21. april 2010

FM2010/83

 

Akileraarutit ingerlanneqarnerat pillugu Inatsisartut inatsisaattut siunnersuut

 
pillugu

Akileraatarnermut Akitsuusisarnermullu ataatsimiitialiap

ISUMALIUTISSIISSUTAA

Siunnersuutip aappassaaneerneqarnissaanut saqqummiunneqartoq

Inatsisartut Akileraartarnermut Akitsuusisarnermullu ataatsimiititaliaa suliarinninnermini ukuninnga inuttaqarpoq:

Inatsisartunut ilaasortaq, Niels Thomsen (siulittaasoq)
Inatsisartunut ilaasortaq, Harald Bianco (siulittaasup tullia)
Inatsisartunut ilaasortaq, Aqqaluaq Egede
Inatsisartunut ilaasortaq, Karl Lyberth
Inatsisartunut ilaasortaq, Aleqa Hammond

Akileraartarnermut Akitsuusisarnermullu ataatsimiititaliap siunnersuutip siullermeerneqarnerata kingunerisaanik siunnersuut pineqartoq misissuataarpaa.

Siunnersuutip imarisai

Inatsisartut 2009-mi ukiakkut ataatsimiinneranni oqaaluserisassani immikkoortoq UKA 2009/138-imi amerlanerussuteqartut akuersissutigaat, tamannalu malillugu akileraarpallaarutinut utertoorutisiat tunniunneqartarnerannut atatillugu erniat 4 procentiniit 2 procentinut appartinneqassalluni. Inatsimmut siunnersuut aalajangersakkamut tamatumunnga malitseqartitsineruvoq ukiumut aningaasarsiorfiusumut 2009-imut tunngatillugu utertitsinissamut atuutilertussatut.

Tamatuma saniatigut Kalaallit Nunaanni eqqartuussisarneq pillugu inatsisip nutaap atuutilerneratigut suliat suliarineqaqqittarfiat nutaaq eqqunneqartoq; Kalaallit Nunaanni Eqqartuussivik  Inatsisissatut siunnersuutip sillimaffigivaa. Tamatumunnga peqatigitillugu Nunatta Eqqartuussiviani suliassaat allanngortinneqarput, taamaasilluni nunatta eqqartuussiviata maanna suliat kredsrettimi imaluunniit Kalaallit Nunaanni Eqqartuussivimmi suliarineqaqqaarfittut suliaasimasut suliareqqitassanngortitsivittut suliarisassallugit.

Siunnersuutip Inatsisartuni siullermeerneqarnera

Inuit Ataqatigiit, Demokraatit, Atassut aamma Kattusseqatigiit Partiiat siunnersuummut tapersiipput.

Siumut siunnersuummut tapersiinngilaq maannakkut erniarititaasoq 4 procentiusoq innuttaasunut akileraarpallaarsimasunut naammattutut isumaqarfigineqarmat. Tamatuma saniatigut maannakkut ernialersuisarnermik pissuteqartumik iluanaarniartoqarsinnaanerata ilimanaateqannginnera Siumumit isumaqarfigineqarpoq.

Akileraartarnermut- Akitsuusisarnermullu ataatsimiitialiap siunnersuummik suliarinninnera

Akilaraarpallaarutinik ernialersuisarnerup 4 %-imiit 2 %-imut appartinneqarnera Nunatta Karsiata akileraarpallaarutinut tapiissutaanik ukiumut 3. mio. kr.-init missaannik aappartinneqarnissaata ilimagineqarsinnaanera Ataatsimiititaliamit paasineqarpoq.

Siumup ikinnerussuteqarluni oqaaseqaatip matuma kinguliiniittup isumaliutissiissummut

ilanngunneqarnissaa kissaatigaa:

“Siorna ukiakkut inatsisartut ataatsimiinnitsinni siunnersuutip oqaluuserineqarnerani Siumumiit siunnersuummut tapersiinngilagut isumaqaratta innuttaasunut akileraarutinik akiliivallaarsimasunut 4 procentimik ernialersuineq naleqquttoq pissusissamisoorlunilu. Aamma annikinnerunissaa kissaatiginanngilluinnarpoq pissutigalugu ukiut ilaanni aningaasat nalikilliartornerisa allaat 4 procent sinnersinnaasarmassuk.”

Akileraartatnermut- Akitsuusisarnermullu ataatsimiititaliap inassuteqaata

Ataatsimiititaliami amerlanerussuteqartut Inuit Ataqatigiinneersut aamma Demokraatineersunit inuttaqartut siullermeerinninnermi oqaaseqaatit qulaani allassimasut tunngavigalugit siunnersuut akuersissutigineqassasoq inassuutigaat.

Ataatsimiititaliami ikinnerussuteqartup Siumumeersup siunnersuut itigartitsissutigineqassasoq inassutigaa.

 

Taama oqaaseqaateqarluni Akileraartarnermut- Akitsuusisarnermullu Ataatsimiititaliap siunnersuut aappassaaniigassanngortippaa.

 

	Niels Thomsen Formand
Harald Bianco		Aqqaluaq Egede
Karl Lyberth		Aleqa Hammond