28. april 2010

UPA 2010/89

 

Eqqissisimatitsisarneq aamma allatigut kulturikkut eriagisassanik kulturikkut kingornussatut illersuineq pillugu Inatsisartut inatsisissaattut siunnersuut

 
pillugu

Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliap

ISUMALIUTISSIISSUTAA

Siunnersuutip aappassaaneerneqarnissaanut saqqummiunneqartoq

Kultureqarnermut, Ilageeqarnermut, Ilisimatusarnermut Ilageeqarnermullu ataatsimiititaliaq suliarinninnermini ukuninnga inuttaqarpoq:

Inatsisartunut ilaasortaq, Debora Kleist
Inatsisartunut ilaasortaq, Harald Bianco
Inatsisartunut ilaasortaq, Andreas Uldum
Inatsisartunut ilaasortaq, Malik Berthelsen
Inatsisartunut ilaasortaq, Knud Kristiansen

Kultureqarnermut-, Ilinniartitaanermut-, Ilisimatusarnermut Ilageeqarnermullu ataatsimiititaliaq siunnersuummik siullermeerinninneq tunngavigalugu siunnersuut manna misissorpaa.

Siunnersuutip imarisaa

Naalakkersuisut siunnersuuteqarnermikkut kissaatigaat inuiaqatigiinnut pingaarutillit ineriartortinneqarnissaat pingaartinneqarpat eqqissisimatitassanngortitsinissamik eqqarsaataasut politikkikkut suliarineqarsinnaanissaata periarfissinneqarnissaat. Peqatigitillugu ilanngullugit kulturikkut kingornussanit paasissutissanik uppernarsaatissanillu katersinissamik suliniutinik aallartitsinissamut iluaqutaasussat siunnersuummi anguniarneqarput inatsimmut tunngaviusut sapinngisamik annertunerpaamik eqqarsaatigalugit.

Siunnersuutip Inatsisartuni siullermeerneqarnera

Siunnersuut partiinit tamanit tapersersorneqarpoq.

Illuatungeriit soqutigisaasa siunnersuummi nalimmassarniarneqarnerat immikkut sammineqangaatsiarpoq. Illuatungaatigut kulturikkut kingornussassat qulakkeerneqarnissaat eqqarsaatigineqassaaq, kiisalu illuatungaani Kalaallit Nunaanni inuussutissarsiornerup annertunerusumik ineriartortinneqarnissaa periarfissinneqassalluni.

Killissarititaasunik Naalakkersuisut  qaqugukkut eqqissisimatitsinermik qaangiataariinnartassanersut imaluunniit eqqissisimatitsinermik pioreersumik atorunnaarsitsisassanersut pingaaruteqarmat Inuit Ataqatigiit ersarissarpaat. Tamatuma saniatigut eqqissisimatitsinerit taamatut atorunnaarsinneqarneranni qaangiataarneqarneranniluunniit Inatsisartut akuliutsinneqarsinnaanerat eqqarsaatigineqartariaqartoq Inuit Ataqatigiit isumaqarput.

Kulturikkut eriagisassanik eqqartorneqartunik soorlu assersuutigalugu inuussutissarsiutitigut pilersaarut eqqissisimatitsinermiit pingaartinneqarnerugaangat Nunatta katersugaasiviata Allagaateqarfiatalu paasissutissanik katersinissaminut piffissalerneqarnissaa qulakkeerneqarnissaa Siumumiit pingaartinneqarpoq.

Immikkorluinnaq pisoqartillugu eqqissisimatitsinermik imaluunniit kulturikkut kingornussassatut illersugassanngortitsinissamik Naalakkersuisut qaangiataariinnarsinnaanissaat Demokraatiniit pitsasutut isigineqarpoq taamaattorli partiit allat isumaannut isumaqataalluni tassalu aatsaat pisinnaassasoq inuiaqatigiinni ineriartornerup piumasarissappagu eqqarsaatigineqartariaqartoq.

Kulturikkut kingornussassanik illersuinissamik aammalu inuussutissarsiutitigut ineriartortitsinissamik periarfissiisussaammat siunnersuut aqqutigalugu oqimaaqatigiinnerusumik inatsisiliortoqarsinnaanera Atassummiit naammagisimaarneqarpoq.

Ataatsimiititaliap siunnersummik suliarinninnera

Tusarniaaneq

Siunnersuut tusarniaasutigineqarpoq ulluni 27. januar 2010-imiit 24. februar 2010-imut (KANUKOKA-p tusarniarneqarnera sivitsorneqarpoq ulloq 26. februar-imut). Siunnersuummut oqaaseqaatit attuumassuteqartut Naalakkersuisuniit ilanngunneqarsimanerat Ataatsimiititaliap maluginiarpaa. Nunatta katersugaasiviata Allagaateqarfiatalu katersugaasiviup sulineranut piffissatigut sinaakkusiussat pillugit kissaatai Naalakkersuisuniit akuersaarneqarsimanerat Ataatsimiititaliap maluginiarpaa. Tusarniaaneq pillugu Ataatsimiititaliaq annertunerusumik oqaaseqaatissaqanngilaq.

Kulturikkut kingornussassat allat illersugaanerat

Eqqissimatitsinerit pillugit aalajangiisinnaassuseqarneq soorlu siunnersuummi aamma inatsisartut inatsisaanni atuuttumi Nunatta Katersugaasivianut Allagaateqarfianullu inissinneqarsimasoq Ataatsimiititaliap maluginiarpaa. Kulturikkut kingornussassanik allanik oqaluttuarisaanermiittunik eqqissisimatitsineq allatut ittoq siunnersuut aqqutigalugu periarfissaqalerpoq. Tamatumunnga aalajangiisinnaanermut oqartussaaffiup aammattaaq Nunatta Katersugaasivianut Allagaateqarfianullu inissiniarneqalernera taamaalilluni susassaqarfimmi ilisimasaqassuseq tunngavigalugu aalajangiisoqarsinnaanera qulakkerniarneqarmat Ataatsimiititaliap iluarisimaarlugu paasivaa.

Eqqissisimatitsinermik imaluunniit kulturikkut kingornussassat allat illersugaaneranik qaangiataarinninneq atorunnaarsitsinerluunniit

Immikkut ittumik pisoqartillugu kiisalu inuiaqatigiit ineriartornerannut tunngavissalimmik innersuussisoqartillugu, Naalakkersuisunut eqqissisimatitsinissamik imaluunniit kulturikkut kingornussassanik allanik qaangiataarinninnissamut imaluunnit eqqissimatitsinermik atuuttumik imaluunniit kulturikkut kingornussassanik allani allannguiniartoqartillugu imaluunniit atorunnaarsitsiniartoqartillugu siunnersuut periarfissiivoq. Siunnersuummi § 3-imi tamanna takuneqarsinnaavoq.

Naalakkersuisut qaangiataarinninnissamik imaluunniit eqqissimatitsinissaq pillugu qaqugukkut toqqaasinnaanerat § 3-imut oqaaseqaatini ersarissaneqartoq Ataatsimiititaliq isumaqarpoq. Kulturikkut kingornussassanik kiisalu inuiaqatigiit ineriartornerannut mianerinninnissami soqutigisallit akerleriissinnaanerat siunnersuummi oqimaaqatigiisarneqarmat siunnersuutip anguniagaanut atatinneqarmat Ataatsimiititaliaq isumaqarpoq. Kulturikkut kingornussassat qangarnitsanit eriagisassanit inuiaqatigiit soqutigisaat allat pingaartinneqarneruppata kulturikkut kingornussassat uppernarsarneqarnissaat pisariaqartoq aammattaaq siunnersuummi qulakkeerneqarpoq.

Eqqissisimatitsinernik qaangiataarinninnernik imaluunniit atorunnaarsitsinermi suliassani tigussaasuni Inatsisartut akulerutsinneqartarnissaannik kissaateqarneq taamaalilluni suliassat taamaattut Inatsisartunit isummerfigineqartalernissaannut utaqqimaartarnissaq pissusissamisuunngitsutut Ataatsimiititaliamit isumaqarfigineqarpoq. Sammisami tassani soorlu aamma sammisani allani taamaattoq inatsisitigut sinaakkusiussat iluini soorlu siunnersuummi oqaatigineqartutuut Inatsisartut Naalakkersuisunut pisinnaatitsissummik tunniussisinnaapput. Naalakkersuisut aalajangiussaat periarfissatut kingullertut eqqartuussivinnut ingerlatinneqarsinnaapput.

Pingajussaaneerinninnissamut allannguutissatut siunnersuut

Siullermeerinninnerup kingornatigut siunnersuut arlalitsigut ajornartorsiutitaqartoq allannguutissatullu siunnersuummik saqummiussaqarnissamik pisariaqartitsisoq Naalakkersuisut paasivaat.

Qanganisarsiornikkut misissuisoqarnissaata ingerlanneqarnissaanut piffissarititaasoq:

Siunnersuummi § 12 naapertorlugu qanganisarsiornikkut misissuineq sioqqullugu qanganisarsiornikkut naliliisoqarsimatillugu pissutsit § 13, imm. 3, oqaaseqatigiit aappaanni pineqarput.

Qanganisarsiornikkulli misissuineq sioqqullugu qanganisarsiornikkut naliliineq ingerlanneqarsimatinnagu imm. 3-imi oqaaseqatigiit pingajuat tassunga tunngassuteqarpoq. Siunnersuutigineqarpoq imm. 3 tassungaannaq tunngassuteqassasoq, sioqqutsisumilli qanganisarsiornikkut misissuinerit immikkoortoq 4-imik ilanngussisoqarneratigut malittarisassaqartinneqarnissaat siunnersuutigineqarpoq.

Qanganisarsiornikkut misissuisoqarnissaata ingerlanneqarnissaanut piffissaliussaq piffissamit misissuisoqarnissaanik kissaateqarfiusumit taamatullu aamma piffissamit qanganisarsiornikkut misissuisoqarnissaanik aalajangiiffiusumit naatsorsorneqartassasoq taamaliornikkut erseqqissarneqassaaq. Taamaalilluni § 12, imm. 3-imi qanganisarsiornikkut misissuinerit pillugit malittarisassanut assingusut naapertuuttunngortitsisoqassaaq.

§ 32, stk. 1 pillugu (pineqaatissiisutit pillugit aalajangersakkat):

§ 32, imm. 1-imi pineqaatissiisarnermut aalajangersakkani § 7, imm. 4-imi aalajangersakkamut innersuussisoqanngilaq, taamaattumillu aalajangersakkamik tassannga unioqqutitsisoq akiligassillugu pineqaatissinneqarsinnaassanani. Tamanna pissusissamisuunngilaq. Allannguutissatut siunnersuut taamaalilluni pineqaatissiinissamut periarfissiissaq, taamaattumillu § 7, imm. 4-imi aalajangersakkap unioqqutinneqarnera, § 19, imm. 3-imi kiisalu § 25, imm. 3-imi  siunnersuummi aalajangersakkanut taakkununnga assingusumik pineqaatissiisoqarsinnaalissalluni.

Siunnersuutip kalaallisuua pillugu:

Siunnersuutip kalaallisoortaani naqinnerit arlalissuit kukkunillit kiisalu oqaaseqatigiit pissusissamisuunnginnerat paasineqarpoq. Qulaani taaneqartut pillugit allannguutissatut siunnersuutip saqqummiunneqarneranut atatillugu taakku aaqqinneqartariaqarput.

Qulaani pissutsit aaqqinneqartariaqarnerat Ataatsimiititaliamit isumaqatigineqarpoq Naalakkersuisullu allannguutissatut siunnersuummik pingajussaarinninneq pitinnagu saqqummiussilersaarnerat Ataatsimiititaliap iluarisimaarlugu paasivaa.

Inassuteqaat

Ataatsimiititaliap isumaqatigiittup siunnersuutip Naalakkersuisut allannguutissatut siunnersuutiginiagat ilanngullugu akuersissutigineqassasoq inassutigaa.

Ataatsimiititaliap taama oqaaseqaateqarluni siunnersuut Inatsisartunut aappassaaniigassanngortippaa.

 

	Harald Bianco
Debora Kleist		Andreas Uldum
Malik Berthelsen		Knud Kristiansen