Nukissiornermi ikummatissat avatangiisinut akitsuutaat pillugu Inatsisartut inatsisaat nr. 21, 18. november 2010-meersoq

 

Nukissiornermi ikummatissat assigisaasalu avatangiisinut akitsuutaat

§ 1. Uuliat aatsitassanit pisut, aamarsuit gassillu Kalaallit Nunaanni kiassarnermut innaallagissiornermullu atorneqartut kiisalu motoorinut ikummatissatut atorneqartut avatangiisinut akitsuummik akitsuuserneqartassapput.
Imm. 2. Avatangiisinut akitsuut ima annertussuseqarpoq:

1) Solaarit suulluunniit, ilanngullugit petruuliu, Jet A 1 assigisaallu	Liiterimut 15o C-imi	0 kr. 10 øre
2) Fueluulia	Tonsimut	113 kr. 80 øre
3) Motoorinut benziinat suulluunniit, ilanngullugit timmisartut orsussaat assigisaallu	Liiterimut 15o C-imi	0 kr. 10 øre
4) Gassit suulluunniit, ilanngullugit naturgassi, bygassi assigisaallu, gassili puiaasamiittoq pinnagu	Nm3-mut	110 kr. 40 øre
5) Aamarsuit suulluunniit, ilanngullugit stenkul, jordoliekoks, brunkul, qisummit usserusiat (trætjære) assigisaallu	Tonsimut	73 kr. 40 øre

Imm. 3. Ikummatissap, ikummatissat imm. 2-mi taaneqartut imaluunniit ikummatissat taakku nioqqutissallu allat atorlugit akuukkap avatangiisinut akitsuutaa tassaavoq nioqqutissap inatsit una naapertorlugu qaffasinnerpaamik akitsuutillip akitsuutaa, akuugaq kiassarnermut innaallagissiornermullu imaluunniit motoorimut ikummatissatut atorneqarsinnaappat.
Imm. 4. Taamaattorli uuliakup imermik akullip umiarsuarni katersap, aammalu kiassarnermut innaallagissiornermulluunniit atorneqartup atorneqartussatulluunniit naatsorsuussap avatangiisinut akitsuutaa tassaavoq imm. 2, nr. 1 malillugu akit procentiat imaattoq:
1) 35 pct. imermik 65 pct.-imik taannaluunniit sinnerlugu akulik.
2) 70 pct. imermik minnerpaamik 30 pct.-imik aamma 65 pct. inorlugu akulik.
3) 95 pct. imermik minnerpaamik 5 pct.-imik aamma 30 pct. inorlugu akulik.
4) 100 pct. imermik 5 pct. inorlugu akulik.

§ 2. Nioqqutissat Kalaallit Nunaanni piiakkat sulialluunniit kiisalu nioqqutissat akitsuuteqarfiusumut eqqunneqarnerminni, kiassarnermut, innaallagissiornermut imaluunniit motoorimut ikummatissatut atorneqartussaanatik allanut atorneqartussatut naatsorsuussat, tak. nioqqutissanik eqqussuineq annissuinerlu pillugit Inatsisartut inatsisaanni § 6, siunertanut taaneqartunut ikummatissanngortinneqarpata akitsuummik akiliisussaatitaaneq atuutilissaaq.
Imm. 2. Nioqqutissat akitsuuteqarfiusumut eqqunneqarnerminni kiassarnermut, innaallagissiornermut imaluunniit motoorimut ikummatissatut atorneqartussatut naatsorsuussat akitsuuteqarfiusumut eqqunneqarneranni akitsuummik akiliisussaatitaaneq atuutilissaaq.
Imm. 3. Avatangiisinut akitsuut akitsuummik akiliisussaatitaanerup atuutilernerani akilerneqartussanngussaaq.

Suliffeqarfinnik assigisaannillu nalunaarsuineq

§ 3. Suliffeqarfiit ingerlataminnut atatillugu nioqqutissanik akitsuusigassanik piiaasut, suliaqartut eqqussuisulluunniit uninngasuutinik peqqumaasivittut akileraaruseriffimmi nalunaarsorneqassapput.
Imm. 2. Suliffeqarfiit allat nioqqutissanik akitsuusigassanik atuisartut uninngasuutinik peqqu­maasivittut akileraaruseriffimmi nalunaarsorneqarsinnaapput, nioqqutissanut akitsuusigassanut uninngatitsivissamik minnerpaamik 1.000 m³-imik annertussuseqartumik peqqumaasiveqarunik. Suliffeqarfiit arlallit ataatsimoorussamik peqqumaasiveqarunik, peqqumaasiviup ilaata atukkamik annertussusia naapertorlugu akitsuummik akiliissapput.
Imm. 3. Uninngasuutinik peqqumaasiviusut nalunaarsornissaannut Naalakkersuisut erseqqinnerusunik maleruagassiorsinnaapput.

§ 4. Suliffeqarfiit aamma ingerlatsiviit assigisaallu uninngasuutinik peqqumaasivittut nalunaarsorneqarsimanngitsut, kiisalu inuit ataasiakkaat nioqqutissanik akitsuusigassanik piiaasut, suliaqartut eqqussuisulluunniit akitsuummik akiliisussaatitaanerup atuutilernerani akileraaru­seriffimmut nalunaaruteqassapput.

Piffissaq akitsuusiiffissaq aamma akitsuusigassat naatsorsorneqarnerat

§ 5. Uninngasuutinik peqqumaasivittut nalunaarsorneqarsimasut piffissaq akitsuusiiffissaat tassaavoq qaammat.

§ 6.  Toqqortuisutut nalunaarsorneqarsimasut nioqqutissat akitsuuteqartut kiassarnermi, innaallagissiornermi ikummatitut motoorinulluunniit orsussatut atorneqarsimasut annaasanik assigisaannillu tapeqartillugit piffissamut akitsuuteqarfiusumut, takuuk § 2, imm. 1, imaluunniit akitsuuteqarfiusumut eqqussaasimasut, takuuk § 2, imm. 2, naatsorsuusiussavaat. Naatsorsuinerit akileraaruseriffiup aalajangersagaanik malittarisassat malillugit immikkoortitigaallutik nalunaarsugaassapput.
Imm. 2. Pisuni allani akitsuusigassat tassaapput nioqqutissat suliffeqarfiup imaluunniit inuup pisuni ataasiakkaani pissarsiarisimasai tigusimasaaluunniit.
Imm. 3. Naalakkersuisut uninngasuutinik peqqumaasivittut nalunaarsorneqarsimasut akitsuusigassanik qanoq naatsorsuisarnissaat pillugu maleruagassanik erseqqinnerusunik aalajangersaasinnaapput.

§ 7. Akitsuusigassanit § 6, imm. 1 naapertorlugu naatsorsorneqartunit ilanngaatigineqassapput
1) nioqqutissat akitsuuteqarfiusup avataanut anninneqartut,
2) nioqqutissat suliffeqarfimmi, suliffeqarfimmulluunniit angallanneranni ikuallattoornikkut, ernartoornikkut, assigisaanilluunniit pisoqarneragut annaasaqaatit.

 
Akiliisussaatitaaneq

§ 8. Akitsuummik § 2, imm. 1-imi pineqartumik akiliisussaatitaavoq akitsuummik akiliisussaatitaanerup atuutilernerani nioqqutissamik piginnittoq.
Imm. 2. Akitsuummik § 2, imm. 2-mi pineqartumik akiliisussaatitaavoq akitsuummik akiliisussaatitaanerup atuutilernerani nioqqutissamik pigisaqalersutut nalunaarneqarsimasoq.

Naatsorsuusiorneq pillugu aalajangersakkat

§ 9. Toqqortuisut § 3, imm. 1 malillugu nalunaarsugaasut, nioqqutissat, pissarsiarineqartut, sananeqartut eqqunneqartulluunniit pillugit, aammalu tunineqartut aammalu § 7 naapertorlugu atorneqartut pillugit naatsorsuusiussapput.
Imm. 2. Allat uninngasuutinik peqqumaasivittut § 3, imm. 2 naapertorlugu nalunaarsorneqarsimasut nioqqutissat akitsuusigassat pigilikkatik, tunisatik suliffeqarfimmilu atukkatik naatsorsuuteqartissavaat.
Imm. 3. Uninngasuutinik peqqumaasivittut nalunaarsorneqarsimasup tunisaqarnerani pisiat allagartaanni paasissutissatut allassimassapput ulloq akiligassat allagartaata sananeqarfia, nioqqutissanik tunisisup aqqa, pisisup aqqa, nioqqutissap sumut tunniunneqarnera, nioqqutissap suunera annertussusialu kiisalu avatangiisinut akitsuutip annertussusia.
Imm. 4. Suliffeqarfiit assigisaasalu naatsorsuutit, matumani ilanngullugit pisiat allagartaat, pisiat allagartaasa assilineqarneri naatsorsuinerillu ukiup naatsorsuusiorfiusup naanerata kingorna ukiuni tallimani toqqortarissavaat.

Avatangiisinut akitsuummik akiliineq

§ 10. Uninngasuutinik peqqumaasivittut nalunaarsorneqarsimasut piffissat akitsuusiiffissat naanerisa kingorna kingusinnerpaamik qaammatit ulluisa 15-ianni nioqqutissat akitsuusigassat qanoq annertutigineri akileraaruseriffimmut nalunaarutigisassavaat, tak. § 6, imm. 1 aam­ma § 7. Avatangiisinut akitsuut piffissat akitsuusiiffissat naanerisa kingorna kingusinnerpaamik qaammatit arfinilissaata ulluisa 15-ianni akileraaruseriffimmut akilerneqartassaaq.
Imm. 2. Akitsuummik akiliisussaatitaasut § 4-mi taaneqartut avatangiisinut akitsuut, akitsuummik akiliisussaatitaanerup atuutilernerata kingorna kingusinnerpaamik ullut 14-it qaangiunneranni akileraaruseriffimmut akilertassavaat. Nioqqutissat qanoq annertutigisut avatangiisinut akitsuuserneqarnissaannik naatsorsuineq § 6, imm. 2-mi maleruagassat naapertorlugit pissaaq.

§ 11. Uninngasuutinik peqqumaasivittut nalunaarsorneqarsimasoq avatangiisinut akitsuummik piffissaagallartillugu akiliisimanngitsoq, akileraaruseriffimmit peqquneqarsinnaavoq nioqqutissat tiguneranni nalunaaruteqartaleqqullugu. Aamma akileraaruseriffiup suliffeqarfik peqqusinnaavaa avatangiisinut akitsuut nioqqutissat tiguneranni akilertaleqqullugu.

§ 12. Nioqqutissat akitsuusigassat avatangiisinut akitsuummik inatsit naapertorlugu akilerneqarsimasussaagaluamik akiliinani tunineqarsimappata, pigineqalersimappata atorneqarsimappataluunniit aningaasat akilinngitsoorneqarsimasut akileeqqusinermiit kingusinnerpaamik ullut 14-it qaangiunneranni akileqquneqassapput. Aningaasat akilinngitsoorneqarsimasut annertussusiat suliffeqarfiup naatsorsuutai tunngavigalugit naatsorsorneqarsinnaanngippat, akileraaruseriffiup missingersuinermigut angissusilersinnaavaa.

Pineqaatissiissutit

§ 13. Kinaluunniit piaaraluneerluni imaluunniit mianersuaalliorujussuarluni iliuuseqartoq akiliisinneqassaaq
1) akitsuutinik nakkutilliinermi atugassanik imaluunniit akitsuummik utertitassamik tunniussinissamut tunngavissaq pillugu eqqunngitsunik paasinerluutaasinnaasunilluunniit paasissutissiisoq imaluunniit paasissutissanik nipangiussisoq,
2) § 3, imm. 1-imik, § 4-mik, imaluunniit § 9, imm. 1-imiit 4-mut unioqqutitsisoq,
3) § 11, oqaaseqatigiinni siullerni peqqusinermik nalunaarutigeriikkamik malinninngitsoq,
4) nioqqutissanik avatangiisinut akitsuummik inatsit naapertorlugu akilerneqarsimasussaagaluamik akiliinani tunisisoq, pigisaqalersoq, pissarsisoq imaluunniit atuisoq, taamaalioriaraluartorluunniit.
Imm. 2. Selskabi assigisaalu imm.1-imik unioqqutitsisuuppata Kalaallit Nunaanni pinerluttulerinermik inatsimmi kapitali 5-imi maleruagassat naapertorlugit pinerluutinut akisussaatitsisoqarsinnaavoq.

§ 14. Akileraaruseriffik isumaqarpat unioqqutitsineq akiliisitaanermit sakkortunerusumik pineqaatitaqartariaqanngitsoq, taava Naalakkersuisut taakkualuunniit taamaaliornissamut piginnaatitaata pineqartoq nalunaarfigissavaa suliassaq eqqartuussisutigoortitsinertaqanngitsumik inerneqarsinnaasoq ilumut unioqqutitsisimanini paasippagu aammalu piffissaatitap erseqqinnerusumik aalajangikkap, qinnuteqarnikkut sivitsorneqarsinnaasup qaangiutinnginnerani akiliutissamik nalunaarummi taaneqartumik akiliiumappat.
Imm. 2. Paasisitsissut imm. 1-imi taaneqartoq pillugu Kalaallit Nunaanni eqqartuussisarnermik inatsimmi maleruagassat unnerluussutip imarisai pillugit taamaallutik atuutissapput.
Imm. 3. Akiliutissaq piffissaagallartillugu akilerneqarluniluunniit isumaqatigiissuteqartoqarneratigut tiguniarneqarsimappat qanoq iliuuseqartoqaqqissanngilaq.

§ 15. Maleruagassiani inatsit una naapertorlugu atulersinneqarsimasuni, maleruagassiani aalajangersakkanik unioqqutitsinerit akiliisitaanermik pillarneqarnissaannik aalajangersaasoqarsinnaavoq.
Imm. 2. Maleruagassiani inatsit una naapertorlugu atulersinneqarsimasuni selskabit assigisaallu Kalaallit Nunaanni pinerluttulerinermik inatsimmi kapitali 5-imi maleruagassat naapertorlugit pinerluutinut akisussaatinneqarsinnaapput.

§ 16. § 13 aamma § 15 naapertorlugit akiliutissanngortitat landskarsip pisassarai.

Atortuulerfia

§ 17.  Inatsit atortuulissaaq 1. januar 2011, atuutissallunilu nioqqutissanut 1. januar 2011-miit kingusinnerusukkulluunniit akitsuusigassaalersussanut.

Kalaallit Nunaanni Namminersorlutik Oqartussat, ulloq 18. november 2010

Kuupik Kleist                                                  

/

Palle Christiansen

---

Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Aappassaaneerinninnermut allannguutissatut siunnersuut (akuerineqartoq)

Isumaliutissiissut (Pingajussaaneerinninneq)

Pingajussaaneerinninnermut allannguutissatut siunnersuut (akuerineqartoq)