POST Greenlandip
allakkanik ingerlassisarnermi pisussaaffii kisermaassisussaatitaaneralu il.il.
pillugit Namminersorlutik Oqartussat nalunaarutaat nr. 9, 24. juni
2011-imeersoq
Allakkerineq pillugu Inatsisartut inatsisaanni nr. 3, 15. april 2011-imeersumi
§§ 3, 4, 6, 10, aamma 16 naapertorlugit aalajangersarneqarput
Kapitali 1
Atuuffia aamma nassuiaassutit
§ 1. Nalunaarummi
matumani POST Greenlandip ingerlassinermi pisussaaffiisa, nassiussanik
aalajangersimasunik ingerlassinissamut kisermaassinerata kiisalu allakkanik
ingerlatitseqqittarnermi, allakkanik ammaasarnermi, allakkerinermi sullissiviit
ataqatigiit ingerlannerini, allakkanik nakkartitsivinnik il.il. atuinerani,
tunniussisarnerani, maalaaruteqarsinnaanermi, taarsiissuteqartarnermi
niunernermilu piumasaqaatini pisinnaatitaaffiisa pisussaaffiisalu
maleruagassiuunneqarnissaat siunertarineqarpoq.
§ 2. Allakkat
nalinginnaasut allakkanut A-nut (timmisartukkut nassiussanut), allakkanut B-nut
(umiarsuakkut nassiussanut) aamma tappiitsunut nassiussanut,
nassiunneqarnerminni nassiusseriaatsimik immikkut ittumik atuiffiunngitsunut
ataatsimut taaguutaavoq.
Imm. 2. Poortukkat
nalinginnaasut poortukkanut, nassiunneqarnerminni nassiusseriaatsimik immikkut
ittumik atuiffiunngitsunut ataatsimut taaguutaavoq.
Imm. 3. Tammatsaalisat
tassaapput nassiussat suulluunniit allakkerivimmut tunniunneqarnerminni
nassiussap taamaallaat tigusisussamit taassumaluunniit piginnaatitaanit,
uppernarsaammik naleqquttumik takutitsisinnaasumit tiguneqarnissaanik, aammalu
nassiussap allakkanut nalilinnut ilanngullugu assartorneqarnissaanik
uppernarsaasiiffiusut.
Imm. 4. Nassiussat
nalilerneqartut tassaapput nassiussat, nalingat quppernermi najukkap
allassimaffianni koruuninngorlugit oorinngorlugillu allanneqartut. Nalingisa
aningaasartaasa annerpaaffissaat POST Greenlandip niuernermi piumasaqaataanni
nalinginnaasuni aalajangersarneqarsimapput.
Imm. 5. Poortukkat
qaatiguuliorneqartut tassaapput nassiussat, karsinngorlugit, imusanngorlugit
imaluunniit amitsukujuunngorlugit poorneqarsimasut, minnerpaaffissaannik
annerpaaffissaannillu, POST Greenlandip niuernermi piumasaqaataanni
aalajangersarneqarsimasunik malinniffiusut.
Imm. 6. Allakkerinermi
sullissivimmik illoqarfimmi nunaqarfimmiluunniit peqarnerani allakkerinermi
sullississutinik atuisoqarsinnaavoq, allakkanik ingerlassisoqarsinnaavoq kiisalu
tunniussisoqarsinnaalluni. Allakkerinermi sullissiveqarfik sumiiffimmi
aalajangersimasumi inissisimasuusariaqanngilaq, kisianni aamma tassaasinnaalluni
elektroniskimik aaqqiissutaasoq. Allakkerinermi sullissivik ataqatigiissoq
tassaavoq allakkerinermi sullissiviit sumiiffiinut ataatsimoortumik taaguutaasoq
aammalu tassaasinnaalluni allakkeriviit, elektroniskimik aaqqiissutaasut aammalu
suliaqartut allat suleqatigalugit aaqqiissutaasut.
Kapitali 2
POST Greenlandip ingerlassisussaatitaanera,
agguaassisussaatitaanerat aamma kisermaassisussaatitaanera
§ 3. POST Greenland
pisussaavoq nuna tamakkerlugu allakkanik ingerlassinissaminut atatillugu
nassiussinerit makku qulakkiissallugit:
1) Allakkat qaatiguuliorneqarsimasut.
2) Poortukkat
qaatiguuliorneqarsimasut.
Imm. 2. Nunap iluani
allakkat qaatiguuliorneqarsimasut tammatsaalisatut imaluunniit nalinga
nalunaarutigalugu ingerlanneqarsinnaassapput.
Imm. 3. Nunap iluani
poortukkat qaatiguuliorneqarsimasut nalinga nalunaarutigalugu
ingerlanneqarsinnaassapput.
Imm. 4. Poortukkat
nunanit allaniit POST Greenland aqqutigalugu Kalaallit Nunaata iluani
ingerlateqqinneqartussatut nassiunneqartut, POST Greenlandip saniatigut
assartuussisoq alla atorlugu Kalaallit Nunaannut assartorneqartut immikkut
akeqartinneqarsinnaapput.
Imm. 5. Danmarkimut,
Savalimmiunut aamma nunanut allanut taakkunanngaanniillu nassiussanik
ingerlatsisussaanermi nunat tamat akornanni suliassaqarfimmut
isumaqatigiissutaat eqqarsaatigineqassapput.
POST Greenlandip agguaassinissamut pisussaaffeqarnera
§ 4. Sapaatit
akunnerannut minnerpaamik marloriarluni aalajangersimasumik agguaassisarnissamut
POST Greenland immikkut ittumik akuerineqarsimanngippat, takuuk imm. 3,
allakkanik nalinginnaasunik agguaassisarneq illoqarfinni ingerlanneqartarpoq.
Allakkanik nalinginnaasunik agguaassineq sapaatip akunnerani ulloq suna
pissanersoq POST Greenlandip aalajangersassavaa.
Imm. 2. Nunaqarfinni
allakkanik nalinginnaasunik agguaassisoqarneq ajorpoq.
Imm. 3. Naalakkersuisut
POST Greenlandip qinnuteqarneratigut sullitatigut tunngaviusut ingerlatsinermilu
aningaasaqarnikkut eqqarsaatersuutit tunngavigalugit illoqarfinni
agguaassinissamut pisussaaffeqarnermik saneqqutsisinnaanermut
akuersissuteqarsinnaapput.
Imm.4. Allakkat
nalinginnaasut nunaqarfinni illoqarfinnilu, allakkanik nalinginnaasunik
agguaassiffiuneq ajortuni POST Greenlandimi taassumaluunniit suleqataanut
aaneqarsinnaassapput.
POST Greenlandip kisermaassisussaatitaanera
§ 5.
Allakkanik qaatiguuliorneqarsimasunik nunap iluani ingerlassinermut POST
Greenland kisermaassisussaatitaavoq, taannalu imatut paasineqassaaq:
1) Imai apeqqutaatinnagit nassiussinerit qaatiguuliorneqarsimasut, taakku
allakkap puussaanut assigisaanulluunniit poorneqarsimappata.
2) Allakkatigut nalunaarutit qaatiguuliorneqarsimasut, taakkununnga ilaallutik
postkortit, inunnut ataasiakkaanut tunngasunik imallit.
Imm. 2. Allakkanik Danmarkimit, Savalimmiunit nunallu allat sinnerinit
nassitsisunit nassiunneqartunik, Kalaallit Nunaannut qaatiguuliorneqarsimasunik,
Kalaallit Nunaanni sumiiffinnut ingerlassinissamut, aamma allakkanik
qaatiguuliorneqarsimasunik nunanut allanut Kalaallit Nunaannit nassitsisunit
Danmarkimut, Savalimmiunut nunallu allat sinnerinut qaatiguuliorneqarsimasunik
nassiunneqartunik ingerlassinissamut POST Greenland kisermaassisussaatitaavoq.
Imm. 3. Allakkanik qaatiguuliorneqarsimasunik ingerlassinermik
kisermaassisussaatitaanermut taakkuninnga katersineq, assartuineq agguaassinerlu
ilaatinneqarput.
§ 6.
Kinaluunniit § 5-imi aalajangersakkat malinngikkaluarlugit inatsisinik
unioqqutitsinani nassiussanik POST Greenland avaqqullugu isumaginnissinnaavoq,
tamanna nammineq susassarisanik imaluunniit alla nassiussanik kiffartuutaq
atorfeqarfigisaq sinnerlugu angallassineruppat.
Imm. 2. Taamaaliortoqarsinnaavortaaq ingerlassineq pippat alla,
ingerlassisup qaqutiguinnaq taamatorluinnaq ittumik ingerlassissuttagaa
kiffartuullugu.
§ 7. Nassiussinerit
ataasiakkaat tamarmik POST Greenlandip nassiussinermut pineqartumut akigititai
naapertorlugit kalaallit frimærkiutaanik atuuttunik pilersorneqarsimappata, §
5-imi aalajangersakkat apeqqutaatinnagit POST Greenland avaqqullugu inatsisit
naapertorlugit ingerlanneqarsinnaapput.
Imm. 2. Frimærkit imm. 1 naapertorlugu atorneqartut
atoqqinneqarsinnaanngillat aammalu atorunnaarsinneqassallutik. Frimærkit
aallaaviatigut ulloq naqissuserneqarnerat ilanngullugu atorunnaarsinneqassapput,
tamannami nassiussap ulloq suna tiguneqarneranut uppernarsaatitut atuummat.
Frimærki naqissuserneqarsimanngitsoq paasineqarpat, taanna kuglepennimik,
tusch-imik assigiisaanilluunniit piiarneqarsinnaanngitsumik allassinnaasumik
krydsilerlugu atorunnaarsinneqarsinnaavoq.
§ 8. Aqqusinerni
allaniluunniit kikkut tamarmik aqqutigisinnaasaanni allakkanut
nakkartitsisarfinnik inissiinissamut POST Greenland kisermaassisussaatitaavoq.
Nassiussanik tigusiumanngittarneq (remail)
§ 9. Nassiussat
qaatiguuliukkat Danmarkimeersut, Savalimmiuneersut nunanillu allaneersut,
nassiussisup Kalaallit Nunaanni najugaqartup, imaluunniit Kalaallit Nunaanni
najugaqartoq sinnerlugu inuup allap Danmarkimiit, Savalimmiuniit imaluunniit
nunanit allaniit Kalaallit Nunaanni tigusisussamut ingerlateqqinneqarnissaa
siunertaralugu nassiussassatut tunniussai Allakkerineq pillugu Nunarsuaq
tamakkerlugu Isumaqatigiissummi tamanna pillugu malittarisassat naapertorlugit
POST Greenlandimit itigartinneqarsinnaapput, tamatumani:
1) nassitsisup
allakkeriviulluunniit allakkanik Kalaallit Nunaannut ingerlateqqitassanik
isumaginnittuusup uppernarsarsinnaanngippagu, nassiussat ilumut Kalaallit
Nunaanniit nassiussisumit Kalaallit Nunaanni tigusisussamut nassiussaanngitsut,
imaluunniit,
2) nassitsisup
allakkeriviulluunniit pineqartup nassiussassanut pineqartunut nunap iluani akit
atuuttut malillugit akiliinissaq akuerippagu, imaluunniit nassiussat taamaattut
pillugit allakkerivimmut pineqartumut isumaqatigiissutaasimasinnaasut malillugit
akiliinissaq akuerippagu.
Imm. 2. Nassitsisup allakkeriviulluunniit allakkanik Kalaallit
Nunaanni ingerlateqqitassanik isumaginnittuusup imm. 1, nr. 2-mi allassimasut
malillugit nassiussat akilerumanngippagit, nassiussaq allakkerivimmut
isumaginnittuusumut utertinneqassanersoq imaluunniit suujunnaarsinneqassanersoq
POST Greenlandip aalajangissavaa.
Kapitali 3
Allakkanik ammaasarneq
§ 10. Nassiussat
matoqqasut POST Greenlandimit isumagineqartut apuunneqarsinnaanngitsut, allatut
iliornikkut nassiussisumut tigusisussamulluunniit
ingerlateqqinneqarsinnaanngitsut, inunnit taamaaliornissamut POST Greenlandip
qullersaqarfianit immikkut toqqakkanit ammarneqarsinnaapput
misissorneqarsinnaallutillu. Nassiussat matoqqasut apuunneqarsinnaanngitsut
tassaapput, tassani tigusisussaq imaluunniit nassiussisoq
nassaarineqarsinnaasimanngitsoq.
Imm. 2. Pisariaqarpat nassiussap qanoq annertutigisumik
ajoqusersimanera aalajangiiffiginiarlugu imaluunniit ajoqusernerup
killilersimaarneqarnissaa anguniarlugu POST Greenlandip nassiussat
ammarsinnaavai.
Imm. 3. Inuit imm. 1-imi taaneqartut uppernarsaammik atsiugaqassapput,
tassanilu nassiussami ammarneqartumi nassiussisup imaluunniit tigusisussap
aqqata najugaatalu saniatigut imaanik allanik piaaralutik
atuagaqarsimannginnertik, kiisalu taamatut iliornerminni ilisimalikkatik
susassaqanngitsunut allanut ilisimatitsissutigissanagit uppernarsassavaat.
Kapitali 4
Allakkerinermi sullissiviit ataqatigiit
§ 11. Kalaallit Nunaanni
najugaqarfinnit tamanit assartuussinermi ungasissutsit, pisariaqartitat
aalajangersimasut innuttaasullu amerlassusiat eqqarsaatigalugit allakkerinermi
sullissivinnik ataqatigiissunik atuisinnaanissaq POST Greenlandip isumagissavaa.
Imm. 2. § 11, imm. 1-imi
illoqarfinni nunaqarfinniluunniit allakkerinermi sullissiveqanngitsuni
aaqqiissutissanik elektroniskiusunik atuinissaq akornusersimaneqanngilaq.
Imm. 3. POST Greenland
pissutsit malillugit naammaginartumik siusissusilimmik ilisimatitsereernikkut
allakkerinermi sullissivimmik ammaanissamut Naalakkersuisunit
peqquneqarsinnaavoq.
Imm. 4. POST Greenland
allakkerinermi sullissivimmik matusinissamik kissaateqarpat, allakkerinermi
sullissivinnik ataqatigiinnik allannguinissaq pillugu aalajangiisoqannginnerani,
najukkami soqutigisaqartut tusarniaaffigineqarlutik ilaatinneqassapput.
Sullissivimmik matusisoqartussaatillugu siumoortumik nalunaaruteqarnissaq
qaammatinit pingasunit sivikinnerussanngilaq.
Imm. 5. POST Greenland
ukiumut ataasiarluni allakkerinermi sullissiviit ataqatigiit maannakkumut
ineriartornera ineriartornissaanullu naatsorsuutigineqartut pillugit
Ineqarnermut, Attaveqarnermut Angallannermullu Naalakkersuisoqarfimmut
nalunaaruteqartassaaq.
Kapitali 5
Allakkanik nakkartitsisarfinnut il.il. maleruagassat
Allakkanik nakkartitsisarfiit, allakkanik ikisisarfiit
matukkut allakkanik nakkartitsisarfiit
§ 12. Allakkanik
nakkartitsisarfittut isigineqarput allakkanik nakkartitsisarfiit sukanut,
iikkanut, sallilikkanit ungalulianut assigisaannulluunniit naatitassanngorlugit
ikkutaasut.
Imm. 2.
Allakkanik nakkartitsisarfiit paarnaarneqarsinnaassapput.
Imm. 3. Allakkanik nakkartitsisarfittut isigineqarput, inissiani
quleriinni allakkanik nakkartitsisarfeqarfiit, allakkanik tunniussivissanut
tamanut immikkut nakkartitsisarfillit.
Imm. 4. Allakkanik nakkartitsisarfittut isigineqarput, allakkanik
nakkartitsisarfiit kipparissut, tunniussivissat matuinut allakkanik
nakkartitsivissatut ivertitat, aammalu allakkanik nakkartitsisarfinnut
ataasiakkaanut allakkanik nakkartitsivissatut ivertitat.
Imm. 5.
Allakkanik nakkartitsisarfiit imaluunniit matuni allakkanik nakkartitsivissatut
ivertitat ataasiakkaat atit allagartaanik ikkussuivigineqassapput. Allakkanik
nakkartitsisarfiit angissusissaannut piumasaqaatit minnerpaaffissai ilanngussami
takuneqarsinnaapput.
Imm. 6. POST Greenland
allakkanik nakkartitsisarfiit atinik allagartalersorneqartarnerat pillugu
aalajangersakkanik teknikkimut tunngasunik sukumiinerusunik aalajangersaassaaq.
Allakkanik nakkartitsisarfiit, allakkanik
nakkartitsisarfeqarfiit aamma matunut allakkanik nakkartitsivissatut ivertitat
ikkussuunnissaannut maleruagassat
§ 13. Allakkanik
nakkartitsisarfiit inoqutigiit ataasiakkaat najugaannut isaariat eqqaannut
inissinneqassapput.
Imm. 2. Illumi pineqartumi namminerisamik najugaqarfiit arlaliuppata,
namminerisamik najugaqarfiit tamarmik immikkut allakkanik nakkartitsisarfinnik
pilersorneqassapput.
Imm. 3. Ilaqutariinnut ataatsinut illu imaluunniit inissiaq
najugaqarfissiaq ataaseq inoqutigiinnit arlalinnit najorneqarpat, inoqutigiillu
taakku ataatsimut isaariaqarpata, najugaqaqatigiit tamanna
isumaqatigiissutigisimappassuk allakkanik nakkartitsisarfik ataaseq
inoqutigiinnit marluusunit amerlanerusunilluunniit ataatsimut
atorneqarsinnaavoq. Allakkanik nakkartitsisarfik inoqutigiit tamarmik immikkut
atiisa allagartaannik ivertitsivigineqarsimassaaq.
Imm. 4. Allakkanik nakkartitsisarfiit marluk amerlanerusulluunniit
sanileriissillugit ikkunneqarsimassapput.
Imm. 5. Allakkanik nakkartitsisarfeqarfinnik ikkussuinissamut
akisussaaffik illumik piginnittup isumagisassaraa.
§ 14.
Illuni pingasut sinnerlugit tunniussivissaqartuni, 1. april 2005-ip kingorna
sanaartornissamut akuersissut malillugu sananeqartuni allakkanik
nakkartitsisarfeqarfinnik ikkussisoqassaaq.
Imm. 2. Allakkanik nakkartitsisarfeqarfiit sapinngisamik inini
allerni illumut isaarissamut pingaarnermut qanittumut, agguaasussap
ajornaatsumik akornusersorneqaranilu iserfigisinnaasaanut, aammalu
akornuteqarani allakkanik nakkartitsisarfeqarfimmut issoraaffigisinnaasaanut
inissinneqassapput.
Imm. 3. Allakkanik nakkartitsisarfeqarfinni allakkanik
nakkartitsisarfiit ataasiakkaat inissiat ataasiakkaat quleriiaarneri
tulleriiaarnerilu malillugit inissititerneqassapput. Inini allerni inissiamut
saamerlermut allakkanik nakkartitsisarfik, allakkanik nakkartitsisarfeqarfimmi
allermut saamerlermut inissinneqassaaq. Inini qullerni inissiamut talerperlermut
allakkanik nakkartitsisarfik, allakkanik nakkartitsisarfeqarfimmi qullermut
talerperlermut inissinneqassaaq.
Imm. 4. Illumi piginnittup illumut isaariaq pingaarneq allakkanik
nakkartitsisarfeqarfimmut isaariaasoq paarnaaqqasartunngorlugu iluarsisimappagu,
allakkanik nakkartitsisarfeqarfik agguaassisussap matu ammaqqaanngikkaluarlugu
silamiit allakkanik issoraavigisinnaasaanut ikkunneqassaaq.
Imm. 5. Allakkanik nakkartitsisarfeqarfinnik ikkussuinissamut
akisussaaffik illumik piginnittup isumagisassaraa.
§ 15.
POST Greenland allakkanik nakkartitsisarfiit inissiffissaat ikkunnissaallu
pillugit aalajangersakkanik teknikkimut tunngasunik sukumiinerusunik
aalajangersaassaaq.
§ 16.
Matu innermut pitarnaveeqqutaappat, allakkanik nakkartitsisarfeqarnissaq
matumilu nakkartitsisarfimmik ikkussinissaq inerteqqutaavoq.
Imm. 2. Allakkanik nakkartitsisarfeqarfinnik ikkussuinissamut
akisussaaffik illumik piginnittup isumagisassaraa.
§ 17. Illuni
pingasut sinnerlugit tunniussivissaqartuni, 1. april 2005-ip kingorna
sanaartornissamut akuersissut malillugu sananeqartuni tunniussivissat tamarmik
allakkanik nakkartitsisarfinnik matukkulluunniit allakkanik nakkartitsisarfinnik
pilersorneqassapput, imaluunniit § 14 malillugu allakkanik
nakkartitsisarfeqarfilersorneqassallutik.
Imm. 2. Ilaqutariinnut
ataatsinut illuni, illuni affarleriinni, illuni sanileriiaani/uiguleriiaani
il.il. allakkanik nakkartitsisarfinnik matukkulluunniit allakkanik
nakkartitsisarfinnik pilersuisoqassaaq.
§ 18. §
14, imm. 1-imi aamma § 17-imi aalajangersakkat taamaallaat illoqarfinnut,
allakkanik nalinginnaasunik agguaassiffiusartunut atuutsinneqarput.
Kapitali 6
Allakkanik tunniussisarnermut maleruagassat
§ 19. POST
Greenlandip inoqutigiit allakkanik nakkartitsisarfinnik/allakkanik
ikisisarfinnik/matukkut allakkanik nakkartitsisarfinnik ikkussuinissamut
piumasaqaatinik naammassinnissimanngitsut allakkanik agguaassisarnermi
minissinnaavai.
§ 20. Inuit
pitsorluttut allallu innarluutillit, namminneerlutik allakkanik
nakkartitsisarfimminnik imaarsiartorsinnaanngitsut allakkat inigisaminnut
toqqaannartumik tunniunneqartarnissaannik immikkut
akuersissuteqarfigineqarsinnaapput.
Imm. 2.
Immikkut akuerineqarnissamut qinnuteqaat najukkami allakkeriviup pisortaanut
tunniunneqassaaq.
Kapitali 7
Taarsiissuteqartarneq – ataatsimut isigalugu
§ 21. POST
Greenland nassiussanik, § 3-mi ingerlassisussaatitaanermut pisussaaffimmut
ilaasunik kinguartoornermut atatillugu taarsiineq ajorpoq.
Imm. 2. Nassiussanut,
ingerlassisussaatitaanermut ilaasunut tammartunut innarlerneqartunullu
piffissami nassiussap tiguneqarneraniit tunniunneqarneranut POST Greenland
taarsiissuteqartarpoq, taamaattorli tak. imm. 3, § 22, imm. 1 aamma § 26, imm.
2.
Imm. 3. Tammartut innarlerneqarsimasulluunniit nassiussisup tungaaniit
kukkunermik sumiginnaanermilluunniit peqquteqarpata, nassiussap qanoq issusia,
poortorneqannginnera imaluunniit amigartumik poortorneqarsimanera,
pissutsilluunniit POST Greenlandip pinngitsoortissinnaanngisai taakkulu
kinguneri POST Greenlandimit taarsiissuteqarfigineqarneq ajorput.
Taarsiissuteqartarneq – Nunap iluani nassiussat
§ 22. Allakkanut
nalinginnaasunut tammartunut innarlerneqarsimasunullu POST Greenland taarsiineq
ajorpoq. Aamma taamaappoq imarisai tamakkiisumik ilaannaasumilluunniit
annaaneqarsimappata.
Imm. 2. Poortukkanut nalinginnaasunut tammartut
innarlerneqarsimasunulluunniit, imaluunniit imarisai tamakkiisumik
ilaannaasumilluunniit annaaneqarsimasunut tunngatillugu POST Greenlandip
annerpaamik aningaasartassamik aalajangersaalluni taarsiissuteqartussaatitaaneq
killilersinnaavaa. Annerpaamik aningaasartaliunneqartut niuernermut
tunngaviusussatut aalajangersakkani allassimassapput aammalu
naleqquttuussallutik.
§ 23.
Allakkat ataatsit poortugarluunniit nalinga nalunaarlugu nassiunneqartoq
tammarpat innarlerneqarpalluunniit, imarisaaluunniit tamakkiisumik
ilaannaasumilluunniit annaaneqarpat, annerpaamik naligitinneqartutut
nalunaarutigineqartoq tunngavigalugu innarlerneqartoq taarserneqassaaq.
§ 24.
Allakkat tammatsaalisat tammarpata nassiussisoq taarsiiffigineqassaaq. POST
Greenland niuernermut tunngavissatut aalajangersakkamini taarsiissutissamut
annerpaamik aningaasartaliussassamik naleqquttumik aalajangersaasinnaavoq.
Imm. 2. Allakkat tammatsaalisat innarlerneqarsimappata,
imarisaaluunniit tamakkiisumik ilaannaasumilluunniit annaaneqarsimappata, POST
Greenlandip annerpaamik aningaasaliiffissatut aalajangersagaata iluani
innarlerneqartoq taarsiiffigineqassaaq.
Taarsiissuteqartarneq – Danmarkimut Savalimmiunullu siumut utimullu aammalu
nunat allat sinnerinut taakkunanngaanniillu nassiussat
§ 25.
Danmarkimut, Savalimmiunut nunanullu allanut siumut utimullu allakkerivikkut
nassiussanut Nunarsuaq tamakkerlugu allakkat pillugit isumaqatigiissummi
malittarisassat naapertorlugit taarsiisoqartassaaq.
Imm. 2. Kalaallit Nunaanniit Danmarkimut, Savaliummiunut imaluunniit
nunanut allanut nassiussaq tammarpat innarlerneqarpalluunniit, imarisaaluunniit
tamakkiisumik ilaannaasumilluunniit annaaneqarpat, piffissami ingerlassineq POST
Greenlandimit isumagineqartillugu, nassiussisumut tamanna iluaqutaanerussappat
nunap iluani nassiussinerit assigalugit taarsiisoqassaaq.
Imm. 3. Danmarkimiit, Savalimmiuniit imaluunniit nunanit allaniit
nassiussaq innarlerneqarpat, piffissami ingerlassinermi POST Greenlandimit
isumagineqartillugu, nassiussisumut tamanna iluaqutaanerussappat nunap iluani
nassiussinerit assigalugit taarsiisoqassaaq.
Taarsiissuteqarnerup annertussusaa
§ 26.
Tammartup nalinga imaluunniit nassiussap ajoquserneqarnermigut
nalikillissutigisaa kisimik taarserneqarsinnaapput. Taarsiissutissat
naatsorsorneqarneranni ajoqusiinerup nalaani pissusiusut tunngavigineqassapput.
Imm. 2. Iluaqutigisartakkanik iluaqutigisartagaqarunnaarneq,
amigaateqalerneq, aningaasat nalikillinerisigut aningaasat annaasat imaluunniit
ajoqusiinerup kingunerisaanik sunniutit allat taarsiiffigineqarsinnaanngillat.
Imm. 3. Nassiussaq tammarpat, taarsiissuteqarnerup saniatigut
nassiussap allakkerivikkoortumik isumagineqarneranut akiliut taarserneqassaaq.
Taamatuttaaq nassiussaq ajoquserneqarsimappat imaluunniit taassuma imarisai
tamarmik imaluunniit imarisaasa ilaat tammarsimappata, tamannalu nassiussap
utertinneqartariaqarneranut pissutaasimappat tamanna atuutissaaq.
Taarsiiffigineqarnissamut pisinnaatitaaffik
§ 27. Nassiussanut
aningaasanullu tammartunut, tassungalu nassiussap allakkerivikkoortumik
isumagineqarneranut akiliutip utertinneqarnissaa ilanngullugu, POST Greenland
taamaallaat taarsiisussaavoq, nassiussat POST Greenlandimut tunniunneqarsimasut
imaluunniit aningaasat POST Greenlandimut akilerneqarsimasut
uppernarsarneqarsinnaappat.
§ 28.
POST Greenlandip taarsiisussaatitaanera atorunnaassaaq, nassiussap
tunniunneqarneraniit ukioq ataaseq qaangiutsinnagu piumasaqaat POST
Greenlandimut nalunaarutigineqarsimanngippat
§ 29. Taarsiineq
atorunnaarsitsinermik kinguneqartumik nassiussisumut tunniunneqarsinnaavoq.
Nassiussaq tigusisussamit tiguneqarsimappat, taarsiineq atorunnaarsitsinermik
kinguneqartumik tassunga tunniunneqassaaq.
Immikkut ittummik pisoqartillugu taarsiissuteqartarneq
§ 30.
POST Greenland pisuni ataasiakkaani, ajoqusiineq immikkoorluinnaq pisoqarnerani
pisimappat, taamaattumillu POST Greenlandip taarsiisussaatitaanera, kapitalimi
matumani aalajangersarneqartoq atussallugu naammaginanngitsutut nalilerneqarpat,
taarsiisussaatitaanermut maleruagassat nalinginnaasut malillugit
taarsiisarsinnaavoq.
Imm. 2.
Imm. 1 naapertorlugu aalajangiinerit Naalakkersuisunut
maalaarutigineqarsinnaanngillat.
Kapitali 8
Niuernermi piumasaqaatit
§ 31. POST Greenland
niuernermi piumasaqaatinik tamanit takuneqarsinnaasunik suliaqassaaq, tassanilu
atuisoq minnerpaamik makku pillugit ilisimatinneqassaaq:
1) POST Greenlandimut
maalaaruteqarnissamut periarfissat.
2) Naammagittaalliorsinnaanermut
pisoqalisoorsinnaanermullu maleruagassat.
3) Taarsiissuteqarnissamut
piumasaqaatit, nalunaarummi matumani allassimasut, kiisalu tunisassianut
sullissinernullu ataasiakkaanut atatillugu tunniussinissamut maleruagassat.
Aammattaaq taarsiissuteqarnermi akiligassat amerlassusissaat uppernarsaatini
assigisaannilu, POST Greenlandip nassiussassamik ingerlateqqitassamik
tunniussisoqarneranut atatillugu tunniussaani ilisimatitsissutigineqassapput.
Imm. 2. Maleruagassat
imaluunniit aalajangiinerit, nalunaarut manna imaluunniit allakkerineq pillugu
Inatsisartut inatsisaat naapertorlugu POST Greenlandimit aalajangersarneqartut
imaluunniit aalajangerneqartut niuernermi piumasaqaatini allassimassapput.
Tamatumanili aalajangiinerit allakkerineq pillugu Inatsisartut inatsisaanni § 5
naapertorlugu aalajangiiffigineqartut pineqanngillat.
Kapitali 9
Pineqaatissiinerit
§ 32. §
10, imm. 3-p unioqqutinneqarnerani Kalaallit Nunaanni pinerluttulerinermik
inatsit malillugu pillaatitut akiligassiisoqarsinnaavoq.
Imm. 2.
Akilisitsissutit nalunaarut manna malillugit pineqaatissiissutigineqartut Nunap
Karsianut tutsinneqartassapput.
Atuutilerfia
§ 33. Nalunaarut
manna 1. juli 2011 atuutilerpoq.
Kalaallit Nunaanni
Namminersorlutik Oqartussat, ulloq 24. juni 2011
Jens B. Frederiksen
/
Steffen Ulrich-Lynge
Ilanngussaq