29. april 2010 UPA 2010/96
UPA 2010/97
Pujortarnermik inerteqquteqarneq pillugu Inatsisartut inatsisaat nr. xx, ulloq. qaammat 2010-meersoq
aamma
Tupa avatangiisinillu tupatorfiunngitsunik isumannaarineq kiisalu tupanik nioqqutissat nalunaaqutserneqartarneri pillugit Inatsisartut peqqussutaata allanngortinneqarnera pillugu Inatsisartut peqqussutaat nr. xx, xx qaammat 2010-meersoq.
pillugit
Inatsisartut Peqqissutsimut Ataatsimiititaliaata
ISUMALIUTISSIISSUTAA
Siunnersuutip aappassaaneerneqarnerani saqqummiunneqartoq
Inatsisartut Peqqissutsimut Ataatsimiititaliaat suliarinninnermini kingullertigut ukuninnga
Inatsisartunut ilaasortaq, Olga P. Berthelsen, Inuit Ataqatigiit
Inatsisartunut ilaasortaq, Debora Kleist, Inuit Ataqatigiit
Inatsisartunut ilaasortaq, Jakob Skade, Kattusseqatigiit Partiiat
Inatsisartunut ilaasortaq, Malik Berthelsen, Siumut
Inatsisartunut ilaasortaq, Akitsinnguaq Olsen, Siumut
Siullermeerinerup kingorna Inatsisartut Peqqissutsimut Ataatsimiititaliaata siunnersuutit misissorpai.
Siunnersuutigineqartut siunertarisaat imarisaallu:Innuttaasut peqqissusiannik siuarsaaneq inuillu allat tupatorlutik pujortarnerisa pujuannik najuussuinikkut nammineq piumassuserinngisamik ajoquserneqarsinnaanerup pinaveersaartinneqarnissaa Inatsisartut inatsisissaattut siunnersuutaapput.
Inatsisartut peqqussutissaattut siunnersuutip aallaavigaa qulaani siunnersuutigineqartup Inatsisartut inatsisissaattut siunnersuutiginertup kingunerisaanik aalajangersakkat arlallit peqqussummi pineqartumi nutaatut taarsiullugit Inatsisartut inatsisissaattut atutilissammata.
Pujortartarnermik inerteqquteqarneq pillugu, Inatsisartut inatsisissaattut siunnersuuteqarnerup akuersissutigineqarpata kingunerissavaa 1998-miit – 2004-mut pujortarnerup inerteqqutaanissaa pillugu maleruagassiat arlallit sukaterneqarnerat.
Inatsisartut ukiakkut 2007-mi aamma upernaakkut 2008-mi ataatsimiinneranni inini tamanit najorneqarsinaasunik tupatortarnerup killiliiffigineqarnissaanut siunnersuutit sisamat oqaluuserimmatigit pujortartarnerup ajoqutaasumik sunniutaasa erseqqissumik nassuerutigineqarnerat oqallinnermilu amerlanerussuteqartuni ersersinneqarmat, inatsisartut aalajangiipput inini tamani najorneqarsinnaasuni pujortarneq inerteqqutaalissasoq.
Peqqissutsimut Naalakkersuisup saqqummiinermini Inatsisartut inatsisissatut siunnersuummut nassuiaatigaa, innuttaasut peqqinnissaat pillugu naalagaaffiup ilisimatusarfia nunatsinni innuttaasunik misissuinermik 2005-imiit 2007-mut ingerlatsitsisimasoq, misissuinermi tassani erserpoq anersaartuutitigut puatsigullu tupamut attuumassuteqartunik kræfteqarneq kræfteqartuni nunatsinni atugaanerpaasoq pujortartarnerullu kingunerisaanik aamma allat pujortarnerisigut pujumik najuussuinerup kingunerisaanik toqusartut tamarmiusut amerlassusiisa sisamararterutaasa missaaniittut.
Pujortanermik inerteqquteqarneq pillugu Inatsisartut inatsisaattut siunnersuuteqarnikkut tupatortartut ullumikkut ikiliartornerisa qulaarnaarneqarnissaa, innuttaasut peqqissuunissaata siuarsarneqarnissaa, pujortartanngikkaluarlunilu putsumik najuussisarnermik akornutaalersartut pinaveersaartinneqarnissaat neriuutigineqarpoq.
Inatsisartut suliarinninnerat
Siullermeerinermi Inatsisissatut siunersuutit marluiusut Inatsisartuni partiinit tamanit tapersersorneqarlutik ataatsimiititaliamut ingerlateqqinneqarnissaat innersuussutigaat. Partiit makku ilaatigut kaammatuutigeqqullugit eqqumaffigeqqullugillu saqqummiussaanut ilaapput, sumiiffinni tamani silami arsakoorfinnik inissiisoqarnissaa, maangaannaq eqqaasoqannginnissaa nunamillu eqqiluitsuutitsinissap isumannaarneqarnissaa anguneqassasoq.
Ataatsimiititaliap suliarinninnera
Ataatsimiititaliap tamarmiusup sumiiffinni tamani inuit orniguttarfiini katerisimaartarfiinilu pujortartarnerup inatsisitigut inerteqqutaalernissaa tapersersorpaa. Ataatsimiititaliami pingaartinneqarluni eqqartorneqartunut ilaavoq, piffissami sivisuumi pujortartarnerup Inatsisartuni eqqartorneqareerluni tassungalu atasunik inatsisitigut sukaterisoqareersimanerata kingunerisaanik maanna inuit ornittagaat suliffeqarfiillu 10-t pallillugit sulisoqartuni tamani pujortarfiujunnaarnissaat.
Inatsisip 1. januar 2010 aallarnerfigalugu atuutilertussaagaluarpoq. Tamannalu 1. oktober 2010 kinguartinneqarpoq.
Ataatsimiititaliaq tamarmiusoq isumaqarpoq inuit orniguttarfii suliffeqarfiillu inatsisissap atuutilernissaanut piareersarfissaat naammattoq, taamaalilluni inatsisissap eqqunneqarnissaa kinguarteqqissallugu pissutissaqanngitsoq.
Ataatsimiititaliap tamarmiusup isumaqatigiissutigalugu aalajangiuppaa, unioqqutitsinerit aalajangersakkat inatsisissami pineqartumi allaqqasut aallaavigalugit, sulisitsut sulisuminnut najoqqutassiornissaat iliuusissanillu aallussilluarnerisa kingunerisaanik inatsisip atuutsinneqarnissaata siunertaa malillugu kinguneqarluarumaartoq.
Ataatsimiititaliap erseqqissarumavaa pineqaatissiilluni pillaammik akiliisitsisoqarsinnaaneq unioqqutsisisunut tamatigut pillaammik akiliuteqartitsinissaq inatsisissami siunertarineqanngimmat. Ataatsimititaliap erseqqissarumavaa inatsisinik unioqqutitsisoqartillugu pillaammik akiliisitsilluni pineqaatissiinerit inunnut ataasiakkaanut soorlu unnuisarfinni pujortafigeqqusanngitsuni ilaatigut atuutereermat.
Ataatsimiititaliataliap naatsorsuutigaa inatsisissap atuutilernerani atuisut allatuulli sungiussiniarnissaat tamannalu piffissaq sivisunngitsoq atorlugu piumaartoq.
Naggataatigut ataatsimiitiliap tamarmiusup kissaatigaa pujortartarnerup inerteqqutaalernissaanut inatsisissap inuit peqqinnerulernissaannut annertuumik aqqutissiuusseqataalluni kinguneqarluarumaartoq.
InassuteqaatitUPA 2010 / 96: ” Pujortarnermik inerteqquteqarneq pillugu Inatsisartut inatsisaat nr. xx, ulloq. qaammat 2010-meersoq. “
aamma
UPA 2010 / 97: “ Tupa avatangiisinillu tupatorfiunngitsunik isumannaarineq kiisalu tupanik nioqqutissat nalunaaqutserneqartarneri pillugit Inatsisartut peqqussutaata allanngortinneqarnera pillugu Inatsisartut peqqussutaat nr. xx, xx qaammat 2010-meersoq. “
Peqqissutsimut Ataatsimiititaliap tamanna tunngavigalugu inatsisissatut siunnersuutit akuersissutigineqarnissaat inassutigaat.Taama oqaaseqarluni Peqqissutsimut Ataatsimiititaliap siunnersuutit Inatsisartunut aappassaaniigassanngortippaat.
Olga P. Berthelsen,
Siulittaasoq
Debora Kleist
Jakob Skade
Malik Berthelsen
Akitsinnguaq Olsen