28. april 2010

UPA2010/87

 

Ilageeqarneq pillugu Inatsisartut inatsisissaattut siunnersuut

 
pillugu

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

 

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq suliarinninnermini makkuninnga inuttaqarpoq:

Harald Bianco, Inuit Ataqatigiit
Debora Kleist, Inuit Ataqatigiit
Andreas Uldum, Demokraatit
Malik Berthelsen, Siumut
Knud Kristiansen, Atassut

UPA10-mi ulloq 14. april 2010-mi siullermeerinerup kingorna siunnersuut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap misissorpaa.

Siunnersuutip imarisaa

Suliassaqarfik pillugu maanna inatsisaasumi ilageeqarnikkut allaffissornikkullu suliassat naapertuutinngitsumik immikkoortinneqarsimapput. Allaffissornikkut ilageeqarnikkullu suliassat immikkoortinneqarnerat Naalakkersuisunut, Ilageeqarnermi atorfilinnut, Ilagiinni soqutigisaqartunut pingaartumillu Biskoppimut ilageeqarnermut sulianik nakkutilliisumut killiliisutut misinnarpoq. Suliassat amerlasuut allaffissornermut ilageeqarnermullu tunngasuupput, tamatuma kinguneralugu allaffissornikkut ilageeqarnikkullu suliassat arlallit nalorninartoqarlutik, tassa akisussaaffinnut oqartussaaffinnullu tunngasut ersarinngimmata.

Kiisalu naalakkersuinermik ingerlatsinerup ilagiinnillu ingerlatsinerup ersarissumik avissaartinneqarnissaat naalakkersuinermik suliaqartunit sivisuumik kissaatigineqarsimavoq.

Inatsit akuerineqarpat ilagiit aaqqissuussaanerat ersarinnerujussuanngorlunilu ilagiit imminut aqunnerulissapput. Tamanna allaffissornikkut suliassat arlalippassuit maannamut Naalakkersuisunit isumagineqarsimasut biskoppimut tunniunnerisigut pissaaq.

 

Ataatsimiititaliap siunnersuummik suliarinninnera

Siunnersuut partiinit tamanit taperserneqartoq aammalu inatsisissatut siunnersuut sivisuumik utaqqineqarsimasoq ataatsimiititaliamit oqaatigineqassaaq.

Ataatsimiinnerit

Ataatsimiititaliap suliarinninnerminut atatillugu biskoppi Sofie Petersen ulloq 19. november 2009-mi ataatsimeeqatigaa. Kiisalu Ilagiit pillugit Naalakkersuisut ulloq 23. martsimit 24. martsimut 2010 isumasioqatigiissitsineranni peqataalluni.

Siunnersuutip tusarniaassutiginera

Siunnersuut ulloq 3. junimit 8. julimut 2008 tusarniaassutigineqarpoq, piffissaritinneqartorlu sivikippallaangajattutut nalilerneqarsinnaavoq, tassa akissuteqarnissamut killigitinneqartoq aasaanerani sulinngiffeqarnissamut qanittuararsuanngorlugu inissineqarsimammat.

Provsteqarfinni ataatsimiititaliat atorunnaarsinneqarnissaat biskoppimit eqqarsarnartoqartinneqartoq ataatsimiititaliap maluginiarpaat, tassa provstit pingasut namminneq immikkut aningaasaqarlutik toqqaannanngitsumik vice-biskoppinngortinneqassammata, tamannalu ilagiit nakkutilliinerata pisariunerulerneranik kinguneqarsinnaasoq biskoppi isumaqarmat. Aammattaaq biskoppi allappoq provsteqarfinni ataatsimiititaliat atorunnaarsinneqarnissaat aalajangiusimaneqarpat biskoppip aqutsisoqarfiata § 8-mut ilanngunneqarnissaa aalajangiisuusumik pingaaruteqartutut isigineqartoq.

Provsteqarfinni ataatsimiititaliat atorunnaarsinneqarnissaat Naalakkersuisut aalajangiusimaneqarpoq oqaatigineqarlunilu biskoppip oqartussaaffii inatsimmut nalinginnaasumik nassuiaatini allassimasut, taamaattumillu biskoppip aqutsisoqarfiata § 8-mut ilanngunneqannginnissaa Naalakkersuisunit toqqarneqarsimalluni.

Naalakkersuisut aalajangernerat ataatsimiititaliamit tusaatissatut tiguneqarpoq, kissaatigaluguli siunnersuutip aappassaaneerneqarnerani aalajangiineq itisilerneqassasoq.

Ilagiit aningaasaqarnerat

Aningaasanut inatsimmut sanilliullugu siunnersuut aningaasartuutaassanngilaq. Taamaappoq allaffissornikkut suliassat tunniunneqarnerannut peqatigitillugu suliassaqarfimmut kontot aamma ilagiinnut tunniunneqassammata. Kontot makku pineqartut Naalakkersuisut paasissutissiipput:

·        Konto pingaarneq 40.92.14, Ajoqissanik organistinillu ilinniartitsineq, 2010-mi 1,791 mio. kr.-it missingersuutigineqarlutik
·        Konto pingaarneq 40.92.15, Ilagiit højskoliat, 2010-mi 1,51 mio. kr.-it missingersuutigineqarlutik
·        Konto pingaarneq 40.97.01, Biskoppip allaffia, 2010-mi 2,984 mio. kr.-it missingersuutigineqarlutik
·        Konto pingaarneq 45.97.02, Danmarkimi ilagiinnik sullissineq, 2010-mi 1,082 mio. kr.-it missingersuutigineqarlutik
·        Konto pingaarneq 40.97.03, Kalaallit Nunaanni Ilagiit, 2010-mi 40,867 mio. kr.-it missingersuutigineqarlutik

Qaanaap sullinneqarneranut akisussaanerup Qeqqata, Qaanaap Tunullu provsteqarfianniit Avannaata provsteqarfianut nuunneqarnissaanut atatillugu provsteqarfiit akornanni aningaasat agguarnerat nalileqqinneqassasut  Naalakkersuisut oqaatigaat. Kiisalu biskoppimit provsteqarfinnut aningaasanik nuussisoqarsinnaavoq.

Siuliani allassimasut malillugit ataatsimiititaliap paasinninnera imaappoq inatsit akuerineqarpat kontot taakku – aningaasartaat allanngornagit – ilagiinnut Naalakkersuisunit nuunneqalersaartut, tamatumanili nussuisoqarsinnaalluni- Aningaasatigut nussuinerit qanoq ittut ingerlanneqarnissaat pillugu ilisimatinneqarnissani ataatsimiititaliap qinnutigaa.

Inassuteqaat

Siuliani oqaatigineqartut siunnersuummillu siullermeerinermi oqaaserineqartut tunngavigalugit siunnersuut akuerineqassasoq ataatsimiititaliamit isumaqatigiittumit inassutigineqarpoq.

Taama oqaaseqarluni ataatsimiititaliap siunnersuut aappassaaniigassanngortippaa.

 

	Harald Bianco
Debora Kleist		Andreas Uldum
Malik Berthelsen		Knud Kristiansen