 6 meter taannaluunniit inorlugu tamakkiisumik takissusilimmut aamma angallammut 6 meter sinnerlugu tamakkiisumik takissusilimmut aalisarsinnaanermut akuersissutinik pigisaqarsinnaanngilaq.
Imm. 2.  Angallammut 6 meter sinnerlugu tamakkiisumik takissusilimmut aalisarsinnaanermut akuersissummik pigisalik pisuni immikkut ittuni angallat 6 meter taannaluunniit inorlugu tamakkiisumik takissusilik atorlugu aalisarsinnaavoq. Motooriiarneq, amutsivimmiinneq sikuuneralu kisimik pisutut immikkut ittutut isigineqassapput. Pisanik tunisinermi tunisat ukiumut pisassanit ilanngaatigineqassapput.
Imm. 3.  Ingerlatseqatigiiffimmi angallammut 6 meter sinnerlugu tamakkiisumik takissusilimmut akuersissummik pigisaqartumi piginneqataasoq angallammut 6 meter sinnerlugu tamakkiisumik takissusilimmut akuersissummik pigisaqartutut isigineqassaaq.

§ 11.  Angallatit Aalisarnermut, Piniarnermut Nunalerinermullu Naalakkersuisumit akuerineqarsimasut kisimik inuussutissarsiutigalugu aalisarnermut atorneqarsinnaapput.
Imm. 2.  Aalisarnermut, Piniarnermut Nunalerinermullu taamaallaat angallatit akuerisinnaavai:
1) piginnittuunermut pissutsit tamanna pillugu aalisarnermut inatsimmi aalajangersakkanut naapertuuppata, aamma
2) angallatip aalisarsinnaassusia aalisarnissamik periarfissanut atuuttunut naleqqussagaasutut nalilerneqarpat.
Imm. 3.  Akuerineqarnissamik qinnuteqaat allaganngorlugu Aalisarnermut, Piniarnermut Nunalerinermullu Naalakkersuisoqarfimmut nassiunneqassaaq.
Imm. 4.  Naalagaaffimmi sumi angerlarsimaffeqarnermut uppernarsaatip aammalu usitussutsimut uuttuutip assilinerat qinnuteqaammut ilanngunneqassapput. Angallat nutaamik uuttorneqarsimappat imaluunniit motoria pingaarneq taarserneqarsimappat imaluunniit annertuumik allannguuteqarsimappat usitussutsimut uuttuut nutaaq nassiunneqassaaq.

§ 12.  Kinaluunniit § 3, imm. 1, nr. 3 malillugu Kalaallit Nunaata aalisarnikkut oqartussaaffiata avataani inuussutissarsiutigalugu aalisarsinnaanermut akuersissummik pigisaqartoq nunat tamalaat akornanni aalisarneq pillugu isumaqatigiissutinik aalajangersakkanillu malinninnissamut pisussaaffeqarpoq.
Imm. 2.  Sumiiffinni aalajangersimasuni nunat tamalaat akornanni isumaqatigiissuteqarfiusuni aalisarnermi nunat tamalaat akornanni isumaqatigiissut aalajangersagarluuniit tamatumunnga atuuttoq naapertorlugit angallat nakkutigineqarlunilu pineqaatissinneqarsinnaavoq.

Pineqaatissiissutit

§ 13.  § 1, imm. 2-mik aamma imm. 3-mik, § 3, imm. 1-imik, § 4, imm. 1-imik, § 6 imm. 1-imik, § 8-mik, § 9 imm. 2-mik, § 10 imm. 2-mik § 11 imm. 1-mik imm. 4-millu aamma § 12-imik unioqqutitsisoqarnerani Kalaallit Nunaani pinerluttulerinermut inatsimmi malittarisassat malillugit pineqaatissiilluni akiliisitsisoqarsinnaavoq arsaarinnissuteqartoqarsinnaallunilu. Aalisarsinnaanermut akuersissummi piumasaqaatinik sumiginnaaneq aamma pineqaatissiilluni akiliisitsinermik kinguneqarsinnaavoq.
Imm. 2.  Inatsisilerinermi immikkoortut inuttut isigineqarsinnaasut pinerluttulerinermut inatsimmi malittarisassat malillugit imm. 1-imut ilaapput.

Atuutilersitsineq

§ 14.  Nalunaarut ulloq 6. februar 2012 atuutilerpoq.
Imm.  2.  Peqatigitillugu Aalisarsinnaanermut akuersissuteqartarneq pillugu Namminersorlutik Oqartussat nalunaarutaat nr. 6, 6. maj 2010-meersoq atuukkunnaarsinneqarpoq.

Namminersorlutik Oqartussat, ulloq 2. februar 2012

Ane Hansen

/

Jens K. Lyberth