18. august 2009 UKA 2009/34
Inatsisissatut siunnersuummut oqaaseqaatit
Naliginnaasumik oqaaseqaatit
Illuliortiternermut aningaasalersuinermi inatsimmi periarfissarititaasoq 20/20/60 najoqqutaralugu aningaasalersuineq siunertani malillugu ajunngitsumik ingerlanneqarsimavoq, inuppassuarnullu namminerisaminnik illutaarniartuni iluaqusersiisimavoq.
Taammakkaluartoq aaqqissuussineq annikitsunik ajornartorsiutitaqarpoq. Pineqartoq najoqqutaralugu illuliortitsisunit atornerlunneqarsinnaanera tamakkiisumik mattunneqarsinnaasimanngilaq, pisortat tapiineratigut inissianik atartortitsisartut attartortitsinerminni iluanaarniapiluttut illuliornerinut taarsigassarsitinneqartartut, kingornalu akisoorujussuanngorlugit akilersillugit attartortittakkaminnik.
Illuliortiternernut aningaasalersuineq pillugu Inatsisartut peqqussutaanni § 9, imm. 4 malillugu aalajangersagaavoq, tarsigassarsiaasut, naalakkersuisunit kommunalbestyrelsiniillu nutaanik illuliornermi tapiissutigineqartut (taarsigassarsiat erniaqaratillu taarsersugassartaqanngitsut ukiuni 20-ini atuuttut), akilerneqartussaapput, taarsigassarsisimasup illu attartortippagu ”piumasaqaatit, inatsisartut inimut attartortitsinermut peqqussutaannut akerliusumik iliuuseqarneranut”.
Taannalu isumaqarpoq killeqartoq qanoq annertutigisumik attartortitsisoq iluanaaruteqassanersoq. Ajornartorsiullu uaniiginnarpoq, attartorneq pillugu peqqussut taammaallaat attartortoq inuinnaappat.
§ 33, imm. 1 Inatsisartut inimik attartorneq pillugu peqqussutaanni aalajangersagaq imaappoq, nammineq illuutinik attartortitsinermi aki aalajangersarneqassasoq aningaasartuutaasimasut tunngavigalugit, taammaasilluni akiliutigineqartussap aningaasartuutaasut qaangerlugit akiliisitsisoqarsinaannani, ingerlatsinermut aningaasartuutit uppernarsarneqarsinnaasut tunngavigalugit kiisalu ilanngunneqassallutik illup nammineq teknikkikkut naliliinermi nalingata qaffariarnera annerpaamik diskontop qaffariartarnerata affaanik.
Ajornartorsiullu uaniiginnarpoq, attartorneq pillugu peqqussut taanna taammaallaat atuuppoq attartortut inuinnaappata.
Taannalu toqqaannanngikkaluartumik inatsisartut illuliortitsernermut peqqussutaannut § 9, imm. 4-imut sunniuteqassaaq, taarsigassarsisimasup najugaq attartortissinnaammagu annertoorujussuarmik iluanaarutitalimmik, pisortanit erniaqaratillu taarsersugassartaqanngitsunik taarsigassarsiaasa akileqquneqarneranik kinguneqartinneqarnatik, najugaq attartortikkuniuk inatsisitigoortumik piginnaatinneqarsimasumut, soorlu assersuutigalugu suliffeqarfinnut imaluunniit pisortaqarfinnut inissianik amigaateqartunut attartortitsigaangata.
Siunertap 20/20/60 atorlugu illuliortitsernermi siunertarineqanngilaq pisortat tapiissutaat aqqutigalugit inissianik inunnut attartortitsisartut iluanaarniapilunnissaannik. Taammaattumik pisariaqarpoq illuliortitsinermut aningaasalersuinissaq pillugu inatsisartut peqqussutaata allanngortinneqarnissaannik.
Peqqussutissatut siunnersuutip massuma kingunerisussaavaa, pisortanit tapiiffigineqarluni illuliortitsinermi tapiissutit akileqquneqarnerinik, akiliutigineqartussap naatsornerani qummut killigitaasussaq qaangerneqarsimappat, soorlu inimik attartornermi peqqussummi najoqqutarineqartut assigalugit attartortoq inuinnaappat.
Pisortanut aningaasatigut allaffissornikkullu sunniutissaiNaatsorsuutigineqanngilaq siunnersuut pisortanut aningaasatigut allaffissornikkullu sunniuteqarnissaannik. Naatsorsuutigineqarsinnaavorlu, siunnersuutip kinguneranik Nuummi inissianik attartortitsisartut akigititaminnik appaanissaat, tamatumalu kingunerisinnaavaa pisortat sulisuminnut ineqarallartitsisarnerinut aningaasartuutigisartagaasa annikillineqarnerinik. Killormullu aamma pisoqarsinaavoq, tassalu ineqarallartitsinermut akiliutaasartut qaffannerinik, siunnersuutip inissianik sanaartornerup annikillisinneqarnerata kingunerisaannik annertunerusumik ineqarallartitsisarnerni akunnittarfinnik atuisoqarnerulernissaa naatsorsuutigineqarsinnaammat.
Pisortaqarfinnut kattuffinnullu tusarniaanerit.Siunnersuutip saqqummiutinnginnerani pisortanit kattuffinnullu tusarniaasoqarsimanngilaq. Siunnersuutigineqassaarli, naalakkersuisut siunnersuutip aappassaaneerneqannginnerani kissaateqarfigineqassasut, pisortanut kattuffinnullu attuumassuteqartunut il.il. tusarniaanissaannik, taamaasillunilu tusarniaanermi akissutigineqartut ataatsimiititaliap suliassaminut ilanngullugit suliariniassamatigik.
Inatsisissatut siunnersuummut oqaatigiumasat.
§ 1-imutImm. 1-imut
§9, imm. 4, illuliortitsernermi aningaasalersuineq pillugu peqqussummi atuuttumi aalajangersarneqarpoq, pisortanit taarsigassarsiat, nutaanik illuliornermi, akilerneqassasut, taarsigassarsisimasup inigisaq attartortippagu naatsorsueriaatsit ineqarnermut akiliutaasartup aalajangersarneqarnerani, inatsisartut peqqussutaat malinneqarsimanngippat.
Kisiannili tassa attartornermut peqqussut taamaallaat atuuppoq attartortoq inuinnaappat.
Siunnersuutigineqartup kingunerissavaa, § 9 (imm. 1), nr. 4 inimik attartornernut allanut atuutilissaaq, attartortumut inatsisitigut piginnaatitaasimasumut, soorlu A/S-inut pisortaqarfinnulluunniit attartortitsinermi.
Taassalu imaalissaaq, pisortanit taarsigassarsilluni illuliornermi taarsigassarsiaasimasut akilerneqassapput, attartortitsisup inatsisitigut piginnaatinneqartumut, attartortitsisullu akigitinneqartumut sanaartornermut aningaasartuutigisimasani qaangerlugit akiliisitsippat, ingerlatsinermut aningaasartuutit uppernarsarneqarsinnaasut tunngavigalugit kiisalu ilanngunneqassallutik illup nammineq teknikkikkut naliliinermi nalingata qaffariarnera annerpaamik diskontop qaffariartarnerata affaanik.
Tamatumalu assigaa, inuinnarmut attartortitsinermi inatsisitigut illersorneqarsinnasumik inissisimalerneranik.
§ 2-imutAllannguutit ull. 1. januar 2010-mi atortuulissasut siunnersuutigineqarpoq.