28. april 2010 UPA 2010/88
Inuussutissarsiutinik ilinniartitsinerit aamma inuutissarsiutinik ilinniartitsinerup iluani pikkorissarnerit pillugit Inatsisartut inatsisissaattut siunnersuut
pillugu
Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliap
ISUMALIUTISSIISSUTAA
Siunnersuutip aappassaaneerneqarnissaanut saqqummiunneqartoq
Kultureqarnermut, Ilageeqarnermut, Ilisimatusarnermut Ilageeqarnermullu ataatsimiititaliaq suliarinninnermini ukuninnga inuttaqarpoq:
Inatsisartunut ilaasortaq, Debora Kleist
Inatsisartunut ilaasortaq, Harald Bianco
Inatsisartunut ilaasortaq, Andreas Uldum
Inatsisartunut ilaasortaq, Malik Berthelsen
Inatsisartunut ilaasortaq, Knud Kristiansen
Ataatsimiititaliap siunnersuummik siullermeerinninneq tunngavigalugu siunnersuut manna misissorpaa.
Siunnersuutip imarisaaNaalakkersuisut siunnersuuteqarnermikkut kissaatigaat unamminartut annertuut nunatsinni inuiaqatigiit inuutissarsiutit nutaarpassuit suliniutillu annertoorujussuit pilernerisigut unammilligassariligaat naaperiarnisaat. Taamaattumik ilinniartitaaneq pillugu suliniuteqarnerup nukittorsarneqarnissaa anguniarneqarpoq pingaarnertullu anguniagaavoq sulisorisat 2/3-iisa 2020-imi ilinniagaqarsimasuulernissaat tamanna nunatsinni inuiaqatigiit atorfissaqartimmassuk.
Aqutsinermut aaqqissuussinermik nutaamik siunnersuuteqarnermi qitiusumik ilinniarfiit siunissami unamminartunut pisariaqartunik sakkussissavai. Tamatuma saniatigut aqutsinermik aaqqissuussinerup nutaap qitiusumik ilinniarfiit qaqugukkulluunniit ilinniakkanik naapertuuttunik suliamullu atatillugu pitsaalluinnartunik neqeroorsinnaanissaat sinaakkusissavaa. Tamanna tunuliaqutaralugu ilusiliussassaq qitiusumik ilinniarfiit ataasiakkaat imminnut aqutarinerunissaannik aallaaveqartoq siunnersuutigineqarpoq. Ilusiliussamut ilaapput suliassat suliarinissaannut naleqqiullugu annertunerusumik kiffaanngissuseqarneq, aamma akisussaaffiup annertunerusup tunniunneqarnera, taamaalilluni qitiusumik ilinniarfiit tamatuma kingorna tassaalissallutik suliffeqarfiit pisortat pigisaat namminersortut. Suliffeqarfiit qullersaasunik aqunneqarneri siulersuisunit, suliamik immikkut ilisimasalinnik, suliffissaqartitsinermilu kattuffinnit toqqarneqartunik ingerlanneqassapput. Tamatuma saniatigut qitiusumik ilinniarfiit suliassanik erseqqinnerusutigut isumaginninneri, siulersuisut Namminersorlutillu Oqartussat akornanni angusaqarnissamik isumaqatigiissutit aqqutigalugit malittarisassiuunneqassasut siunnersuutigineqarpoq.
Siunnersuutip Inatsisartuni siullermeerneqarneraPartiit tamarmiusut siunnersuummut tapersersuipput.
Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliap siunnersuummik suliarinninneraTusarniaaneq
Siunnersuut ulluni 5. maj-imiit 4. juni-mut 2008 tusarniaassutigineqarpoq.
Tusarniaanermi akissutigineqartunut attuumassuteqartumik siunnersuummut oqaaseqaatinik pitsaasumik suliaqartoqarsimanera taakkulu siunnersuummut attuumassuteqarnerat takuneqarsinnaammat Ataatsimiititaliamit maluginiarneqarpoq.
Ataatsimiititaliap siunnersuummik suliarinninneranut atatillugu pissutsit arlallit Naalakkersuisunut Ataatsimiititaliamiit itisileqquneqarput. Ataatsimiititaliap apeqqutai kiisalu Naalakkersuisut akissutaat ilanngussaq 1-imi takuneqarsinnaapput.
Naalakkersuisut akissutaannut Ataatsimiititaliaq qujassuteqarpoq tusaatissatullu tiguneqarpoq. Qitiusumik ilinniarfiit siulersuisuinut akissarsiaqartitsineq kiisalu aningaasartuutinut ajunngitsorsiassaqartitsineq pillugu Naalakkersuisut akissuteqaatiminnut atatillugu nalunaarummut missingiusiamik nassiussaqarput. Nalunaarutissatut missingiusiaq Isumaliutissiissummi ilanngussaq 2-itut aammattaaq ilanngunneqarpoq. Tassunga atatillugu erseqqissarneqasaaq missingiusiaq pineqartoq suli tusarniaassutigineqarsimanngimmat.
InassuteqaatQulaani allassimasut kiisalu siunnersuutip siullermeerneqarnerani oqaaseqaatigineqartut tunngavigalugit Ataatsimiititaliap isumaqatigiittup siunnersuut akuersissutigineqassasoq inassutigaa.
Taama oqaaseqaateqarluni Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliap siunnersuut Inatsisartunut aappassaaniigassanngortippaa
Harald Bianco
Debora Kleist
Andreas Uldum
Malik Berthelsen
Knud Kristiansen