31. marts 2010
FM 2010/103
Inatsisissatut siunnersuummut nassuiaatit
Nalinginnaasumik nassuiaatit1. Inatsisissatut siunnersuutip imaa
Pinerliiniarnernik akiuiniarneq siunertaralugu inunnut aalajangersimasunut aamma ataatsimoortunut peqqarniisaarnernut attuumassuteqartunut aningaasaqarnikkut pineqaatissiisarnissap atuutilersitsinissaanik nunanut Naalagaaffiit Peqatigiinni ilaasortaasunut pisussaaffiliisumik isumaqatigiissummik 1373-imik (2001) Naalagaaffiit Peqatigiit Isumannaallisaanermik Siunnersuisoqatigiivi akuersissuteqarsimapput.
Naalagaaffiit Peqatigiit Isumannaallisaanermik Siunnersuisoqatigiivisa isumaqatigiissutaanni 1373-mi pineqarput nalinginnaasumik pinerliiniarnernik akiuiniarneq, tassani pinerliiniarnernik pitsaaliunissamut akiuiniarmullu naalagaaffiit tamarmik Isumannaallisaanermik Siunnersuisoqatigiinnit kaammattorneqarlutik. Taamaattorli Naalagaaffiit Peqatigiit tungaanniit isumaqatigiissummut ilaatinneqartunik pinerliiniartunik aamma pinerliisartut suleqatigiiffii pillugit nalunaarsuiffimmik suliaqartoqarsimanngilaq. Taamaattumik aallaaviatigut kikkut isumaqatigiissummut ilaatinneqassanersut Naalagaaffiit Peqatigiinni nunat ilaasortaasut ataasiakkaat aalajangiisussaapput.
Nalunaarsuiffik 1373-imik taaneqartartoq EU-mi nunanit ataatsimoortumik kinaassusersineqarpoq Naalagaaffiit Peqatigiit isumannaallisaanermik siunnersuisoqatigiivisa isumaqatigiissutaata 1373-p naammassineqarnissaanut EU-p iluani ingerlaavartumik nutarterneqartarluni.
2. Pisortanut aningaasaqarnikkut allaffissornikkullu kingunissaiPisortanut aningaasaqarnikkut allaffissornikkullu kingunissai annertussanngitsut nalilerneqarpoq.
3. Inuussutissarsiortunut aningaasaqarnikkut allaffissornikkullu kingunissaiInuussutissarsiortunut aningaasaqarnikkut allaffissornikkullu kingunissai killeqangaatsiassasut nalilerneqarpoq.
4. Innuttaasunut aningaasaqarnikkut allaffissornikkullu kingunissai:Innuttaasunut aningaasaqarnikkut allaffissornikkullu kinguneqassanngitsoq nalilerneqarpoq.
5. Naalagaaffeqatigiinnermut namminersorlutillu oqartussanut pissutsitSiunnersuutikkut Namminersorlutik Oqartussat inatsisaat Naalagaaffeqatigiinnermi inatsisinut naleqqussarneqarput.
6. Oqartussanik suleqatigiiffinnillu tusarniaaneq:Siunnersuut saqqummiunneqartoq ukunani tusarniutigineqarsimavoq:
Kanukoka, Grønlands Arbejdsgiverforening, Grønlands Landsret, Deloitte, Grønlands Revisionskontor, GrønlandsBanken, Nuuk Sparbank, If Forsikring Grønland, Codan Forsikring Grønland, PFA Soraarneq aamma Finanstilsynet.
Tusarniaanermi akissutinik tigusaqartoqarsimanngilaq.
Inatsisissatut siunnersuummi aalajangersakkanut ataasiakkaanut nassuiaatit
§ 1-imutSuliffeqarfiit inuillu inatsimmut ilaatinneqartut tassaapput suliffeqarfiit inuillu nunat allat aningaasaannik taarsiisitsinermik, taarsigassarsisitsinernik, niuernikkut taarsigassarsisitsinernik, illunik tuniniaasartunik, suliffeqarfinnut kiffartuussinissamik neqerooruteqartarnermik inuussutissarsiutigalugu ingerlataqartut aamma inuit suliffeqarfiillu taamatut ingerlataqarnermut qanittumik ingerlataqartut kiisalu pigisanik tuniniaasartut.
§ 2-mutPinerliiniat nalunaarsorsimaffiat Udenrigsministeriap aamma Erhvervs- og Byggestyrelsip nittartagaannit takuneqarsinnaavoq, aammattaaq saaffiginnittoqarneratigut Inuussutissarsiornermut Suliffeqarnermullu Naalakkersuisoqarfimmit pissarsiarineqarsinnaalluni.
Kalaallit Nunaat pillugu Hvidvasksekretariati Danmarkimi Hvidvasksekretariatimi inissisimavoq Statsadvokaten for særlig Økonomisk Kriminalitetimi (SØK), SPK-mut ilaanngikkaluarluni, illusimaffeqarluni.
Imm. 2. Suliani kinaassutsit atillu pinerliiniat nalunaarsorsimaffianiittunut assigiittoqartillugu tamanna ingerlaannartumik Hvidvasksekretariatimut nalunaarutigineqassaaq. Kinaassutsikkut assigiittoqarnersoq Hvidvasksekretariatimit nalunaarutigineqassaaq, aamma arsaarinnittoqassanersoq. Tamatuma paasineqarnissaata tungaanut aningaasanut aningaasaatitigut pigisanut imaluunniit aningaasatigut isumalluutinut pineqartunut isersinnaatitaasoqanngilaq.
Kinaassutsikkut assigiittoqarnera isumaqarpoq assersuutigalugu aningaaseriviup suliffeqarfiulluunniit paasisimagaa sullitani, suliffeqarfik, suleqatigiiffik imaluunniit sullitami nalunaarsuiffiani ateq inummullu paasissutissat pinerliiniat nalunaarsorsimaffianni atimut 100%-imik naapertuuttoqartoq.
Suliami atimik p pinerliiniat nalunaarsorsimaffianiittumik atimik assigiittoqarnera tamanna isumaqarpoq aningaaseriviup suliffeqarfiulluunniit paasisimagaa sullitaqarluni, pinerliiniat nalunaarsorsimaffiini atimut imaluunniit aningaasaqarnikkut pineqaatissiisarneq pillugu peqqussutini allani atit allattorsimaffiini atia tamakkiisumik ilaannakuusumilluunniit naleqquttoq.
Imm. 3. Kalaallit Nunaanni tiguseqqusinnginnissamik pisussaaffik Kalaallit Nunaanni Pinerluttulerinermik inatsit aamma Kalaallit Nunaanni Eqqartuussisarnermi inatsimmi arsaarinninnermi malittarisassat malillugit naammassineqassaaq.
Ilaatigut aningaasanik tiguseqqusinngitsoqarsinnaavoq tamannalu isumaqarluni annertussusaanik, aningaasanik, inissisimaffiinik, piginnittunut tunngasut, tigummiat, suunerisa aalajangersakkallu allanngortinnerannik kinguneqartut imaluunniit allannguinerit allat suugaluartulluunniit, pineqartunik atuilersitsisinnaasut aningaasanik nikisitsinerit, nuussinerit, allannguinerit atuinerluunniit suulluunniit akornuserneqartut.
Taakku saniatigut aningaasanik isumalluutinik tiguseqqusinngitsoqarsinnaavoq tamannalu isumaqarluni aningaasanik, nioqqutissanik kiffartuussinernilluunniit sutigulluunniit atuisinnaanerit akornuserneqartut, taakkununngali ilaanngillat tunisinerit, attartornerit imaluunniit taarsigassarsianut sallunaveeqqusiinerit.
§ 3-mutPinerluttulerinermik inatsimmi (inatsit nr. 306, 30. april 2008-imeersoq) pineqaatissiinermi aalajangersakkat tassaapput §§ 26, 30 aamma 170.
Pinerluttulerinermik inatsimmi § 26-mi pinerluttuliorninngortippai aalajangersakkanik imaluunniit inerteqqutinik piaaraluni imaluunniit mianersuaalliorluni unioqqutitsinerit, inatsit malillugu Naalagaaffiit Peqatigiinni ilaasortatut naalagaaffeqatigiit pisussaaffiinik naammassineqartussaasut.
Pinerluttulerinermik inatsimmi § 30-mi pinerluttuliorninngortippai pinerliiniarnernik ingerlataqarnernik imaluunniit iliuutsit tassunga attuumassuteqartut toqqaannartumik toqqaannanngitsumilluunniit aningaasatigut tapiiffigineqartut imaluunniit aningaasanik pissarsinikkut katersinikkulluunniit taperserneqartut imaluunniit toqqaannartumik toqqaannanngitsumilluunniit aningaasaliiffigineqartut, aningaasaatinik pilersorneqartut imaluunniit aningaasaatitigut allatigulluunniit kiffartuussinikkut pinerliiniarnernik suleqatigiiffinnut atorneqartussanngortinneqartut.
§ 70 tassaavoq pinerluttulerinermik inatsimmi arsaarinninneq pillugu aalajangersagaq.
Eqqartuussisarnermi inatsimmi (inatsit nr. 305, 30. april 2008-imeersoq) aalajangersakkat attuumassuteqartut tassaapput arsaarinnittarnerit ilaalu ilanngullugit kapitali 37-mi nassaarineqarsinnaasut.
§ 4-mutSiunnersuutigineqarpoq inatsit ulloq 1. juni 2010-imi atulersinneqassasoq.