15. marts 2010

UPA 2010/83

 

Inatsimmut siunnersuummut oqaaseqaatit

Oqaaseqaatit nalinginnaasut

1. Inatsimmut siunnersuutip tunuliaqutaa

Inatsisartut 2009-mi ukiakkut ataatsimiinneranni amerlanerussuteqartut akuersissutigaat akileraarpallaarutit utertinneqarnerannut atatillugu erniat 4 procentiniit 2 procentinut appartinneqassasoq, takuukUKA 2009/138. 

Inatsimmut siunnersuut aalajangiinerup tamatuma kinguneraa. 

Maannamut Skatterådip aalajangigai Nunatta Eqqartuussivianut suliarineqaqqaarfittut suliassiissutigineqarsinnaapput. Kalaallit Nunaanni eqqartuussisarneq pillugu inatsisip nutaap atuutilerneratigut suliat suliarineqaqqaarfiat nutaaq eqqunneqarpoq; Kalaallit Nunaanni Eqqartuussivik. Tamatumunnga peqatigitillugu Nunatta eqqartuussiviani suliassat allanngortinneqarput, taamaasilluni nunatta eqqartuussiviata suliareqqitassanngortitsivittut maanna suliat kredsrettimi imaluunniit Kalaallit Nunaanni Eqqartuussivimmi suliarineqaqqaarfittut suliaasimasut suliarisassallugit. Inatsimmut siunnersuummi siunnerfigineqarportaaq tamatumuuna eqqartuussiveqarnerup aaqqissuussaanerata allanngorneranik pilersitaasoq naleqqussaaffigineqarnissaa. 

2. Inatsimmut siunnersuutip imarisai

Inatsimmut siunnersuutip kinguneraa akileraarpallaarutinut utertoorutisianit erniarititaasoq 4 procentiniit 2 procentinut appartinneqarnissaa ukiumi aningaasarsiorfiusumi 2009-imut utertoorutisiat tunniunneqarneranniit atuutilersumik. 

Siunnersuutigineqarpoq Skatterådip aalajangiineri Kalaallit Nunaanni Eqqartuussivimmut suliarineqaqqaarfittut suliassiissutigineqarsinnaanissaat. 

Tamatumalu saniatigut siunnersuutigineqarpoq Inatsisartut inatsisaanni oqaatsit atorneqartut Namminersorluni Oqartussaanermut ikaarsaariarnerup kingunerisaanik allanngortinneqassasut. 

3. Aningaasatigut allaffissornikkullu pisortanut sunniutissat 

Siunnersuutip nunatta karsianut ukiumut 3 mio. koruunit missigisaannik sipaarutaanissaa ilimagineqarpoq. 

4. Aningaasatigut allaffissornikkullu inuussutissarsiuteqartunut sunniutissat 

Siunnersuutip inuussutissarsiuteqartunut aningaasatigut allaffissornikkullu sunniuteqarnissaa ilimagineqanngilaq. 

5. Avatangiisinut pinngortitamullu sunniutissat

Siunnersuut avatangiisinut pinngortitamullu sunniuteqartussaanngilaq 

6. Aningaasatigut allaffissornikkullu innuttaasunut sunniutissat 

Siunnersuut innuttaasut aningaasanik atorsinnaasaannik ukiumut 3 mio. koruuninik ikileriartitsinissaa naatsorsuutigineqarpoq. 

Siunnersuut innuttaasunut allaffissornikkut sunniuteqarnissaa naatsorsuutigineqanngilaq. 

7. Naalagaaffeqatigiinnermut namminersornermullu tunngasut 

Inatsimmut siunnersuut naalagaaffeqatigiinnermut attuumassuteqanngilaq. 

8. Oqartussaasunut kattuffinnullu tusarniaaneq 

Siunnersuut tusarniaassutigineqarsimavoq ukununnga:

KANUKOKA, Kalaallit Nunaanni sulisitsisut Peqatigiiffiat , Nunaqavissut Suliffiutillit Kattuffiat (NUSUKA), Sulinermik Inuussutissarsiuteqartut Kattuffiat (SIK), KNAPK, Aningaasaqarnermut Naalakkersuisoqarfik, Inuussutissarsiornermut  Suliffeqarnermullu Naalakkersuisoqarfik aamma Isumaginninnermut Naalakkersuisoqarfik aamma Peqqissutsimut Naalakkersuisoqarfik. 

Tusarniaanermut akissutit tiguneqarsimapput  KANUKOKA-mit , SIK-mit aammalu Peqqissutsimut Naalakkersuisoqarfimmit. 

KANUKOKA isumaqarpoq erniaqartitsinermi annertussutsip allanngortinnissaa siunissamut sammitinneqartariaqartoq, innuttaasut 2009-mi akileraarpallaarutinut utertoorutisiassaat 4 procentinik erniaqartinneqarnissaannut ilimasussallutik pissutissaqarmata. 

Tamatumunnga oqaatigineqassaaq Naalakkersuisut pingaartissimammassuk ukioq manna aningaasatigut naatsorsuiffiusumi sipaaruteqartoqareersimanissaa. 

SIK aamma Peqqissutsimut Naalakkersuisoqarfik siunnersuummut tunngatillugu oqaaseqaateqarsimanngillat. 

 

Inatsimmut siunnersuummi aalajangersakkanut ataasiakkaanut oqaaseqaatit  

 

§ 1-imut  

Nr. 1-imut.

Siunnersuutigineqarpoq akileraarpallaarutinut utertoorutisiat erniat 4 procentiniik 2 procentinut appartinneqassasoq. 

Nr. 2-mut.

Siunnersuutigineqarpoq sulianut Skatterådimut suliassiissutigineqarsimasunut tunngasut suliarineqaqqaarfiusutut eqqartuussinikkut aalajangiisinnaaneq Kalaallit Nunaanni Eqqartuussivimmut inissinneqassasoq. 

Nr. 3-6-imut

Namminersorluni Oqartussaanermut ikaarsaariarnerup kingunerisaanik Inatsisartut inatsisaanni oqaatsit atorneqartut allanngortinneqassasut siunnersuutigineqarpoq.

 

§ 2-imut

Siunnersuutigineqarpoq inatsit 1. juni 2010-mi atuutilissasoq utertoorutisianillu § 25, imm. 2-mi appartitsineq, ukiumi aningaasarsiorfiusumi 2009-mi akileraarpallaarutinut utertoorutisiat utertinneqarneranniit atuutilerluni.