12. april 2010 UPA 2010/118
Peqqussutissatut siunnersuummut oqaaseqaatit
Oqaaseqaatit naliginnaasut1. Aallaqqaasiut
Allannguutissatut siunnersuutip uuma siunertaaraa, § 8, imm. 1-mi aalajangersakkap oqaatsitigut erseqqissarnera kalaallisoornerata qallunaatoorneranut naapertuuttunngornissaa qulakkeerniarlugu.
Uumalu allannguuutitut siunnersuutip siunnertaraattaaq Inatsisartut UKA 2007-mi imm. 123 aaliangingaat malinniarlugu. Taamani allannguinissamut siunnersuuteqarnissaminnut Naalakkersuisut peqquneqaramik § 23-mi Pisortanit ikiorsissutit pillugit Inatsisartut peqqussutaat nr. 15, 20. november 2006-imeertumi, periarfissaqalersillugu illerfiit angallannissaannut aningaasartuutit kommunenit matussusersinnaalerlugit.
2. Aningaasatigut allaffissornikkullu kingunerissasatAllannguutitut siunnersuutip aningaasatigut allaffissornikkulluunniit kinguneqassanngilaq.
Inatsisartut peqqussutaat naapertorlugu pisortanit ikiorsiissutit atorlugit, tamarmik immikkut naliliiffigineqareerlutik, toqusup illerfiata toquffianiit kommunemut angerlarsimaffianut nassiunnera kommuneniit akilerneqartarnikuuvoq, taannalu aalajangersagaq atuunnikuuvoq piffissami 1982-2007-imut. Ullumikkut peqqussutip pisortanit ikiorsiissutit pillugit atuutilerneraniit inatsisitigut tamanna tunngavissaaruppoq. Taamaattorli peqqussummu ullumikkut atuuttumut tunngatillugu aningaasatigut naatsorsuinermi ilaasimanngilaq, tassami kommunet aningaasatigut sipaaruteqarsimagaluarput. Taamaattumik illerfiit angallannerinut aningaasartuutit uunga inatsimmut naatsorsuinermi ilaassanngillat.
Naatsorsuutigineqanngilaq pisortanut allaffissornikkut kinguneqarumaartoq.
3. Inuussutissarsiornermi aningaasaqarnikkut aqutsinermilu kingunerisassatSiunnersuut aningaasaqarnikkut kinguneqarnissaa naatsorsuutigineqanngilaq.
4. Avatangiisitigut pinngortitamilu kingunerisassatSiunnersuut avatangiisitigut pinngortitamullu tunngasutigut kinguneqarnissaa naatsorsuutigineqanngilaq.
5. Innuttaasunut aqutsinikkut kingunerisassatSiunnersuut aqutsinikkut innuttaasunut kinguneqarnissaa naatsorsuutigineqanngilaq
6. Kingunerisassat allat pingaarneritSiunnersuutip allatigut pingaarutilinnut kinguneqarnissaa naatsorsuutigineqanngilaq.
7. Naalagaaffeqatigiinnermut tunngatilluguSiunnersuut Naalagaaffeqatigiinnermut tunngatillugu kinguneqarnissaa naatsorsuutigineqanngilaq.
8. Pisortanik kattuffinnillu il.il tusarniaaneq.Siunnersuut tusarniaatitut ukununnga nassiunneqarnikuuvoq: KANUKOKA, Aningaasaqarnermut Naalakkersuisoqarfik, Peqqissutsimut Naalakkersuisoqarfik, Nunamut namminermut, Pinngortitamut Avatangiisinullu Naalakkersuisoqarfik, Utoqqaat Nipaat, Kommunet naatsorsuuserissarfiat Isumaginninnermullu Naammagittaalliuuteqartarfimmut.
Pisortat kattuffiillu tusarniaanermut uku akissuteqarsimapput:
KANUKOKAOqaatigineqarpoq pineqartoq Kalaallit Nunaanni illoqarfigisami nunaqarfigisamiluunniit kingullermik najugaqarfigisami avataani toqusimappat, toqusullu pigisaasa imaluunniit qanigisaasut aningaasartuutit akilersinnaanngippatigit, taava ajornartorsiut maanna Inatsisartut pisortanit ikiorsiissutit pillugit siunnersuutigisaannit naapertuunnerusumik aaqqinneqartariaqartoq. KANUKOKA isumaqarpoq peqqinnissaqarfik taannaasariaqartoq napparsimasup najukkamut uternissaanut akisussaasussaq. KANUKOKA-p oqaatigivaa ilaqutariit qanigisaminnik annaasaqarnerup saniatigut najukkami ilaqutaasup ilineqarnissaanut annertuumik akiligassinneqarnissaat ataqqininnerunngitsoq. KANUKOKA-p nangilluni oqaatigivaa qanigisaasunut akiliisinnaassuseqanngitsunut toqusoornerup saniatigut ilaqutaasup najukkamini ilisaanissaanut kommunimut qinnuuloortariaqarnissaq suli ajornerusoq,
Oqaatigineqartut tusaatissatut tiguneqarput. Inatsisartulli 2007-mi ukiakkut ataatsimiinnermi aalajangersimavaat, Inatsisartut pisortanit ikiorsiissutit pillugit peqqussutaanut periarfissaliisoqassasoq kommunit illerfiit angallanneqarnerannut aningaasartuutinik matussusiisinnaanngorlugit. Inatsisartut Ilaqutariinnut Ataatsimiisitaliaata isumaliutissiissusiamini oqaatigivaa, illerfiit angallanneqarnerannut kommunit tapersiissutissaat inunnut malittarisassat naapertorlugit pisortanit ikiorserneqarnissamut ikiorserneqarsinnaasunut tunngatinneqassasut. Inatsisartut Ilaqutariinnut Ataatsimiisitaliaata nangilluni oqaatigivaa, pisami sapinngasamik kommunini tamani assigiimmik atugassaqartitsisumik malittarisassiuussisoqassasoq, allannguinerlu nunatta karsianut nanertuutaassanngitsoq.
Utoqqaat NipaatUtoqqaat Nipaata peqqussummut siunnersuut taperserpaa.
Uku oqaaseqaateqanngillat:Aningaasaqarnermut Naalakkersuisoqarfik aamma Isumaginninnermi Naammagittaalliuuteqartarfik
Uku tusarniaatitsinermi akissuteqanngillat:Peqqinnissamut Naalakkersuisoqarfik, Nunamut namminermut, Pinngortitamut Avatangiisinullu Naalakkersuisoqarfik aamma Kommunit kukkunersiuisui
Peqqussutissatut siunnersuummi aalajangersakkanut ataasiakkaanut oqaaseqaatit
§ 1-mutNr. 1-mut
Siusinnerusukkut oqaaseqaatit innersuussutigineqarput.
Nr. 2-mutOqaaseqatigiit ”Pineqartoq Kalaallit Nunaanni………toqusimappat” tassani killiliinerup nassataraa, taamaallaat illerfimmik angerlaallugu angallassineq pisortanit ikiorsiissutigineqarsinnaammat, pineqartoq Kalaallit Nunaanni toqusimappat. Killiliinerup taassuma maani inuttaasoq Kalaallit Nunaata avataani, soorlu Rigshospitalimi katsorsartinnermi nalaani imaluunniit ilinniartuunermi nalaani imaluunniit sulinngiffeqarluni angalanermini toqusimappat illerfiata angallanneqarnerannut pisortanit ikiorneqarsinnaanermut ilaatinneqanngillat.
Aalajangersagaq atorneqartassaaq qanigisat aningaasartuutinik akiliisinnaanngikkaagata, aammalu pigisat naliisa aningaasartuutit matussusersinnaanngikkaagatigit. Oqaatsip ”ilaqutariit” imarai qaniginerpaasat, soorlu katissimasaq / aaliangersimasumik inooqatigisaq, meeqqat, qatanngutit angajoqqaallu.
Aalajangersakkami uani pisortanit ikiorsiissutit inunnut tunniunneqarsinnaapput, pisortatigut ikiorsiissutinik inatsisit malillugit pisinnaasunut, malitsigisaanilli Kalaallit Nunaata avataani najugalinnut tunniunneqarsinnaanatik.
Aalajangersakkap qulakkeerniarpaa eqqartukkami kommuneni tamani assigiimmik pissuseqarnissaq.
Pisortanit ikiorsiissutinut peqqussummi § 19, 1. januar 1984-miit 31. marsi 2007-imut atuuttoq naapertorlugu, ilisinermut naleqquttunik aningaasartuutinik ikiorsiissoqarsinnaavoq pisariaqartitsineq naapertorlugu. Aalajangersagaq taanna tunngavigalugu ilaatigut kommunit toqusup illerfiata uninngavigisaanit najungarivitaanut nassiunneqarnissaanut ikiorsiisarnikuupput.
Nr. 3-mutAalajangersakkami aalajangersaavigineqarpoq illerfiup angallanneqarneranut aningaasartuutaajumaartussat aalajangeruminaatsinneqarsimappata, taamaanneranilu illerfiup angallanneqarneranut ikiorsiisoqarsinnaatillugu, kommunalbestyrelsip ikiorsiissutitut siumoortumik akiliutissamik tunniussisinnaanera. Aningaasanik tigusisup tigusinermini atsiornermigut uppernarsassavaa, ikiorsiissutip utertinniarneqarsinnaanera. Pigisat naligisa nalunaarsornerat naammassineqareerpat aningaasartuutit aaqqivigineqassapput.
Aalajangersagaq ilanngunneqarpoq, ingerlatsinermi allaffiup illerfimmik angerlaallugu angallassinermut pisortanit ikiorsiinissaq aatsaat aaliangiiffigisinnaammagu pigisat naligi qulakkeerneqareerpata. Ilisisoqarnerani ikiorsiisarnermi malittarisassat atuuttut assigai.
Taamatut qulakkeerinninneq tamatigut ilisisoqannginnerani pisinnaasanngilaq. Qulakkeerinneqqaarnissami eqqartuussiviit ilanngutitinneqartariaqassappata (Eqqartuussivimmi imaluunniit Kalaallit Nunaanni Eqqartuussiveqarfimmi toqusimasut pigisaanik agguaassisarnermi) kingusinnerusukkut aatsaat ilisisoqareernerani qulakkeerneqarsinnaasarpoq.
Aaliangersagakkap uuma kommunalbestyrelse piginnaaffilerpaa ilisinermi aamma illerfimmik angallassinermi siumoortumik aningaasartuutinut tunniussisisinnaaneranik.
Til § 2Inatsisartut peqqussutaata 1. juli 2010-mi atuutilernissaa siunnersuutigineqarpoq.