8. januar 2010

FM 2010/90

Inatsisissatut siunnersuummut oqaaseqaatit

Oqaaseqaatit nalinginnaasut

1. Inatsisissatut siunnersuutip tunuliaqutaa

Kalaallit Nunaanni inatsisit malillugit pinerlunnikkut aningaasarsiat iluanaarutillu malunnarunnaarsarnissaannut periarfissat, ajortumeerinianit atornerlunneqarsinnaanerinut, ajortumeerinianullu aningaasalersuinissat pinngitsoortinneqarnissaannut sakkussamik inatsisiliornissaq inatsisissatut siunnersuutip imaraa, aammalu pinerlunnikkut aningaasarsiat iluanaarutillu malunnarunnaarsarnissaannut periarfissat, ajortumeerinianit atornerlunneqarsinnaanerannut, ajortumeerinianullu aningaasalersuisinnaanernut Inatsisartut inatsisaat malillugu pitsaaliuinissaq siunnersuutip tunuliaqutigaa. Pinerlunnikkut aningaasarsiat malunnarunnaarsannginnissaannut, ajortumeerinianillu aningaasalersuinnginnissanut siunnersuutit taakku pingasut siunertaraat. Kalaallit Nunaanni pinerlunnikkut aningaasarsianik malunnarunnaarsaannginnissanut inatsit malillugu Akileraartarnermut Oqartussat nakkutilliisussatut pisinnaatitaanngillat, inatsit taanna suliffeqarfinnik namminersorlutik oqartussanit pigineqanngitsunit aningaasatigut peqquserluuteqarsimasut pillugit suliniuteqarnerannut tunngassuteqarmat.

Ilaanngullugu UPA 2010-mi inatsisissatut siunnersuutit annertuut innersuussutigineqarput (UPA 2010/xx aamma UPA 2010/xx).

2. Inatsisissatut siunnersuutip imai

Inatsisissatut siunnersuummi siunertarineqarpoq inuit ataasiakkaat akitsuuteqarfiusumut tikinnerannut tassanngalu aallalernerannut akiliutitut atoriaannarnik tigumiaqarnersut Akileraartarnermut Aqutsisoqarfimmit nakkutigineqarsinnaalerneri ersarissumik tunngavissaqalissaaq. Siunnersuummittaaq ilanngunneqarpoq arsaarinnissinnaanermik aalajangersagaq, akiliutitut atoriaannarnik pinerlunnikkut pissarsianik imalt. pinerlunnermut atugassanik, inatsimmik unioqqutitsisimasinnaaneq aarleqqutigineqaraangat atorneqarsinnaasoq.

3. Aningaasatigut allaffissornikkullu pisortanut sunniutigisinnaasai

Inatsisissatut siunnersuutip ilusilerneqarnera tunngavigalugu oqartussanut sunniuteqangaarnavianngilaq.

4. Aningaasatigut allaffissornikkullu inuussutissarsiutilinnut sunniutigisinnaasai

Inuussutissarsiutilinnut aningaasatigut allaffissornikkullu sunniuteqassanngilaq.

5. Avatangiisinut pinngortitamullu sunniutigisinnaasai

Avatangiisinut pinngortitamullu sunniuteqassanngilaq.

6. Innuttaasunut allaffissornikkut sunniutigisinnaasai

Ilimagineqanngilaq innuttaasunut allaffissornikkut siunnersuut sunniuteqassasoq.

7. Naalagaaffeqatigiinnermut namminersornermullu sunniutigisinnaasai.

Inatsisissatut siunnersuut naalagaaffeqatigiinnermut attuumassuteqarpoq, EU-p maleruaqqusaliaanut tunngassuteqarmat, pinerlunnikkullu aningaasanik malunnarunnaarsaanermut akiuiniarnermut inatsit naalagaaffeqatigiinnerup isumagisassarimmagu.

8. Oqartussanik kattuffinnillu tusarniaaneq

Siunnersuut ukunani tusarniaassutigineqarpoq:

Inuussutissarsiornermut Suliffeqarnermullu Naalakkersuisoqarfik

Aalisarnermut, Piniarnermut Nunalerinermullu Naalakkersuisoqarfik

Ineqarnermut, Attaveqarnermut, Angallannermullu Naalakkersuisoqarfik

Nunamut namminermut, Pinngortitamut Avatangiisinullu Naalakkersuisoqarfik

GrønlandsBANKEN

Sparbank

Kalaallit Nunaanni Politimesteri

Grønlands Arbejdsgiverforening

SIK

NUSUKA

SIK

KANUKOKA

Tusarniaanermut uku akissuteqarput:

Grønlands Arbejdsgiverforening, Ineqarnermut, Attaveqarnermut Angallannermullu Naalakkersuisoqarfik, KANUKOKA kommunillu, Økonomi og Erhvervsministeriet aamma Finanstilsynet.

Tusarniaavigineqartut arlaannaalluunniit siunnersuummut oqaaseqaateqanngillat.

Siunnersuut aamma Inatsisilerinermut allaffimmut Inatsisartullu inatsisilerinermut allaffiannut tusarniaassutigineqarpoq. Taakkuttaaq oqaaseqaateqanngillat.

 

 

Inatsisissatut siunnersuummut oqaaseqaatinut ataasiakkaanut aalajangersakkat

 
§ 1-imut

Nr. 1-imut.

§ 30-imi nutaatut imm. 4 siunnersuutigineqarpoq. Imm. nutaami 4-mi erseqqissaatigineqarpoq nakkutilliinermut oqartussat, akiliutitut atoriaannarnik misissuisinnaatitaanermut aamma periarfissaqartitaalernerat.

Akiliutitut atoriaannaat tassaapput aningaasat (aningaasat pappiaqqat aningaasallu aggorsimasut akiliutigineqarsinnaasutut kaaviiaartinneqartut), pappiaqqat nalillit tuneriaannaat, tassunga ilanngullugit pappiaqqat akiliutaasinnaasut, soorlu rejsecheckit, kaaviiaartitsinermut pappiaqqat (tassunga ilanngullugit checkit, akiitsunut allakkat aningaasallu allagartaat), tuneriaannarnik tigumialik, atsiornikut killeqanngitsumik atorneqarsinnaasut, tigusisussamut piviusuunngitsumut tunniussinikkut allatulluunniit pisassarisat tunniunneqarnerani, akiliissutissatullu naammassineqanngitsutut ilusilikkat (tassunga ilanngullugit checkit, akiitsunut allakkat aningaasallu allagartaat), atsiornikut tigusisussalli aqqanik allaffigineqarsimanngitsut.

Nr. 2-mut.

Aalajangersagaq pisinnaatitsissutaavoq taamaasillunilu akileraaruseriffik akiliutitut atoriaannarnik arsaarinninnissamut inatsisitigut pisinnaatitaalissalluni. Tassani piumasaqaataavoq akiliutitut atoriaannaat pinerlunnermut inatsimmut unioqqutitsinikkut pissarsiarineqarsimanissaat imalt. atorneqarnissaat aarleqqutigineqarpat. Aalajangersagaq politiit qanimut suleqatigilluinnarlugit ingerlanneqartassaaq pinerlunnermullu inatsit unioqqutinneqarsimappat taakku unnerluussisussaatitaapput. Arsaarinnittoqarsimatillugu tassanittaaq eqqartuussisarneq pillugu inatsit toqqammavigalugu suliaq ingerlanneqassaaq.

Tamatuma kingunerissavaa, eqqartuussisarnermi inatsimmi § 422, imm. 4 naapertorlugu, arsaarinninnissamut aalajangerneq eqqartuussivimmit aalajangerneqartussaammat, eqqartuussiviup aalajangernissaata utaqqineqarnera pissutigalugu arsaarinninniarneq maangaannassanngippat eqqartuussiviup aalajangernissaa utaqqeqqaarnagu arsaarinnittoqarsinnaavoq.

Eqqartuussivimmit aalajangernerup pissarsiariniartarnera, inuup tikinneranut aallalerneranullu piffissamit atorneqartartumit nalinginnaasumik sivisunerujussuaq atorneqartarpoq. 

Taamaattumik eqqartuussiviup aalajangernissaata siumoortumik piniarneqarsinnaasannginnera pissutigalugu, eqqartuussiviullu aalajangernissaa utaqqineqassappat, inuup angalasup akiliutitut atoriaannaat peernissaanut periarfissaqarluassammat, taamatut suleriaaseq nalinginnaasumik ileqqorineqanngilaq.

Taamatut pisoqartillugu, tassa inuup pineqartup (arsaarneqartup), eqqartuussisarneq pillugu inatsisip § 422, imm. 3 tunngavigalugu piumasaqaateqarpat, eqqartuussivimmut aatsaat saqqummiunneqassaaq.

Akileraartarnermut Oqartussat aamma arsaarinnissinnaapput, inuk pineqartoq, eqqartuussisarneq pillugu inatsimmi § 422, imm. 7 naapertorlugu atsiorluni arsaarneqarnissaminut akuersippat.

Akileraartarnermut Oqartussat akiliutitut atoriaannaat, maleruagassat taakku malillugit arsaarinnissuteqarunik, suliassaq ingerlaannartumik politiinut, pinerluttoqarsimaneranik paasiniagassanngorlugu aalajangiiffigisassanngorlugulu suliassanngortissavaat.

Arsaarinninneq tunngavissaqanngitsoq paasinarsissagaluarpat, pisortat taarseeqqusissuteqarfigineqarsinnaapput, eqqartuussisarneq pillugu inatsisip §§ 487 aamma 488 -mi najoqqutassat tunngavigalugit.

Nioqqutissanik eqqussuinermi akitsuutit pillugit Inatsisartut inatsisaanni allannguutissatut siunnersuutigineqartut tunngavigalugit, pinerlunnikkut malunnarunnaarsaasarnernut, akileraaruseriffik akitsuuserinikkut pineqartunut suliaqarnissaminut inatsisitigut tunngavissinneqarpoq.

Nr. 3-mut

Aalajangersagaq Namminersorluni Oqartussaanerup atuutilersinneqarnerata malitsigaa.

§ 2- mut

Inatsisartut inatsisaat, 1. juni 2010-mi atortuulersinneqassasoq siunnersuutigineqarpoq.