17. april 2010

UPA 2010/18 UKA 2009/34

 

Uunga siunnersuut: Illuliortiternernut aningaasalersuineq pillugu Inatsisartut peqqussutaata allanngortinneqarneranik Inatsisartut peqqussutaat nr. xx. xxxx. 2009-meersoq
(Attartortup inatsisitigut pisinnaatitaasunut attartortitsinerani pisortanit taarsigassarsilluni illuni attartortitsinermi akiliutissap naatsorsornerani najoqqutassat)

(Inatsisartunut ilaasortaq Olga Poulsen Berthelsen, Inuit Ataqatigiit)

pillugu

Attaveqaqatigiinnermut Ineqarnermullu Ataatsimiititaliap

ISUMALIUTISSIISSUTAA

Aalajangiiffigisassatut siunnersuutip aappassaaneerneqarnerani saqqummiunneqartoq

 

Ataatsimiititaliaq kingullermik suliarinninnermini ukuninnga inuttaqarpoq:

Inatsisartunut ilaasortaq Justus Hansen, Demokraatit, siulittaasoq
Inatsisartunut ilaasortaq Olga P. Berthelsen, Inuit Ataqatigiit, siulittaasup tullia
Inatsisartunut ilaasortaq Anders Olsen, Inuit Ataqatigiit
Inatsisartunut ilaasortaq Kim Kielsen, Siumut
Inatsisartunut ilaasortaq Akitsinnguaq Olsen, Siumut

Siullermeerinerup kingorna siunnersuut ataatsimiititaliap peqqissaartumik naliliivigaa makku­ninngalu oqaaseqaateqarniarluni:

Siunnersuutip tunuliaqutaa imarisaalu

Illuliortiternermut aningaasalersuineq pillugu Inatsisartut peqqussutaat naapertorlugu aalaja­ngersarneqarpoq pisortanit taarsigassarsiaasut nutaanik illuliornerni tapiissutigineqartut akilerneqarneqartussaapput taarsigassarsisimasup illu attartortippagu piumasaqaatit Inatsisar­tut inimut attartortitsinermut peqqussutaannut akerliusumik iliuuseqarneranut. Attartornerli pillugu peqqussummi aalajangersagaq taanna taamaallaat atuuppoq attartortut inuinnaappat. Siunnersuuteqartup siunnersuuteqarnermigut kissaatigaa aalajangersagaq taanna aamma atorneqassasoq attartortoq inatsisitigoortumik piginnaatinneqartumut, assersuutigalugu aktiaa­teqarluni ingerlatseqatigiiffimmut imaluunniit oqartussaasunut.

Siunnersuuteqartup kissaatigaa siunnersuutip kingunerisaanik pisortanit tapiiffigineqarluni illuliortitsinermi tapiissutit akileqquneqarnerinik, akiliutigineqartussap naatsorsornerani qum­mut akiliutaasussaq qaangerneqarsimappat, soorlu attartorneq pillugu peqqussummi najoqqu­tarineqartut assigalugit attartortoq inuinnaappat. Tamanna atuutissaaq attartortitsineq attar­torneq pillugu peqqussummi ilaatinneqarnersoq apeqqutaatinnagu, taamaalillunilu aamma atuutissalluni inissiaq inatsisitigoortumik piginnaatinneqartumut attartortinneqarpat.

Tusarniaaneq

Siunnersuutip saqqummiunneqannginnermini pisortanut kattuffinnullu il.il. tusarniaasoqar­simanngimmat aappassaaneerisoqartinnagu pisortanut kattuffinnullu il.il. attuumassuteqar­tunut tusarniaasoqarnissaa siunnersuuteqartup siunnersuutigaa, taamaalilluni tusarniaanermi akissutigineqartut ataatsimiititaliap suliarinninnermini ilanngussinnaaniassammagit.

Tusarniaanermi illuatungeriinnit ineqarnermut akiliutip annertunerpaaffissap naatsorsorneqar­tarneranut ilitsersuut ersarissoq kissaatigineqartoq pingaarnertut sammineqarluni tusarniaaner­mi akissutigineqartumi ilanngussami allassimavoq. Assersuutigalugu allassimavoq ineqar­nermut akiliutip annertunerpaaffissaata naatsorsorneqartarneranut maanna ilitsersuutaasoq ersarissaarneqanngippat attartortitsisut, attartortut taarsigassarsisitsisartullu attartortitsinermi akigititap qanoq annertutigisumik naatsorsorneqarsinnaanersut nalornissutigissagaat. Ineqar­nermut tunngasuni taama nalornisoqarnerata kingunerisaanik akiligassarsisitsisarfiit aningaaseriviillu taarsigassarsisitsisarnerminnik killillersuilersinnaanerat naatsorsuutigineqar­tariaqartoq, tamatumanilu ineqarnikkut maanna pissutsit nutaanillu sanaartornerit annertuumik sunnerneqassapput.

Tusarniaanermi akissuteqaatit itisilertinneqarnissaat siunertaralugu tusarniarneqartut ilaannik Ataatsimiititaliaq ataatsimeeqateqarpoq. Siunnersuutip pineqartup akuersissutigineqarnissaa ajornartorsiutissartaqanngitsutut isigineqarpoq. Piffissami sivikitsuararsuarmi ilimasaaru­teqarluni allaffisornikkut allannguisoqarsinnaanerata ungasinnerusumut isigaluni aningaasa­liinernut ajortumik sunniisinnaanera pissutigalugu nalornisoorsinnaanerup killilernissaa imaluunniit peerneqarnissaa pingaartutut isigineqarpoq. Ataatsimiititaliap tamanna pingaaruteqartutut isigaa ajornartorsiutillu taassuma Naalakkersuisunit iliuuseqarfigene­qarnissaa kaammattuutigissallugu.

Siunnersuutip suliarineqarnera

Siunnersuutip Inatsisartuni siullermeerneqarnerani tamakkiisumik tapersersorneqartoq ataatsi­miititaliap maluginiarpaa. 

Siunnersuut tapersersorneqassasoq Naalakkersuisut siullermeerinninnermi inassutigaat. Ine­qarnermut akiliutinit aningaasartuutit tunngavigalugit aalajangersarneqarsimasunit qaffasinne­rusumik akeqartitsillutik inissianik iluanaarniuteqartartut siunnersuutikkut akornuserneqar­sinnaasut Naalakkersuisut naliliipput. Inissianik iluanaarniuteqartartut inissianik inatsisitigut pisussaatitaallutillu pisinnaatitaasunut qaffasissorujussuarmik akeqartitsillutik attartortitsisin­naanissaannut akornuserneqarpat inissianik pisariaqartitsinermut naleqquttunik sanaartornis­samut siunnersuut qulaajaassasoq Naalakkersuisut isumaqarput. Taamaalilluni utaqqiisaa­sumik inissiigallarnernut ineqarnermut akigititat qaffaseqisut appartinneqarsinnaasut aamma Naalakkersuisut naliliipput.

Apeqqutigineqartut tusarniaanermilu akissutigineqartuni ajornartorsiutit qaqinneqartut ataatsi­miititaliamit Naalakkersuisut qinnuigineqarput. Siunnersuutip ataatsimiititaliamit tapersersor­neqarnissaanut tunngavilersuutigisaanut tusarniaanermi akissutigineqartut allanngortitsin­ngimmata siunnersuut pillugu ataatsimiititaliap isumaqatigiittup oqaatigissavaa. Inatsit 1. jan­uar 2010-mi atuutilersinneqassasoq siunnersuuteqartup siunnersuutigaa. Tamatuma kingune­risaanik atortuulernissaa pillugu aalajangersagaq allanngortinneqartariaqarpoq, taamaanngip­pat inatsit kingumoortumik atortuulissammat. Taamaattumik ataatsimiititaliaq siunnersuum­mut allannguutissatut siunnersuuteqarpoq. Ataatsimiititaliap allannguutissatut siunnersuutaa iusumaliutissiissummut uunga ilanngunneqarpoq.

Tamanna tunngavigalugu allannguutissatut siunnersuut Inatsisartunit akuersissu­tigineqassasoq Ataatsimiititaliap isumaqatigiittup inassutigaa, taamaalilluni siunnersuut ilusimisut isikkoqartoq pingajussaaneerneqarnissaminut ingerlateqqinneqassaaq.

Taama oqaaseqarluni Attaveqaqatigiinnermut Ineqarnermullu Ataatsimiititaliap siunnersuut Inatsisartunut aappassaaniigassanngortippaa.

 

	Justus Hansen, Siulittaasoq Demokraatit
Aqqaluaq B. Egede, Inuit Ataqatigiit		Anders Olsen, Inuit Ataqatigiit
Kim Kielsen, Siumut		Akitsinnguaq Olsen, Siumut