30. april 2010

UPA 2010/101

Siunnersuut uunga: Sanaartorneq pillugu Inatsisartut inatsisaat

(Ineqarnermut, Attaveqarnermut Angallannermullu Naalakkersuisoq)

pillugu

Attaveqarnermut Ineqarnermullu Ataatsimiititaliap

ISUMALIUTISSIISSUTAA

Aalajangiiffigisassatut siunnersuutip aappassaaneerneqarnerani saqqummiunneqartoq

Ataatsimiititaliaq kingullermik suliarinninnermini ukuninnga inuttaqarpoq:

Inatsisartunut ilaasortaq Justus Hansen, Demokraatit, siulittaasoq
Inatsisartunut ilaasortaq Olga P. Berthelsen, Inuit Ataqatigiit, siulittaasup tullia
Inatsisartunut ilaasortaq Debora Kleist, Inuit Ataqatigiit
Inatsisartunut ilaasortaq Kim Kielsen, Siumut
Inatsisartunut ilaasortaq Akitsinnguaq Olsen, Siumut

Siullermeerinerup kingorna siunnersuut ataatsimiititaliap peqqissaartumik naliliivigaa makku­ninngalu oqaaseqaateqarniarluni:

Siunnersuutip tunuliaqutaa imarisaalu

Kalaallit Nunaanni sanaartornerup pitsaanerusumik aqunneqarnissaata anguneqarnissaa siunertaralugu sanaartornermut inatsiserpiamik peqalernissamik kissaateqarneq naammassi­niarlugu siunnersuutip saqqummiunneqarneranut siunnersuuteqartumit tunngaviuvoq. Sanaartukkat najukkami avatangiisinut, sanaartukkat pitsaassusiinut atorneqarsinnaanerinullu kiisalu isumalluutinik atuinermut naleqqussarneqarnissaasa eqqarsaatigineqarnissaat siunnersuuteqartumit kissaatigineqarpoq.

Sanaartornermut inatsit sinaaakkusiisumik inatsisaassasoq siunnersuuteqartoq nassuiaavoq, siullermik pingaarnertullu siunertaralugu illuliorfiusumi sanaartornerup ikuallattoornissamut, isumannaallisaanermut peqqinnissamullu tunngatillugu pissutsit naammaginartuutillugit ingerlanneqarnissaa ilusilersorneqarnissaalu aammalu illuutip nunaminertai sanaartorfigine­qanngitsut naammaginartumik pitsaassuseqarnissaasa isumannaatsumillu aserfallatsaaliorne­qarnissaasa qulakkeerneqarnissaa.

Tusarniaaneq

Tusarniaanermit akissutit tiguneqartut attuumassuteqartut siunnersuummut nassuiaatini ilanngunneqarsimasut ataatsimiititaliamit maluginiarneqarpoq.

Siunnersuutip suliarineqarnera

Siunnersuut Inatsisartuni siullermeerneqarnermini nalinginnaasumik tapersersorneqartoq ataatsimiititaliap maluginiarpaa. 

Pissutsinut makkununnga maleruaqqusat piaartumik suliarineqarnissaat ataatsimiititaliamit immikkut pingaartinneqarpoq:

· Sanaartukkat tikikkuminassusissaat, taamaalillutillu inunnit innarluutilinnit atorne­qarsinnaanissaat aammalu sanaartukkani pioreersuni, taamatullu nutaani nukimmik atuinerup killilerneqarnissaa eqqarsaatigalugit isumannaarinissaq.
· Sillimanissamut, ikuallattoornissamut peqqinnissamullu tunngasut eqqarsaatigalugit sanaartukkat sanaartorneqartarnissaanik ilusilersorneqartarnernissaanillu isumannaa­rinissaq.
· Sanaartukkani pioreersuni taamatullu nutaani innaallagissamik, imermik kiassar­nermillu atuinermut uuttuutinik immikkoortunik ikkussuinissap qulakkeernissaa.

Nakkutilliinermik oqartussaasut sukateriffigineqassasut ataatsimiititaliaq aamma isumaqar­poq, taamaalilluni najugaqartut/piginnittut sanaartukkamik tigusereernerisa kingorna sanasut sannarlunnerisa, pilersaarusiornerlunnerup sanaartornerullu ingerlanerani nakkutilliinerlutto­qarnerata kingunerisaannik aningaasaqarnikkut eqqornerlugaannginnissaat qulakkeerne­qarsinnaaqqullugu.

Najugaqartut/piginnittut aamma illut pioreersut allanngortinneqartillugit naatsorsuuti­ginngisanik annertuunik aningaasartuuteqannginnissamut qulakkeerunneqarnissaat Naalak­kersuisunit sulissutigineqartariaqartoq ataatsimiititaliaq isumaqarpoq.

Tamanna tunngavigalugu siunnersuut Inatsisartunit akuersissutigineqassasoq Ataatsi­miititaliap isumaqatigiittup inassutigaa.

Taama oqaaseqarluni Attaveqarnermut Ineqarnermullu Ataatsimiititaliap siunnersuut Inatsisartunut aappassaaniigassanngortippaa.

 

	Justus Hansen, Siulittaasoq, Demokraatit
Olga P. Berthelsen, Siulittaasup tullia, Inuit Ataqatigiit		Debora Kleist, Inuit Ataqatigiit
Kim Kielsen, Siumut		Akitsinnguaq Olsen, Siumut