Nukissiornermi ikummatissat avatangiisinut akitsuutaat pillugit Inatsisartut inatsisaata allanngortinneqarneranik Inatsisartut inatsisaat nr. 1, 14. april 2011-meersoq
(Motoorinut ikummatissap akitsuusernagu umiarsuarnut timmisartunullu tunineqarsinnaanera)

 

§ 1

Nukissiornermi ikummatissat avatangiisinut akisuutaat pillugit Inatsisartut inatsisaanni nr. 21, 18. november 2010-meersumi makku allannguutigitinneqarput:

1.  § 1-ip kingornanut ilanngunneqarpoq:
”§ 1 a.  § 1 naapertorlugu akitsuusiinissami pineqanngilaq motoorinut ikummatissaq timmisartut imaluunniit umiarsuit 200 bruttoregistertonimik tassanngaluunniit annertunerusumik bruttotonnagellit bruttoregistertonnagellilluunniit Kalaallit Nunaannut tikinneranni orsussaasivianniittoq, motoorinut ikummatissaq umiarsuup timmisartulluunniit pineqartup nammineq ingerlatissaatuinnaq naatsorsuussaappat.
Imm. 2.  § 1 naapertorlugu akitsuusiinissami aamma pineqanngillat timmisartut umiarsuilluunniit aseruatitersimasut usimik allagartaat malillugit akitsuuteqarfiusumut tikittussaanngikkaluartut, kiisalu timmisartut umiarsuilluunniit taamaallaat nakorsamik atorfissaqartitsillutik imaluunniit napparsimasunik, toqusunik allatulluunniit ajornartorsiortunik niusiartorlutik akitsuuteqarfiusumut tikittut.
Imm. 3.  Akitsuusiinnginnissamut imm. 1-imi taaneqartumut atatillugu naatsorsuusiorneq nakkutilliinerlu pillugit malittarisassat Naalakkersuisunit aalajangersarneqarsinnaapput.”

2.  § 4-p kingornanut ilanngunneqarpoq:

”Akitsuusigaanngitsumik uninngasuutit

§ 4 a.  Akileraaruseriffiup suliffeqarfiit uninngasuutinik peqqumaasivittut nalunaarsorsimasut akitsuusigaanngitsumik uninngasuuteqarnissamut akuersissummik tunisinnaavai. Akitsuusigaanngitsumik uninngasuutit taamallaat tassaasinnaapput nioqqutissat akitsuusigassat akit­suuteqarfiup avataanut anninneqartussatut naatsorsuussat, aammalu nioqqutissat § 9 naaper­torlugu avatangiisinut akitsuusernagit nioqqutigineqartussat. Akileraaruseriffik akitsuusigaanngitsumik uninngasuuteqarnissamut akuersissummik tunisinerminut atatillugu akitsuusigaanngitsumik uninngasuutit pillugit piumasaqaateqarsinnaavoq.
Imm 2.  Naalakkersuisut akitsuusigaanngitsumik uninngasuutit pillugit erseqqinnerusunik maleruagassiorsinnaapput, matumani aamma naatsorsuusiornermi nakkutilliinermilu maleruagassat aalajangersarsinnaallugit kiisalu akileraaruseriffiup akuersissutinik tunisinerminut atatillugu qularnaveeqqusiinissamik piumasaqaateqarsinnaanera aalajangersinnaallugu.”

3.  § 6, imm. 1, oqaaseqatigiinni siullerni allassimasup ”imaluunniit akitsuuteqarfiusumut eqqunneqarsimasut, tak. § 2, imm. 2” kingornanut ilanngunneqarpoq: ”, nioqqutissanik akitsuusigassanik akitsuusigaanngitsumik uninngasuutinut ilassutaasimasunik ilanngarlugit, tak. § 4 a, imm. 1.”

4.  § 7 ima oqaasertaqarpoq:
”§ 7.  Akitsuusigassanit § 6, imm. 1 naapertorlugu naatsorsorneqartunit ilanngaatigineqassapput
1) nioqqutissat akitsuuteqarfiusup avataanut anninneqartut,
2) nioqqutissat suliffeqarfimmi imaluunniit suliffeqarfimmut suliffeqarfimmiilluunniit assartorneqarneranni ikuallattoqarnera, erngartoqarnera assigisaaluunniit pissutigalugu annaaneqartut, aamma
3) nioqqutissat § 7 a naapertorlugu avatangiisinut akitsuusigassaanngitsut.”

5.  § 7-ip kingornanut ilanngunneqarpoq:
”§ 7 a.  Uninngasuutinik peqqumaasivittut nalunaarsorneqarsimasut nioqqutissanik angallatinut ukununnga tunisaqarneranni akitsuusiisoqassanngilaq
1) umiarsuit nunanut allanut ingerlaartut, tassunga ilanngullugit umiarsuit takornarianik angallassissutit,
2) umiarsuit uuliasiortut gassisiortullu 1.500 bruttotonnagemik imaluunniit bruttoregistertonnagemik taannalu qaangerlugu usisinnaasut,
3) timmisartut nunanut allanut ingerlaartut,
4) aalisariutit Kalaallit Nunaanni angerlarsimaffeqartutut nalunaarsorneqarsimanngitsut, aamma
5) aalisariutit 200 bruttotonnagemik imaluunniit bruttoregistertonnagemik taannalu qaangerlugu usisinnaasut, Kalaallit Nunaanni angerlarsimaffeqartutut nalunaarsorneqarsimasut.
Imm. 2.  Akitsuusiinnginnissami piumasaqaataavoq nioqqutissaq umiarsuup, timmisartup, aalisariutilluunniit orsussaasivianut toqqaannartumik tunineqarnissaa.
Imm. 3.  Naalakkersuisut akitsuummik akiliisussaatitaannginnernut atatillugu naatsorsuusiornermi nakkutilliinermilu maleruagassanik aalajangersaasinnaapput.”

6.  § 9, imm. 1, ima oqaasertaqarpoq:
”Uninngasuutinik peqqumaasivittut § 3, imm. 1 naapertorlugu nalunaarsorneqarsimasut nioqqutissat piiarneqartut, suliarineqartut eqqussorneqartut amerlissutaat imaluunniit akitsuusigaanngitsumik uninngasuutit ikilissutaat, kiisalu nioqqutissat § 7 aamma § 7 a, imm. 1 naapertorlugit tunineqartut atukkallu naatsorsuuteqartissavaat.”

7.  § 12-imi ilanngunneqarpoq:
”Imm. 2.  Nioqqutissat akitsuusigassat § 7 a naapertorlugu akitsuusigassaajunnaartut atorneqarfissaminnut naatsorsuussamit allaasumut atorneqarpata, suliffeqarfiup nioqqutissanik akit­suuteqanngitsumik pisisinnaanera akileraaruseriffiup atorunnaarsissinnaavaa. Nioqqutissat pineqartut avatangiisinut akitsuutaat akileeqqusinermiit kingusinnerpaamik ullut 14-it qaangiunneranni akileqqullugu suliffeqarfik peqquneqassaaq.
Imm. 3.  Suliffeqarfiup nioqqutissanik akitsuuteqanngitsumik pisisinnaaneranik atorunnaarsitsinerminut atatillugu akileraaruseriffiup uninngasuutinik peqqumaasivittut nalunaarsorneqarsimasoq nalunaarfigisinnaavaa, suliffeqarfik nioqqutissanik akitsuuteqanngitsunik siunis­sami tunisiffigineqarsinnaassanngitsoq.”

 

§ 2

Inatsisartut inatsisaat atortuulissaaq 15. april 2011.
Imm. 2.  § 1 a, inatsimmi matumani nr. 1-imi oqaasertaligaasoq nioqqutissanut 1. januar 2011-mi kingusinnerusumiluunniit akitsuusigassaalersussanut atuutissaaq.

Namminersorlutik Oqartussat, 14. april 2011

Kuupik Kleist

---

Siunnersuummut nassuiaatit

Isumaliutissiissut (Aappassaaneerinninneq)

Isumaliutissiissut (Aappassaaneerinninneq)