29. april 2010

UPA 2010/119

Siusinaartumik pensionisiat pillugit Inatsisartut peqqussutaata allanngortinneqarnissaa pillugu Inatsisartut peqqussutaa nr. xx, xx 2010-meersoq
(Siusinaartumik pensionisiat annertussusaannik allannguut, toqusoqartillugu aningaasanik tunniussisarnerit atorunnaarsinneqarneri kiisalu oqaatsitigut erseqqissaanerit)

(Isumaginninnermut Naalakkersuisumit saqqummiunneqartoq)

pillugu

Ilaqutariinnermut Ataatsimiititaliap

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

  

Ilaqutariinnermut Ataatsimiititaliaq suliarinninnermini ukuninnga inuttaqarpoq:

Inatsisartunut ilaasortaq Debora Kleist, Inuit Ataqatigiit
Inatsisartunut ilaasortaq Jane Petersen, Inuit Ataqatigiit
Inatsisartunut ilaasortaq Andreas Uldum, Demokraatit
Inatsisartunut ilaasortaq Ruth Heilmann, Siumut
Inatsisartunut ilaasortaq Knud Kristiansen, Atassut

Siunnersuut UKA 2010-mi ulloq 15. april 2010-mi siullermeerneqarnerani Ilaqutariinnermut Ataatsimiititaliap sukumiisumik misissorpaa.

Siunnersuut pillugu

Siusinaartumik pensionisialinnut annertussusiliinerup iluarsiivigineqarnissaat pillugu Naalakkersuisunit kissaateqartoqarnera siunnersuummut tunngaviuvoq.

1) Annertussusiliinerit qaammammut 1000 kr.-inik qaffanneqarnissaat siunnersuutigineqarpoq.
2) Annertussusiliinerit akinut nalimmassarneqarnissaat siunnersuutigineqarpoq.
3) Taamatuttaaq siusinaartumik pensionisiallip pensionisiaqarsinnaatitaasup toqukkut qimagunnerata kingorna inooqataa/aapparisaa qaammatini marlunni pisartagaqassasoq siunnersuutigineqarpoq.
4) Tamatuma saniatigut oqaatsitigut erseqqissaasoqarnissaa siunnersuutigineqarpoq.

Taamaalilluni siuliani allassimasutut allannguutissatut siunnersuutinik sisamanik saqqummiussisoqarpoq.

Siunnersuutip tusarniaassutigineqarnera

Siunnersuut susassaqartunut tusarniaassutigineqarsimanissaa naatsorsuutigineqarpoq.    

Siunnersuummik siullermeerinninneq

Siunnersuummik siullermeerineq ulloq 15. april 2010-mi ingerlaneqarpoq, matumani partiit naalakkersuinermik suliaqartut Inatsisartunullu ilaasortat tamarmik siunnersuummut oqaaseqarnissamut  periarfissaqarlutik. 

Ilaqutariinnermut Ataatsimiititaliap oqaaseqaatai

Siunnersuut nunatsinni siusinaartumik pensionisialinnut aningaasaqarnikkut pitsanngorsaataasumik kinguneqassasoq siullermeerinermi partiit oqaatigaat.

Siusinaartumik pensionisialinnut aningaasaqarnikkut pitsanngoriaateqartitsinissaq pisariaqartinneqarlunilu pisariaqartoq illuatungeriit tamarmik isumaqatigaat. Aningaasatigulli pitsanngorsaanissaq qanoq annertutigissanersoq naalakkersuinikkut suliaqartunit isumaqatigiissutigineqanngilaq.

Siusinaartumik pensionisiallit sapinngisamik annertunerpaamik namminerlu piginnaasaq naapertorlugu suliffeqalersinnaanerannik kissaat Ilaqutariinnermut Ataatsimiititaliamit ataatsimut isigalugu tapersersorneqarsinnaavoq. Tamanna pillugu siunnersuutip tamakkiisuunissaata malittarineqarnissaa Ilaqutariinnermut Ataatsimiititaliamit Naalakkersuisunut inassutigissavaa.

Inassuteqaat:

Ilaqutariinnermut Ataatsimiititaliami amerlanerussuteqartut Inuit Ataqatigiinneersut, Demokraatineersut Atassummeersullu siunnersuutip ilusimisut iluseqartup akuersissutigineqarnissaa inassutigaat, siusinaartumik soraarnerussutisiallit aningaasaqarnerinut tunngatillugu nukittorsaanissamik siunnersuut aningaasatigut pisinnaasanut sanilliullugu naleqqussarneqarsimammata. Pensionit akinut ataavartumik nalimmassartuarneqarnissaannik siunnersuut imaqarmat amerlanerussuteqartut naammagisimaarpaat, taamaalilluni siusinnerusukkut pisarsimasutut pensionit ajorneruleratillu pisissutaasinnaanerat mangiarneqarsinnaajunaarmata.

Siusinaartumik soraarnerussutisialinnut pissutsit pitsaanerulernissaannut ullumikkorninngarnillu suliffeqarfinni akuunerulernissaannut nukinnik tamanik atorfissaqartitsiffiusuni amerlanerusunik suliniuteqarniarneq amerlanerussuteqartunit qilanaarineqarpoq.

Aningaasat pitsanngorsaatissatut siunnersuutigineqartut naammanngitsut Ilaqutariinnermut Ataatsimiititaliami ikinnerussuteqartut Siumumeersut isumaqarput. Siusinaartumik pensionisiallit aningaasaqarnerannik siunnersuummit matumani pineqartumit annertunerusumik pitsanngorsaataasussamik aammalu tamatuma saniatigut siusinaartumik utoqqalinermilu pensionisialinnut annertussutsit akornanni aningaasaqarnikkut akuerineqarsinngitsumik assigiinngisitsinermut nalimmassaataasussamik Siumut UKA 2009-mi siunnersuummik ataatsimoortumik saqqummiussaqareersoq Siumup tapersiinerminut ilanngullugu oqaatigaa. Ataatsimut isigalugu siunnersuummi akinik nalimmassaaneq oqaatsitigut erseqqissaanerit kiisalu toqusoqarnerata kingorna pensionisianik tunniussisarnissaq Siumumit taperserneqarsinnaapput, ataatsimulli isigalugu pitsanngoriaat naammanngilaq aammalu Akileraartarnermut Atugarissaarnermullu Ataatsimiititaliarsuaq utaqqimaarneqassanani.    

Taama naatsumik oqaaseqarluni siullermeerinermilu oqaatigineqartut innersuussutigalugit Ilaqutariinnermut Ataatsimiititaliap siunnersuut Inatsisartunut aappassaaniigassanngortippaa.

 

	Debora Kleist Siulittaasoq
Jane Petersen		Andreas Uldum
Ruth Heilmann		Knud Kristiansen