Kommunit akileraartarnermut tunngasut pillugit innuttaasunik kiffartuussinerat pillugu Namminersorlutik Oqartussat nalunaarutaat nr. 23, 20. december 2010-meersoq

Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi § 8 naapertorlugu aalajangersarneqarput:

 

Suliassat

§ 1. Innuttaasut suliffeqarfiillu ornigullutik akileraartarnermut tunngasut suulluunniit pillugit saaffiginninneranni kommunip suliassat paasissutissiinermut tunngasut isumagissavai. Kommunip akileraartarnermut tunngasut pillugit immersugassat, paasissutissiissutit allallu tunniutissavai, atortussallu kissaatigineqartut akileraaruseriffiup nittartagaaniittut pissarsiariniarneranni innuttaasut suliffeqarfiillu ikiussallugit.
Imm. 2. Akileraaruseriffiup nunap immikkoortuani allaffia, kommunimi innuttaasut suliffeqarfiillu attuumassuteqarfigisaat kommunip suleqatigissavaa tassungalu saaffiginneqqusisarluni. Kommunip innuttaasut suliffeqarfiillu kommuninit allaneersut saaffiginnissappata ikiussavai.

Apeqquteqaatinik il.il. ingerlatitseqqiineq

§ 2. Akileraartarnermut tunngasut § 1-imi taaneqartunut ilaanngitsut pillugit saaffiginnissutit kommunip akileraaruseriffimmut ingerlateqqissavai.

Akileraaruseriffimmik suleqateqarneq

§ 3. Immersugassat, paasissutissiissutit allallu elektroniskiusumik pissarsiarineqarsinnaanngitsut akileraaruseriffiup kommunimut atugassiissutigissavai.

Aningaasartai

§ 4. Immersugassat, paasissutissiissutit allallu naqiterneqarnerannut kommunimullu nassiunneqarnerannut aningaasartuutit akileraaruseriffiup akilissavai.

Atortuulerfia

§ 5. Nalunaarut ulloq 1. januar 2011-mi atortuulissaaq.
Imm. 2. Tamatumunnga peqatigitillugu atorunnaarsinneqarpoq Akileraartarnermut suliaqarnermut atatillugu kommunit innuttaasunut kiffartuussinerat pillugu nalunaarut nr. 22, 2. november 2006-imeersoq.

Namminersorlutik Oqartussat, ulloq 20. december 2010

Palle Christiansen

/

Jan H. Lynge-Pedersen