2012-imi akileraarutitigut naligiissaanissaq aamma kommuninut ataatsimut akileraarutip agguataarneqarnissaa pillugit Namminersorlutik Oqartussat nalunaarutaat nr. 18, 30. december 2011-meersoq

Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi, kingullermik Inatsisartut inatsisaatigut nr. 2, 18. maj 2010-meersukkut allanngortinneqartumi § 41 aamma § 42, imm. 2 naapertorlugit aalajangersarneqarput:

 

§ 1. Kommunini inummut ataatsimut agguaqatigiissitanik akileraarutitigut isertitat assigiinngissutaasa naligiissarneqarnissaannut aammalu kommuninut ataatsimut akileraarutip agguataarneqarnissaanut kommunit ataani taaneqartut 2012-imi tapiissuteqarfigineqassapput:

Kommune Kujalleq.....................................................................	kr.   91.821.000
Kommuneqarfik Sermersooq......................................................	kr.   44.085.000
Qeqqata Kommunia ..................................................................	kr.   90.495.000
Qaasuitsup Kommunia................................................................	kr. 255.588.000

Imm. 2.  Tapiissutit landskarsimiit akilerneqartassapput qaammatini tamani 1/12-imik qaammatinut ataasiakkaanut tapiissutinut agguagassanut tapertaliullugit.  

§ 2. 2012-imi kommuninut ataatsimut akileraarummit agguataagassaapput kr. 390.000.000 kiisalu iluarsiissutit, takuuk imm. 3, ukiuni 1987-imiit 2007 ilanngullugu kr. 17.660.000, 2008-mit kr. 79.000, 2009-mit kr. 12.736.000, 2010-miillu kr. 61.514.000, katillugit kr. 481.989.000.
Imm. 2.  Kommuninut ataatsimut akileraarut nuna tamakkerlugu akileraarutip akilersorneqartarneratut landskarsimut akilersorneqartassaaq.
Imm. 3.  Kommuninut ataatsimut akileraarummit isertitat imm. 1-imi kisitsimmit aalajangerneqarsimasumit allaaneruppata nikingassut ukiumi tulliuttumi kommuninut ataatsimut akileraarutip agguataarneqarnerani iluarsiissutigineqassaaq.

§ 3.  Nalunaarut 1. januar 2012-imi atuutilissaaq.

Namminersorlutik Oqartussat, ulloq 30. december 2011

Maliina Abelsen

/

Jan H. Lynge-Pedersen