Isiginnaartitsisartutut ilinniartitaaneq pillugu Namminersorlutik Oqartussat nalunaarutaat nr. 11, 14. november 2011-meersoq

Isiginnaartitsisarfeqarneq pillugu Inatsisartut inatsisaanni nr. 23, 18. november 2010-meersumi § 11, imm. 3 naapertorlugu aalajangersarneqarput:

 

Atuartitsineq

§ 1.  Isiginnaartitsisartutut ilinniartitaaneq Kalaallit Nunaata Isiginnaartitsisarfiata pisortaanit isiginnaartitsisartutut ilinniartitaanermi sulianut pingaarnertut akisussaasumit aqunneqarpoq.

§ 2.  Isiginnaartitsisartutut ilinniartitaaneq akeqanngilaq, taamaattorli tak. imm. 2.
Imm. 2.  Kalaallit Nunaata Isiginnaartitsisarfiani aalajangiisoqarsinnaavoq ilinniartut atortunut, atisanut isiginnaartitsissutinut, qalipaatinut pinnersaatinut il.il. namminneq killilimmik pisissasut.

§ 3.  Isiginnaartitsisartutut ilinniartitaaneq suliatigut atuagarsornikkullu ilinniartitsinertaqarpoq ukiunillu 2-nik sivisussuseqarluni.
Imm. 2.  Ilinniarnermut pinngitsoorani takkuttarnissaq piumasaqaataavoq.
Imm. 3.  Pinngitsoorani takkuttarnissaq pillugu, atuarunnaarsitsineq pissusissanillu iliuuseqarnerit allat aalajangersakkat erseqqinnerusut ilinniagassatut aaqqissuussinermi Kalaallit Nunaata Isiginnaartitsisarfiata aalajangersaavigissavai.

§ 4.  Kalaallit Nunaata Isiginnaartitsisarfia ilinniartitaanerup imai ilinniagassatullu aaqqissuussinerit pillugit erseqqinnerusumik malittarisassiussaaq.
Imm. 2.  Ilinniagassatut aaqqissuussinerit makku pillugit aalajangersaaviussapput:
1) anguniakkat, imarisat, ilinniartitaanerup ingerlanerani inissiineq piffissamullu tunngasut,
2) atuartitseriaatsit,
3) ilinniartitaanermi naliliinerit amerlassusii, ilusaat inissinneqarfiilu aamma
4) merit
Imm. 3.  Ilinniagassatut aaqqissuussinerit sapinngisamik Kalaallit Nunaata avataani isiginnaartitsisartutut ilinniartitaanernut naleqqussarneqassapput.
Imm. 4.  Kalaallit Nunaata Isiginnaartitsisarfia aalajangersakkanit immikkut akuersissuteqarsinnaavoq taamaallaat Kalaallit Nunaata Isiginnaartitsisarfianit aalajangersarneqartunit.
Imm. 5.  Ilinniagassatut aaqqissuussinerni ilinniartitaanerup ECTS-pointinut tunngasortai taakkartorneqassapput.

 

Ilinniartussatut tiguneqarneq

§ 5.  Isiginnaartitsisartutut ilinniartitaanermut tiguneqarnissamut misilitsitsisoqartassaaq. Qinnuteqartup piginnaasaanik naleqqussusianillu naliliineq malillugu Kalaallit Nunaata Isiginnaartitsisarfia tigusinissamik aalajangiissaaq.

§ 6.  Isiginnaartitsisartutut ilinniartitaanermut tiguneqarnissami piumasaqaataavoq qinnuteqartoq
1) 18-ileereersimassasoq aamma
2) tiguneqarnissamut misilitsinnerminik angusisimassasoq, tak. § 7.

§ 7.  Kalaallit Nunaata Isiginnaartitsisarfia ilinniagassatut aaqqissuussinerni tiguneqarnissaq pillugu erseqqinnerusumik malittarisassiussaaq.
Imm. 2.  Malittarisassani ilaatinneqassapput:
1) ilinniartitaanermi ilinnialernissamut tunngaviit,
2) qinnuteqarnermi akuerisaanermilu periusissat,
3) naliliineq aamma
4) immikkut akuersisinnaaneq naammagittaalliuuteqarsinnaanerlu.

 

Soraarummeersimanermut uppernarsaatit

§ 8.  Kalaallit Nunaata Isiginnaartitsisarfia ilinniakkap naammassineranut uppernarsaasiisarpoq. Uppernarsaatip minnerpaatut imarissavai:
1) Ilinniartitaanermut tunngasut ECTS-pointinngorlugit aamma
2) Ilinniareersimasat ilinniakkamut allamut nuunneqartut ECTS-pointinngorlugit.
Imm. 2.  Ilinniartut ilinniarnerminnik taamaatitsisut ilinniakkamik naammassisartaanut ECTS-pointinngorlugit uppernarsaammik pisinnaatitaapput.

 

Aalajangersakkat allat

§ 9.  Kalaallit Nunaata Isiginnaartitsisarfia ilinniartup pilersitseqqaartutut piginnittussaatitaanera ataqqillugu isiginnaagassianik ilinniartitaanermi suliassat suliarineqarnerannut atatillugu pilersunut piginnittussaatitaavoq, taamaattorli tak. imm. 2.
Imm. 2.  Suliassap suliarineqarnerani Kalaallit Nunaata Isiginnaartitsisarfiata avataani susassaqartut, taakkununnga ilanngullugit suliffeqarfiit, sullissiveqarfiit il.il. ilanngutsinneqarpata Kalaallit Nunaata Isiginnaartitsisarfiata, ilinniartup allallu pineqartup akornanni isumaqatigiissutigineqassaaq Kalaallit Nunaata Isiginnaartitsisarfia, ilinniartoq allalu pineqartoq malittarisassat pilersitseqqaartutut  piginnittussaatitaanermut atuuttut ataqqillugit isiginnaagassianik suliassamik suliarinninnermi angusaasunik qanoq annertutigisumik atuisinnaatitaanersut, tassunga ilanngullugu allamut pineqartumut tunngasut pillugit paasissutissaasinnaasut tamanut saqqummiunneqarsinnaanersut.

 

Atuutilersinneqarnera

§ 10.  Nalunaarut 1. decembari 2011-mi atuutilerpoq.

Namminersorlutik Oqartussat, ulloq 14. november 2011

Mimi Karlsen

/

Lise Lennert Olsen