10. maj 2010

UPA 2010/89

Allannguutissatut siunnersuut

uunga

Eqqissisimatitsisarneq aamma allatigut kulturikkut eriagisassanik kulturikkut kingornussatut illersuineq pillugu Inatsisartut inatsisissaattut siunnersuut.

Pingajussaaneerneqarnissaanut Naalakkersuisunit saqqummiussaq.

§ 13-imut

1.  § 13, imm. 3, ima oqaasertalerneqassaaq:
”Imm. 3.  Qanganisarsiornikkut misissuineq piaarnerpaamik suliarineqassaaq, qaammatillu 18-it qaangiutsinnagit naammassereersimassalluni, pissutsit immikkut ittut atuutsinnagit. Piffissaliussaq naatsorsorneqassaaq misissuinissamik qinnuteqaateqartoqarneraniit, tak. imm. 1, imaluunniit qanganisarsiornikkut misissuisoqarnissaanik aalajangiussinerup, tak. imm. 2, sanaartortitsisumut imaluunniit assaanermik akiliisussamut nalunaarutigineraniit.”

 2.  § 13, imm. 3, kingorna imm. 4-tut ikkunneqassaaq:
”Imm. 4.  Qanganisarsiornikkut misissuineq sioqqullugu qanganisarsiornikkut naliliisoqarsimappat, tak. § 12, qanganisarsiornikkut naliliineq aamma qanganisarsiornikkut misissuineq tamarmik qaammatit 18-it qaangiutsinnagit naammassereersimassapput, pissutsit immikkut ittut atuutsinnagit. Piffissaliussaq naatsorsorneqassaaq qanganisarsiornikkut naliliinissamik qinnuteqartoqarneraniit, tak. § 12, imaluunniit qanganisarsiornikkut naliliisoqarnissaanik aalajangiussinerup, tak. § 12, imm. 2, sanaartortitsisumut imaluunniit assaanermik akiliisussamut nalunaarutigineraniit.”

§ 32-mut

3.  § 32, imm. 1-imi”§ 6, imm. 1-3,” kingorna ilanngunneqassaaq: ”§ 7, imm. 4,”.

 

Kalaallisuuani aalajangersakkanut arlaqartunut

4.  Siunnersuutip kalaallisuuani uku allanngorneqassapput:
a) § 1, imm. 4, allanngussaaq: ”Imm 4.” imaalersillugu: ”Imm. 4.”.
b) § 7, imm. 2-mi ”atorunnarsitsinissaq” imaalissaaq: ”atorunnaarsitsinissaq”.
c) § 8, imm. 1-imi ”uppernarsaasersorneqarnissanut” imaalissaaq: ”uppernarsaasersorneqarnissaannut”.
d) § 9, imm. 1-imi, aamma § 14, imm. 1-imi, ”Atuagaateqarfiatalu” imaalissaaq: ”Allagaateqarfiatalu”.
e) § 14, imm. 1-imi, ”aningaasartuutitssat” imaalissaaq: ”aningaasartuutissat”.
f) § 24,immk. 5-imi, ”eqqissimatitassanngortinneqarnissaannut” imaalissaaq ”eqqissisimatitassanngortinneqarnissaannut”.
g) § 25, imm. 2-mi,”tun ineqarsimasut” imaalissaaq: ”tunineqarsimasut” aamma ”sivisusseqassaaq” imaalissaaq: ”sivisussuseqassaaq”.
h) § 30-mi, ”Pinngitsaaliissumik” imaalissaaq: ”Pinngitsaaliissummik”.
i) § 32, imm. 4-mi, ”Akiliisissusanngortitsineq” imaalissaaq: ”Akiliisussanngortitsineq”.

 

 

Nalinginnaasumik oqaaseqaatit

Allannguutissatut siunnersuut saqqummiunneqarpoq, tamanna pillugu Inatsisartut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaata siunnersuutip aappassaaneerneqarnissaanut isumaliutissiissummini inassuteqarnera tunngavigalugu.

Allannguutissatut siunnersuummut ilaatigut pissutaapput siunnersuutip siullermeerlugu oqallisiginerata kingorna siunnersuummi siunertamut naapertuutinngitsualuit paasineqarmata aamma siunnersuutip kalaallisuuani oqaatsitigut kukkunerit paasineqarmata. 

Aalajangersakkanut ataasiakkaanut oqaaseqaatit

Nr. 1-imut

Siunnersuutikkut maannamut § 13, imm. 3-mi naggatit aappaat atorunnaarpoq, ilutigisaanillu siunnersuutigineqarpoq taanna maanna § 13, imm. 4-p ilaatut ikkunneqassasoq. Maannamut naggatit aappaanni aalajangersakkami pineqarpoq qanganisarsiornikkut misissuinerup siornagut siunnersuummi § 12 naapertorlugu qanganisarsiornikkut naliliisoqarsimanera. Kisianni maannamut naggatit pingajuanni pineqarpoq, qanganisarsiornikkut misissuineq sioqqullugu qanganisarsiornikkut naliliisoqarsimannginnera. Tamatuma nassatarisaanik siunertamut naapertuuttutut isigineqarpoq imm. 3-mi taamaallaat taamatut pisoqarnera pineqarpat, kisiannili qanganisarsiornikkut nalileeqqaartoqarnera immikkoortoq 4-mi malittarisassiuunneqassasoq siunnersuutigineqarluni.

Allannguinikkut aalajangersarneqarpoq, qanganisarsiornikkut misissuinissamut piffissaliussaq misissuinissamik qinnuteqartoqarneraniit imaluunniit qanganisarsiornikkut misissuinissap qaqugumiit pinissaata aalajangiunneraniit naatsorsorneqassasoq. Taamaaliornikkut aalajangersagaq § 12, imm. 3-mi qanganisarsiornikkut naliliinerit pillugit assingusumik aalajangersakkamut naapertuutilerpoq.

Nr. 2-mut

Siunnersuutip tunuliaqutaa pillugu nr. 1-imut oqaaseqaatit innersuunneqarput. Siunnersuutikkut erseqqissarneqarpoq, qanganisarsiornikkut misissuisoqannginnerani siunnersuummi § 12 naapertorlugu qanganisarsiornikkut naliliisoqarsimatillugu, qanganisarsiornikkut naliliineq aamma qanganisarsiornikkut misissuineq ataatsimut isigalugit qaammatit 18-it qaangiutsinnagit naammassereersimassasut, pissutsit immikkut ittut atuutsinnagit. Ilutigisaanik erseqqissarneqarpoq, taama pisoqartillugu piffissaliussaq naatsorsorneqartassasoq qanganisarsiornikkut naliliisoqarnissaanik qinnuteqarnermiit imaluunniit qanganisarsiornikkut naliliinissap sanaartortitsisumut imaluunniit assaanermik akiliisussamut nalunaarutigineraniit.

Nr. 3-mut

Allannguutissatut siunnersuummut tunuliaqutaavoq paasineqarmat § 32-mi kinguneqartitsisinnaanermik aalajangersakkani § 7, imm. 4-mi aalajangersagaq innersuunneqarsimanngitsoq, taamaalillunilu aalajangersakkamik taassumannga unioqqutitsineq akiliisitaanermik nassataqarsinnaani. Tamanna siunertarineqanngilaq. Taamaalilluni allannguutissatut siunnersuutip siunertaraa tamatuma periarfissaqalernissaa, taamaalillunilu § 7, imm. 4-mi aalajangersakkamik unioqqutitsineq § 19, imm. 3-mi aamma § 25, imm. 3-mi aalajangersakkat assigalugit kinguneqartinneqarsinnaalissalluni.

Nr. 4-mut

Litra d-mi allannguutissatut siunnersuut eqqaassanngikkaanni allannguutissatut siunnersuutit naqinnerliukkat paasisat pissutigalugit siunnersuutaapput. Litra d-mut tunngatillugu kukkunikkut oqariaaseq eqqunngitsoq atorneqarsimavoq.