6. maj 2010

UPA 2010/120

Utoqqalinermi pensionisiat pillugit Inatsisartut peqqussutaannik allanngortitsineq pillugu Inatsisartut peqqussutaat nr. xx, xx 2010-meersoq (Toqukkut qimagunnerup kingorna tunniussisarneq)

(Isumaginninnermut Naalakkersuisoq)

pillugu

Ilaqutariinnermut Ataatsimiititaliap

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Ilaqutariinnermut Ataatsimiititaliaq kingullermik suliarinninnermini ukuninnga inuttaqarpoq:

Inatsisartunut ilaasortaq Debora Kleist, Inuit Ataqatigiit
Inatsisartunut ilaasortaq Jane Petersen, Inuit Ataqatigiit
Inatsisartunut ilaasortaq Andreas Uldum, Demokraatit
Inatsisartunut ilaasortaq Ruth Heilmann, Siumut
Inatsisartunut ilaasortaq Knud Kristiansen, Atassut

Siunnersuut kiisalu siunnersuutip siullermeerneqarnerani UPA 2010-mi ulloq 27. april 2010-mi ingerlanneqartoq aammalu Inatsisartunut ilaasortat Naalakkersuisullu tamarmik siunnersuummut oqaaseqaatiminnik saqqummiussinissaannik periarfissiiffiusoq Ilaqutariinnermut Ataatsimiititaliap erseqqinnerusumik misissorpai.

Siunnersuut pillugu

Siunnersuutip saqqummiunneqarneranut tunngaviuvoq aalajangiiffigisassatut siunnersuutip UKA 2009/44-p akuersissutigineqarnera, taanna inaarutaasumik akuersissutigineqarami ima oqaasertaqarpoq:

Katissimallutik aappariit inooqatigiilluunniit aappaata toqunerani qimagaasoq toqukkut qimaguttup utoqqalinermi imaluunniit siusinaartumik pensionisiaanik qaammatini marlunni pisartagaqarsinnaaqqullugu utoqqalinermi pensionisat aammalu siusinaartumik pensionisiat pillugit maleruagassanut allannguutissatut siunnersuummik 2010-mi saqqummiussinissamut Naalakkersuisut peqquneqarnissaannik aalajangiiffigisassatut siunnersuut.

Siunnersuut pillugu tusarniaaneq

Siunnersuut attuumassuteqartunut tusarniaassutigineqarsimavoq.    

Ilaqutariinnermut Ataatsimiititaliap oqaaseqaatai

Siunnersuut saqqummiunneqartoq Ilaqutariinnermut Ataatsimiititaliamit tikilluaqquneqarpoq. Siunnersuut saqqummiunneqartoq aalajangiiffigisassatut siunnersuummit qulaani taaneqartumit annertunerusoq  Ilaqutariinnermut Ataatsimiititaliaq isumaqarpoq, aalajangiiffigisassatummi siunnersuummi pensionisiallit katissimasut inooqatigiilluunniit pineqarmata. Utoqqalinermi pensionisiallip qimataata nammineq aamma pensionisiaqartuunissaa siunnersuummi saqqummiunneqartumi piumasaqaatigineqanngimmat Ilaqutariinnermut Ataatsimiititaliap eqqarsarnartoqartinngilaa.   

Siunnersuummulli nassuiaatit misissornerat erseqqissaateqarnissamut tunngavissiivoq. Siunnersuummut nassuiaatini § 1-imi oqaaseqatigiinni kingullerni kukkusumik ima allassimavoq:

“Taamaasilluni aalajangersagaq siunnersuutigineqartoq atorneqassanngilaq, pensionisiaqartoq toqukkut qimagunnermini katissimasaqanngippat inoqatigisaqanngippalluunniit.” 

Utoqqalinermi pensionisiallip qimataata nammineq pensionisiaqartuunissaa inatsisip oqaasertaani aalajangiisuutinneqanngilaq. Utoqqalinermi pensionisiallit qimataannut (katissimallugu aapparisaannut inooqatigisaannulluunniit) tamanut siunnersuut sammitinneqarpoq aammalu siunnersuummut nassuiaatini kukkusumik allassimaneratut atuuffia annikillisarneqassanani.

Inassuteqaat

Siuliani erseqqissaatit ilanngullugit siunnersuut maanna ilusimisut iluseqartoq akuersissutigineqassasoq ataatsimiititaliap isumaqatigiittup inassutigaa.

Taama oqaaseqarluni Ilaqutariinnermut Ataatsimiititaliap siunnersuut aappassaaniigassanngortippaa.

 

	Debora Kleist Siulittaasoq
Jane Petersen		Andreas Uldum
Ruth Heilmann		Knud Kristiansen