12. april 2010 UPA 2010/119
Peqqussutissatut siunnersuummut oqaaseqaatit
Oqaaseqaatit nalinginnaasut1.Aallaqqaasiut
Inatsisartut peqqussutissatut siunnersuut una saqqummiunneqarpoq siusinaartumik pensionisiallit aningaasatigut pitsaanerusumik atugaqarsinnaalersinniarlugit. Siusinaartumik pensionisiat annertussusilerneqarsimanerisa qaffanneqarnissaat siunnersuutigineqarpoq, taakkua 1998-miilli allanngortinneqarsimanngimmata. Piffissami tassani pisassat akiinut naleqqersuutit qaffassimapput. Aammattaaq siunnersuutigineqarpoq siusinaartumik pensionisiat akit nikerarnerinut ingerlaannartumik naleqqussarneqartassasut.
Siunnersuuttaaq saqqummiunneqarpoq Inatsisartut UKA 2009-mi immikkoortumi 44-mi saqqummermat, Naalakkersuisut pensionisiallit katissimasut imaluunniit inooqatigiit aappaasa aapparisami toqukkut qimagussimanerisa kingorna qaammatini marlunni toqoreersup siusinaartumik pensionisiassaannik tigusaqartarnissaat pillugu allannguutissatut siunnersuummik saqqummiussisasut. Naalakkersuisut aalajangerput, tamanna aamma siusinaartumik pensionisialinnit aappaminnit toqukkut qimagaasunut atuutissasoq.
Siunnersuut aalajangersakkanit ataasiakkaat nassuiaataasa paasineqarsinnaanerannik ajornartorsiornarsinnaanerinittaaq aamma tunngaveqarpoq. Taamaattumik erseqqissaatigalugu siunnersuutigineqarpoq, kisimiittumut siusinaartumik pensioniassat minnerpaamik 20%-iinik pisinnaatitaaffeqartoq.
Naggataatigut siunnersuummi § 18-mi aamma § 21-mi oqaasertat erseqqissarneqarput taamaaliornikkut kalaallisut qallunaatullu allanneri naapertuunnissaat qulakkeerniarneqarmat.
2. Siunnersuummi immikkoortut pingaarnerpaatSiusinaartumik pensionisiat annertussusiisa allanngortinneqarnerat
Siusinaartumik pensionisiat annertussusilerneqarnerisa qaffanneqarnissaat siunnersuutigineqarpoq, annertussusiliinerit 1998-miilli aaqqiiffigineqarnikuunngimmata. Piffissami 1998-miilli nioqqutissat akiinut naleqqersuut qaffakkiartuaarpoq. Aammattaq siunnersuutigineqarpoq utoqqalinersiutit pillugit inatsisartut peqqussutaat assigalugu siusinaartumik pensionisiat akit nikerarnerinut ingerlaannartumik naleqqussarneqartassasut.
Pensionisiallip toqukkut qimagunnerani pensionisiassaasa tunniunneqartarnissaat
Siunnersuutigineqarpoq, pensionisiaqartumik katissimasaminik inooqatigisaminilluunniit toqukkup qimagaasup qaammammi aapparmi toqquiata naanerata kingorna qaammatini marlunni siusinaartumik pensionisassaanik tigusaqartassasoq.
Inatsisinik atuuttunik erseqqissaaneq
Siusinaartumik pensionisiassat annertussusissaat isertitat akileraarutaasussanut naleqqersuullugit aaqqinneqartarput, kisiannili akileraarutaasussanik isertitaqaraluaraanniluunniit atorunnaarsinneqarsinnaanngisaannarput.
Erseqqissaatigalugu siusinaartumik pensionisiassat annertussusissat kisermaamut siusinaartumik pensionisiassanit minnerpaamik 20 %-iussasut siunnersuutigineqarpoq.
Oqaasertalerneqarneri ataasiakkaat erseqqissaassutigineqarput, taamaaliornikkut § 18 aamma § 21-imi kalaallisut qallunaatullu allassimasut naapertuunnissaat qulakkeerniarlugu, aammattaaq aalajangersakkami tassani oqaasertaliunneqarsimasut immikkuualuttortaat ersarissarneqarnissaat qulakkeerniarlugu.
3. Aningaasatigut allaffissornikkullu kingunerisinnaasaiAnnertussusiliinernik qaffaanissatut siunnersuutigineqartut AIS 2010-mut ikkunneqarput, Siunertamut 17 mio. kr. -nit immikkoortinneqarlutik.
Pensionisiallit katissimasut imaluunniit inooqatigiit aappaasa aapparisami toqukkut qimagussimanerisa kingorna qaammatini marlunni toqoreersup pisortanit pensionisiassaanik imaluunniit siusinaartumik pensionisiassaannik tigusaqartarnissaannik aningaasaqarnikkut kinguneqarnissaa naatsorsuutigineqarpoq killiliussat iluanniinnissaa.
Tamatuma avataatigut aningaasaqarnermut kinguneqarnissaa naatsorsuutigineqanngilaq.
Pisortanut allaffissornikkut kinguneqarnissaa naatsorsuutigineqanngilaq.
4. Aningaasaqarnikkut allaffissornikkullu inuussutissarsiortunut kingunerisinnaasaiSiunnersuut aningaasatigut kinguneqarnissaa naatsorsuutigineqanngilaq
5. Avatangiisinut pinngortitamullu kingunerisinnaasaiSiunnersuut avatangiisinut pinngortitamullu kinguneqarnissaa naatsorsuutigineqanngilaq
6. Allaffissornikkullu innuttaasunut kingunerisinnaasaiSiunnersuut allaffissornikkullu innuttaasunut kinguneqarnissaa naatsorsuutigineqanngilaq
7. Allatigut kingunerisinnaassaiAllatigut kinguneqarsinnaanera naatsorsuutigineqanngilaq.
8. Naalagaaffeqatigiinnermut kingunerisinnaasaiSiunnersuut Naalagaaffeqatigiinnermut kinguneqarnissaa naatsorsuutigineqanngilaq.
9. Oqartussanik kattuffinnillu tusarniaaneqSiunnersuut ukununnga tusarniaassutigineqarpoq: KANUKOKA, NUSUKA, GA, SIK, AK, IMAK, ILIK, PIP, ASG, PPK, KNAPK, APK, Aningaasaqarnermut Naalakkersuisoqarfik, Inussutissarsiornermut Suliffeqarnermullu Naalakkersuisoqarfik, Kulturimut, Ilinniartitaanermut Ilisimatusarnermut Ilageeqarnermullu Naalakkersuisoqarfik Peqqissutsimut Naalakkersuisoqarfik, Nunamut Namminermut, Pinngortitamut Avatangiisinullu Naalakkersuisoqarfik, Aalisarnermut, Piniarnermut Nunalerinermullu Naalakkersuisoqarfik, Kommunit Kukkunersiuisui Isumaginninnermullu Naammagittaalliuteqartarfik.
Oqartussat kattuffiillu tusarniaanermut uku akissuteqarput:
KANUKOKAOqaatigineqassaaq siusinaartumik pensionisiat 1998-imiit siusinaartumik pensionisiat akit nikerarnerinut naleqqussarneqartarnerisa atorunnaarsinneqarnerat kommuninut inummut tapeqartitsinikkut aningaasartuuteqarnerulernermik kinguneqarsimasoq, tassa pensionisiat pisisinnaassusikkut malinnaasimanngimmata. Taamaattumik tunniunneqartartut maannakkut iluarsineqartarnissaannik siunnersuuteqartoqarnera tikilluaqquneqarpoq. Kommunit siunnersuutigaat akit nikerarnerinut naleqqussaasarneq pillugu aalajangersakkamik ikkussisoqassasoq, taamaalilluni pensionisisartuni pisisinnaassuseq siunissamut qulakkeerneqarluni. Aammattaaq siunnersuutigineqarpoq pensionisiaqartut kisermaat qaammatini marlunni toqusup piinut qaammatini marlunni pensionisisassasut.
Oqaaseqaatit tusaatissatut tiguneqarput. Erseqqissaatigineqassaarli siusinaartumik pensionisiaqartut pisartagaasa akit nikerarnerinut naleqqussarneqartarneri 1. juli 1995-imi atorunnaarsinneqarmat.
Siusinaartumik pensionisiat akit nikerarnerinut naleqqussaanermut tunngatillugu tamanna peqqussutissatut siunnersuummi matumani tulluarsarlugu ilanngunneqarpoq.
Pensionisiaqartup toqunerata kingorna qaammatini marlunni pensionisiat tunniunneqartarnissaannut siunnersuut peqqussutissatut siunnersuummi matumani naleqqussarlugu ilanngunneqassanngilaq. Aalajangersakkatut siunnersuutigineqartumi siunniussaq tassaavoq qaammatip toqukkut qimanguffiusup naanerata kingorna qaammatini marlunni pensionisiaqartup toqusup pisartagai qimanneqartup tigusassagai, manna tikillugu aningaasartuutit marluullutik akilersorsimasaannut piffissami sivikitsuinnarmi qimanneqartoq ikiorserusullugu.
Aningaasaqarnermut NaalakkersuisoqarfikSiusinaartumik pensionisiat iluarsineqartarnissaat Naalakkersuisoqarfiup akueraa. Siunnersuutigineqarpoq utoqqalinersiutini atorneqartoq malillugu siusinaartumik pensionisiat ingerlaannartumik iluarsineqartarnissaat tulluarsarlugu ilanngunneqassasoq. Aammattaaq siunnersuutigineqarpoq isertitat akileraaruserneqartussat annertussusai apeqqutaatinnagit siusinaartumik pensionisiaqartup kisermaap pensionisiarisartagaasa minnerpaamik 20 %-iinik pensionisiaqarnissaq pillugu aalajangersagaq atorunnaarsinneqassasoq/peerneqassasoq.
Oqaaseqaatit tusaatissatut tiguneqarput. Tamanna pillugu utoqqalinersiuteqarnermut peqqussummi aalajangersakkamut eqqaanartoq siusinaartumik pensionisiat ingerlaannartumik iluarsineqartarnissaannut aalajangersagaq nutaaq tulluarsarlugu ilanngunneqarpoq. Isertitat akileraaruserneqartussat annertussusai apeqqutaatinnagit siusinaartumik pensionisiaqartup kisermaap pensionisiarisartagaasa minnerpaamik 20 %-iinik pensionisiaqarnissaq pillugu aalajangersakkap peerneqarnissaanut siunnersuut peqqussutissatut siunnersuummi matumani tulluarsarlugu ilanngunneqanngilaq, Atugarissaarnermulli ataatsimiititaliarsuup kaammattuutissai utaqqimaarneqarlutik, tassa aalajangersagaq iliuuseqatigiittarnermi ajornartorsiutinut, Atugarissaarnermut ataatsimiititaliarsuarmit misissorneqartussanut ilaatinneqassagunarmat.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik.Oqaatigineqarpoq peqqussummi taaguut “aappariit” atorneqartoq, tassa “aappariit” pillugit nassuiaat § 4-mi nangillugu atorneqarmat inuillu taakkuullutik katissimasut, nalunaarsorneqarsimallutik aappariittut imaluunniit katissimanermut eqqaanartumik aappariittut, sivikinnerpaamik ukiumi ataatsimi aappariissimasut. Oqaatigineqarpoq “aappariit” allannguutissatut siunnersuumi aamma atorneqassasoq.
Oqaaseqaatit tusaatissatut tiguneqarput allannguutissatullu siunnersuummi tulluarsarlugit ilanngunneqarlutik.
Uku oqaaseqaateqarsimanngillat:GA (ILIK-lu ataatsimuulersimasut), AK, SIK, PIP, Peqqissutsimut Naalakkersuisoqarfik aamma Isumaginninnermut Naammagittaalliuteqartarfik.
Uku tusarniaanermi akissuteqarsimanngillat:IMAK, ASG, PPK, KNAPK, APK, NUSUKA, Inuussutissarsiornermut Suliffeqarnermullu Naalakkersuisoqarfik, Nunami Namminermi Pissutsinut, Pinngortitamut Avatangiisinullu Naalakkersuisoqarfik, Aalisarnermut, Piniarnermut Nunalerinermullu Naalakkersuisoqarfik, Kommunit Kukkunersiuisui.
Peqqussutissatut siunnersuummi aalajangersakkat ataasiakkaat pillugit oqaaseqaatit
§ 1-mut
Nr. 1-mut
Imm. 1-mut
Aalajangersagaq aalajangersakkamut atuuttumut naapertuuppoq, pensionisiassalli annertussusaat qaffanneqarput. Siusinaartumik pensionisialimmut kisermaamut ukiumut 100.000 kr.-inut qaffanneqarnissaat siunnersuutigineqarpoq , aappariinnut, aappaanna siusinaartumik pensionisiaqarpat, ukiumut 100.000 kr.-nit, aappariinnut tamarmik siusinaartumik pensionisialinnut ukiumut 150.000 kr.-it.
Tamakkiisumik siusinaartumik pensionisiaqarnissamut piumasaqaatit eqquutsinneqarsimappata, siusinaartumik pensionisiat annertussusiliinerit taaneqartut naapertorlugit tunniunneqartassapput. Taamaattoqanngippat piffissaq najugaqarfiusimasoq tunngavigalugu aningaasat ilaannai tunniunneqassapput, ukiuni 40-ni najugaqarsimasinnaaneq tunngavigalugu naatsorsoneqartumik.
1998-miilli siusinaartumik pensionisiat atuuttut qaffanneqarsimanngineri pisiassallu akiinut naleqqersuut piffissami tassani qaffakkiartuaarsimaneri tunngavigineqarpoq.
Imm. 2-mut
Aalajangersagaq aalajangersakkamut naapertuuppoq, aningaasalli amerlaninngortinneqarput.
Aappariit, aappaasup siusinaartumik pensionisiaqartup aappaalu pisortanit soraarnerussutisiaqartoq, utoqqalinersialinnut inatsisartut peqqussutaanni atuuttumi aalajangersarneqarput, taamaattumillu siusinaartumik pensionisiassat pillugit inatsisartut peqqussutaanni atuuttumi aalajangersarneqarlutik.
Utoqqalinersiassat Kalaallit Nunaanni Naatsorsueqqissaartarfimmi pisiassat akiinut naleqqersuutit saqqummiussai tunngavigalugit aaqqinneqartarmata, pensionisiassat annertussusaat aaqqinneqartarput, aappariinnut aappaasoq siusinaartumik pensionisiaqarpat aappaalu utoqqalinermi utoqqalinersiaqarpat.
Pensionisiassat annertussusaat kingullermik 148.400 kr.-niusussatut aalajangersarneqarput.
Imm. 3-mut.
Aalajangersagaq nutaajuvoq aalajangersarneqarlunilu siusinaartumik pensionisiat akit nikerarnerinut naleqqussarneqartassasut. Aalajangersakkap malitsigisaanik atuisunut akigititaannut naleqqersuut tamakkiisumik pointinik pingasunik allanngorsimangaangat siusinaartumik pensionisiat tamatigut iluarsineqartassasut. Taamaallaat 1. julimi atuisunut akigititanut naleqqersuut tunngavigalugu januarimi siullermi tullinnguuttumi atuutilertassalluni. Assersuutigalugu 1. juli 2010-mi atuisunut akigititanut naleqqersuut tunngavigineqarluni 100-mut inissinneqarpoq. 1. juli 2010-mut naleqqiullugu atuisunut akigititanut naleqqersuut 103.17-miippat 3 procentimik iluarsiisoqassaaq. Taamatut iluarsiineq aalajangiussimaneqassaaq tullianik atuisunut akigititanut naleqqersuut 106 qaangerpagu imaluunniit 100 ataallugu apparsimappat. Siusinaartumik pensionisiat appartinneqarsinnaapput aningaasat naleerunneranni 100 ataappagu. Iluarsiinissamut tunngavissaq toqqarneqarpoq aningaasanut inatsisiliornissaq eqqarsaatigalugu, piffissarlu iluarsiiffiusussaq toqqarneqarluni allaffissorneq eqqarsaatigalugu.
Imm. 4-mut
Aalajangersagaq nutaajuvoq aalajangersarneqarlunilu akigititat nutaat ukiut tamaasa januarip aallaqqaataani Naalakkersuisunit tamanut saqqummiunneqartassasut. Tamanna pisassaaq Namminersorlutik Oqartussat isumaginninnermi inatsisit atuuttut pillugit nittartagaanni.
Nr. 2-mutAalajangersagaq § 9, imm. 2-mut naapertuuppoq, erseqqissaatigineqarporli siusinaartumik pensionisianik ilanngaasoqarsinnaanngitsoq (soorlu § 9, imm .2-mi atuuttumi allaqqasoq), imaammat isertitat akileraarutaasussat qanorluunniit annertutigigaluarpata tamatigut siusinaartumik pensionisiallip kisermaap penisonisiassaasa 20 procentiannik pisartagaqarnissaq pisinnaatitaaffigigaat, soorlu Inunnut Isumaginninnikkut Isumannaallisaaneq pillugu Nunat Avannarliit Isumaqatigiissutaanni aalajangersakkat malillugit siusinaartumik pensionisiassaqartoqartartoq.
Isertitassatut killiliussat aalajangersakkat malillugit kisermaamut siusinaartumik pensionisialimmut ukiumut 180.000 kr.-iupput, aappariinnut marluullutik siusinaartumik pensionisialinnut 270.000 kronit, 270.000 kr.-nit, aappariinnut aappaannaa siusinaartumik pensionisialimmut, aapparisaalu pisortanit pensionisianik sunilluuunniit pisartagaqanngitsumut aammalu aappariinnut ukiumut 300.000 kr.-nit aappaannaa siusinaartumik pensionisialimmut aappaalu utoqqalinermi pensionisialimmut.
Siusinaartumik pensionisiatut pisartagassat naatsorsorneqartarput § 10 aamma § 11 naapertorlugit.
Nr. 3-mutImm. 1-mut
Aalajangersagaq aalajangersakkamut atuuttumut naapertuuppoq, uanili oqaasertaani erseqqissaassuteqartoqarpoq.
Aalajangersakkami aalajangersarneqarpoq, siusinaartumik pensionisiaqartut namminneerlutik pisussaasut nalunaaruteqassallutik inuttut atugarisamigut, soorlu avinnermi katinnermiluunniit, aningaasaqarnermigulluunniit allannguuteqartoqarpat, soorlu isertitatigut qaffariaateqartoqarsimappat. Tamanna aamma atuuppoq, siusinaartumik pensionisiallit kommunit agguataarnerisa avataani aalajangersimasumik najugaqartunut, siusinaartumik pensionisiaqartunullu Inunnut Isumaginninnikkut Isumannaallisaaneq pillugu Nunat Avannarliit malittarisassaat malillugu siusinaartumik pensionisiaqartunut.
Imm. 2-mut
Aalajangersagaq aalajangersakkamut atuuttumut naapertuuppoq, uanili oqaasertaani erseqqissaassuteqartoqarpoq.
Aalajangersakkami ersarissumik naqissuserneqarpoq, siusinaartumik pensionisiaqarsinnaatitaaneq atuukkunnaartartoq, aalajangersakkami piumaqaataasut atuukkunnaarnerini imaluunniit eqqunngitsumik tunngaveqartumik siusinaartumik pensionisiaqartitaalersimagaanni. Aalajangersagaq inunnut ikittuinnarnut, piffissap sivikitsup ingerlareernerani sulisinnaassuseqaleqqittunut attuumassuteqarneruvoq. Aammattaaq aalajangersagaq atuutissaaq akuttusuutigut pisartutigut, soorlu inuk nakorsamit allagartamik peqquserlulluni allanngortitsimaneratigut imaluunniit allatigut paasissutissanik eqqunngitsunik tunniussisoqarsimaneratigut.
Imm. 3-mut
Aalajangersagaq aalajangersakkamut atuuttumut naapertuuppoq, uanili oqaasertaani erseqqissaassuteqartoqarpoq.
Aalajangersakkami kommunit periarfissinneqarput siusinaartumik pensionisianik amerlanaaralutik tunniussisimaneranni siusinaartumik pensionisassat ingerlaavartunit akiligassiisinnaanissamik. Siusinaartumik pensionisianit akiligassiinissamut piumasaqaataavoq, siusinaartumik pensionisialik nammineerluni eqqunngitsumik paasissutissiisimanissaa, imaluunniit siusinaartumik pensionisiassat annertuussusissaanut allannguutaasinnaasunik paasissutissanik isertuussisoqarsimanissaa. Kommuni nammineerluni annertuallaamik siusinaartumik pensionisiassanik tunniussisimaneratigut, siusinaartumik pensionisialimmullu kukkunermut pisuutinneqarsinnaanngippat, utertitsinissamik imaluunnit akiligassiisoqarsinnaanngilaq, tamannali atuutinngilaq erseqqissisinneqarsinnaappat amerlanaaraluni tuniussisoqarsimanera siusinaartumik pensionisiallip ersarissumik ilisimasimagaa.
Assersuutigalugu kommuni kukkulluni kisitsisiliinermini kisitsisit kingullersaanni 0-mik ilasisoorsimappat, taamaalisoqarnerani siusinaartumik pensionisiallip qaammammut tigusassai 65.000 kr.-ninngorsimallutik 6.500 kr.-niusimagaluartut, taamatut pisoqarnerani siusinaartumik pensionisiallip eqqortumik tunineqarsimanissani naatsorsuutigissallugu tunngavissaqanngilaq. Kommuni siusinaartumik pensionisialimmit ilanngaassissalluni imaluunniit amerlanaaraluni tunniunneqarsimasunik utertitseqqusissalluni periarfissaqassaaq. Siusinaartumik pensionisiassallip tigusassaanit ilanngaasiisoqassatillugu imaluunniit utertitseqqusisoqassatillugu piumasaqaataanngilaq siusinaartumik pensionisialik eqqunngitsumik paasissutissanik tunniussisimanerminik tigusaqarsimanerminilluunnit ilisimaarinnissimanersoq uppernarsassallugu. Siusinaartumik pensionisiallip paasissutissanik eqqunngitsumik tunniussisimanera eqqunngitsunik/kukkusumilluunniit paasinnissimaneranik uppernarsaasinnaaneq naammappoq.
Siusinaartumik pensionisianit pisortanit utoqqalinersiassanilluunnit ilanngaasiisoqarsinnaavoq, inuk pineqartoq pisortanit utoqqalinersisalersimappat, sulilu aningaasanik taarsersugassaqarpat. Taamatuttaaq pensionisiassanit inuttullu tapinit ilanngaasiisoqarsinnaavoq. Meeqqanut tapinit ilanngaasiisoqarsinnaanngilaq.
Kommuni siusinaartumik pensionisianit utertitsisoqassatillugu taarsiisoqassasorluunniit aalajangerpat illuatungerisamik tusarniaassuteqartoqarsimassaaq, takuuk suliat ingerlanneqartarnerat pillugu Pisortani sullissineq pillugu inatsisartut inatsisaat aamma aalajangersakkat Kalaallit Nunaanni eqqartuussisaatsimi inatsisitigut pituttukkat, taamaaliornikkut siusinaartumik pensionisiallit penisonisiami sinneri inuussutissaannut naammannissat qulakkeerniarlugu. Pisut tamarmik ataasiakkaarlutik nalilersorneqartassapput, taamaaliornikkut aalajangiiffigineqarsinnaanngorlugu siusinaartumik pensionisiallip pensionisiaminit qanoq annertutigisumik akiliissinaanersoq nalilersorneqartassammat.
Nr. 4-mutAalajangersagaq aalajangersakkamut atuuttumut naapertuuppoq, uanili oqaasertaani erseqqissaassuteqartoqarpoq
Kommuni naliliinini tunngavigalugu siusinaartumik pensionisialik pensionisiassaanik aqutsinissani aalajangiiffigisinnaavaa. Soorlu tamanna pisinnaalluni, pisuni siusinaartumik pensionisiallip aningaasaqarnerminik akisussaassuseqannitsumik aqutsisimaneratigut, soorlu ullormi tigusiffissamini aningaasat tamaasa nungussimappagit, taamaalisoqarnerani siusinaartumik pensionisialik aningaasartuutinut aalajangersimasunut akiliisinnaajunnaarneratigut imaluunniit imminut isumagisinnaajunnaarneratigut, imaluunniit pisuni siusinaartumik pensionisiallip aningaasartuuminik naammaginartumik ingerlatsisinnaajunnartillugu.
Aalajangersakkamili siusinaartumik pensionisiallip nammineerluni siumoortumik tunniussisarneranit allaanerusumik tuniunneqartarnissaanik piumasaqaateqartoqarsinnaaneranik tunngavissinneqanngilaq. Siunertaanngilaq siusinaartumik pensionisiallip pensionisiassami agguarlugit tigorusussappagit piumasaqaateqarnera tunngavigalugu, kommunip siusinaartumik pensionisiassat taamatut aqutsilissasoq. Kommuunili taamatut qinnuteqaateqartoqarpat qinnuteqaammut malitsinissaanut aamma killilersorneqanngilaq.
Nr. 5Aalajangersagaq nutaajuvoq. Aalajangersakkami aalajangersarneqarpoq pensionisiaqartup toquneranut atatillugu aappariinni qimanneqartoq, § 4 naapertorlugu qaammammi toqqukkut qimaguffiusup naanerata kingorna qaammatini marlunni siusinaartumik pensionisiassaanik tigusaqartassasoq.
Aalajangersakkami § 22, imm. 1 ilanngunneqarpoq, qaammammi siusinaartumik pensionisiaqarnissamut piumasaqaatit eqquutsikkunnaarnerisa kingorna pensionisiassat unitsinneqassammata qaammatip tulliuttup naanerani.
Taamaattumik aalajangersagaq atorneqassanngilaq, pisuni toqukkut qimaguttup katissimasaminik inooqateqanngippat imaluunniit inooqateqanngippat.
Toqukkut qimagussimasup katissimasaa il.il. isumaginninnermi ulloq unnuarlu paaqqinnittarfimmut nuuvissimappat, qimagaasoq toqukkut qimagussimasup siusinaarumik pensionianik tigusaqarsinnaanngilaq. Tamanna pissuteqarpoq, inatsisartut peqqussutaanni atuuttumi § 4, imm.2-mi aaliangersarneqarsimammat siusinaartumik pensionisianik pisartagaqartoq kisermaatut siusinaartumik pensionisialimmut naleqqiunneqartarmat, katissimasaa, nalunaarsukkamik inooqatigisaa imaluunniit inooqatigisaa ulloq unnuarlu paaqqinnittarfimmut nuuvissimagaangat.
§ 2-mutPeqqussut 1. juli 2010-mi atuutilersinneqassaaq.