21. april 2010

FM 2010/84

 

Qamutit motoorillit uulia tunngavigalugu atuinngitsut eqqunneqarneranni, motoorinullu akitsuuserneqanngikkallarnissaannut Inatsisartut inatsisaattut siunnersuut

 
pillugu

Akileraatarnermut Akitsuusisarnermullu ataatsimiititaliap

ISUMALIUTISSIISSUTAA

Siunnersuutip aappassaaneerneqarnissaanut saqqummiunneqartoq

Inatsisartut Akileraartarnermut Akitsuusisarnermullu ataatsimiititaliaa suliarinninnermini ukuninnga inuttaqarpoq:

Inatsisartunut ilaasortaq, Niels Thomsen (siulittaasoq)
Inatsisartunut ilaasortaq, Harald Bianco (siulittaasup tullia)
Inatsisartunut ilaasortaq, Aqqaluaq Egede
Inatsisartunut ilaasortaq, Karl Lyberth
Inatsisartunut ilaasortaq, Aleqa Hammond

Akileraartarnermut Akitsuusisarnermullu ataatsimiititaliap ulloq 13. april 2010 siunnersuutip siullermeerneqarnerata kingunerisaanik siunnersuut pineqartoq misissuataarpaa.

Siunnersuutip imarisaa

UKA 2009-imi Inatsisartut isumaqatigiittut aalajangiuppaat (UKA2009/23) qamutit motoorillit eqqunneqarneranni akitsuutit allanngortinneqarnissaat pillugu Naalakkersuisut peqquneqassasut, taamaalilluni ukiuni sisamani misileraanermi qamutinik motoorilinnik eqqussinermi uulia tunngavigalugu atuinngitsut akitsuuserneqanngikkallarsinnaaqqullugit.

Tamanna tunngavigalugu Qamutit motoorillit eqqunneqarneranni, qamutillu motoorillu taamaattut akitsuuserneqanngikkallarsinnaaqqullugit Naalakkersuisut siunnersuummik uannga saqqummiipput.

Inatsisartuni siunnersuummik siullermeerinninneq

Siunnersuutip siullermeerneqarnerani partiit tamarmiusut tapersiipput.

Tamatuma saniatigut biilinik innaallagissamik ingerlatilinnik pissarsiniarneq pilerinarneruqqullugu orsersortarfinnik inissitsiterinissaq siunnersuummi ilanngunneqassasoq Inuit Ataqatigiinniit ujartorneqarpoq. Ilanngulluguttaaq Inuit Ataqatigiit siunnersuutigaat, biilit illoqarfimmi ingerlaarnerminni minnerpaamik nal. akunneranut liiterimut kilometerit 20-it ingerlasinnaasut akitsuutaasa appartinneqarnissaat inatsimmut ilanngunneqassasoq. Tamanna aamma biilinut akuleriinnik ingerlatilinnut atuutissaaq.

Naalakkersuisut

Ataatsimiititaliamiit kaammattorneqarnertik tunngavigalugu biilit akuleriinnik ingerlatillit qanoq akitsuuserneqanngikkallarnissaat Naalakkersuisut aamma eqqarsaasersuutigivaat. Siunnersuummi biilit taamaattut ilaatinneqarnissaat taamaattoq Naalakkersuisunit toqqarneqanngilaq tassa biilit innaallagissamik imaluunniit brintimik ingerlatillit saniatigut aammattaaq biilit taamaattut uulia tunngavigalugu ingerlateqartarmata. Maannakkorpiaq ulluinnarni atuinermi biilit suna ingerlatigisarneraat pillugu nakkutilliinissami ajornartorsiuteqarpallaarsinnaanera pillugu Naalakkersuisut naliliipput. Taamaattorli biilinut akuleriinnik ingerlatilinnut uulia tunngavigalugu ingerlatillit atuinerannut sanilliullugu akitsuutip annikillisinneqarnissaa anguniarlugu akitsuuseeriaaseq qanoq ittoq pilersinneqassappat allaffissornikkut suut piumasaqaataassanersut Naalakkersuisuniit qulaajarniarneqarpoq.

Akileraartarnermut Akitsuusisarnermullu ataatsimiititaliap siunnersuummik suliarinninnera

Siunnersuutip tapersersorluarneqarnera Ataatsimiititaliamit aallarniutitut maluginiarneqarpoq aammalu ukiup affakkaartumik qamutit motoorillit akitsuutaasa qamutit oqimaassusaat tunngavigalugu akilersinneqartartup siunnersuummi ilanngunneqarnissaannik Ataatsimiititaliap kaammattuutaa Naalakkersuisunit malinneqarsimanera ilanngullugu.

Biiilit ingerlatissaminnut orsersorneqarneranut (batteriilersornerannut) aammattaaq piffissami misileraanermi innaallagissamik atuinerup avatangiisitigut nalilersuinissami ingerlatsisoqarnissaanut atatillugu, pissutsinut avatangiisinut ataqatigiittussaanerata innaallagissamik pilersorneqarneq imermik nukissiuutinik atuinikkut pinersoq imaluunniit uulia tunngavigalugu innaallagissiorneq ingerlanneqarnersoq apeqqutaatillugu aammattaaq Ataatsimiititaliamit iluarisimaarneqarluni maluginiarneqarpoq.

Biilit akuleriinnik ingerlatillit akitsuusiinermut ilaatinneqannginnissaannik Naalakkersuisut tunngavilersuutaat Ataatsimiititaliamit tusaatissatut tiguneqarpoq. Ilutigaluguli Ataatsimiititaliap Naalakkersuisunut kaammattuutigissavaa maannakkut akitsuusersueriaatsimi avatangiisinut mingutitsinngitsunik qamutinik angallassissutinik atuineq eqqarsaasersuutigeqqullugu. Tamanna biilinut amerlangaatsiartuut annertuumik oqimaassusilinnut kiisalu orsussamik annertuunik atuisut eqqarsaatigalugit.

Akileraartarnermut- Akistsuusisarnermullu ataatsimiititaliap inassuteqaataa

Qulaani allassimasut kiisalu siunnersuummik siullermeerinninnermi oqaaseqaatigineqartut tunngavigalugit Akileraartarnermut- Akitsuusisarnermullu ataatsimiititaliap isumaqatigiittup siunnersuut akuersissutigineqassasoq inassutigaa.

Taama oqaaseqaateqarluni Akileraartarnermut- Akitsuusisarnermullu ataatsimiititaliap siunnersuut Inatsisartunut aappassaaniigassanngortippaa

 

	Niels Thomsen Formand
Harald Bianco		Aqqaluaq Egede
Karl Lyberth		Aleqa Hammond