06. april 2010 UPA 2010/89
Siunnersuut uunga: Eqqissisimatitsisarneq aamma allatigut kulturikkut eriagisassanik kulturikkut kingornussatut illersuineq pillugu.
Kapitali 1
Siunertaa, pingaartittariaqartut nassuiaatillu§ 1. Inatsisartut inatsisaatigut kulturikkut eriagisassat immikkoorutillit allanngorartullu illersorneqassapput Kalaallit Nunaata kulturikkut kingornussaasa ilaattut aammalu Kalaallit Nunaata kulturikkut oqaluttuarisaaneranik paasinninnissamut tapertatut. Kulturikkut eriagisassat tamakku ukiut tuusintilikkaat ingerlanerini inuit suliaqartarsimanerinut uppernarsaataapput. Qanga maannalu pisut imminnut atassuserneqarnissaannut inuiaqatigiillu taakkunannga pilersitsisut takussaasunngortinnissaannut peqataapput.
Imm. 2. Kulturikkut eriagisassat nukissatut eriagisassatut, ilisimatusarnermi paasissutissanik aallerfissatut aammalu massakkut inuusut siunissamilu kinguaariit misigisaqarnissaannut, imminnut paasinissaannut, atugarissaarnissaannut naparliinnannginnissaannullu qaqugumut tunngavilersuisussatut nunami maani pisussaaffeqarnitsinnut Inatsisartut inatsisaat ilaavoq.
Imm. 3. Inatsisartut inatsisaatigut Kalaallit Nunaata kulturikkut kingornussaasa nunarsuarmiut inuiaallu oqaluttuarisaanerannut pingaarutilimmik akuunerat qularnaarneqarpoq, kiisalu eqqissisimatitassanngortitsineq allatulluunniit kulturikkut kingornussatut illersugassanngortitsineq siunertaralugu kulturikkut kingornussanik illersuinermik suliniuteqarneq aqqutigalugu, Kalaallit Nunaat nunarsuarmioqatigiit kulturikkut kingornussaannik illersuinermut peqataalluni.
Imm 4. Inatsisartut inatsisaatigut qularnaarneqarpoq, kulturikkut eriagisassat illersorneqarnerisa pisariaqavitsillugu, inuiaqatigiit ineriartortinneqarneranni, ataatsimoornerusumik isiginnilluni pingaartittariaqartut naapertuuttumik mianeralugit pisinnaanissaat.
Imm. 5. Inatsisartut inatsisaatigut qularnaarneqarpoq, kulturikkut eriagisassap aamma ilisimasat paasissutissallu kulturikkut eriagisassap imarisaasa sapinngisamik pitsaanerpaamik uppernarsaasersorneqarnissaat, Naalakkersuisut inuiaqatigiit ineriartortinneqarneranni, ataatsimoornerusumik isiginnilluni pingaartittariaqartut innersuullugit, tak. § 3, eqqissisimatitsinissamik allatulluunniit kulturikkut kingornussatut illersuinissamik pilersaarutit tunuartinneqarnissaannik aalajangiissappata, imaluunniit eqqissisimatitsinermik allatulluunniit kulturikkut kingornussatut illersuinermik pioreersumik allannguissappata atorunnaarsitsissappataluunniit.§ 2. Kulturikkut eriagisassat inatsimmi matumani pineqartut tassaapput qanganitsat eriagisassat imaaliallaannarlugit peerneqarsinnaanngitsut, illut kiisalu sumiiffiit kulturikkut oqaluttuarisaanermi pingaarutillit.
Imm. 2. Qanganitsat eriagisassat imaaliallaannarlugit peerneqarsinnaanngitsut tassaapput inoqarsimaneranut ersiutit tigussaasut, qangaaniilli piusut taakkualu sumiiffimminni attuumassuteqarfii.
Imm. 3. Illu tassaavoq illu pineqartoq tamarmi, illup silataa, illup ilai ataasiakkaat illullu avatangiisai qaninnerit, tamarmiusumik ataavartitsinissamut illersuinissamulluunniit ilaasut.
Imm. 4. Sumiiffiit kulturikkut oqaluttuarisaanermi pingaarutillit tassaapput sumiiffiit kulturikkut oqaluttuarisaanermut atatillugu naleqartut.§ 3. Naalakkersuisut immikkorluinnaq pisoqartillugu, kiisalu inuiaqatigiit ineriartortinneqarneranni, ataatsimoornerusumik isiginnilluni pingaartittariaqartunik, patsisitalersukkamik innersuussillutik, tak. imm. 2, eqqissisimatitassanngortitsinissamik allatulluunniit kulturikkut kingornussatut illersugassanngortitsinissamik eqqarsaat tunuartinneqassasoq aalajangiisinnaassapput imaluunniit eqqissisimatitassanngortitsisimanermik allatulluunniit kulturikkut kingornussatut illersugassanngortitsisimanermik pioreersumik allannguisinnaassallutik atorunnaarsitsisinnaassallutilluunniit. Naalakkersuisut aalajangiinerminni kulturikkut eriagisassap kulturikkut oqaluttuarisaanermi pingaaruteqassusianik, kulturikkut eriagisassap takornariaqarnermut atatillugu periarfissariunnagaanik aamma eqqissisimatitsinnginnerup allatulluunniit kulturikkut kingornussatut illersuinnginnerup kingunerisassaanik naliliissapput, suliffeqarfiup pineqartup inuiaqatigiit ineriartortinneqarneranni, ataatsimoornerusumik isiginnilluni pingaartittariaqartuunerarneqarneranut naleqqiussillutik.
Imm. 2. Inuiaqatigiit ineriartortinneqarneranni, ataatsimoornerusumik isiginnilluni pingaartittariaqartutut paasineqassapput, tunngavigisat makkunannga patsiseqartinneqartut:
1) inuiaqatigiit nukissamik ataavartumik pilersorneqarnissasa qularnaarnissaannik kissaateqarneq,
2) inuiaqatigiit pinngortitaq pissutigalugu ajunaarnersuit malitsigisinnaasaannut illersornissaasa isumannaarnissaannik kissaateqarneq imaluunniit,
3) inuutissarsiornikkut suliffeqarfinnik pilersitsinissamik imaluunniit pioreersunik annertusaanissamik kissaateqarneq, taakku
a) inuiaqatigiinnut iluanaarutaasinnaasunik annertuunik pilersitsippata aamma
b) sumiiffimmi allami kulturikkut eriagisassanik eqquiffiunngitsumi annertuunik aningaasartuuteqarneroqqaarani ingerlanneqarsinnaanngippata.
Imm. 3. Naalakkersuisut inuiaqatigiit ineriartortinneqarneranni, ataatsimoornerusumik isiginnilluni pingaartittariaqartut innersuullugit aalajangiussippata, Naalakkersuisut aalajangiussinerminnut atatillugu aammattaaq aalajangiiffigissavaat, kulturikkut eriagisassap aamma ilisimasat paasissutissallu taassuma imarisaasa illersorneqarsinnaasumik uppernarsaasersorneqarnissaat ilutigisaanik qanoq pissanersoq, tak. § 1, imm. 5. Naalakkersuisut aalajangiussinerminni pingaartissavaat kulturikkut eriagisassap kulturikkut oqaluttuarisaanermi pingaaruteqassusia aamma kulturikkut eriagisassap illersorneqarsinnaasumik uppernarsaaserneqarnissaanut iliuusissat pisariaqartinneqartut qanoq ittuunissaat qanorlu annertutiginissaat. Naalakkersuisut kulturikkut eriagisassaq pillugu isumannaatsumik uppernarsaasersuinissaq qularnaarumallugu iliuuserisassatut aalajangiussaannut aningaasartuutit, sanaartortsitsisumit imaluunniit suliffeqarfiup, inuiaqatigiit ineriartortinneqarneranni, ataatsimoornerusumik isiginnilluni pingaartittariaqartuuneranik tunngaveqarluni pilersinneqarneranut akisussaasumit akilerneqassapput. Aalajangiinermut atasumik Naalakkersuisut aammattaaq allanik piumasaqaateqarnissamik aalajangiisinnaassapput.
Kapitali 2
Qanganitsat eriagisassat imaaliallaannarlugit peerneqarsinnaanngitsut§ 4. Kapitalimi uani pineqarput nunami imartamilu qanganitsat eriagisassat imaaliallaannarlugit peerneqarsinnaanngitsut.
§ 5. Qanganitsat eriagisassat 1900-p siornaneersut tamarmik eqqissisimatitaapput, taakkununnga ilanngullugit illukut, nunaqarfikut, ilerrit iliveqarfikullu. Nunaannarmi ilerrit 1900-p kingornaneersut aammattaaq eqqissisimatitaapput.
Imm. 2. Nunatta Katersugaasiviata Allagaateqarfiatalu, taamaattoq tak. § 8, tamanna pillugu tusarniaareernerup kingorna, tak. § 7, imm. 3, eqqissisimatitassatut aalajangiiffigissavai 1900-miit kingornagullu sanaartukkat, iliveqarfiit atorunnaakkat, inussuit, narsaatit tamakkunanilu ujaqqanik assequtaliussat, piuinnarnissaat oqaluttuarisaanermut annertuumik pingaaruteqartut.
Imm. 3. Naalakkersuisut Nunatta Katersugaasiviata Allagaateqarfiatalu inassuteqaateqarnera naapertorlugu, qanganitsat eriagisassat imaaliallaannarlugit peerneqarsinnaanngitsut eqqissisimatinneqarnissaat malittarisassaliuussinnaavaat, eqqissisimatitsinissamut piumasaqaatit ilanngullugit.§ 6. Eqqissisimatitassanngortitsinerup kingunerissavaa eqqissisimatitassanngortitat innarlerneqannginnissaat, allanngortinneqannginnissaat imaluunniit tamakkiisumik ilaannakortumilluunniit nuunneqannginnissaat.
Imm. 2. Qanganitsanit eriagisassaniit imaaliallaannarlugit peerneqarsinnaanngitsuniit 2 meterisut ungasitsigisup iluani suugaluartunilluunniit ingerlatsisoqaqqusaanngilaq.
Imm. 3. Qanganitsanit eriagisassaniit imaaliallaannarlugit peerneqarsinnaanngitsuniit 2 meterimiit 20 meterisut ungasitsigisup iluani suugaluartunilluunniit ingerlatsisoqaqqusaanngilaq, nunalerinikkut ingerlatsinerit qanganitsanullu eriagisassanut orniguttut aqqusineeraliuunnerat eqqaassanngikkaanni. Nunalerinikkut ingerlatanut ilaapput nunap qaavaniit 15 cm tikillugu itissusilimmut nunap qaavanik nalimmatserineq, naggorissaaneq, naasussaliineq kiisalu nunatap ivigartortitsivittut atorneqarnera. Nunalerinikkut ingerlatanut allanut, matumanittaaq ujaraajaanissamut, kiisalu paasissutissanut nivinngaaviliinissamut, eqqaavinnik allanillu inuit qanganitsanut eriagisassanut imaaliallaannarlugit peerneqarsinnaanngitsunut tikitsisinnaanerannut iluaqutaasinnaasunik ikkussinissamut Nunatta Katersugaasivia Allagaateqarfialu akuersissuteqarsinnaavoq.
Imm. 4. Immikkut tunngavissaqavitsillugu imm. 1-3-mi aalajangersakkat sanioqqunneqarnissaat Nunatta Katersugaasiviata Allagaateqarfiatalu akuersissutigisinnaavai.§ 7. Atuisut nunaminertamik tunineqarsimasut allatulluunniit nunaminertamik atuisinnaatitaasut, kommunalbestyrelsit, pisortani oqartussat sumiiffinnilu katersugaasiviit peqatigiiffiillu, nalinginnaasumik aalajangersimasumilluunniit eqqissisimatitsinissaq ataavartitsinissarluunniit siunertaralugu isumagisaqartut, qanganitsanik eriagisassanik imaaliallaannarlugit peerneqarsinnaanngitsunik eqqissisimatitassangortitsinissaq pillugu suliassanik, kiisalu taakkuninnga allanngortitsinissamik atorunnaarsitsinissamillunniit suliassanik saqqummiisinnaapput. Tamatuma saniatigut Nunatta Katersugaasivia Allagaateqarfialu nammineerluni suliassanngortitsisinnaavoq.
Imm. 2. Nunatta Katersugaasivia Allagaateqarfialu qanganitsat eriagisassat imaaliallaannarlugit peerneqarsinnaanngitsut eqqissisimatitassanngortinnissaat aamma tamatuminnga allanngortitsinissaq imaluunniit atorunnarsitsinissaq pillugit aalajangiisuussaaq. Nunatta Katersugaasivia Allagaateqarfialu aalajangiinermut atatillugu piumasaqaatinik aalajangersaasinnaavoq.
Imm. 3. Eqqissisimatitsinermut tunngasunik aalajangiisoqartinnagu imaluunniit allanngui-soqartinnagu atorunnaarsitsisoqartinnaguluunniit, inuit tamat, atuisut nunaminertamik tunineqarsimasut allatulluunniit nunaminertamik atuisinnaatitaasut, kommunimi qanganitsap eriagisassap imaaliallaannarlugu peerneqarsinnaanngitsup inissisimaffigisaani kommunalbestyrelsi, Naalakkersuisut allallu pineqartumut soqutigisallit ilisimatinneqassapput tusarniaavigineqarlutillu. Tusarniaaneq qaammatinik 3-nik sivisussuseqassaaq, piffissallu taassuma iluani taaneqartut oqaaseqaateqarnissamut periarfissaqartitaassallutik. Kiisalu Kulturikkut kingornussat pillugit siunnersuisoqatigiit inassuteqaateqassapput, tak. § 29, imm. 2.
Imm. 4. Imm. 3-mi taaneqartup nalunaaruteqarnerup pineraniit eqqissisimatitassanngortitsinissamut akornutaasinnaasumik imaluunniit ajornartorsiortitsisisinnaasumik iliuuseqartoqassanngilaq. Tamanna atuutinngilaq aatsitassarsiornermut aamma sikumik imermillu isumalluutinut tunngasuni misissueqqaarnissamut, ujarlernissamut atuisinnaanermullu akuersissutaareersunut, kiisalu erngup nukinganik nukissiorfiliornernut taamatullu taakkununnga atasumik misissueqqaarnernut.§ 8. § 7, imm. 3 malillugu tusarniaanermi tunngavissaqartumik paasinarsippat eqqissisimatitassanngortitsinissamik eqqarsaateqarneq imaluunniit eqqissisimatitassanngortitamik pioreersumik atuutsitsiinnarnissamik allannguinissamilluunniit eqqarsaateqarneq, inuiaqatigiit ineriartortinneqarneranni, ataatsimoornerusumik isiginnilluni pingaartittariaqartunut patsisitalersukkamik akerliusoq, tak. § 3, Nunatta Katersugaasiviata Allagaateqarfiatalu suliaq Naalakkersuisunut aalajangiiffigisassanngorlugu saqqummiutissavaa. Suliaq Naalakkersuisunut saqqummiunneqannginnerani Nunatta Katersugaasiviata Allagaateqarfiatalu Kulturikkut kingornussat pillugit siunnersuisoqatigiinnut oqaaseqaateqarfigitissavaa. Kulturikkut kingornussat pillugit siunnersuisoqatigiinnut saqqummiussinermini, tamatumalu kingorna suliap Naalakkersuisunut ingerlateqqinnerani, Nunatta Katersugaasiviata Allagaateqarfiatalu ilanngullugit tunniutissavai, eqqissisimatitassanngortitsinissamik suliap aalajangiiviginissaanut inassuteqaatini aamma Naalakkersuisut eqqissisimatitsinissamik eqqarsaataagaluaq tunuartillugu imaluunniit eqqissimatitsineroreersoq allanngortillugu atorunnaarsillugulluunniit aalajangiissagaluarpata, qanganitsap eriagisassap isumannaatsumik uppernarsaasersorneqarnissanut pisariaqartumik iliuusissatut inassuteqaatini.
Imm. 2. Naalakkersuisut eqqissisimatitsinissamik imaluunniit eqqissisimatitsinermik pioreersumik atuutsitsiinnarnissamik allannguinissamilluunniit aalajangiissagaluarunik malittarisassanik § 6, imm. 1-3-miittunik sanioqqutitsisinnaapput.§ 9. Nunatta Katersugaasiviata Atuagaateqarfiatalu eqqissisimatitsinerit aamma taakkunannga allannguinerit atorunnaarsitsinerilluunniit, tamakku pillugit aalajangiisoqarneraniit, ullut 14-it qaangiutsinnagit tamanut saqqummiutissavai. Piginnittoq, atuisut nunaminertamik tunineqarsimasut allatulluunniit atuisinnaatitaasut aamma kommuni qanganitsap eriagisassap inissisimaffigisaa, kiisalu pineqartumut soqutiginnittut allat toqqaannartumik ilisimatinneqassapput.
Imm. 2. Sumiiffimmut qanganitsap eriagisassap inissisimaffigisaanut pisinnaatitaanermik pigisaqartunit tamanit, eqqissisimatitsineq ataqqineqassaaq, pisinnaatitaanerup qanga atuutilersimanera apeqqutaatinnagu.§ 10. Nunatta Katersugaasiviata Allagaateqarfiatalu qanganitsat eriagisassat imaaliallaannarlugit peerneqarsinnaanngitsut eqqissisimatitaasut ilisimaneqartut tamaasa nalunaarsussavai, matumani ilanngullugit eqqissimatitassanngortitsinermut piumasaqaataasut.
Imm. 2. Nunatta Katersugaasiviata Allagaateqarfiatalu qanganitsat eriagisassat imaaliallaannarlugit peerneqarsinnaanngitsut Inatsisartut inatsisaat manna tunngavigalugu eqqissisimatitassanngortitaasimasut nakkutigissavai.
Imm. 3. Nunatta Katersugaasiviata Allagaateqarfiatalu aningaasanut inatsimmi aningaasaliissutit iluini qanganitsat eriagisassat imaaliallaannarlugit peerneqarsinnaanngitsut pingaaruteqartut aserfallatsaalineqarnissaat isumagissavaa.
Tigussaasumik pilersaarusiornermut atatillugu aammalu assaanissamut piareersarnermut atasumik qanganitsat eriagisassat imaaliallaannarlugit peerneqarsinnaanngitsut isumannaarneqarneri§ 11. Nunatta Katersugaasiviata Allagaateqarfiatalu nunaminertanik pilersaarusiornermut aatsitassalerinermullu oqartussaasut susassaqartullu allat, nunap pisuussutaanik atuinermik suliaqartut suleqatigalugit sulissutigissavaa qanganitsat eriagisassat imaaliallaannarlugit peerneqarsinnaanngitsut aamma ilisimasat paasissutissallu taakkunannga pilersut siunissaq eqqarsaatigalugu isumannaarneqarnissaat.
Imm. 2. Nunaminertanik pilersaarusiornermut aatsitassalerinermullu oqartussat allallu nunap piinik atuinermik suliaqartut, pilersaarusiornerminni akuersissutillu suliarinerini qanganitsanik eriagisassanik imaaliallaannarlugit peerneqarsinnaanngitsunik attuisinnaasut suliaritillugit Nunatta Katersugaasivia Allagaateqarfialu akulerutsittassavaat.
Imm. 3. Nunaminertanik pilersaarusiornermut aatsitassalerinermullu oqartussat allallu nunap piinik atuinermik suliaqartut, akuersissutinik qanganitsanik eriagisassanik imaaliallaannarlugit peerneqarsinnaanngitsunik attuisinnaasunik suliaqarnerminnut atatillugu, Inatsisartut inatsisaanni matumani imm. 4-mi, §§ 12-16-imi aamma § 32-mi imarisaasut pillugit qinnuteqartoq nalunaarfigisassavaat.
Imm. 4. Annertuumik assaasoqassatillugu sanaartortitsisup Nunatta Katersugaasivia Allagaateqarfialu akulerutsissavaa.
Imm. 5. Sumiiffinni pineqartuni imm. 2 aamma 4 naapertorlugit peqataatitsilluni Nunatta Katersugaasiviata Allagaateqarfiatalu allagaateqarfiit atorlugit qanganitsanik eriagisassanik imaaliallaannarlugit peerneqarsinnaanngitsunik peqarneranik nakkutilliineq ingerlatissavaa.§ 12. Sanaartortitsisup imaluunniit misissueqqaarnermik assaanernilluunniit akiliisussap, suliap aallartinnginerani Nunatta Katersugaasivia Allagaateqarfialu qinnuigisinnaavaa sumiiffiup pineqartup qanganisarsiornikkut naliliivigineqarnissaanik.
Imm. 2. Nunatta Katersugaasiviata Allagaateqarfiatalu aalajangiussinnaavaa sumiiffimmi pineqartumi qanganisarsiornikkut naliliisoqassasoq, sumiiffik qanganisarsiornikkut ilisimaneqanngippat imaluunniit qanganitsanik eriagisassanik imaaliallaannarlugit peerneqarsinnaanngitsunik peqarnissaa ilimagissallugu patsisissaqarpat.
Imm. 3. Qanganisarsiornikkut naliliineq piaarnerpaamik pissaaq, immikkullu ittunik pisoqartinnagu qaammatit 9 qaangiutsinnagit naammasseriissalluni. Piffissaliussaq naatsorsorneqassaaq naliliinissamik qinnuteqaateqarnermiit, tak. imm. 1, imaluunniit qanganisarsiornikkut naliliinissap aalajangiunneqarnerata, tak. imm. 2, sanaartortitsisumut imaluunniit assaanermik akiliisussamut nalunaarutigineqarneraniit.§ 13. Sanaartortitsisup imaluunniit misissueqqaarnermik assaanermilluunniit akiliisussap suliap aallartinnginnerani Nunatta Katersugaasivia Allagaateqarfiatalu qinnuigisinnaavaa sumiiffimmi qanganisarsiornikkut misissuinermik ingerlatseqqullugu.
Imm. 2. Nunatta Katersugaasiviata Allagaateqarfiatalu aalajangiussinnaavaa sumiiffimmi pineqartumi qanganisarsiornikkut misissuisoqassasoq, Nunatta Katersugaasiviata Allagaateqarfiatalu nalilerpagu sumiiffik qanganitsanik eriagisassanik imaaliallaannarlugit peerneqarsinnaanngitsunik peqartoq.
Imm. 3. Qanganisarsiornikkut misissuineq piaarnerpaamik pissaaq, immikkullu ittunik pisoqartinnagu qaammatit 18-it qaangiutsinnagit naammasseriissalluni. Qanganisarsiornikkut misissuineq sioqqullugu qanganisarsiornikkut naliliisoqarsimappat, tak. § 12, immikkut ittunik pisoqartinnagu, qanganisarsiornikkut naliliineq aamma qanganisarsiornikkut misissuineq ataatsimut qaammatit 18-it qaangiutsinnagit naammassereersimassapput. Piffissaliussaq naatsorsorneqassaaq naliliinissamik qinnuteqaateqarnermiit, tak. imm. 1, imaluunniit qanganisarsiornikkut misissuinissap aalajangiunneqarnerata, tak. imm. 2, sanaartortitsisumut imaluunniit assaanermik akiliisussamut nalunaarutigineqarneraniit.§ 14. Sanaartortitsisup imaluunniit assaanermik akiliisussap, qanganisarsiornikkut naliliinermut imaluunniit qanganisarsiornikkut misissuinermut aningaasartuutit akilissavai. Nunatta Katersugaasivia Atuagaateqarfialu naliliinermut imaluunniit misissuinermut aningaasartuutitssat missingersersuusiussavai. Missingersersuut sanaartortitsisumut imaluunniit assaanermik akiliisussamut akuerisassanngorlugu piaarnerpaamik naliliinerup misissuinerulluunniit aallartinnginerani saqqummiunneqassaaq.
Imm. 2. Inuit namminneerlutik annikinnerusumik nunami assaaneranni, aamma aatsitassat ingerlassallu tamatumunnga pingaaruteqartut pillugit Inatsisartut inatsisaat naapertorlugu annikinnerusumik ujaasinissamut atuinissamullu akuerisaasunut, qanganisarsiornermi misissuinernut Naalakkersuisut tamakkiisumik ilaannakortumilluunniit aningaasartuutinik matussusiisinnaapput, aningaasartuutit nammineerluni sanaartortitsisumut imaluunniit annikinnerusumik ujaasinissamut atuinissamullu akuerisaasumut naleqqutinngitsumik artukkiissappata. Naalakkersuisut ilaannakortumik aningaasartuutinik matussusiippata, nammineerluni sanaartortitsisoq imaluunniit annikinnerusumik ujaasinissamut atuinissamullu akuerisaasoq missingersersuummik akuerisassaanik saqqummiiffigineqassaaq, tak. imm. 1.§ 15. Nunami assaanerit, qanganitsanik eriagisassanik imaaliallaannarlugit peerneqarsinnaanngitsunik imaluunniit qanganisarsiornikkut naliliinermik imaluunniit misissuinermik, attuisussaatinnagit aallartinneqarnissaat Nunatta Katersugaasiviata Allagaateqarfiatalu aalajangiiffigissavaa. Aalajangiinermi pingaartinneqassapput qanganitsat eriagisassat imaaliallaannarlugit peerneqarsinnaanngitsut illersorneqarnissaat, qanganisarsiornikkut naliliinerit misissuinerillu ingerlanneqarnissaasa qularnaarnissaat assaanerullu aallartinneqarnissaanut periarfissat.
Assaanerup nalaani qanganitsat eriagisassat imaaliallaannarlugit peerneqarsinnaanngitsut nassaarineqartut§ 16. Assaanerup nalaani qanganitsamik eriagisassamik imaaliallaannarlugu peerneqarsinnaanngitsumik naammattuuisoqarpat sanaartortitsisup nassaarneq erngertumik Nunatta Katersugaasivianut Allagaateqarfianullu nalunaarutigissavaa, suliarlu - qanganitsamik eriagisassamik imaaliallaannarlugu peerneqarsinnaanngitsumik attuinera naapertorlugu - unitsinneqassaaq. Nunatta Katersugaasiviata Allagaateqarfiatalu aalajangissavaa qanganisarsiornikkut misissuisoqassanersoq, tak. § 13, imm. 2, imaluunniit eqqissisimatitsinissaq siunertaralugu suliamik aallartitsisoqassanersoq, tak. § 5, imm. 2.
§ 17. Nunatta Katersugaasivia Allagaateqarfialu qanganitsat eriagisassat imaaliallaannarlugit peerneqarsinnaanngitsut aammalu nassaat assaaviginissaannut suliffeqarfinnut allanut imaluunniit ilisimatusarnikkut soqutigisaqaqatigiinnut akuersissuteqarsinnaavoq, akuersissutinullu atasumik piumasaqaasiorluni.
Kapitali 3
Illut§ 18. Nunatta Katersugaasiviata Allagaateqarfiatalu, taamaattoq tak. § 20, tusarniaareernikkut, tak. § 19, imm. 2, illut piuinnarnissaat illersornissaalluunniit oqaluttuarisaanikkut imaluunniit illulioriaatsikkut annertuumik pingaaruteqartut eqqissisimatinnissaat aalajangissavaa.
Imm. 2. Illunik eqqissisimatitassanngortitsinerup malitsigissavaa illup aserfallatsaaliorneqarnissaanut aamma sanaartorfigineqarsinnaaneranut naleqqiullugu immikkut pisussaaffeqarneq, tak. § 22.
Imm. 3. Naalakkersuisut, Nunatta Katersugaasiviata Allagaateqarfiatalu inassuteqareerneratigut, illunik eqqissisimatitassanngortitsisarneq pillugu malittarisassiuussisinnaapput, eqqissisimatitsinermut piumasaqaataasussat ilanngullugit.§ 19. Piginnittut, atuisut nunaminertamik tunineqarsimasut allatulluunniit nunaminertamik illumilluunniit atuisinnaatitaasut, naalagaaffik, kommunit, sumiiffinni katersugaasiviit aammalu peqatigiiffiit siunertanik nalinginnaasumik aalajangersimanerusumilluunniit eqqissisimatitsinissamik ataavartitsinissamillu isumaginnittut eqqissisimatitassanngortitsinissaq kiisalu taassuminnga allannguinissaq imaluunniit atorunnaarsitsinissaq pillugit sulianik aallartitsisinnaapput, tamatumunnga ilanngullugit illup eqqissisimatitaasup nuunneqarnissaa pillugu suliassat. Taamatuttaaq Nunatta Katersugaasivia Allagaateqarfialu tamanna pillugu nammineq suliamik aallartitsisinnaavoq.
Imm. 2. Eqqissisimatitassanngortitsinissamik kiisalu taassuminnga allannguinissamik imaluunniit atorunnaarsitsinissamik aalajangiissoqarnissaq sioqqullugu inuit tamat, piginnittoq, atuisut nunaminertamik tunineqarsimasut allatulluunniit nunaminertamik illumilluunniit atuisinnaatitaasut, kommunilu illup inissisimaffigisaa, Naalakkersuisut allallu pineqartumut soqutigisallit ilisimatinneqassapput tusarniaaffigineqarlutillu. Tusarniaanissamut piffissaliussaq qaammatinik 3-nik sivisussuseqassaaq, pineqartullu piffissap taassuma iluani oqaaseqaateqarnissamut periarfissaqartitaapput. Kiisalu Kulturikkut kingornussat pillugit siunnersuisoqatigiit inassuteqaateqassapput, tak. § 29, imm. 2.
Imm. 3. Imm. 2-mi taaneqartup ilisimatitsinerup pineraniit eqqissisimatitassanngortitsinissamut akornutaasinnaasumik imaluunniit ajornartorsiortitsisinnaasumik iliuuseqartoqassanngilaq. Tamannali atuutinngilaq aatsitassarsiornermut tunngasuni misissueqqaarnissamut, ujarlernissamut atuisinnaanermullu akuersissutaareersunut, sikumik imermillu isumalluutinut tunngasunut, kiisalu erngup nukinganik nukissiorfiliornernut taamatullu taakkununnga atasumik misissueqqaarnernut.
Imm. 4. Eqqissisimatitassanngortitsinissamik kiisalu taassuminnga allannguinissamik atorunnaarsitsinissamilluunniit suliat Nunatta Katersugaasiviata Allagaateqarfiatalu aalajangiiffigissavai. Nunatta Katersugaasivia Allagaateqarfialu aalajangiinermut atatillugu piumasaqaatinik aalajangersaasinnaavoq.§ 20. § 19 malillugu tusarniaanermi tunngavissaqartumik paasinarsippat eqqissisimatitassanngortitsinissamik eqqarsaateqarneq imaluunniit eqqissimatitsinermik pioreersumik atuutsitsiinnarnissamik allannguinissamilluunniit eqqarsaateqarneq, inuiaqatigiit ineriartortinneqarneranni, ataatsimoornerusumik isiginnilluni pingaartittariaqartunut akerliusoq, Nunatta Katersugaasiviata Allagaateqarfiatalu suliaq Naalakkersuisunut aalajangiiffigisassanngorlugu saqqummiutissavaa. Naalakkersuisut aalajangiinnginneranni suliaq Kulturikkut kingornussat pillugit siunnersuisoqatigiinnut oqaaseqarfigeqqullugu saqqummiunneqassaaq. Kulturikkut kingornussat pillugit siunnersuisoqatigiinnut saqqummiussinermini, tamatumalu kingorna suliap Naalakkersuisunut ingerlateqqinnerani, Nunatta Katersugaasivia Allagaateqarfialu, eqqissisimatitassanngortitsinissap aalajangiiffiginissaanut aamma Naalakkersuisut eqqissimatitsiniaratik imaluunniit eqqissimatitsinermik pioreersumik allannguinissamik atorunnaarsitsinissamilluunniit aalajangiissagaluarpata, illup illersorneqarsinnaasumik uppernarsaasersorneqarnissaa qularnaarumallugu iliuuserisassat pisariaqartut pillugit inassuteqaateqassaaq.
Imm. 2. Naalakkersuisut eqqissisimatitsinissamik imaluunniit eqqissisimatitsinermik pioreersumik atuutsitsiinnarnissamik allannguinissamilluunniit aalajangiissagaluarunik, Naalakkersuisut malittarisassanik § 22, imm. 1-imiittunik sanioqqutitsisinnaapput.§ 21. Nunatta Katersugaasiviata Allagaateqarfiatalu eqqissisimatitassanngortitsinermik, aamma takkuninnga allannguinermik imaluunniit atorunnaarsitsinermik aalajangiinerit, aalajangiinermiit ullut 14-it qaangiutsinnagit, tamanut nalunaarutigissavai. Piginnittoq, atuisut nunaminertamik tunineqarsimasut, allatulluunniit illumik atuisinnaatitaasut kommunilu illup inissisimaffigisaa, kiisalu susassaqartut allat tamarmik toqqaannartumik ilisimatinneqassapput.
Imm. 2. Eqqissisimatitassanngortitsinernik aalajangiinerit Nunatta Katersugaasiviata Allagaateqarfiatalu piumasaqaateqarneratigut Kalaallit Nunaanni Eqqartuussivimmit nalunaarsorneqassapput. Piginnittut nikinneri Kalaallit Nunaanni Eqqartuussiviup Nunatta Katersugaasivianut Allagaateqarfianullu nalunaarutigissavai.
Imm. 3. Eqqissimatitsineq illumut pisinnaatitaaffimmik pigisaqartut tamarmik ataqqissavaat, pisinnaatitaaffik qaqugukkut pilersimanersoq apeqqutaatinnagu.§ 22. Illu eqqissimatitaq piginnittunit isumannaatsumik aserfallatsaalineqassaaq eqqissisimatitassanngortitsinermut naapertuuttumik. Nalinginnaasumik aserfallatsaaliuineq pissaaq atortussat, periutsit qalipaatillu maannamut atorneqartut atorlugit, illullu eqqissisimatitassanngortitaasimasup eqqissisimatitassanngortitsinerup nalaani qanoq issusia isikkualu naapertorlugit. Nunatta Katersugaasiviata Allagaateqarfiatalu immikkut pissutsit taamaaliornissaq taperserpassuk, atortussat, periutsit qalipaatillu maannamut atorneqartut atornisaannik piumasaqaat sanioqqussinnaavaa.
Imm. 2. Illumi eqqissisimatitassanngortitami sanaartornerit tamarmik Nunatta Katersugaasivianit Allagaateqarfiannillu akuerineqaqqaassaapput, suliaq illup ilaanut eqqissisimatitassanngortitsinermi pineqartunut ilaappat, aammalu suliaq nalinginnaasumik aserfallatsaaliinermit annertuneruppat. Nunatta Katersugaasivia Allagaateqarfialu akuersissummut atasumik piumasaqaateqarsinnaavoq.
Imm. 3. Qinnuteqartoqareerneratigut Nunatta Katersugaasivia Allagaateqarfialu aalajanger-sinnaavoq illumi eqqissisimatitassanngortitami aserfallatsaaliuinermut imaluunniit sanaartornermut aningaasartuutit aningaasanut inatsimmi aningaasaliissutit iluannit tamakkiisumik ilaannakortumilluunnit aningaasartuutigineqassasut.§ 23. Illut eqqissisimatitaasut Nunatta Katersugaasiviata Allagaateqarfiatalu nalunaarsussavai, eqqissisimatitassanngortitsinermi piumasaqaataasut ilanngullugit.
Imm. 2. Nunatta Katersugaasiviata Allagaateqarfiatalu illut eqqissisimatitat nakkuti-gissavai.
Kapitali 4
Sumiiffiit kulturikkut oqaluttuarisaanermi pingaarutillit§ 24. Nunatta Katersugaasiviata Allagaateqarfiatalu, taamaattorli tak. § 26, tusarniaaneq ingerlatereerlugu, tak. § 25, imm. 2, sumiiffiit kulturikkut oqaluttuarisaanermi pingaarutillit eqqissimatitassanngortinneqarnissaannik allatulluunniit kulturikkut kingornussatut illersorneqarnissaannik aalajangiissaaq, sumiiffiit piuinnarnissaat imaluunniit illersorneqarnissaat annertuumik pingaaruteqarpat.
Imm. 2. Sumiiffiit kulturikkut oqaluttuarisaanermi pingaarutillit eqqissisimatitassanngortinneqarnerannut allatulluunniit kulturikkut kingornussatut illersugassanngortinneqarnerannut ilaavoq ataqatigiissuseq, kulturikkut eriagisassat arlaqartut imaluunniit sumiiffiup immikkut pisimasoqarfiusup akornanni piusoq.
Imm. 3. Sumiiffiit kulturikkut oqaluttuarisaanermi pingaarutillit eqqissisimatitassanngortinneqarnerisa nassatarissavaa sumiiffiup iluani sunilluunniit iliuuseqarnissap inerteqqutaanera, kikkunnilluunniit tikinneqarsinnaanissaat eqqaassanngikkaanni. Immikkut tunngavissaqavitsillugu Nunatta Katersugaasivia Allagaateqarfialu tamatuminnga sanioqqutitsinissamik akuersisinnaavoq.
Imm. 4. Sumiiffinnik kulturikkut oqaluttuarisaanermi pingaarutilinnik allatut kulturikkut kingornussatut illersugassanngortitsinerup nassatarissavaa, sumiiffiup iluani sunilluunniit sumiiffiup ilaanut imaluunniit sumiiffimmut tamarmut isikkuluutaalersinnaasumik aseruutaasinnaasumilluunniit iliuuseqartoqassanngimmat. Immikkut tunngavissaqavitsillugu Nunatta Katersugaasivia Allagaateqarfialu tamatuminnga sanioqqutitsinissamik akuersisinnaavoq.
Imm. 5. Naalakkersuisut Nunatta Katersugaasiviata Allagaateqarfiatalu inassuteqareerneratigut sumiiffiit kulturikkut oqaluttuarisaanermi pingaarutillit eqqissimatitassanngortinneqarnissaannut allatulluunniit kulturikkut kingornussatut illersorneqarnissaannut malittarisassaliorsinnaapput, tamatumunnga ilanngullugit sumiiffiup killilerlugu nalunaarsorneqarnera, sumiiffiup atorneqarsinnaanera, sumiiffiup aqunneqarnera kiisalu sumiiffimmut ornigussinnaaneq ornigunnermilu akiliuteqarsinnaaneq.§ 25. Piginnittut, atuisut nunaminertamik tunineqarsimasut imaluunniit nunaminertamik allatut atuinissamik akuerisaasut, naalagaaffik, kommunit, sumiiffinni katersugaasiviit aammalu peqatigiiffiit nalinginnaasumik aalajangersimasumilluunniit eqqissisimatitsinissaq ataavartitsinissarluunniit siunertaralugu isumagisaqartut, eqqissisimatitassanngortitsinissaq allatulluunniit kulturikkut kingornussatut illersuinissaq pillugit suliamik, kiisalu taassuminnga allannguinissaq imaluunniit atorunnaarsitsinissaq pillugu suliamik aallartitsisinnaapput. Taamatuttaaq Nunatta Katersugaasivia Allagaateqarfialu tamanna pillugu nammineq suliamik aallartitsisinnaavoq.
Imm. 2. Eqqissisimatitassanngortitsinissamik allatulluunniit kulturikkut kingornussatut illersugassanngortitsinissamik, kiisalu taakkuninnga allannguinissamik imaluunniit atorunnaarsitsinissamik aalajangiisoqarnissaa sioqqullugu inuit tamat, piginnittoq, atuisut nunaminertamik tun ineqarsimasut allatulluunniit nunaminertamik atuinissamut akuerineqarsimasut, kommunilu sumiiffiup kulturikkut oqaluttuarisaanermi pingaarutillip inissisimaffigisaa, Naalakkersuisut allallu pineqartumut soqutigisallit ilisimatinneqassapput tusarniaavigineqarlutillu. Tusarniaanissamut piffissaliussaq qaammatinik 3-nik sivisusseqassaaq, pineqartullu piffissap taassuma iluani oqaaaseqaateqarnissaminnut periarfissaqartitaallutik. Aammattaaq Kulturikkut kingornussanut siunnersuisoqatigiit inassuteqaateqarsinnaapput, tak. § 29, imm. 2.
Imm. 3. Imm. 2-mi taaneqartup nalunaaruteqarnerup pineraniit eqqissisimatitassanngortitsinissamik allatulluunniit kulturikkut kingornussatut illersugassanngortitsinissamik pilersaaruteqarnermut akornutaasinnaasumik imaluunniit ajornartorsiortitsisinnaasumik iliuuseqartoqassanngilaq. Tamannali atuutinngilaq aatsitassasiornermut tunngasuni misissueqqaarnissamut, ujarlernissamut atuisinnaanermullu akuersissutaareersunut, sikumik imermillu isumalluutinut tunngasunut, kiisalu erngup nukinganik nukissiorfiliornernut taamatullu taakkununnga atasumik misissueqqaarnernut.
Imm. 4. Eqqissisimatitassanngortitsinissamik allatulluunniit kulturikkut kingornussatut illersugassanngortitsinissamik taakkuninngalu allannguinissamik atorunnaarsitsinissamilluunniit suliassat Nunatta Katersugaasiviata Allagaateqarfiatalu aalajangiiffigisassavai.§ 26. § 25, imm. 2 malillugu tusarniaanermi patsisitalersukkamik paasinarsippat, eqqissisimatitassanngortitsinissamik allatulluunniit kulturikkut kingornussatut illersugassanngortitsinissamik imaluunniit eqqissisimatitsinerup allatulluunniit kulturikkut kingornussatut illersuinerup pioreersup atuutsiinnarneqarnissaanik allanngortinneqarnissaanilluunniit eqqarsaateqarneq inuiaqatigiit ineriartortinneqarneranni, ataatsimoornerusumik isiginnilluni pingaartittariaqartunut, tak. § 3, akerliusoq, Nunatta Katersugaasiviata Allagaateqarfiatalu suliaq Naalakkersuisunut aalajangiiffigisassanngorlugu saqqummiutissavaa. Naalakkersuisut aalajangiinnginneranni suliaq Kulturikkut kingornussat pillugit siunnersuisoqatigiinnut oqaaseqarfigeqqullugu saqqummiunneqassaaq. Kulturikkut kingornussat pillugit siunnersuisoqatigiinnut saqqummiussinermini, tamatumalu kingorna suliap Naalakkersuisunut ingerlateqqinnerani Nunatta Katersugaasivia Allagaateqarfialu, eqqissisimatitassanngortitsinissap allatulluunniit kulturikkut kingornussatut illersuinissap aalajangiiffiginissaanut aamma Naalakkersuisut eqqissimatitsiniaratik imaluunniit allatut kulturikkut kingornussatut illersugassanngortitsiniaratik, imaluunniit eqqissimatitsinermik allatulluunniit kulturikkut kingornussatut illersuinermik pioreersumik allannguinissamik atorunnaarsitsinissamilluunniit aalajangiissagaluarpata, sumiiffiup kulturikkut oqaluttuarisaanermi pingaaruteqartup illersorneqarsinnaasumik uppernarsaasersorneqarnissaa qularnaarumallugu iliuuserisassat pisariaqartut pillugit inassuteqaateqassaaq.
Imm. 2. Naalakkersuisut eqqissisimatitsinissamik allatulluunniit kulturikkut kingornussatut illersuinissamik imaluunniit eqqissisimatitsinermik pioreersumik atuutsitsiinnarnissamik allannguinissamilluunniit aalajangiissagaluarunik, Naalakkersuisut malittarisassanik § 24, imm. 3-4-miittunik sanioqqutitsisinnaapput.§ 27. Nunatta Katersugaasiviata Allagaateqarfiatalu eqqissisimatitassanngortitsinermik allatulluunniit kulturikkut kingornussatut illersugassanngortitsinermik, aamma taakkuninnga allannguinermik imaluunniit atorunnaarsitsinermik aalajangiinerit, aalajangiinermiit ullut 14-it qaangiutsinnagit, tamanut nalunaarutigissavai. Piginnittoq, atuisut nunaminertamik tunineqarsimasut, allatulluunniit nunaminertamik atuisinnaatitaasut kommunilu sumiiffiup kulturikkut oqaluttuarisaanermi pingaaruteqartup inissisimaffigisaa, kiisalu susassaqartut allat tamarmik toqqaannartumik ilisimatinneqassapput.
Imm. 2. Eqqissisimatitsineq allatulluunniit kulturikkut kingornussatut illersugassanngortitsineq pisinnaatitaaffimmik pigisaqartunit tamanit ataqqineqassapput, pisinnaatitaaffik qaqugukkut pilersimanersoq apeqqutaatinnagu.§ 28. Nunatta Katersugaasiviata Allagaateqarfiatalu sumiiffiit kulturikkut oqaluttuarisaanermi pingaaruteqartut eqqissisimatitaasut allatulluunniit kulturikkut kingornussatut illersugaasut tamaasa nalunaarsussavai, matumani ilanngullugit eqqissimatitassanngortitsinermi allatulluunniit kulturikkut kingornussatut illersugassanngortitsinermi piumasaqaataasut.
Imm. 2. Nunatta Katersugaasiviata Allagaateqarfiatalu sumiiffiit kulturikkut oqaluttuarisaanermi pingaaruteqartut eqqissisimatitat allatulluunniit kulturikkut kingornussatut illersugaasut nakkutigissavai.
Imm. 3. Nunatta Katersugaasiviata Allagaateqarfiatalu aningaasanut inatsimmi aningaasaliissutit iluanni sumiiffiit kulturikkut oqaluttuarisaanermi pingaarutillit eqqissisimatitassanngortinneqarsimasut allatulluunniit kulturikkut kingornussatut illersugassanngortinneqarsimasut aserfallatsaalineqarnissaat isumagissavaa.
Kapitali 5
Kulturikkut kingornussat pillugit siunnersuisoqatigiit§ 29. Naalakkersuisut Kultureqarnermut ilaasortaata Kulturikkut kingornussat pillugit siunnersuisoqatigiit 3-nik ilaasortallit pilersissavai, illussanik ilusilersuinermut, qanganisarsiornermut kulturikkullu oqaluttuarisaanermut ilisimasaqartunit inuttaqartussat. Kulturikkut kingornussat pillugit siunnersuisoqatigiit ukiut sisamakkaarlugit toqqarneqartassapput.
Imm. 2. Kulturikkut kingornussat pillugit siunnersuisoqatigiit eqqissisimatitassanngortitsinissamik allatullu kulturikkut kingornussatut illersorneqartussanngortitsinissamik suliat pillugit inassuteqaateqartassapput, § 22, imm. 2-lu malillugu akuersissutinut atatillugu tusarniarneqartassalluk. Taakku saniatigut illunik eqqissisimatitassanngortitsiniarnermi sumiiffinnillu kulturikkut oqaluttuarisaanermi pingaaruteqartunik eqqissisimatitassanngortitsiniarnermi allatulluunniit kulturikkut kingornussatut illersugassanngortitsiniarnermi pineqartunullu attuumassuteqartuni siunnersuisutut inissisimassallutik.
Imm. 3. Kulturikkut kingornussat pillugit siunnersuisoqatigiinnut Nunatta Katersugaasivia Allagaateqarfialu allatseqartitsissaaq.
Kapitali 6
Pinngitsaaliissummik pigisanik piginnikkunnaarsitsisarneq naammagittaalliorsinnaanerlu§ 30. Naalakkersuisut Inatsisartut inatsisaat manna malillugu eqqissisimatitassanngortitsinissap allatulluunniit kulturikkut kingornussatut illersugassanngortitsinissap naammassinissaanut pisariaqarpat, pigisamik pineqartumik pinngitsaaliissummik piginnikkunnaarsitsinissamut pisinnaatinneqarput. Pinngitsaaliissumik piginnikkunnaarsitsinissaq pissaaq piginnikkunnaarsitsisarneq pillugu malittarisassat qaqugukkulluunniit atuuttut malillugit.
§ 31. Nunatta Katersugaasiviata Allagaateqarfiatalu Inatsisartut inatsisaat manna naapertorlugu aalajangiineri Naalakkersuisunut allakkatigut naammagittaalliutigineqarsinnaapput.
Imm. 2. Naammagittaalliorsinnaatitaapput:
1) Kinaluunniit aalajangiinermi pineqartoq.
2) Kinaluunniit suliap qanoq inerneqarnissaanik inuttut imaluunniit annertuumik soqutigisaqartutut naatsorsuutigineqartariaqartoq.
Imm. 3. Naammagittaalliornissamut piffissarititaapput sapaatip-akunneri 4, ullormit aalajangiinerup aalajangiinermi pineqartumut nalunaarutigineqarfianiit. Piffissaliussap qaangiutinnginnerani naammagittaalliorneq, aalajangiinermik pineqartumik kinguartitsinermik kinguneqassaaq, naammagittaalliorfissatut oqartussaasoq allatut aalajangiinngippat.
Imm. 4. Naalakkersuisut piffissaliussamut killigititap qaangerneqarsimanera atuutinngitsoortissinnaavaat, pissutsit immikkut ittut taama iliornissaq pisariaqartilissappassuk.
Imm. 5. Naalakkersuisut aalajangiineri allaffissornikkut sulialinnut allanut ingerlateqqinneqarsinnaanngillat.
Kapitali 7
Pineqaatissiissutit§ 32. Akiliisussanngortitsisoqarsinnaavoq § 6, imm. 1-3, § 9, imm. 2, § 11, imm. 2-4, § 16, naggat siulleq, § 19, imm. 3, § 21, imm. 3, § 22, imm. 1 aamma 2, § 24, imm. 3 aamma 4, § 25, imm. 3, § 27, imm. 2 unioqqutinneqarpata aamma malittarisassat piumasaqaatillu § 3, imm. 3, § 5, imm. 3, § 18, imm. 3, § 19, imm. 4 aamma § 24, imm. 5 naapertorlugit aalajangersakkat unioqqutinneqarpata.
Imm. 2. Inatsisartut inatsisaat imaluunniit peqqussutit Inatsisartut inatsisaat tunngavigalugu atuuttuulersinneqartut akiliisitsinissamik pisinnaatitsippata, akiliisitsinikkut akiligassaq inummut inatsisitigut akisussaasumut Kalaallit Nunaanni pinerluttaalisitsinermi inatsit naapertorlugu akiligassanngortinneqarsinnaavoq.
Imm. 3. Unioqqutitsinikkut iluanaarutit arsaarinnissutigineqanngippata, akiligassiissutip annertussusilerneqarnerani iluanaarutaasimasut annertussusaat immikkut naatsorsuutigineqassapput.
Imm. 4. Akiliisissusanngortitsineq aamma arsaarinninneq Nunatta karsianut iluaqutaasussanngorlugit pissapput.
Kapitali 8
Atortuulersitsineq, atorunnaarsitsinermi ikaarsaariarnermilu aalajangersakkat§ 33. Inatsisartut inatsisaat atuutilissaaq ulloq 1. juli 2010. Ilutigisaanik Kulturikkut eriagisassat eqqissisimatitaanerat pillugu Inatsisartut inatsisaat nr. 18, 19. november 2007-imeersoq atuukkunnaassaaq.
§ 34. Eqqissisimatitassanngortitsinerit, eqqissisimatitassanngortitsinernik allatigulluunniit kulturikkut kingornussatut illersugassanngortitsinermik Inatsisartut inatsisaat manna malillugu taarserneqanngitsut atuutiinnassapput, atorunnaarsinneqarnissamik tungaanut. Illunik ukiut 100-t sinnerlugit pisoqaassusilinnik atunngitsunillu, § 5, imm. 2 naapertorlugu, Kulturikkut eriagisassat eqqissisimatitaanerat pillugu Inatsisartut inatsisaanni nr. 18, 19. november 2007-imeersumi § 3-mut sanilliullugu, eqqissisimatitsinerit Inatsisartut inatsisaata matuma atuutilerneratigut atorunnaarsinneqassapput.
Namminersorlutik Oqartussat, ulloq xx i xx. 2010
Kuupik Kleist/
Mimi Karlsen