2. marts 2010 UPA 2010/92
Peqqussutissatut siunnersuummut oqaaseqaatit
Nalinginnaasumik oqaaseqaatit1. Peqqussutissatut siunnersuutip tunuliaqutaa
Inatsisartut 2010-mut aningaasanut inatsisissamik aalajangiinerminnut atatillugu Radio tv-lu pillugit aalajangiisartunut aningaasaliissutaasartut atorunnaarsinniarlugit aalajangerput. Tamatumunnga atatillugu ukiup 2010-p affaani siullermi aalajangiisartut sulinissaannut aningaasartuutissat kr. 150.000 aningaasaliissutigineqarsimapput, taakkulu 2010-mi ukiup affaa ingerlareerpat atorunnaar-sinneqassapput. Tamatuma kingunerisaanik siunnersuut saqqummiunneqarpoq, siunnersuullu 1. juli 2010 atuutilertussanngorlugu suliarineqarluni. Radiukkut tv-kkullu aallakaatitsisarneq pillugu Ina-tsisartut peqqussutaanni atuuttumi Radio-mi tv-milu aalajangiisartut sulinerannut tunngassuteqartup atorunnaarsillugu aalajangiinerup kingunerisaanik siunnersuut suliarineqarpoq, tassa aalajangii-sartut sulinerannut tunngatillugu aningaasaliissutit qaangiunnerisigut inatsisitigut tunngavigisat atorunnaassallutik.
2. Peqqussutissatut siunnersuummi immikkoortut pingaarneritSiunnersuuteqarnermi pineqarpoq Radio tv-lu pillugit Inatsisartut peqqussutaanni nr. 6 ulloq 14. no-vember 2004-meersumi radiukkut tv-kkullu aallakaatitsinermut tunngasumi kingorna allanngor-tinneqartumi Radio tv-lu pillugit aalajangiisartut pillugit aalajangersakkat atorunnaarsissallugit. Taamaaliornikkut atortutigut inatsisitigut inissisimaneq aningaasaliissuteqarnermullu inatsisit naa-pertuunnissaat qulakkeerneqassaaq.
a) Inatsisitigut aalajangersakkat atuuttut
Inatsisartut peqqussutaanni atuuttumi radiukkut tv-kkullu aallakaatitsinermut tunngasumi takuneqarsinnaavoq Naalakkersuisut Radio tv-lu pillugit aalajangiisartunik pilersitsissasut taakkulu radiumut tv-mullu tunngasunik suliaqartinneqassasut. Radio tv-lu pillugit aalajangiisartut suliaannut tunngasut inatsisitigut maleruagassartaat Inatsisartut peqqussutaanni nr. 6 ulloq 14. november 2004-meersumi radiukkut tv-kkullu aallakaatitsinermut tunngasumi kingorna allanngortinneqartumi aamma Namminersornerullutik Oqartussat nalunaarutaanni nr. 5 ulloq 7. marts 2005-imeersumi Radio tv-lu pillugit aalajangiisartut suleriaasianni allaqqapput. Taakkua saniatigut Namminersor-nerullutik Oqartussat nalunaarutaanni nr. 21 ulloq 30. december 2004-meersumi sumiiffinni assigiinngitsuni radiukkut tv-kkullu assigisaasigullu tapiissuteqartarnermut tunngasumi allaqqavoq Radio tv-lu pillugit aalajangiisartut sumiiffinni assigiinngitsuni tv-qarfiit qinnuteqarnerat naaper-torlugu tv-kkut aallakaatitassiornernut tapiissutinik agguaassisartuusut.
Kiisalu Inatsisartut peqqussutaanni atuuttumi takuneqarsinnaavoq Radio tv-lu pillugit aalajangii-sartut pingaarnertut suliassarigaat sumiiffinni assigiinngitsuni aallakaatitsinissamut akuersissutinik tunniussisarneq, aallakaatitsinissamut akuersissutinik atorunnaarsitsisarneq, nuna tamakkerlugu aal-lakaatitsinissamut akuersissutinik atorunnaarsitsisarnissamut Naalakkersuisunut innersuussisin-naaneq, KNR-ip ukiumoortumik public-service-kontraktimik malinnissimaneq pillugu nalunaa-rutaanik misissuinissaq, taannalu pillugu Naalakkersuisunut oqaaseqaateqarnissaq. Tamakkua saniatigut ussassaarinermut tunngatillugu aningaaliisartunillu aningaasaliiffigisassat tungaatigut suliassat aalajangiiffigisassallugit, KNR-ip kiisalu sineriammi radiukkut tv-kkullu aallakaatitsisarfiit aallakaatitsinissamut akuersissummut atatillugu malittarisassanik malinninnerannik nakkutillii-nermik ingerlatsissalluni, arlaatigullu radiukkut tv-kkullu aallakaatitsisarfiit aallakaatitsinissamut akuersissummut atatillugu malittarisassanik unioqqutitsisoqarpat uparuaassuteqassalluni. Radio tv-lu pillugit aalajangiisartut aammattaaq radiomut tv-mullu tunngasutigut apeqqutini Naalakkersui-sunut siunnersuineq suliarisassavaat, kiisalu radiumut tv-mullu tunngasutigut avataaniit arlaannut attuumassuteqanngitsunik misissuinissat isumagissallugit. Tamakkua saniatigut Naalakkersuisut Radio tv-lu pillugit aalajangiisartut allanik suliakkersinnaavaat, kiisalu aalajangiisartut radiumi tv-milu ussassaarutinut aningaasaliisartunullu tunngasutigut suliassat assigiinngitsut suliarissallugit. Tamakku tassaapput ussassaarisarnermi aningaasaliisarnermilu maleruagassanik unioqqutitsinermut tunngatillugu aalajangiisarnerit.
b) Siunnersuut
Immikkortoq 1-imi aallarniutigalugu oqaatigineqareersoq siunnersuuteqarnermi siunertarineqarpoq
Radio tv-lu pillugit aalajangiisartunut tunngatillugu Inatsisartut peqqussutaanni atuuttumi aalaja-ngersakkat tamarmik atorunnaarsinneqassasut. Tamatuma kingunerissavaa suliniutit allaqartut ato-runnaarnissaat. Tamatumunngalu ilutigitillugu pisariaqartinneqarsimavoq Radio tv-lu pillugit aalajangiisartut pisinnaasaat arlaqartut inatsimmi atuuttumi allaqqasut qitiusumik ingerlatsivimmut nuussallugit. Tamakku soorlu tassaapput sineriammi radioqarfiit tv-qarfiilli radiukkut tv-kkullu aallakaatitsinissamut akuersissutinik tunisisarnerit, tv-qarfiit qinnuteqarnerat naapertorlugu tv-kkut aallakaatitassiornernut tapiissutinik agguaassisartuuneq aamma ussassaarinermut aningaasaliissute-qarnermullu malittarisassatigut unioqqutitsisoqartillugu kinguneqartitsinissami aalajangiisarnerit. Radio tv-lu pillugit aalajangiisartunut attuumassuteqartut malittarisassat atorunnaarsinneqarnerisa kingunerisaanik, ilaalluni Radio tv-lu pillugit aalajangiisartut suliassaannik aalajangersakkanut tunngasoq pisinnaatitsissutitut malittarisassaq nalunaarut nr. 5 7. marst 2005-imeersoq, siunnersuutip atuutilerneratigut nalunaarut kingullertut taaneqartoq atorunnaarsinneqarpoq.
3. Pisortat ingerlatsiviinut aningaasatigut ingerlatsinikkullu kingunerisassatErseqqissaatigineqassaaq siunnersuummik suliaqarneq 2010-mi aningaasanut inatsimmi sipaarniar-nermut suliaqarnermut attuumassuteqarmat. Peqqussutissatut siunnersuut aningaasatigut inatsimmi sipaarniutissatut allaqqasutut annertutigisunik Namminersorlutik Oqartussanut sipaarutaanissaa naatsorsuutigineqarpoq. Kiisalu tamatumunnga atatillugu oqaatigineqassaaq Radio tv-lu pillugit aalajangiisartut inatsisit atuuttut tunngavigalugit suliarisartagaat qitiusumik ingerlatsivimmit tiguneqartussaammata, ullup affaanilu suliaqarfiusumik atorfimmik naleqartussatut naatsorsuutigi-neqarluni. Tassani atorfimmi suliarineqartussat aallakaatitsinissamut akuersissutinik suliaqartarne-rit, aallakaatitassiornermut tapiissutinik ingerlatsisarnerit kiisalu aalajangiisartut suliai allat qitiusu-mik ingerlatsivimmut nuunneqartussaapput. Kommuninut tunngatillugu siunnersuutip aningaasati-gut ingerlatsinikkullu sunniuteqarnissaa naatsorsuutigineqanngilaq.
4. Inuussutissarsiornermi aningaasatigut ingerlatsinikkullu kingunissaiPeqqussutissamut siunnersuutip inuussutissarsiornermi aningaasatigut ingerlatsinikkullu kingune-qarnissaa naatsorsuutigineqanngilaq.
5. Avatangiisinut pinngortitamullu kinguneqarnissaaPeqqussutissamut siunnersuut avatangiisinut pinngortitamullu sunniuteqassanngilaq.
6. Innuttaasunut ingerlatsinikkut kinguneqarnissaaPeqqussutissamut siunnersuutip innuttaasunut aningaasatigut ingerlatsinikkullu kinguneqarnissaa naatsorsuutigineqanngilaq.
7. Naalagaaffeqatigiinnermut aamma Namminersorlutik Oqartussanut attaveqarneqPeqqussutissatut siunnersuutip Naalagaaffeqatigiinnermut tunngatillugu pissutsinut imaluunniit namminersorlutik oqartussaanerup nangittumik atuutsikkiartorneranut sunniuteqarnissaa naatsor-suutigineqanngilaq.
8. Pisortat ingerlatsiviinik kattuffinnillu tusarniaaneqPiffissami 19. januar 2010-miit 16. februar 2010-mut siunnersuut ukunani tusarniaassutigineqarpoq:
Aningaasaqarnermut Naalakkersuisoqarfik
Siulittaasup Qullersaqarfia
Aalisarnermut, Piniarnermut Nunalerinermullu Naalakkersuisoqarfik
Inuussutissarsiornermut Aatsitassarsiornermullu Naalakkersuisoqarfik
Ineqarnermut, Attaveqaatinut Angallannermullu Naalakkersuisoqarfik
Peqqinnissamut Naalakkersuisoqarfik
Isumaginninnermut Naalakkersuisoqarfik
Nunamut Namminermut Naalakkersuisoqarfik
Aatsitassanut Ikummatissanullu Pisortaqarfik
Kalaallit Nunaanni Sulisitsisut(GA)
SIK
KANUKOKA
NUSUKA
IMAK
KNR
STTK
Radio tv-lu pillugit aalajangiisartut
Tusarniaanermut killiliussap qaangiunneratigut tusarsiaavigineqarsimasut makkua akissuteqaataat tiguneqarsimapput:Aatsitassanut Ikummatissanullu Pisortaqarfik, Isumaginninnermut Naalakkersuisoqarfik, Peqqin-nissamut Naalakkersuisoqarfik, IMAK, GA, Radio tv-lu pillugit aalajangiisartut, SIK aamma KANUKOKA, taassumalu tusarniaassummik akissutaa Kommuneqarfik Sermersuumit oqaaseqaa-titaqarluni.
Aatsitassanut Ikummatissanullu Pisortaqarfik, Isumaginninnermut Naalakkersuisoqarfik, Peqqinnis-samut Naalakkersuisoqarfik, IMAK, GA aamma Radio tv-lu pillugit aalajangiisartut nalunaarput siunnersuummut oqaaseqaatissaqaratik.
GA-li kissaateqarpoq attuumassuteqanngitsup ingerlatsiviup KNR-imut aningaasaliissutinik KNR-ip atuinera naliliiffigisariaqaraluaraa. Kiisalu KANUKOKA peqatigalugu Kommuneqarfik Sermer-sooq nalunaaruteqarpoq nuna tamakkerlugu sumiiffinnilu radiomik tv-millu ingerlatsinermi malitta-risassanik maleruaanermi politikkikkut oqartussaasut annersaasumik nakkutilliisuutitaanissaat eq-qarsarnartoqartillugu. Taamatut eqqarsarnartoqartitsineq nalunaarutigineqarpoq tusagassiuutit pitut-torsimannginnissaat naapertuilluassusissaallu eqqarsaatigalugu. Tamarmik nalunaaruteqarput nakkutilliisussaqarnissaq piumaneqartoq allamilli pituttorsimanngitsumit ingerlanneqassasoq.
Tassunga tunngasumik erseqqissarneqassaaq inatsisit ajornartimmassuk qitiusumik aqutsisoqarfiup radiokkut tv-kkullu suliaqarnermi imarisassanut sunniuteqarnissaa, taamaammallu radiukkut tv-kkullu tusagassiuutinik tulluanngitsumik sunniinissaq ilimanassasoq tunngavissaqarsorinanngitsoq. Tassanilu ilaavoq inatsisitigut tunngavigisaq 1. januar 2005 sioqqullugu inatsiseqarneranut uter-saarmat. Taamani soorlu sumiiffinni aallakaatitsisinnaanermut akuersissutit Kultureqarnermut, Ilin-niartitaanermut, Ilisimatusarnermut Ilageeqarnermullu Pisortaqarfimmit tunniunneqartarput, taman-nalu pineqartunik ajornartorsiutinik kinguneqassanani. Tamanna sanilliunneqassaaq piviusumik ina-tsisitigut malittarisassat, soorlu sumiiffinni aallakaatitsisinnaanermut akuersissutit ima naapertuil-luassuseqartinneqartigisarput qitiusumik aqutsisoqarfiup malittarisassatigut ingerlatsineq sunnissal-lugu periarfissaqangaassanani.
GA-p oqaaseqaataanut atatillugu oqaatigineqassaaq KNR-imut aningaasaliissutinik nakkutilliineq ingerlanneqareersuummat KNR-ip naatsorsuutai aqqutigalugit, inatsisillu naapertorlugit taakku Naalakkersuisunit akuerineqartussaapput ilisimatitsissutitullu Inatsisartunut nassiunneqassallutik. Tamatuma saniatigut aamma aningaasaliissutinut nakkutilliineq pissaaq anguniagassanut isumaqati-giissut aqqutigalugu, taannalu tamanut saqqummiunneqassalluni aamma Namminersorlutik Oqar-tussat nalinginnaasumik nakkutilliinerat aqqutigalugu. Kiisalu aamma Radio tv-lu pillugit aalaja-ngiisartunut taartaasussamik nutaamik aqutsisoqarfimmik pilersitsinissaq isumaqangaarnavian-ngilaq, eqqarsaatigissagaanni maanna atuuttut aalajangiisartut atorunnaarsinneqarnissaannik Inatsi-sartut aalajangiinerat.
Radio tv-lu pillugit aalajangiisartut aamma nalunaaruteqarput aalajangiisartut manna tikillugu isu-maqartut aalajangiisartuni ilaasortaasut pisinnaatitaanerat naammattumik iluaqutigineqarsiman-ngitsoq.
Tamakku saniatigut aalajangiisartut oqaatigaat radiukkut tv-kkullu ingerlatsinermi aqutsinissamut periusissanik toqqaasimaneq iluarinartuutinneqarlunilu tulluartuutinneqartoq. Naggasiutitut apeqqutigineqarpoq siunnersuummi § 55a malillugu Naalakkersuisut aalajangiinerannut atatillugu naammagittaalliortarfimmik pituttorsimanngitsumik pilersitsisoqassanersoq. Tassunga atatillugu oqaatigineqassaaq suliassat Radio tv-lu pillugit aalajangiisartunit ingerlanneqartussat qitiusumik aqutsisoqarfimmut kingumut utertinneqassasut, soorlu aamma tunngavissaqanngitsoq suliassaqarfiup taassuma iluani suli annertunerusumik ingerlatsinermik pilersitsisoqarnissaa, soorlu tamanna pillugu GA-p oqaaseqarnera aamma taamaattoq. Saniatigut ersersinneqassaaq qitiusumik aqutsisoqarfik, soorlu Radio tv-lu pillugit aalajangiisartut manna tikillugu taamaassimasut, inatsisinit pisussaaffilerneqassasoq, soorlu sumiiffinni aallakaatitsisinnaanermut akuersissutinik qinnuteqarnernik suliaqarnermut il.il.
Peqqussutissatut siunnersuutip ataasiakkaartuinut tunngatillugu oqaaseqaatit
§ 1-imutImm.1-imut
Allannguutissatut siunnersuutip kingunerissavaa Inatsisartut peqqussutaanni atuuttumi allaqqasut tunngavigalugit Radio tv-lu pillugit aalajangiisartut suliaat aalajangiisinnaanerillu arlaqartut tas-sanngaanniit qitiusumik ingerlatsivimmut nuunneqarnissaat, tassa siunissami Naalakkersuisoqarfiup tamakkununnga akisussaasup suliassat tamakku tigussagai. Tamatumani naalakkersuisoqarfik pineqartoq tassaavoq Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik.
Pisariillisaaneq eqqarsaatigalugu Inatsisartut peqqussutaani atuuttumi aalajangersakkat siunnersuu-teqarnerup sunnigassai soorlu aamma suliassat Naalakkersuisunit tiguneqartussat ima nassuiassal-lugit tulluartinneqarpoq:
1) § 10, imm. 1, 2 aamma 4 kiisalu § 12, imm. 3: Sinerissami aallakaatitsisarfinnut aallakaatitsinis-samut akuersissutinik tunniussinissamik aalajangiisarneq Naalakkersuisunit tiguneqassaaq.
2) § 17: Naalakkersuisut tigussavaat aallakaatitassiornermut tunngatillugu aallakaatitsinissamut akuersissummik pigisaqartup aallakaatitanik aallakaateriikkanik immiussanik tunniussaqarnissaanut pisussaaffiliinernik kiisalu aallakaatitsinissamut akuersissummik pigisaqartoq aallakaatitanik im-miussanik qaammatit pingasut sinnerlugit tigumminninnissamik pisussaaffiliinissamik aalajangii-sinnaatitaaneq.
3) § 19, imm. 1 aamma 2: Sinerissami aallakaatitsisarfiit aallakaatitsinissamut akuersissutit pigisaasa utaqqiisaagallartumik imaluunniit ataavartumik arsaarinnissutigineqartarnissaat pillugu aalajangiisinnaatitaaneq Naalakkersuisut tigussavaat.
4) § 56, imm. 1 aamma 2: Naalakkersuisut radio-kkut tv-kkullu ussassaarisarnermut aningaasaliisar-nermullu malittarisassanik unioqqutitsinernut tunngatillugu kinguneqartitsisinnaanermut aalaja-ngiisinnaatitaaneq tigussavaat.
Imm. 2-mutAllannguutissatut siunnersuut Inatsisartut peqqussutaanni atuuttumi § 19, imm. 3-mut tunngavoq. Allanngortitsinerup kingunerissavaa siunissami Naalakkersuisut malittarisassanik § 19, imm.2-mi taaneqartuni unioqqutitsisoqartillugu nuna tamakkerlugu aallakaatitsinissamut akuersissummik atorunnaarsitsigallarnissamut imaluunniit atorunnaarsitsivinnissamut aalajangiisinnaatitaalissapput.
Imm. 3-mutAllannguutissatut siunnersuutip kingunerissavaa KNR-ip siunissami public-service kontraktimik malinnissimanini pillugu ukiumoortumik nalunaarusiani Radio tv-lu pillugit aalajangiisartunut nas-siuttarunnaassammagu, tassami ukiumoortumik nalunaarusiaq siunissami taamaallaat Naalakkersui-sunut nassiunneqartalissammat.
Imm. 4-mutAllannguutissatut siunnersuuteqarnermut tunngavigineqarpoq Radio tv-lu pillugit aalajangiisartut Inatsisartut peqqussutaanni atuuttumi § 44, imm.1 nr. 5 allaqqasut tunngavigalugit nakkutilliisuu-titaanerat atorunnaarmat, tak. pkt. 6-ip ataani allaqqasut. Tamatuma kingunerisaanik siunnersuuti-gineqarpoq Radio tv-lu pillugit aalajangiisartut KNR-ip kiisalu sineriammi radioqarfiit tv-qarfiillu radiukkut tv-kkullu aallakaatitsisarnermi malittarisassanik maleruaaneranni nakkutilliinermut kii-salu taakkununnga uparuaasinnaatitaanermut pisinnaatitaaffeqarnerat Naalakkersuisunut nuunne-qassasoq.
Kiisalu Inatsisartut Inatsisilerinermik allaffeqarfiata maluginiaqqusimavaa aalajangersakkamik ilan-ngussisoqartariaqartoq § 48-mik atuuttumik atorunnaartussamullu taartaasussamik. Taamaattumik siunnersuutigineqarpoq aalajangersakkami imm. 2-mi Naalakkersuisunut piginnaatitaaneq ilan-ngunneqassasoq Naalakkersuisut nakkutilliinermik suliaqarneranni KNR aallakaatitsisinnaanermillu akuersissuteqartoq nakkutilliinissamut atugassanik paasissutissanik piumasaqarfiginissaannik pigin-naatitsisumik.
Imm. 5-imutAllannguutissatut siunnersuutip kingunerissavaa Naalakkersuisut tunngaviusumik tapiissutit aallakaatitassiornermullu tapiissutit ingerlanneqarnerisa Radio tv-lu pillugit aalajangiisartunut ingerlateqqittarunnaassammatigit. Aalajangiineq sunniuteqassaaq ulluinnarni sulinermi Radio tv-lu pillugit aalajangiisartut sineriammi tv-qarfiit aallakaatitassiornermut tapiissutinik agguaasarnermut ingerlatsinerannut. Aallakaatitassiornermut tapiissutinik suliaqartarneq siunissami Kultureqarner-mut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmit isumagi-neqalissaaq.
Imm. 6-imutAllannguutissatut siunnersuutip kingunerissavaa kapitali 6 Radio tv-lu pillugit aalajangiisartut suli-nerannut tunngavigineqartoq atorunnaassammat. Kapitali 6-imi pisinnaatitaaffiit allattorsimasut arlaqartut Naalakkersuisunut nuunneqarnissaat siunnersuutigineqarpoq. Soorlu ussassaarinermut aningaasaliisartunullu tunngassuteqartut pillugit aalajangiisinnaanerit, maanna § 46-mi naleqqus-sarneqarsimasut. § 46-mi pisinnaatitaaffiit eqqartorneqartut tamatumunnga atatillugu Naalakkersui-sunit tiguneqartussaapput erseqqinnerusumik tak. siunnersuummi imm. 7 matuma ataani, tassa § 55 a-p nutaajusup ilanngunnera. Allannguutissatut siunnersuutip aammattaaq kinguneraa avataani tusarnaartartunik isiginnaartartunillu attuumassuteqanngitsumik misissuisarnerit ingerlanneqar-tarunnaarnissaat, kiisalu assersuutigalugu KNR-ip public servicekontraktimik malinninnera pillugu ukiumoortumik nalunaaruteqarnera pillugu Naalakkersuisunut oqaaseqaateqartarnerup avataaniit misissuinermik ingerlatsiveqassanani.
Kapitel 6-ip atorunnaartinnerata kingunerisaanik inatsisartut peqqussutaanni § 10-mi kapitel 6-imut innersuussut peerneqassaaq.
Imm. 7-imutAalajangersakkap ilanngunnissaa siunnersuutigineqarpoq anguniarlugu Radio tv-lu pillugit aalaja-ngiisartut radiukkut tv-kkullu ussassaaruteqartarnermut aningaasaliisartunullu tunngatillugu male-ruagassanik unioqqutitsisoqartillugu aalajangiisinnaanermut pisinnaatitaaffiisa Naalakkersuisunit ti-guneqarnissaat. Piginnaatitsineq eqqarsaatigalugu aalajangersakkap naligaa Inatsisartut peqqussu-taanni maanna atuuttumi § 46, taannalu atorunnaarsinneqarpoq, tak. qulaani imm. 6.
Imm. 8-mutAalajangersakkap kinguneraa radiukkut tv-kkullu ussassaarutinut aningaasaliissuteqarnermullu tun-ngatillugu maalaarutit siunissami Naalakkersuisunut ingerlatinneqartalissammata, ingerlatitsif-fissarlu tassaalluni Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik, tassa siunnersuut aallaavigalugu maalaarutinik suliaqartussaq.
Imm. 9-mutUani kingunerisassanik allannguineq pineqarpoq. Kapitel 6-ip taamaatinneqarneratigut § 46, imm. 1, nr. 1 aamma 2 innersuussutigineqarsinnaajunnaassapput. Ussassaarutit suunerannik, inissinne-qarnerannik, oqaatsinik annertussutsinillu aalajangiinerit tamatuma kingorna § 55a nr. 1 naapertor-lugu pisassapput, tassa inatsisartut peqqussutaanni § 46, imm. 1, nr. 1-imik taartaasussaq. Taamatut-taaq radiukkut tv-kkullu ussassaarutit imaat pillugit aalajangiinerit pisalissapput § 55a nr. 2 naaper-torlugu, tassaasorlu maanna atuuttumik inatsisartut peqqussutaanni § 46, imm. 1, nr. 2-mik taarsii-sussaq.
Imm. 10-mutUani kingunerisassamik allannguineq pineqarpoq. Tassa kapitel 6 – taamaalillunilu aamma § 48 – atorunnaassammata § 48-mut inatsisartut peqqussutaanni § 59, imm. 1, nr. 7-imiittumut innersuus-sineq peerneqassaaq.
Imm. 11-mut§ 60, imm. 3. pkt 2, tassaasoq pineqartup iluani inatsisinut tunngatillugu ikaarsaariarnermi aalaja-ngersagaasoq Radio tv-lu pillugit aalajangiisartut atorunnaasinneqarnerisa kingunerisaanik atorun-naarsinneqassasoq siunnersuutigineqarpoq. Peqatigisaanillu siunnersuutigineqarpoq Radio tv-lu pil-lugit aalajangiisartut atorunnaarsinneqarnerisa kingunerisaanik inatsisartut peqqussutaanni atuuttu-mi § 64 aammattaaq atorunnaarsinneqassasoq.
Imm. 12-imut aamma 13-imutInatsimmi nr. 473-imi ulloq 12. juni 2009-imeersumi Kalaallit Nunaanni Namminersorlutik Oqar-tussanut tunngasumi § 1-imi aalajangersarneqarpoq inatsisinik atortitsisut tassaasut Naalakkersui-sut, inatsisiliortullu tassaasut Inatsisartut. Aalajangersakkap taassuma allanngortippaa inatsisini aalajangersagaq taamaaqataa nr. 577 ulloq 29. november 1978-imeersoq Kalaallit Nunaanni Nam-minersornerullutik Oqartussat pillugit inatsisaasoq, tassani inatsisinik atortitsisut taaneqarlutik tas-saasut ”Landsstyret”, inatsisiliortullu taaneqarlutik tassaasut ”Landstinget”. Tamatuma kinguneri-saanik siunnersuutigineqarpoq peqqussummi tamakkiisumi allanneqartoq ”Landsstyret” taarserne-qassasoq allanneqalerluni ”Naalakkersuisut” Taamatuttaaq siunnersuutigineqarpoq allanneqartoq ”Hjemmestyre” taarserneqassasoq allanneqalissalluni ”Selvstyre”, tassa maanna namminersornerup eqqunneqareerneranut naapertuuttunngorlugu.
§ 2-mut
Siunnersuutigineqarpoq Inatsisartut peqqussutaat 1. juli 2010 atortuulersinneqassasoq, tamannalu nalinginnaasumik oqaaseqaatini allaqqavoq, Radio tv-lu pillugit aalajangiisartunut aningaasaliissu-tit atorunnaarnerannut ilutigitillugu.
Imm. 2-mut
Aalajangersakkap kingunerissavaa naammagittaalliuutit qinnuteqaatillu, Radio tv-lu pillugit aalaja-ngiisartunut siunnersuutip atuutilernissaa sioqqullugu nassiunneqarsimasut Naalakkersuisunit naammassineqassammata, suliarinniffissarlu tassaalluni Kultureqarnermut, Ilinniartitaanermut, Ilisi-matusarnermut Ilageeqarnermullu Naalakkersuisoqarfik. Aammattaaq suliassat allat Radio tv-lu pil-lugit aalajangiisartunit siunnersuutip atortuulersinneqarnerata nalaani aallartinneqarsimasut taama-tut pineqassapput. Soorlu assersuutigalugu tassaasinnaapput misissuinerit aalajangiisartut nammi-neerlutik sinerissami radioqarfiit TV-qarfiillu radio tv-llu pillugit inatsisini aalajangersakkat malil-lugit ingerlatsinersut pillugit suliaralugit aallartissimasaat.