28. april 2010

UPA 2010/91

 

Isumaginninnermi perorsaasutut ilinniarneq pillugu Inatsisartut peqqussutaata allanngortinnissaa pillugu Inatsisartut inatsisissaattut siunnersuut (Aalajangersimasumik ukioqarnissamik piumasaqaatit atorunnaarsinnerat aamma maalaaruteqarnissamut piffissaliussamik erseqqissaaneq)

pillugu

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap

ISUMALIUTISSIISSUTAA

Peqqussutissatut siunnersuutip aappassaaneerneqarnerani saqqummiunneqartoq

 

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq suliarinninnermini ukuninnga inuttaqarpoq:

Harald Bianco, Inuit Ataqatigiit
Debora Kleist, Inuit Ataqatigiit
Andreas Uldum, Demokraatit
Malik Berthelsen, Siumut
Knud Kristiansen, Atassut

UPA 10-mi ulloq 13. april 2010-mi siullermeerinerup kingorna siunnersuut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap misissorpaa.

Siunnersuutip imarisaa

Siunnersuutikkut siunertarineqarpoq:

1. Ilinniartut 20-t inorlugit ukiullit ilinnialernissamut piumasaqaatinik naammassinnissimagunik isumaginninnermi perorsaasutut ilinniartitaanermik aallartitsinissamut akuerineqarsinnaaqqullugit ilinnialernissamik akuerineqarnissamut 20-nik ukioqarnissamik killiliinerup peerneqarnissaa.

2. Naammagittaalliuutip tunniunneqareerfissaatut killigitinneqartup erseqqissaatiginera, tamanna peqqussummi suliassaqarfimmut atuuttumi allassimanngimmat.

Ataatsimiititaliap siunnersuummik suliarinninnera

Siunnersuut partiinit tamanit taperserneqartoq ataatsimiititaliamit oqaatigineqassaaq. Isumaginninnermi perorsaasutut ilinniarneq pillugu Inatsisartut peqqussutaanni allanik allannguuteqartitsinissaq pisariaqartinneqarnersoq Atassutip kissaateqarneratigut ataatsimiititaliamit misissorneqarpoq. Tassunga atatillugu danskisuuani kapitali 9-mi misiliilluni aaqqissuussinernut tunngasumi naqinnerliugaq iluarseqqullugu Naalakkersuisut ataatsimiititaliamit qinnuigineqarput, tassani allassimalluni:

”§ 24. Landsstyret kan godkende sådanne afvigelser fra denne forordning, som muliggør for føgsordninger”.

Ima allassimasariaqaraluarpoq:

§ 24. Landsstyret kan godkende sådanne afvigelser fra denne forordning, som muliggør for forsøgsordninger”.

Tamatuma saniatigut allannguutissanik allanik saqqummiussinissaq ataatsimiititaliap pissutissaqarsorinngilaa. Inatsisartut peqqussutaani allanik allannguuteqartitsisoqarnissaanik kissaateqarnermik tusarniaanermut akissuteqaatit tiguneqartut imaqannginnerat matumani oqaatigineqassaaq.

Inassuteqaat

Oqaaseqaatit siuliani allassimasut siullermeerinermilu saqqummiunneqartut tunngavigalugit siunnersuut akuersissutigineqassasoq ataatsimiititaliamit isumaqatigiittumit inassutigineqarpoq.

Taama oqaaseqarluni ataatsimiititaliap siunnersuut aappassaaniigassanngortippaa.

 

	Harald Bianco
Debora Kleist		Andreas Uldum
Malik Berthelsen		Knud Kristiansen