7. maj 2010

UPA2010/95

 

Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutaata allanngortinneqarnissaanut Inatsisartut peqqussutaat

 
pillugu

Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliap

ISUMALIUTISSIISSUTAA

Peqqussutip aappassaaneerneqarnissaanut saqqummiunneqartoq

 

Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliaq suliarinninnermini ukuninnga inuttaqarpoq:

Harald Bianco, Inuit Ataqatigiit
Debora Kleist, Inuit Ataqatigiit
Andreas Uldum, Demokraatit
Malik Berthelsen, Siumut
Knud Kristiansen, Atassut

UPA 10-mi ulloq 20. april 2010 siullermeerinnereernerup kingorna Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap siunnersuut misissuataarpaa.

Siunnersuutip imarisaa

Meeqqanut suli atualinngitsunut perorsaanikkut inerikkiartuutasasunik ulluunerani neqerooruteqartarneq pillugu Inatsisartut peqqussutaanni nr. 10 5. december 2008-imeersup ersarissarneqarnissaa siunnersuuteqarnermi pingaarnertut siunertaavoq. Meeqqanut suli atualinngitsunut perorsaanikkut inerikkiartuutaasunik ulluunerani neqeroorutinut akiliuteqartarneq pillugu Namminersorlutik Oqartussat nalunaarutaat nr. 17, 27. november 2009-meersup Inatsisartut peqqussutaanni naammattumik tunngavissinneqanngimmat Ombudsmandip nassuerutiginninnera tunuliaqutaralugu siunnersuut saqqummiunneqarpoq.

Tamatuma kingunerisaanik Inatsimmi tunngavigineqartup ersarissarneqarnissaa Naalakkersuisut pisariaqartutut isigaat. Tamatumunnga atatillugu piginnaatitsinissamut aalajangersakkat allat aammattaaq erserissarneqarnissaat pissusissamisoortutut isigineqarpoq.

Ataatsimiititaliap siunnersuummik suliarinninnera

Siunnersuut partiinit tamanit tapersersorneqartoq Ataatsimiititaliap maliginiarpaa. Siunnersuutip oqaatsinut tunngasortaasa ersarissarneqarnissaat taamaallaat pineqarmat taamaalillunilu Inatsisartut peqqussutaata tunngaviusumik anguniagai kalluarneqanngimmata aammattaaq Ataatsimiititaliap paasivaa.

Inassuteqaat

Qulaani allassimasut siullermeerinninnermilu oqaaseqaatigineqartut tunngavigalugit Ataatsimiititaliap isumaqatigiittup siunnersuut akuersissutigineqassasoq inassutigaa.

Taama oqaaseqaateqarluni Ataatsimiititaliap siunnersuut aappassaaniigassanngortippaa.

 

	Harald Bianco
Debora Kleist		Andreas Uldum
Malik Berthelsen		Knud Kristiansen