11. maj 2010

UPA 2010/96

Allannguutissatut siunnersuut

uunga

Siunnersuut: Pujortarnermik inerteqquteqarneq pillugu Inatsisartut inatsisaat nr. xx, ulloq. qaammat 2010-meersoq

Pingajussaaneerneqarnissaanut Naalakkersuisunit saqqummiunneqartoq.

§ 9-mut

1. § 9, imm. 3, imatut oqaasertaqassaaq:
”Imm. 3. Naalakkersuisut malittarisassanik tarnikkut napparsimasut mattussaasut napparsim­mavinni uninngatinneqartut eqqarsaatigalugit, pineqaatissinneqarsimasut Kalaallit Nunaanni inissinneqarsimasut eqqarsaatigalugit kiisalu pineqaatissinneqarsimasut aamma tigummigallarneqartut Kalaallit Nunaanni politiit isertitsiviiniittut eqqarsaatigalugit illup iluani pujortarsinnaatitsisunik qaqutigooraluartumik aalajangersaasinnaapput.”

 

Siunnersuut pillugu oqaaseqaatit

Oqaaseqaatit nalinginnaasu
 

Pujortarnermik inerteqquteqarneq pillugu Inatsisartut inatsisissaattut siunnersuummi 7. april 2010 ullulerneqarsimasumi takuneqarsinnaavoq Naalakkersuisut malittarisassanik tarnikkut napparsimasut mattussaasut napparsimmavinni uninngatinneqartut aamma pineqaatissinneqarsimasut Kalaallit Nunaanni inissinneqarsimasut eqqarsaatigalugit illup iluani pujortarsinnaatitsisumik qaqutigooraluartumik aalajangersaasinnaasut.

Kalaallit Nunaanni Politimesterip allakkatigut 29. april 2010 ullulerneqarsimasutigut erseqqissaatigaa pineqaatissinneqarsimasunut inissiisarfinniitinneqartunut im­mik­kut ittumik aku­ersissuteqarsinnaanermik periarfissiinermut tunuliaqutaasut aamma inunnut, tigummigallarneqarlutik politiit isertitsiviiniittunut imaluunniit pineqaatissinneqarsimallutik isertitsivinniittunut aammattaaq atuuttariaqartut. Ilanngullugu Kalaallit Nunaanni Politimesteri isumaqarpoq immikkut ittumik akuersissuteqarsinnaanermik periarfissiisoqarsinnaasariaqartoq pisuni, ilisimannittut il.il. naalagaaffiup killisiuisarfiiniittoqartillugu.

Tamanna tunngavigalugu Kalaallit Nunaanni Politimesterip siunnersuutigaa Naalakkersuisut malittarisassanik illup iluani pujortarsinnaatitsisunik qaqutigooraluartumik aalajangersaasinnaanerat aammattaaq inunnut tigummigallarneqarlutik politiit isertitsiviiniittunut imaluunniit pineqaatissinneqarsimallutik isertitsivinniittunut aamma naalagaaffiup killisiuisarfiiniittunut atuutissasoq.

Allannguutissatut siunnersuutip kingunerisaanik § 9, imm. 3 annertusitinneqarpoq tigummigallarneqartunut pineqaatissinneqarsimasunullu politiit isertitsiviiniittunut aamma atuuttussanngortillugu.

Naalakkersuisut isumaqanngillat aalajangersagaq annertusineqassasoq inunnut naalagaaffiup killisiuisarfiiniittunut aamma attuuttussanngortillugu, allat inini killisiuisarfiinniit­ta­ria­qartut eqqarsaatigalugit. Maluginiarneqassaaq inuit nammineq piumassuserinngisaminnik tupap pujuanik pujoorfigitinnikkut navianartunik kingunipiloqartunik najuussuinissaasa pinaveersimatinneqarnissaa inatsisikkut siunertarineqarmat.

Aalajangersakkamut oqaaseqaatit allannguutit naapertorlugit iluarsineqarput.. Tamatuma saniatigut allanngortitsisoqanngilaq.

Inatsisissatut siunnersuutip aqutsinikkut kingunerisassai

Inatsisissatut siunnersuut aqutsinikkut kinguneqassanngilaq.

Inatsisissatut siunnersuutip aningaasaqarnikkut kingunerisassai

Inatsisissatut siunnersuuti aningaasaqarnikkut kinguneqassanngilaq.

Aalajangersakkat ataasiakkaat pillugit oqaaseqaatit

 
Nr. 1-imut

Inuit pineqaatissinneqarsimallutik imaluunniit tigummigallarneqarlutik politiit isertitsiviiniit­tut  imm. 3-mi aammattaaq ilaatinneqarput.