2. marts 2010 UPA 2010/91
Peqqussutissatut siunnersuummut oqaaseqaatit
Oqaaseqaatit nalinginnaasut
1. Peqqussummik siunnersuuteqarnermut tunuliaqutaasut
Siunnersuuteqarnermi aallaaviupput malittarisassanut atuuttunut ataasiakkaannguanut atatillugu naapertuutinngitsut paasineqarsimaneranni aaqqiissuteqarusunnermik kissaateqartoqarnera. Tamakku ilaatigut tassaapput ilinniarnermut tassunga qinnuteqartut akuerineqarnissamut periarfissinneqarnissaannut atatillugu aalajangersimasunik ukioqarnissamik piumasaqaat ullutsinnut naleqqukkunnaartutut isigineqartoq. Tamatumunnga tunngavigineqarpoq ullumikkut Kalaallit Nunaanni ilinniagaqarniartut nalinginnaasumik inerisimanerat inuiaqatigiittut ineriartornitsinnut naleqquttuummat. Tamatumunngalu atatillugu maluginiarneqassaaq ilin-niarniakkamut atatillugu tassunga attuumassuteqartumik minnerpaamik ukiumi ataatsimi suli-nikkut misilittagaqarsimanissaq akuerisaanissamut piumasaqaatitut suli atuutsinneqarmat. Tamakkorpiaat pillugit ilinniartussanik akuersisarnermi aalajangersimasumik ukioqarnissamik piumasaqarneq taamaatitinneqarsinnaavoq. Aalajangersimasunik ukioqarnissamik piumasaqarneq ilinniartunngorsinnaagaluartunik pisariaqanngitsumik killilersuinermik kinguneqartartutut isigineqarpoq, tassami peqqussummi allaqqasut ilinniartussatut akuerineqarnissamut periarfissat allat naammaginartutut isigineqarmata. Qanoq ukioqarneq aallaavigalugu ilinniartussatut akuerineqartussanik killilersuinerup atuutitinneqarnissaa ilanngunneqarsima-voq qulakkeerniarlugu ilinniarniarlutik qinnuteqartut inerisimanissaat, tamannalu ullumikkut inuiaqatigiinni pissutsit aallaavigalugit pisariaaruttutut isigineqarpoq.
Taakkua saniatigut siunnersuuteqarnermut ilaapput amigaataasut maalaarnermi piffissaliissutit ilinniartut ilinniarnerminnik unitsitsisimasut ilinniarnerminnik aallartitseqqinniarlutik qinnuteqartut aalajangiiffigineqartarnerannut, ilinniartut ilinniarnerminnit soraarsitaasarnerannut kiisalu alluinissamut aamma semesterimik uteqqiinissamut aalajangiisarnernut tunngassuteqartut.
2. Peqqussutissatut siunnersuummi immikkoortut pingaarnerita) Inatsisitigut aalajangersakkat atuuttut
Inatsisartut peqqussutaat atuuttoq tunngavigalugu ilinniartoq ilinniarnerup aallartinnerani 20-nik ukioqalersimanngitsoq ilinniarnermik aallartitsinissamut akuerineqarnissaminut periarfissaqanngilaq. Tamanna atuuppoq ilinniartoq ilinniarnertuunngorniarfimmi ilinniarnermik assigisaanilluunniit naammassinnissimagaluarpalluunniit aamma minnerpaamik ukiumi ataatsimi ilinniagassamut naleqquttumik sulinikkut misilittagaqaraluarpalluunniit.
Kiisalu takuneqarsinnaavoq ilinniarnermik unitsitsisimasut ilinniakkamik aallartitseqqinnissaasa aalajangiiffigineqarnerannut taamatullu ilinniarnerminnit soraarsitaanermik anisitaanermillu aalajangiiffigineqarsimasut maalaaruteqarsinnaanissamut piffissalerneqarnerat nutarteriffigineqarsimanngitsoq. Soorlu aamma alluinermi semesterimilluunniit uteqqiinermi aalajangiinernut maalaarutinut taamatut aamma amigaataapput. Taamaattumik nalornissutaavoq rektorip aalajangigai, qaammatit arlaqartut imaluunniit ukioq sinnerlugu sioqqullugit Ilinniartitaanermut Siunnersuisoqatigiit tigoreersimasaat, Ilinniartitaanermut Siunnersuisoqatigiit piviusumik suliarissallugit ilumut qanoq annertutigisumik pisussaaffeqarnersut.
b) Siunnersuut
Aalajangersimasunik ukioqarnissamik piumasaqaammik atorunnaarsitsinissaq siunertaralugu allannguutissatut siunnersuutip kingunerisussaavaa siunissami perorsaasutut ilinniarnissamut akuerineqassagaanni gymnasiami assigisaaniluunniit naammassinnissimanissamik piumasaqarnissaq kiisalu minnerpaamik ukiumi ataatsimi tassunga tunngasumik suliaqarsimanissaq.
Tamatuma kingorna ilinniarfimmi akuerineqarnissamut itigartitsinermi ilinniartup ilinniarnerup aallartinnerani 20-nik ukioqalereersimanissaanik piumasaqartarneq tunngavilersuutigissallugu pisariaarutissaaq.
Maalaaruteqarnissamut piffissaliinerit ilanngunneqarnerisa kingunerisussaavaat ilinniartut maalaaruteqarnissamut sapaatipakunneri sisamat qaangiutsinnagit qanoq iliuuseqarnissamut pisussaaffilerneqarnerat. Tamanna ilinniartup ilinniarnerminik unitsitsisimasup aallartitseq-qinnissaanut qinnuteqarneranut tunngatillugu rektorip aalajangiineranut aamma rektorip ilinniartumik ilinniarneranik anisitsineranut tunngatillugu maalaarnernut atuuppoq. Tamanna aamma alluinermut semesterimillu uteqqissinnaanermut attuumasunut rektorip aalajangiineranut maalaarutinut atuuppoq. Taamaalillunilu Ilinniartitaanermut Siunnersuisoqatigiit piffissap aalajangikkap iluani naammagittaalliummut atatillugu pissutsit piviusut tunngavigalugit suliaqarnissamut pisussaaffilerneqarput. Tassa imaappoq maalaarutit piffissaliussamik qaammatinik arlalinnik kingusinaartumik nassiunneqarsimasut pissutsit piviusut tunngavigalugit suliarineqarsinnaanngillat. Siunertaanngilarli pissutissaqartillugu nammineq pisuussuteqarnani piffissaliinernik qaangiitsiarnerit Ilinniartitaanermut Siunnersuisoqatigiinnit qissimigaarneqarnissaannik pinngitsuuititsiniarneq, tamannali aalajangiiffigineqassaaq piffissamik qaangiinernut sivisussuseq pissutaasorlu tunaartaralugu ilaatillugu aalajangiinerup maalaarutinut sunniutissaa. Piffissamik qaangiinerit pissutissaqartinneqartut eqqarsaatigalugit tassaasoritinneqarsinnaapput silap pissusaanit pissuteqartumik maalaarutip kingusinaartumik takkunnera imaluunniit pissutsit allat allakkat ingerlaarnerannik kinguarsaasut. Tamakku saniatigut tassaasinnaapput uppernarsarneqarsinnaasumik ilinniartup piffissami sivisunerusumi maalaarutip piffissamik killiliiffigeqarnera tikillugu napparsimasimanera.
Ilanngullugu erseqqissagaavoq maalaarutit allakkatigut tunniunneqartassammata.
3. Pisortat ingerlatsiviinut aningaasatigut ingerlatsinikkullu kingunerisassatPeqqussutip allanngortinnissaanut siunnersuut Kalaallit Nunaanni Namminersorlutik Oqartussat kommunillu ingerlatsiviinut aningaasatigut ingerlatsinikkullu annertunerusumik kingune-qartussaanngitsutut nalilerneqarpoq. Kisiannili naatsorsuutigisariaqarpoq ilinniarniarlutik qinnuteqartut ataasiakkaat ilinniarfimmut isersinnaalernissaat sukkanerulissasoq, tassa aalaja-ngersimasumik ukioqalereernissamik piumasaqaatip atorunnaarsinnissaa aalajangiiffigineqarpat. Tamatumunnga tunngavigineqarpoq ilinniarneqartussamut tassunga qinnuteqartut ataasiakkaat soorlu assersuutigalugu gymnasiami naammassereersimasut perorsaanermut naleqquttumik minnerpaamik ukiumi ataatsimi sulinermik misilittagaqareersimasut sukkanerusumik ilinniarfimmut isersinnaalissasut, ilinniarnerup aallartinnerani 20-nik ukioqalereersimanissamik piumasaqaat kinguarsaatigeqqaarnagu. Tamatumunngali atatillugu ilanngullugu maluginiarneqartariaqarpoq ilinniartut ilinniakkamut pineqartumut tassunga qinnuteqartussat qassinik amerleriaateqassanersut maannangaaq naatsorsussallugu periarfissaqarsimanngimmat, tamatumunngalu ilanngullugu aammattaaq ilinniartut qassit perorsaanermik ilinniarfimmut, ilinniarfinnut allanut qinnuteqarnissamut taarsiullugu, siunissami qinnuteqarniarlutik toqqaanissamut kajungernerulissanersut maannangaaq nalilersorneqanngimmat. Tamatumunnga tunngavigineqarpoq qinnuteqarniarnermi gymnasiami tassungaluunniit assingusumi naammassereersimanissamik piumasaqaammut atatillugu qinnutigisamut naleqquttumi min-nerpaamik ukiumi ataatsimi sulereersimanissaq suli piumasaqaatigineqarmat, taannalu tunngavigalugu pissutsit piviusut aallaavigalugit ilinniarfimmut pineqartumut qinnuteqartartut annertunerusumik allannguuteqarnissaat naatsorsuutigineqanngilaq. Kisiannili ilinniakkamut pineqartumut akuerineqarnissamut qassinik ukioqalereersimanissamik piumasaqaatip aalajangiisuusarnera matumuuna qaangerneqassaaq.
4. Inuussutissarsiornermi aningaasatigut ingerlatsinikkullu kingunissaiPeqqussutissamut siunnersuut manna inuussutissarsiornermut aningaasatigut ingerlatsinikkullu kinguneqarnissaa naatsorsuutigineqanngilaq.
5. Avatangiisinut pinngortitamullu kinguneqarnissaaPeqqussutissamut siunnersuut manna avatangiisinut pinngortitamullu sunniuteqassanngilaq.
6. Innuttaasunut ingerlatsinikkut kinguneqarnissaaPeqqussutissatut siunnersuutip innuttaasunut aningaasatigut ingerlatsinikkullu kinguneqarnissaa naatsorsuutigineqanngilaq, tassa ilinniartut 18-inik 19-inillu ukiullit gymnasiami assigisaaniluunniit naammassereersimasut ilinniakkamullu naleqquttumi minnerpaamik ukiumi ataatsimi misilittagaqareersimasut ilinniakkanut qinnuteqarnerminni akuerineqarsinnaalernissaat eqqarsaatigissanngikkaanni. Tamatuma saniatigut siunnersuut ilinniartut ilinniarnerminnik unitsitsisimasut aallarteqqinniarlutik qinnuteqartunut tunngatillugu rektorip aalajangiineranut imaluunniit ilinniartup ilinniarfimmiit anisitaaneranut tunngatillugu aalajangiineranut sapaatipakunneri sisamat qaangiutsinnagit maalaarnissamut periarfissinneqarnerat ilanngunneqarpoq.
7. Naalagaaffeqatigiinnermut aamma Namminersorlutik Oqartussanut attaveqarneqPeqqussutissatut siunnersuutip Naalagaaffeqatigiinnermut tunngatillugu pissutsinut imaluunniit namminersorlutik oqartussaanerup nangittumik atuutsikkiartorneranut sunniuteqarnissaa naatsorsuutigineqanngilaq.
8. Pisortat ingerlatsiviinik kattuffinnillu tusarniaaneqPeqqussutissatut siunnersuut piffissami 12. januarimiit 16. februaari 2010-mi makkunani tusarniaassutigineqarpoq:
Perorsaanermik Ilinniarfik
Naalakkersuisut Siulittaasuata Naalakkersuisoqarfia
Ineqarnermut, Attaveqarnermut Angallannermullu Naalakkersuisoqarfik
Aningaasaqarnermut Naalakkersuisoqarfik
Aalisarnermut, Piniarnermut Nunalerinermullu Naalakkersuisoqarfik
Inuussutissarsiornermut Suliffeqarnermullu Naalakkersuisoqarfik
Isumaginninnermut Naalakkersuisoqarfik
Peqqissutsimut Naalakkersuisoqarfik
Nunamut Namminermut, Pinngortitamut Avatangiisinullu Naalakkersuisoqarfik
Aatsitassanut Ikummatissanullu Pisortaqarfik
Kalaallit Nunaanni Sulisitsisut (GA)
ILIK
SIK
PIP
KANUKOKA
KANUNUPE
ASG
NUSUKA
IMAK
KIK (Kalaallit Nunaanni ilinniartut kattuffiat)
Avalak (Qallunaat nunaanni kalaallit ilinniartut kattuffiat)
AK (Atorfillit Kattuffiat)
PK (peqqissaasut)
PPK (terapeutit, ernisussiortut, ergoterapeutit, fysioterapeutit, bioanalytikerit)
SSK (Kalaallit Nunaanni sulinermi aqutsisut)
MIPI – Videnscenter for Børn og Unge
Bedre Børneliv
Mælkebøtten
Nanu Børn
Tusarniaanermut killiliussap qaangiunnerani tusarniaavigineqarsimasut makku akissuteqaataat tiguneqarsimapput:Aalisarnermut, Piniarnermut Nunalerinermullu Naalakkersuisoqarfik, Naalakkersuisut Siulittaasuata Naalakkersuisoqarfia, AK. SIK, IMAK, Peqqissutsimut Naalakkersuisoqarfik, KANUNUPE, Aatsitassanut Ikummatissanullu Pisortaqarfik, PIP aamma GA, siunnersuummut oqaaseqaateqanngitsut. GA-li ilanngussivoq siunnersuut ilalernartillugu, tassa naatsorsuutigineqarsinnaammat sulisussat ilinniagaqartut piukkunnassusillit qassinik ukioqarnerup killiliiffigineqarnera atorunnaarsinneqarpat sivisunerusumik suliffeqarfinniissinnaassammata. Kiisalu tusarniaanermi akissut tiguneqarsimavoq Aningaasaqarnermut Naalakkersuisoqarfimmiit (AN), tassanngaanniillu siunnersuut tapersersorneqarpoq, soorlu aamma AN naliliivoq Namminersorlutik Oqartussanut kommuninulluunniit siunnersuut allaffissornikkut aningaasatigulluunniit kinguneqarnavianngitsoq.
Peqqussutissatut siunnersuutip ataasiakkaartuinut tunngatillugu oqaaseqaatit
§ 1-imutNr.1-imut
Allannguutissatut siunnersuutip kingunerissavaa ilinniartut perorsaanermik ilinniarfimmut qinnuteqartut akuerineqassagunik ilinniarnerup aallartinnerani 20-nik ukioqalereersimanissaannik piumasaqaat pisariaarutissasoq. 20-nik ukioqalereersimanissamik piumasaqaatip atuuttup atorunnaarsinneqarnerata kingunerissavaa ilinniarfimmi ilinniartussatut akuerineqarnissamut piumasaqaatigineqartut tassaalissammata gymnasiami assigisaaniluunniit naammassereersimanissamik piumasaqarneq kiisalu ilinniakkamut naleqquttumi minnerpaamik ukiumi ataatsimi sulereersimanissaq.
Nr. 2-mutTassani allannguuteqartitsinissaq nr. 1-imi allannguuteqartitsinerup kinguneraa. Tamatuma kingunerisaanik qinnuteqartoq allamik ilinniagaqarsimasoq ilinniartussatut akuerineqarsinnaalissammat, tassa ilinniakkamut naleqquttumi minnerpaamik ukiumi ataatsimi sulinermik misilittagaqarnissamik naammassinnissimappat, akuerineqarnissamut misilitsinneq angusiffigisimappagu, ilinniagarlu alla perorsaanermik ilinniarnermut naleqquttumik atuagarsornikkut imaqarsimappat.
Nr. 3-mutAllannguutissatut siunnersuutip kingunerissavaa sapaatip-akunnerinik sisamanik piffissamik killiligaasumik maalaarsinnaatitaaneq, aalajangiinerup ullulerneraniit naatsorsorlugu. Tamatuma kingorna ilinniartoq maalaaruteqarusuttoq alluinermik imaluunniit semesterimik uteqqiinermik periarfissamik rektorip aalajangernera pillugu kingusinnerpaamik sapaatip-akunneri sisamat rektorip aalajangiussaata ullulerneraniit Ilinniartitaanermut Siunnersuisoqatigiinnut maalaarutini tunniutissavaa.
Immikkorluinnaq pisoqartillugu Ilinniartitaanermut Siunnersuisoqatigiit piffissamik qaangiisinnaanermut periarfissaat pillugu innersuussutigineqarpoq siunnersuutip nalinginnaasumik oqaaseqaatitaanni immikkoortoq 2b.
Nr. 4-mutAllannguutissatut siunnersuutip kingunerissavaa sapaatip-akunnerinik sisamanik piffissamik killiligaasumik maalaarsinnaatitaaneq, aalajangiinerup ullulerneraniit naatsorsorlugu. Tamatuma kingorna ilinniartoq maalaaruteqarusuttoq ilinniarnermik unitsitsisimalluni ilinnialeqqinnissamik rektorip aalajangernera pillugu kingusinnerpaamik sapaatip-akunneri sisamat rektorip aalajangiussaata ullulerneraniit Ilinniartitaanermut Siunnersuisoqatigiinnut maalaarutini tunniutissavaa.
Immikkorluinnaq pisoqartillugu Ilinniartitaanermut Siunnersuisoqatigiit piffissamik qaangiisinnaanermut periarfissaat pillugu innersuussutigineqarpoq siunnersuutip nalinginnaasumik oqaaseqaatitaanni immikkoortoq 2b.
Nr. 5-mutAllannguutissatut siunnersuutip kingunerissavaa sapaatip-akunnerinik sisamanik piffissamik killiligaasumik maalaarsinnaatitaaneq, aalajangiinerup ullulerneraniit naatsorsorlugu.
Tamatuma kingorna ilinniartoq maalaaruteqarusuttoq ilinniarnerminit soraarsitaasimalluni rektorip aalajangernera pillugu kingusinnerpaamik sapaatip-akunneri sisamat rektorip aalajangiussaata ullulerneraniit Ilinniartitaanermut Siunnersuisoqatigiinnut maalaarutini tunniutissavaa.
Immikkorluinnaq pisoqartillugu Ilinniartitaanermut Siunnersuisoqatigiit piffissamik qaangii-sinnaanermut periarfissaat pillugu innersuussutigineqarpoq siunnersuutip nalinginnaasumik oqaaseqaatitaanni immikkoortoq 2b.
Nr. 6-mutKalaallit Nunaanni Namminersorlutik Oqartussat pillugit inatsimmi nr. 473-imi 12. juni 2009-meersumi § 1-imi aalajangersagaavoq inatsisinik atortitsineq Naalakkersuisuniittoq. Aalajangersakkap allanngortippaa Kalaallit Nunaanni Namminersornerullutik oqartussat pillugit inatsimmi nr. 577-imi 29. november 1978-imeersumi inatsisikkut atorunnaarsinneqartumi aalajangersagaq assinga, inatsimmilu tassani § 1-imi, imm. 2-mi aalajangersarneqarsimavoq ingerlatsineq naalakkersuisuniittoq. Tamatuma nassatarisaanik siunnersuutigineqarpoq aalajangersakkap qallunaatuuani tamakkiisumi ”landsstyret” allanngortinneqassasoq imaalillugu ”Naalakkersuisut”.
§ 2-mutSiunnersuutigineqassaaq Inatsisartut peqqussutaat 1. august 2010 atortuulersinneqalissasoq.