Borgmesterinik borgmesterillu tulliinik kiisalu kommunalbestyrelsinut nunaqarfinnilu aqutsisunut ilaasortanik il.il. akissarsiaqartitsineq pillugu Namminersorlutik Oqartussat nalunaarutaat nr. 1, 21. januar 2011-meersoq

Kommunit aqunneqarnerat pillugu Inatsisartut inatsisaanni nr. 22, 18.november 2010-meersumi §§ 56, 66 aamma 67 malillugit aalajangersarneqarpoq: 

Borgmesterinik, borgmesterit tulliinik kiisalu kommunalbestyrelsinut
nunaqarfinnilu aqutsisunut ilaasortanik il.il. akissarsiaqartitsineq

§ 1.  Borgmesterip akissarsiassai kommunalbestyrelsimit taassuma atuuffianut aalajangersarneqassapput.
Imm. 2.  Ukiumut tullermut missingersuusiornermut atatillugu borgmesterit tulliisa, kommunalbestyrelsinut nunaqarfinnilu aqutsisunut ilaasortat, ataatsimiititaliani siulittaasut nunaqarfinnilu aqutsisuni siulittaasut akissarsiaasa annertussusissaat kommunalbestyrelsip aalajangersassavaa.

§ 2.  Borgmesteri ukiumut akissarsiaqartinneqassaaq annerpaamik Kalaallit Nunaanni ilinniagartuut kattuffiata Akademikernes Sammenslutning i Grønland-ip (ASG) isumaqatigiissuteqarfiini tjenestemandinut akissarsiat pillugit isumaqatigiissutit qaqugukkulluunniit atuuttut naapertorlugit akissaateqarfiit 38-iannut, nalinginnaasumik tapiissutit ilanngullugit, naapertuuttumik kisiannili nalinginnaasumik akissaateqarfiit nikerarnerinut tapiissutit ilanngunnagit, aamma tapiissutit tamaasa eqqarsaatigalugit 1.4. 1991 akit naapertorlugit ukiumut tunngaviusumik kr. 130.600-nik immikkut tapiissutitalimmut, aamma ukiumut tunngaviusumik kr. 174.130-nik immikkut tapiissutitalimmut, kiisalu aamma suli ukiumut tunngaviusumik kr. 12.100-nik immikkut tapiissutitalimmut, naapertuuttumik sulinngiffeqartarnerlu pillugu inatsit naapertorlugu immikkut sulinngiffeqarnersiuteqartitsisoqassalluni.
Imm. 2.  Borgmesterip akissarsiai tunniunneqartassapput Kalaallit Nunaanni ilinniagartuut kattuffiata Akademikernes Sammenslutning i Grønland-ip (ASG) isumaqatigiissuteqarfiini tjenestemandit qaammammusiallit akissarsiaasa tunniunneqartarnerattut.
Imm. 3.  Borgmesterit Naalakkersuisut akuersisimatinnagit borgmesteritut akissarsiamik saniatigut nalunaarut manna malillugu kommunimi suliarititanut allanut akissarsiaqarsinnaanngillat.

§ 3.  Borgmesterip tullii kommunini ataatsimik borgmesterimut tullilinni aamma kommunini marlunnik borgmesterimut tullilinni borgmesterip tullia siulleq kommunalbestyrelsip aalajangiineratigut aalajangersimasumik akissarsiaqartitsisoqarsinnaavoq § 1 naapertorlugu akissarsiarititat saniatigut annerpaamik borgmesterip akissarsiaasa 15 pct.-iannik.
Imm. 2.  Borgmesterip tullia imm. 1 naapertorlugu aalajangersimasumik akissarsiaqanngitsoq piffissami borgmesteritut atuuffigisamini taamatut akissarsiaqassaaq.
Imm. 3.  Imm. 2 malillugu taartaalluni atuunnermi akissarsiat allatigut naatsorsorneqarlutillu tunniunneqartassapput maleruagassat atorfinni Kalaallit Nunaanni ilinniagartuut kattuffiata Akademikernes Sammenslutning i Grønland-ip (ASG) isumaqatigiissuteqarfiini akissarsiat pillugit maleruagassanut naapertuuttut malillugit.

§ 4.  Kommunalbestyrelsimut ilaasortaq borgmesteritut taartaalluni atuuteqqusaasoq borgmesteritut akissarsiaqartinneqassaaq § 2-mi taaneqartut malillugit.
Imm. 2.  Nunaqarfinni aqutsisunut ilaasortaq nunaqarfinni aqutsisunut siulittaasutut taartaalluni atuuteqqusaasoq siulittaasutut akissarsiaqartinneqassaaq § 7, imm 2-mi taaneqartoq malillugu.

§ 5.  Kommunalbestyrelsip kommunalbestyrelsimut ilaasortat aalajangersimasumik akissarsiaqartissavai amerlanerpaamik akissarsiap § 2, imm. 1-imi taaneqartup arfinilinngorlugu avinneranik ataatsimik.
Imm. 2.  Akissarsiat tunniunneqartassapput kommunalbestyrelsimut ilaasortanut tamanut akissarsiassat amerlanerpaaffissaasa agguarneri assigiimmik annertussuseqartillugit.

§ 6.  Nunaqarfinni aqutsisunut ilaasortat akissarsiaqartinneqassapput amerlanerpaamik akissarsiap § 2, imm. 1-imi taaneqartup aqqaneq-marlunngorlugu avinneranik ataatsimik.

§ 7.  Ataatsimiititaliani siulittaasunut ilassutitut aningaasarsianut kommunip aningaasartuutai tamarmiusut ukiumut amerlanerpaamik akissarsiap § 2, imm. 1-imi taaneqartup affarisinnaavai.
Imm. 2.  Nunaqarfinni aqutsisunut siulittaasunut tamanut ilassutitut aningaasarsiat ukiumut amerlanerpaamik akissarsiap § 2, imm. 1-imi taaneqartup aggornerisa aqqaneq-marlorisinnaavaat ataaseq.

§ 8.  Borgmesterit tulliisa, kommunalbestyrelsimut nunaqarfinnilu aqutsisunut ilaasortat, ataatsimiititaliat siulittaasuisa aamma nunaqarfinni aqutsisuni siulittaasut akissarsiaat qaammatip taamatut suliffiup naanerani tunniunneqartassapput.
Imm. 2 . Kommunalbestyrelsimut ilaasortap suliassani isumaginngippagit aamma aqutsinermut inatsimmi § 66, imm. 8 naapertorlugu sulinngiffeqanngippat ilaasortap pineqartup akissarsiai peqataanngiffiata sivisussusianut naapertuuttumik ilanngaaffigineqassasut kommunalbestyrelsip aalajangersinnaavaa. Akissarsiaritippallaarsimasut isumaqatigiissuteqarnikkut sivisunerpaamik qaammatinut pingasunut agguarlugit akilersorneqarnissaat isumaqatigiissutigineqarsinnaavoq.
Imm. 3. Naartunermut, meerartaarnermut meeravissiartaarnermulluunniit atatillugu peqataannginneq pissutissaqarluni peqataannginneruvoq. Kommunalbestyrelsip allatigut aalajangertassavaa qaqugukkut pissutissaqarluni peqataasoqannginnersoq

Sulinermit isertitassaraluit annaasat matussuserneqartarnerat, angalanernut
unnuinernullu aningaasartuutit akilerneqartarnerat kiisalu ullormusiat il.il.

§ 9.  Kommunalbestyrelsip aalajangersinnaavaa kommunit aqunneqarnerat pillugu inatsimmi § 66, imm. 1 naapertorlugu ataatsimiinnermut il.il. ilaasunut ullunut angalaffiusunut atatillugu sulinermi aningaasarsiassaraluanik annaasanut taartisiaqartitsiumalluni.
Imm. 2.  Sulinermit aningaasarsiassaraluanik annaasat matussuserneqartarnissaat pillugu kommunalbestyrelsip aalajangiiffigisaanut amerlanerpaamik ilaasinnaapput:
1) Sulinermik inuussutissarsiuteqartut sulillutik akissarsiassaraluaminnik annaasaat uppernarsarneqartut imaluunniit
2) ullormut akissarsiat akissarsiat § 2, imm. 1-imi taaneqartut 730-inngorlugit aggornerannut ataatsimut naapertuuttut inunnut, ataatsimiinnerup nalaani annermik namminersorluni inuussutissarsiuteqarnermit aningaasarsiorfeqartunut, soorlu piniartunut, aalisartunut, savaatilinnut il.il..

§ 10.  Kommunit aqunneqarnerat pillugu inatsimmi § 66, imm. 1 naapertorlugu ataatsimiinnernut il.il. atatillugu angalanermut unnuinermullu aningaasartuutit kommunalbestyrelsip akilertassavai. Angalanermut unnuinermullu aningaasartuutit akilerneqartarnerat pillugu kommunalbestyrelse malittarisassanik erseqqinnerusunik aalajangersaasinnaavoq.
Imm. 2.  Ullormusiat tunniunneqartassapput tjenestemandit Kalaallit Nunaanni atorfillit atorfitsik naapertorlugu angalanerini aningaasartuutinut amerlissutit matussuserneqartarnerat pillugu malittarisassat sukkulluunniit atuuttut malillugit.

§ 11.  Piffissamik qaammatinik marlunnit sivikinnerusumik utaqqiisaagallartumik sinniisutut sulinermi ullormusiaqartitsineqartassaaq ulloq unnuarlu akiligiutigineqartartut atorlugit ullut ataatsimiiffiit tunngavigalugit kiisalu sulinermit aningaasarsiassaraluanik annaasat aamma akiliutigineqartassapput.

Atuutilernera

§ 12.  Nalunaarut ulloq 1. februar 2011 atuutilerpoq.
Imm. 2.  Peqatigitillugu Borgmesterinik borgmesterillu tulliinik kiisalu kommunalbestyrelsinut nunaqarfinnilu aqutsisunut ilaasortanik il.il. akissarsiaqartitsineq pillugu Namminersornerullutik Oqartussat nalunaarutaat nr. 29, 18. december 2008-meersoq atuukkunnaarsinneqarpoq.

Namminersorlutik Oqartussat, ulloq 21. januar 2011

Anthon Frederiksen

/

Hans-Erik Bresson