7. maj 2010

UPA 2010/118

 

Uunga siunnersuut: Inatsisartut peqqussutaat nr. Xx.xx 2010-meersoq pisortanit ikiorsiissutit pillugit Inatsisartut peqqussutaata allanngortinneqarnera.
(Illerfiillu angallanneqartarneri kiisalu pisortanit ikiorsiissutinik tunniussisarnermi piumasaqaatit erseqqissaavigineqarneri)

(Isumaginninnermut Naalakkersuisumit saqqummiunneqartoq)

pillugu

Ilaqutariinnermut Ataatsimiititaliap

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Ilaqutariinnermut Ataatsimiititaliap kingullermik suliarinninnermini ukuninnga inuttaqarpoq:

Inatsisartunut ilaasortaq Debora Kleist, Inuit Ataqatigiit
Inatsisartunut ilaasortaq Jane Petersen, Inuit Ataqatigiit
Inatsisartunut ilaasortaq Andreas Uldum, Demokraatit
Inatsisartunut ilaasortaq Ruth Heilmann, Siumut
Inatsisartunut ilaasortaq Knud Kristiansen, Atassut

Siunnersuut aammalu ulloq 15. april 2010 UPA 2010-mi ingerlanneqartumi siunnersuutip siullermeerneqarnerani Ilaqutariinnermut Ataatsimiititaliamit sukumiisumik misissorpaa.

Siunnersuut pillugu

Aalajangiiffigisassatut siunnersuutip UKA 2007/123-p Inatsisartunit UKA 2007-imi akuersissutigineqarnera siunnersuutip saqqummiunneqarneranut tunngavigineqarpoq, pisortanit ikiorsiissutit pillugit maleruaqqusat malillugit illerfinnik angallassinermut aningaasartuutinik matussusiinissamut kommunit periarfissaqarput. Tamatuma kingorna siunnersuut oqaatsitigut erseqqissaassummik imaqarpoq, taanna malillugu inatsimmi § 8, imm. 1-ip danskisut kalaallisullu oqaasertai imminnut naapertuuttunngortinneqarlutik.

Taamaalilluni siunnersuummi matumani pineqartumi pingaarnertut imarisaasoq tassaavoq inatsisiliortut siusinnerusukkut aalajangigaannik atuutsitsilerneq, taamaannerani kissaatigineqarluni pisortanit ikiorsiissutit pillugit maleruaqqusat iluini illerfinnik assartuinermut aningaasartuutinik matussusiinissamut kommunit aningaasatigut killissaareersut iluini periarfissaqarnissaat.

Inatsisartut Inatsisissaannik Nalilersuisarfimmit allakkiaq tunngavigalugu siunnersuutaaqqaartoq saqqummiunneqarpoq aammalu siullermeerinissaq sioqqullugu siunnersuummut iluarsiissummik tunniussisoqarluni.

Siunnersuutip tusarniaassutigineqarnera

Siunnersuut oqartussaasunut susassaqartunut tusarniaassutigineqarpoq. KANUKOKA-mit tusarniaanermut akissutigineqartumi isornartorsiuisunik oqaaseqaaseqaatitaqarpoq. Toqusup najukkaminut utertinneqarnissaanut peqqinnissaqarfik aningaasaqarnikkut akisussaasariaqartoq KANUKOKA-mit oqaatigineqarpoq.     

Siunnersuummik siullermeerinninneq

Siunnersuut ulloq 15. april 2010-mi siullermeerneqarpoq, tamatumani partiit gruppii Inatsisartunullu ilaasortat tamarmik siunnersuummut oqaaseqaateqarnissaminnut periarfissaqarlutik.

Ilaqutariinnermut Ataatsimiititaliamit apeqquteqaat

Siunnersuut pillugu apeqqutinik marlunnik saqqummiussinissaq Ilaqutariinnermut Ataatsimiititaliap pisariaqarsoraa. Tamatumani illerfinnik assartuinermut assigisaannillu peqqinnissaqarfiup inatsisillu allat, isumaqatigiissutit periutsillu iluini qanoq ikiuuttoqarnissaa eqqarsaatigalugu. Apeqqutit akissutillu isumaliutissiissummut matumunnga ilanngussatut ilanngunneqarput.

Ilaqutariinnermut Ataatsimiititaliap oqaaseqaatai

Siunnersuut manna Ilaqutariinnermut Ataatsimiititaliamit ilassilluarneqarpoq. Inatsisartut siusinnerusukkut peqqussutaata 2007-imeersup atorunnaarsinneratigut toqusup qimatai illerfimmik assartuinermut akiliinissaminnut periarfissaqanngitsut inuunerminni atukkamikkut ilungersunartorujussuarmik inissisimatilerneqarput. Tamatumani illerfinnik assartuinermut aningaasartuutinik matussusiinissamut periarfissap tamakkiisumik atorunnaarsinneratigut.

Toqusoq imminut pilersorsinnaanngitsoq aammalu pisortanit ikiorsiissutit pillugit maleruaqqusat atuuttut iluini piginnaatitaasoq illerfimmik assartuinermut aningaasartuutinik matussusiinissamut annikitsuinnarmik periarfissinneqartoq Ilaqutariinnermut Ataatsimiititaliaq isumaqarpoq.

Pisortanit ikiorsiissutit pillugit Inatsisartut peqqussutaanni atuutereersumi § 23, imm. 1-imut atatillugu siunnersuut isigineqassaaq, tamatumani ilisinermi aningaasartuutit naammaginartumik matussuserneqarnissaannut periarfissaqareerluni.  

§ 23. Kommunalbestyrelsi ilisinermut aningaasartuutinut naleqquttunut matussutissanik pisortanit ikiorsiisinnaavoq, aningaasartuutit pigisanit akilerneqarsinnaasimanngippata toqusullu piumasaqaatit § 4-mi imm. 1 naammassisimappagu.

Aammattaaq illerfinnik assartuinissamut periarfissaq pisortanit ikiorsiissutit pillugit maleruaqqusani maleruagassiornissaat Ilaqutariinnermut Ataatsimiititaliamit naleqquttutut isigineqarpoq, taamaalilluni kommunit taamaalillutillu innuttaasut assigiimmik maleruagassiuunneqarlutik.

Toqusoq danskisut innuttaassuseqanngitsoq aammalu Kalaallit Nunaanni aalajangersimasumik najugaqanngitsoq innuttaasullu nalunaarsorsimaffianni allassimanngitsoq maleruaqqusanut ilaatinneqarnissamut periarfissaqanngilaq. Taakku assersuutigalugu tassaasinnaapput angerlarsimaffeqanngitsut aallallu innuttaasut nalunaarsorsimaffianni nalunaarsorneqarsimanngitsut. Siunnersuutip matuma aappassaaneerneqarnissaanut atatillugu Kalaallit Nunaanni angerlarsimaffeqanngitsut innuttaasut nalunaarsorsimaffiannut qanoq nalunaarsorneqartarnersut pillugu nassuiaateqaqqullugu Naalakkersuisunut ilaasortaq qinnuigineqarpoq.   

Siunnersuummi saqqummiunneqartumi sanngeequtaasoq tassaavoq inatsisit allat assigisaat atuuttullu, isumaqatigiissutit periutsillu nassuiaatini nassuiaatigineqanngillat. Tamanna pissutigalugu taakku pillugit Ilaqutariinnermut Ataatsimiititaliaq marlunnik apeqquteqarnissaminut pissutissaqalerpoq.

Maleruaqqusat isumaqatigiissutilluunniit allat illerfinnik assartuinermut tapiissutinik matussusiippata siunnersuummi maleruaqqusat atorneqarsinnaanngitsut Ilaqutariinnermut Ataatsimiititaliamit oqaatigineqassaaq. Tamanna pisortanit ikiorsiissutit pillugit inatsisartut peqqussutaanni § 4, imm. 2-mi aalajangersakkamut atuuttumut naapertuulluni, taanna malillugu pisortanit ikiorsiissutinik tunniussisoqarsinnaavoq, pisariaqartitsineq ikiorsiissutit allat atorlugit pisinnaanngikkaangat.

Inassuteqaat

Oqaatigineqartut tunngavigalugit siunnersuut ilusimisut iluseqartoq akuerineqassasoq ataatsimiititaliamit isumaqatigiittumit inassutigineqarpoq. 

Taama oqaaseqarluni Ilaqutariinnermut Ataatsimiititaliap siunnersuut aappassaaniigassanngortippaa.

 

	Debora Kleist Siulittaasoq
Jane Petersen		Andreas Uldum
Ruth Heilmann		Knud Kristiansen

 

---

Ilanngussaq 1

Ilanngussaq 2